SIRONGWA SELIRONGO 19
Omu vakuronambunga nava likida eharo nouhungami kwava va tekura momudona
“Yeeyi ove kapisi nyove Karunga ogu wa hara udinikarunga; nomudona kapi a kara poge.”—EPIS. 5:4.
RUSUMO 142 Kwaterera kehuguvaro lyetu
ETWAROMO *
1-3. (a) Kuliza nEpisarome 5:4-6, ngapi omu Jehova a lizuvhu kuhamena yirugana yoyidona? (b) Morwasinke kutekura vanona momudona ayi lirwanesere ‘noveta zaKristusa?’
KARUNGA JEHOVA kwa nyenga yirugana nayinye yoyidona. (Resa Episarome 5:4-6.) Unene po age kwayi nyenga apa vantu ava kwatere vanona kononkondo. NgoNombangi daJehova, ose kuhonena Jehova. Nose kwayi nyenga apa vanona ava va kwatere kononkondo, ntani nsene tuna dimburura udona owo mombungakriste, ose kurugana ko yuma.—Rom. 12:9; Heb. 12:15, 16.
2 Kukwatera vanona kononkondo kulirwanesa ‘noveta zaKristusa.’ (Gar. 6:2) Morwasinke tuna kuuyungira ngoso? Ngomu katu yi lirongere mosirongwa sina ka pita, veta zaKristusa kwa kwatera mo nayinye eyi nga rongo Jesus kupitira mononkango nomosihonena sendi, ayo kwa yi tatekerere keharo nouhungami. Vakurona kusikisa mo veta ozo, apa ava tekura vanona monkedi ezi nazi va ninkisa va lizuvhe epopero ntani va lizuvhe asi vakurona vawo kwa va hara. Kuhepeka vanona kuna kara sininke sosidona. Ayo kuninkisa vanona va lizuvhe asi kwato ogu ana kuvapopera ntani asi kwato ogu ga va hara.
3 Mouzuni ou, nkareso zokukwatera vanona kononkondo zina vhuka unene, nye ehudi Vakriste vamwe nawo kwava kundama nkareso ezi zondona. Morwasinke? ‘Vadinikarunganovakumbageli vana vhukaʼ ano vamwe kuhetekera ko kuwiza mombungakriste. (2 Tim. 3:13) Ehudi, vamwe ava ava karere Jehova kwa kwatera vanona kononkondo. Tu zeni tu ka zogere eyi ya karera nzo zonene nsene tu tekura vanona momudona. Ntani tatu ka zogera eyi vakuronambunga nava rugana nsene gumwe gomombungakriste ana kwatere munona kononkondo. Tatu ka zogera hena omu vakurona nava popera vana vawo. *
NZO ZONENE
4-5. Morwasinke kukwatera vanona kononkondo ya karera nzo kogu vana kwatere kononkondo?
4 Kukwatera vanona kononkondo kukundama vantu momudona siruwo sosire. Ayo kukoresa muntu ogu vana kwatere kononkondo nekoro lyendi ntani vapuli vakwawo. Kukwatera vanona kononkondo kuna kara nzo zonene.
5 Nsene o kwatera munona kononkondo, ove kuna kuzonena mukweni. * Ayo nzo nsene tu koresa vakwetu. Ngomu natu ka yi zogera mosirongwa sokukwama ko, muntu ogu a kwatere munona kononkondo, age kumukoresa mononkedi dokulisiga-siga. Ayo kuninkisa munona a dire kuhuguvara muntu ogo, ntani nokulizuvha asi kapi ana kara mepopero. Twa hepa kupopera vanona kosininke oso sosidona unene ntani twa hepa kuhengagwida nokuvatera vanona ava va kwatera kononkondo.—1 Tes. 5:14.
6-7. Morwasinke kukwatera vanona kononkondo ya karera nzo kombungakriste ntani kepangero?
