JESUS kwa pumbire asi pomazuva gopouhura varongwa vendi ngava lihameka mo unene mokuzuvhisa. (Mat. 9:37; 24:14) Tu tareni omu nonkango odo da sikilira mo momukunda gwaTranscarpathia moUkraine. Monodoropa ntatu domomukunda ogo kwa kara mo nombungakriste 50 ano vazuvhisi wokupitakana po-5 400. * Monodoropa odo kwa kara mo Nombangi dononzi.

Ngapi omu va kara vantu vamo? Munazinyetu Vasile kwa tanta asi: “Awo kwa fumadeka Bibeli, kwa hara kurugana uwa, kwa hara unene vekoro ntani kulivatera-vatera.” Age kwa tanta hena asi: “Poyiruwo yimwe, kapi ava kwatesa ko eyi twa pura. Nye nsene o va likida moBibeli tava purakene nawa.”

Vanavazinyetu kuligwanekera nomaudigu pokuzuvhisira monomukunda omu mwa kara Nombangi dononzi. Pasihonena, mombungakriste zimwe kwa kara mo vazuvhisi 134 nye momukunda ogu ava zuvhisire kwa kara mo tupu mambo 50. Yisinke ava rugana vanavazinyetu owo?

Vanavazinyetu wovanzi kulitura mo mokukazuvhisira oku vana hepa vazuvhisi. Munazinyetu gomugara Ionash gonomvhura 90 kwa tanta asi: “Momukunda gwetu kwa kara mo Nombangi dononzi. Ame ngani zi ure wonokilometa 160 ni ka zuvhisire Vahungarian komukunda oku ava dili kuzuvhisira unene, nye kutunda apa na tameka kuvera-vera ame kuzuvhisira tupu momukunda gwetu.” Vazuvhisi va hepa kulizambera mokukavatera konomukunda dapeke. Age kwa tanta hena asi: “Ngani pinduka po 4:00 ngurangura nokukazuvhisa dogoro po 6:00 kongurova apa ali ka tengura ehina lyorutenda. Ngani yirugana oyo ruvali ndi rutatu mosivike.” Ngapi a lizuvhu Ionash kweyi ga rugana? Age kwa tanta asi: “Ayo kwa hafesa nge morwa na gwene mpito mokuvatera epata limwe li ya lironge Bibeli.”

Kapisi navenye womonombungakriste domomukunda ogo ava vhuru kuza va ka zuvhisire komavango gokoure, nye navenye kukwatera mo vakurupe kuhetekera ko kumana kuzuvhisira monomukunda dawo. Mo-2017 sivaro sovantu ava va kere pomurarero monodoropa odo ntatu kwa ka sikire koukahe wosivaro sovantu womonodoropa odo. Yipo nye, yi kare asi kupi tuna kuzuvhisira twa hepa kukara “nomupampi moyirugana yaHompa.”—1 Kol. 15:58.