MOKUMONA asi ose kuna kuparuka mouzuni womaudigu, twa hepa kukondja yipo tu gwane mbili. Nye nampili ngomu twa kara nombili, poyiruwo yimwe kutudigopera kukara nazo. Yisinke za uyunga ko Bibeli kuhamena eyi nayi tu vatera tu gwane mbili zene-zene? Ngapi natu vatera wopeke nawo va zi gwane?

Ose kuvhura kukara nombili zene-zene nsene tu kara mepopero ntani nsene tu kara tuna litura. Ntani twa hepa kutunga po ukaume wounene novakwetu. Nye unene po mokugwana mbili zene-zene twa hepa kutunga po ukaume wounene naJehova. Ngapi natu yi rugana?

Apa atu limburukwa nompango daJehova, ose kulikida asi twa mu huguvara ntani tuna hara kukara nelikwatakano lyewa kumwe nendi. (Jer. 17:7, 8; Jak. 2:22, 23) Ano ngoyitundwamo age kutuhedera pepi nokutupa mbili zomomutjima. Jesaya 32:17 kwa tanta asi: “Morwa navenye ngava rugana youhunga, makura ngamu kara mpora negameno dogoro narunye.” Nsene tu limburukwa Jehova kutundilira komutjima ngatu gwana mbili zomomutjima.—Jes. 48:18, 19.

Mpepo zokupongoka nazo kutuvatera tu kare nombili zene-zene.—Yirug. 9:31.

Mbili kuna kara sikara sautatu esi ga tumbwire mupositoli Paurusa ‘ngoyiyimwa yompepo.’ (Gar. 5:22, 23) Mokumona asi mpepo zokupongoka yizo azi retesa po mbili zene-zene, twa hepa kuzihundira yipo tu kare nombili zene-zene. Ngesi tatu ka konakona nonkedi mbali omu mpepo zokupongoka nazi tu vatera tu kare nombili.

Zokuhova, nsene tu resa Bibeli nkenye ezuva ose ngatu kara nombili. (Epis. 1:2, 3) Ngomu tuna kuteda ko kweyi atu resa, mpepo  zokupongoka ngazi tu vatera tu kwate egano omu Jehova a tara yininke. Pasihonena, ose kudimburura eyi ayi mu tumangeda a kare nombili ntani neyi mbili za karera nomulyo kwendi. Apa atu tura pasirugana magano nagenye ogo gomoNonkango daKarunga, ose kuyagwana mbili zene-zene meparu.—Yis. 3:1, 2.

Zauvali, twa hepa kuhundira mpepo zokupongoka. (Ruk. 11:13) Jehova kwa tumbwidira asi nsene tu pura evatero kwendi ‘mbili zaKarunga, ezi za pitakana unene nondunge nadinye, ngazi kungira nomwenyo detu nomagazaro getu mwaJesus Kristusa.’ (Fil. 4:6, 7) Nsene tu hundira nkenye apa mpepo zokupongoka, Karunga nga tu pa mbili zomomutjima ezi ava gwana tupu ava va kara nelikwatakano nendi.—Rom. 15:13.

Bibeli kwa vatera vantu wovanzi va rundurure maparu gawo.

Vantu ava va kere ‘wokuhanduka usimbu’ ngesi awo kuna kara vantu wonkenda nombili ntani awo kuruganena kumwe novakwawo mombungakriste. * (Yis. 29:22) Mokupameka usili wononkango odo, tara vazuvhisi vavali ava va gwene evatero mokuyafunda po ehandu nokutunga po mbili novakwawo.

David kwa kere nonkareso zondona. Komeho aya kare gumwe goNombangi daJehova age kwa kere nonyanya ntani nga tuku vemepata lyawo. Konyima zosiruwo, ga ya dimbwilire asi ga hepere kutura po marunduruko. Ngapi omu ga ya lirongere kukara nombili? Age kwa tanta asi: “Ame kwa tamekere kutura pasirugana nompango domoBibeli, ngoyitundwamo na ya kere nombili kumwe nepata lyange.”

Ntundiliro zaRachel kwa kundamene nkareso zendi. Age kwa tanta asi: “Nampili ngesi ame simpe kukondja ni dire kuhanduka usimbu morwa kwa rerera nge mepata lyokuhandauka usimbu. Yisinke ya mu vatera aya kare nombili? Age kwa tanta asi: “Kukanderera kwaJehova.”