6 Kukwatera vanona kononkondo, kuna kara nzo kombungakriste. Nsene munazinyetu ana kwatere munona kononkondo, age kuswaukisa mbungakriste. (Mat. 5:16; 1 Pet. 2:12) Ayo kuswaukisa mamiliyona govanavazinyetu ava vana ‘kukondja’ mokuparuka monkedi ezi azi yererepeke Jehova. (Juda 3) Ose kapi atu pulisire vantu ava ava rugana yoyidona ndi ava ava swaukisa mbungakriste va kare mombungakriste nsene kapi vana kulitezurura.
7 Kukwatera vanona kononkondo, kuna kara nzo kepangero. Vakriste va hepa kulimburukwa ‘kepangero eli ali va pangere.’ (Rom. 13:1) Ose kulikida ulimburukwi kepangero apa atu sikisa mo noveta depangero. Nsene gumwe gomombungakriste a teza veta zosirongo, pasihonena nsene a kwatera munona kononkondo, age ngoso ana zono kepangero. (Hetakanesa Yirugana. 25:8.) Vakuronambunga kapi va kara nononkondo dokutengeka vantu ava ava teza po noveta dosirongo. Nye nampili ngoso, kapi ava popere ogu ana kwatere munona kononkondo asi li dire kumutengeka epangero. (Rom. 13:4) Muntu ogu a zono nga zangura yitundwamo yendi.—Gar. 6:7.
8. Ngapi ayi tara Jehova nsene muntu a zonena mukwawo?
8 Kukwatera vanona kononkondo, kuna kara nzo zonene kwaKarunga. (Epis. 51:4) Apa muntu a zonene mukwawo, age hena kuzona kwaJehova. Pasihonena, tu tareni Veta ezi ga geve Karunga koVaisraeli . Veta kwa tente asi mugara ogu nga dili kurugwida ndi ogu nga vaka yininke ya mukwawo ‘nga zono kwaHOMPA.’ (Lev. 6:2-4) Mokulifana, nsene gumwe gomombungakriste a kwatera munona kononkondo, age ngoso kuna kuzona kwaKarunga. Muntu gwangoso kuswaukisa Jehova. Yipo nye, ya kara nomulyo tu dimburure asi kukwatera munona kononkondo kuna kara nzo zonene kwaJehova ntani twa hepa kunyokera po nkareso ozo.
9. Magano musinke gomanzi za pwagesa mbunga zaJehova monomvhura dina ka pita ntani morwasinke?
9 Nomvhura dononzi dina ka pita, mbunga zaJehova kwa pwagesa magano gomanzi kuhamena kukwatera vanona kononkondo. Pasihonena, pwa kara yirongwa yomoRuhungu noAwake! eyi ya zogera eyi nava rugana ava va kwatera kononkondo. Ntani nomu wopeke nava vhura kuhengagwida nokukoragenda vantu owo ntani nomu vakurona nava vhura kupopera vana vawo. Vakuronambunga va gwana edeuro lyeyi nava rugana nsene gumwe ana kwatere munona kononkondo. Mbunga zaJehova kuna kutwikira kuvatera vakuronambunga va dive eyi nava rugana nsene gumwe ana kwatere munona kononkondo. Morwasinke? Yipo zi dive nsene asi vakuronambunga kuna kuyirugana kuliza noveta zaKristusa.
EYI AVA RUGANA VAKURONAMBUNGA NSENE GUMWE ANA TURA NZO ZONENE
10-12. (a) Yisinke nava diworoka vakuronambunga nsene gumwe ana tura nzo zonene ntani sitambo musinke nava kara naso? (b) Kuliza naJakopo 5:14, 15, yisinke nava rugana vakuronambunga?
10 Apa vakuronambunga ava pangura nonzo, awo kudiworoka asi veta zaKristusa kwava harera va tekure womombungakriste neharo nokurugana eyi ga hara Karunga. Yipo nye, va hepa kutarurura yininke yokulisiga-siga komeho va tokore eyi nava rugana. Sitambo sawo sosinene po kuna kara sokufumadeka Jehova. (Lev. 22:31, 32; Mat. 6:9) Sitambo sawo simwe somulyo po kuna kara sokuvatera vanavazinyetu va kare nelikwatakano lyewa naJehova ntani sokuhengagwida ava va zonena.
11 Vakuronambunga kuhetekera ko hena kutara nsene ogu ga zona, ga litezurura yipo va mu vatere a tengwidire po elikwatakano lyendi naJehova. (Resa Jakopo 5:14, 15.) Mukriste ogu a tura nzo zonene mokuhafesa madowo gendi, kwa fana ngwendi muntu gokuvera. Eyi kutanta asi age kapi ga kara nelikwatakano lyewa naJehova. * Vakuronambunga kwa fana ngwendi vandokotora. Awo kuhetekera ko ‘kuverura muntu’ ogu ana kuvera pampepo. Awo kuruganesa magano gomoBibeli mokumuvatera a tengwidire po elikwatakano lyendi naJehova, nye eyi kuhoroka tupu nsene muntu ogo kuna kulikida elitezururo lyosili.—Yirug. 3:19; 2 Kol. 2:5-10.
12 Yosili, vakuronambunga kwa kara nositumbukira sosinene. Awo kupakera nawa mbili siunda esi ga va pa Karunga. (1 Pet. 5:1-3) Awo kuna hara vanavazinyetu navenye va lizuvhe epopero mombungakriste. Nsene vana dimburura asi gumwe ana tura nzo zonene ngwendi kukwatera munona kononkondo, awo kurugana ko yuma usimbu-simbu. Yisinke ava rugana? Koneka mapuro aga gana kara ketameko lyoparagarafu zo-13, 15, ntani 17.
13-14. Vakuronambunga va kara nononkondo mokurapota kepangero muntu ogu ana kwatere munona kononkondo ndi? Faturura.
13 Vakuronambunga va kara nononkondo mokurapota kepangero muntu ogu ana kwatere munona kononkondo ndi? Nhi. Moyirongo omu mwa kara veta ozo, vakuronambunga kusikisa mo veta ozo. (Rom. 13:1) Veta zangoso kapi azi lirwanesa noNonkango daKarunga. (Yirug. 5:28, 29) Apa gumwe a tantere vakuronambunga asi munona gongandi vana mu kwatere kononkondo, awo kupura ko magano koMberewa zoMutayi va dive eyi nava rugana kuliza noveta zosirongo.
14 Apa vakuronambunga ava uyunga nogu va kwatera kononkondo ntani novakondi vendi ndi navamwe ava va diva udigu owo, awo kuvakorangeda va rapote udigu owo kepangero. Nye ngapi nsene asi muntu ogu ga kwatera munona kononkondo kuna kara gomombungakriste ntani nsene udigu owo una divikwa momukunda? Ngoso Mukriste ogu ana rapota udigu owo kuvhura a lizuvhe asi ana swaukisa edina lyaJehova ndi? Hawe. Muntu ogu ana kwatere munona kononkondo, yige ana swaukisa edina lyaJehova.
15-16. (a) Kuliza na-1 Timoteusa 5:19, morwasinke pwa hepera nombangi mbali komeho vakuronambunga va pangure udigu? (b) Yisinke ava rugana vakuronambunga apa ava dimburura asi gumwe gomombungakriste ana kwatere munona kononkondo?
15 Morwasinke pwa hepera kukara nombangi mbali komeho vakuronambunga va pangure udigu? Nkedi ozo za liza nonompango domoBibeli. Nsene gumwe vana mu rundire asi ga zona, nye kapi ana kuyitambura, pwa hepa kukara nombangi mbali komeho vakuronambunga va pangure udigu owo. (Deut. 19:15; Mat. 18:16; resa 1 Timoteusa 5:19.) Eyi ngesi kutanta asi pwa hepa kukara nombangi mbali komeho muntu a ka rapote udigu owo kepangero ndi? Hawe. Nsene kuna kurapota udigu owo kepangero kapi pwa hepa nombangi mbali.