 David naRachel kuna kara tupu yihonena yivali eyi ayi likida asi ose kuvhura kukara nombili nsene tu tura pasirugana nompango domoBibeli nokuhundira Karunga a tu pe mpepo zendi zi tu vatere. Eyi kulikida asi nampili mouzuni ou wonyanya ose kuvhura kukara nombili zene-zene ezi azi tu ninkisa tu kare mouumwe nomapata getu ntani noVakriste vakwetu. Nye Jehova kutukorangeda hena tu ‘kare nombili kovantu navenye.’ (Rom. 12:18) Kuvhura yi horoke ngoso ndi? Mauwa musinke atu gwanene mo apa atu tulisa po mbili?

Kupitira mosirugana sokuzuvhisa ose kuzigida vantu va gwanene mo mauwa mombudi zoUhompa waKarunga. (Jes. 9:6, 7; Mat. 24:14) Vantu wovanzi kwa tambura mbudi zetu. Ngoyitundwamo, awo kapi ayi va handukisa kweyi ayi horoka mouzuni ou. Awo ngesi vana kara nehuguvaro lyokomeho ntani ayo kuvatumangeda va ‘tokomene po mpora noku zi kondjera.’—Epis. 34:14.

Nye kapisi vantu navenye ava tambura mbudi zetu. (Joh. 3:19) Nampili ngoso mpepo zokupongoka kutuvatera tu zuvhise mbudi zongwa monkedi zongwa zombili ntani zefumadeko. Monkedi zangesi ose kukwama evyukiso lyaJesus kuhamena sirugana sokuzuvhisa eli va tumbura mwaMateusa 10:11-13 asi: “Muna kuza ponzugo, tanko tomu gava mbili. Nsenesi nzugo ozo ngwa, mpora zeni tazi zi wizire. Ano nsenesi kapi za kara yoyiwa, mpora zeni tazi mu tengwire nyamweni.” Apa atu kwama epukururo olyo ose kukara nombili ntani ayo kuvhura kuvatera muntu ogo nga ture po marunduruko komeho.

Ose hena kuretesa po mbili apa atu uyunga nefumadeko nava ava rugana mepangero, kukwatera mo ava ava tu rwanesa. Pasihonena, sirongo simwe somoAfrika kwa retesere po elitondororo yipo tu dire kugwana epulisiro lyokutunga Yinyanga yoUhompa. Mokukohonona po udigu owo, munazinyetu ogu ga kere nare mutumwa mosirongo oso yipo va mu tumine a ka uyunge nomukareli po gosirongo oso moLondon moIngiranda. Age ga hepere ku ka tantera vemepangero olyo kuhamena yirugana yoyiwa yoNombangi daJehova mosirongo oso saAfrika. Yitundwamo musinke ya kere?

Age kwa tanta asi: “Apa na ka sikire pokutambwira vagenda na dimbwilire asi mutambuli vagenda gwina kwa kere gorudi rweraka eli na lirongere. Makura tani mu morora meraka lyamwene. Nye ya tetukisire nge apa ga pulire nge asi: ‘Konda musinke muna wizire?’ Tani mu tantere monkedi zougomoki asi: “Nina hara kuzogera nomukareli po gosirongo. Mukadi gwina yipo ga toonene ngodi mugara gumwe ogu ga wizire nokuyamorora nge meraka lyorudi rwawo. Konyima zoyo, age kwa purakenene nawa ngomu na mu tanterere yirugana yoyiwa yoNombangi.”

Monkedi ezi munazinyetu ga uyungisire mugara gwina ya vaterere mukareli po gosirongo oso a kwate egano ukaro wosirugana setu esi va silikire. Konyima zosiruwo, epangero lyosirongo oso saAfrika lya ya pulisilire kutunga Yinyanga yoUhompa. Vanavazinyetu kwa va hafesere apa va zuvhire mbudi ozo. Yosili, kutekura wopeke nefumadeko kureta yitundwamo yoyiwa, kukwatera mo mbili.

Naina, Nombangi daJehova kuhafera nkarapamwe zongwa, omu mwa kara uumwe nombili. Nsene o tunga po sikara esi sombili nove kuvhura o kwatese ko nkarapamwe ezi zongwa. Nye unene po ngo hafesa Jehova ntani ngo ka hafera mbili zene-zene mouzuni woupe.—2 Pet. 3:13, 14.