16 Apa vakuronambunga ava zuvhu asi gumwe gomombungakriste ana kwatere munona kononkondo, awo kuhetekera ko kugwana mauzera nagenye. Ano konyima zoyo, awo kutokora kuliza noBibeli va dive nsene asi kuvhura va yi pangure. Vakuronambunga kupura muntu ogo nsene asi sili ana tura nzo, ano nsene a patana awo kupura ko vamwe ava vana diva eyi kayihorokere. Nsene pa kara nombangi mbali dina kuyikwatesa ko asi muntu ogo yige ka kwaterere munona kononkondo ndi nsene mbangi zimwe zi uyunga asi muntu ogo ga kwatera hena munona kononkondo sikando simwe, makura vakuronambunga vana kara nononkondo dokupangura ogo muntu. * Nsene mbangi zimwe tupu zina rapota udigu wangoso, kapi yina kutanta asi kapisi usili. Nampili kapi pana kara nombangi mbali dina kuyikwatesa ko asi muntu ogo ka kwaterere munona kononkondo, vakuronambunga va yi diva asi muntu gwangoso nampo kwa rugana sininke sosidona esi sa koresa wopeke. Vakuronambunga ngava twikira kuhengagwida nokugava evatero kwava ga koresa. Ntani awo ngava popera mbungakriste kwankenye udona ou ana retesa po muntu ogo.—Yirug. 20:28.
17-18. Faturura sitambo sokomitiye zoyipangura.
17 Yisinke sitambo sokomitiye zoyipangura? Awo kutokora nsene ogu ana tura nzo zonene kuvhura a twikire kukara mombungakriste ndi hawe. Awo kapi ava tokora nsene asi ogu ana zono va hepa kumutengeka morwa ana teza veta zepangero. Yininke nayinye oyo kuyisiga momawoko gepangero yipo li tokore omu nava tengeka ogu ana teza po veta.—Rom. 13:2-4; Tit. 3:1.
18 Vakuronambunga kupangura tupu yininke eyi ya hamena kelikwatakano lyomuntu naJehova ntani kumwe novapuli vakwawo. Awo kuruganesa Bibeli va tokore nsene asi muntu ogu ga zona ana litezurura ndi hawe. Nsene kapi ana hara kulitezurura, vakuronambunga kumudivisa asi tava mu gusa mombunga ntani kuyidivisa kombungakriste asi age ngesi kapi ana kara hena gumwe goNombangi daJehova. (1 Kol. 5:11-13) Nsene a litezurura, kapi tava mu gusa mombungakriste. Nye vakuronambunga tava mu tantere asi kapi nga gwana hena yitumbukira mombungakriste nampo eparu lyendi mudima. Mokumona asi vakuronambunga va kara nosinka kovanona, awo kuvhura va rondore vakondi yipo va takamese nsene vana vawo kuna kukara pepi nomuntu ogu ga kwatera munona kononkondo. Apa vakuronambunga ava rondora vakurona, awo kapi ava ava tantere asi vanona musinke ga kwatera kononkondo ogo muntu.
NGAPI OMU NO POPERA VANA WOGE?
Vakurona kupopera vana vawo pokuvaronga yirongwa yokuhamena eligwanekero panyama. Mokuyirugana oyo, vakurona kuruganesa yirongwa eyi azi pwagesa mbunga zaKarunga. (Tara Paragarafu 19-22)
19-22. Yisinke nava rugana vakurona yipo va popere vana vawo? (Tara efano lyopontunda.)
19 Vakurona yiwo va pa situmbukira sokupopera vanona koudona. * Vana veni kuna kara “yigava yaHOMPA.” (Epis. 127:3) Jehova kwa mu pa situmbukira sokupopera vana veni. Yisinke no mu rugana yipo mu va popere koudona?
20 Sokuhova, konakona mauzera gokuhamena kukwatera kononkondo. Diva asi vantu musinke ava kwatere vanona kononkondo nononkedi edi ava ruganesa. koneka yininke ndi vantu ava nava vhura kureta siponga. (Yis. 22:3; 24:3) Diworoka asi vantu ava ava kwatere vanona kononkondo kuna kara vaava va diva ndi ava va huguvara.
21 Sauvali, uyunga nkenye apa novana woge. (Deut. 6:6, 7) Eyi kwa kwatera mo kuvapurakena nawa nsene vana woge kuna kuuyunga. (Jak. 1:19) Diworoka asi vanona kapi va hara kuuyunga nsene kuna va kwatere kononkondo. Awo kukara nowoma asi kwato ogu nayikwatesa ko, ndi kuvhura va kare nowoma morwa ogu kava kwaterere kononkondo ka va tanterere asi ngava rugana yoyidona nsene va yi tantera nkenye ogu. Nsene o dimburura asi koyili yoyidona kayi horokerere vana woge, va pura mapuro monkedi zongwa ntani purakena nawa eyi vana kukutantera.
22 Sautatu, ronga vana woge. Va ronga eyi va hepa kudiva kuhamena eligwanekero panyama. Va tantera eyi nava rugana nsene gumwe ana hara kuvakwatagura monkedi zokudira kuwapera. Ruganesa magano aga azi gava mbunga zaJehova kuhamena omu no popera vana woge.—Tara kakende “ Lironga nyamoge ntani vana woge.”
23. Ngapi omu atu tara kukwatera munona kononkondo ntani epuro musinke ngasi kalimburura sirongwa sokukwama ko?
23 NgoNombangi daJehova ose kutara kukwatera kononkondo asi azo nzo zonene. Kuliza noveta zaKristusa, Nombangi daJehova kapi adi kwatesa ko yitundwamo yomuntu ogu ana tura nzo zonene. Nye yisinke natu rugana yipo tu vatere muntu ogu vana kwatere kononkondo? Sirongwa sokukwama ko ngasi ka limburura epuro olyo.
RUSUMO 103 Vakuronambunga—Mauhwi movantu
^ para. 5 Mosirongwa esi tatu ka zogera omu natu vatera vanona nsene kwava tekura momudona. Tatu ka zogera omu vakuronambunga nava popera mbungakriste nomu vakurona nava popera vana vawo.
^ para. 3 EFATURURO LYONKANGO: Kukwatera vanona kononkondo kuhoroka apa mukurona a rara nomunonagona mokuhafesa tupu malizuvho gendi. Ayo kwa kwatera mo kuligwanekera panyama kupitira kokana ndi kupitira konyima ntani kukwatagura komavere ndi koyilyo yonomuga ndi komatako nayimwe hena. Sinzi sava ava kwatere kononkondo kuna kara vakadona, nye vamati vamwe nawo kuvakwatera kononkondo. Sinzi sovantu ava ava kwatere vanona kononkondo kuna kara vagara, nye vakadi vamwe nawo kuyirugana.
^ para. 5 EFATURURO LYONKANGO: Mosirongwa esi ntani sokukwama ko, kwa ruganesa mo nkango “Ogu va kwatera kononkondo.” Azo kwa tamba komuntu ogu va kwatera kononkondo pounona. Ntanto ezi kulikida asi munona ogo kuna mu koresa pamalizuvho ntani kapi ga zona yuma.
^ para. 11 Nsene gumwe ogu ga dira kukara nelikwatakano lyewa naJehova a tura nzo, ayo kapi yina kutanta asi kapi tava mu pangura. Munanzo ogo, ga kara nousima kweyi ga rugana ntani Jehova nga mu pangura.—Rom. 14:12.
^ para. 16 Munona ogu va kwatera kononkondo kapi ta vhuru kukara pompanguro zogu ga mu zonena. Vakondi womunona ndi mukondi gwapeke kuvhura kutantera vakuronambunga eyi kayihorokere.
^ para. 19 Magano aga kwa tamba hena kwava ava rere vanona va hana asi vana vawo.
