1. Morwasinke vamwe ava dilire kuhara kulironga?

SINZI sovantu naina kurugana unene yipo va gwane yimaliwa yokulireresa. Vanavazinyetu wovanzi kurugana novili dononzi yipo va gwane yimaliwa yokureresa mapata gawo. Ano vamwe kugenda siruwo sosire va ze koyirugana nokutengura komambo gawo. Sinzi sawo kurugana yirugana youdigu yokomawoko. Apa ava dumbuka, awo kulizuvha eroroko! Eyi kuvadigopera kulironga.

2. Siruwo musinke o lirongo Bibeli noyimbapiratjangwa yetu?

² Natuvenye twa hepa kulitulira po siruwo sokulironga Nonkango daKarunga noyimbapiratjangwa yetu. Eyi mulyo unene kuyirugana morwa ngayi tu vatera tu kare nelikwatakano lyewa naJehova nokukagwana mwenyo gwanarunye. (1 Tim. 4:15) Vamwe kulironga apa ava pinduka ngurangura, morwa kwato ezogerero ntani morwa vana pwizumuka. Ano vamwe kulironga Bibeli nokuteda ko apa ava dili kukara nomadonganeso kongurova.

3-4. Marunduruko musinke za tura po Mbungagendesi ntani morwasinke?

³ Nampo nove kuna kuyikwatesa ko asi twa hepa kulitulira po siruwo sokulironga. Nye yisinke natu lironga? Vamwe kuvhura va uyunge asi: ‘Yininke yinzi yokuresa, kapi tatu vhuru kuyiresa nayinye.’ Vanavazinyetu vamwe kuvatompoka kuresa yimbapiratjangwa yetu nayinye, nye sinzi sovanavazinyetu kuvadigopera kugwana siruwo sokuyirugana. Mbungagendesi za dimburura udigu ou. Udigu ou ka u ninkisire Mbungagendesi zi tokore kusesupika sivaro soyimbapiratjangwa eyi ava nduruka neyi atu gwana kointaneta.

 ⁴ Pasihonena, ngesi kapi hena vana kupwagesa buke Yearbook of Jehovah’s Witnesses, morwa yilimonena yoyinzi ngesi kuvhura kuyigwana ko-jw.org^® ntani kupitira melikwamo lyo-JW Broadcasting^® eli ali pwaga nkenye kwedi. Yifo yetu Ruhungu ntani Awake! ngesi kuyipwagesa tupu rutatu momvhura. Mbungagendesi kapi za tura po ewapaiko eli, yipo tu gwane siruwo sosinzi sokurugana yirugana yanyamwetu. Nye awo kwa tura po ewapaiko eli, yipo tu demenene koyininke “yoyiwa po” ndi yomulyo. (Fil. 1:10) Ngesi tu zogereni omu natu tokora asi yipi yomulyo po ntani nomu natu gwanena mo uwa melirongo lyanyamwetu lyoBibeli.

5-6. Yimbapiratjangwa musinke natu hova kulironga?

⁵ Yisinke natu hova kulironga? Twa hepa kugwana siruwo sokulironga Nonkango daKarunga nkenye ezuva. Magaununo aga atu konakona mereso lyetu lyoBibeli lyankenye sivike, va ga sesupika yipo tu gwane siruwo sosinzi sokuteda ko ntani sokurugana epaparo kweyi tuna kulironga. Sitambo setu kapisi sokumana tupu kuresa magaununo ogo, nye twa hepa kupulisira eyi tuna kuresa moBibeli yi tu gume komutjima nokutuvatera tu hedere pepi naJehova.—Epis. 19:14.

⁶ Yisinke hena natu lironga? Twa hepa kuliwapaikira Ruhungu rwElirongo ntani buke ezi atu rugana mepongo lyomokatji kosivike nokuliwapaikira nayinye eyi ayi pitire mepongo olyo. Twa hepa hena kuresa Ruhungu ntani Awake!

7. Morwasinke natu dilira kudompa mutjima nsene kapi tuna kuvhura kuresa nokutarera nayinye eyi ya kara kointaneta zetu ntani ko-JW Broadcasting?

⁷ Kuvhura o lipure asi: ‘Ngapi kuhamena yirongwa nonovidiyo eyi atu gwana ko-jw.org ntani ko-JW Broadcasting? Yinzi unene!’ Gazadara ko kosifanekeso esi: Mositora kwa kara mo nondya dononzi, nye kapi to vhuru kumana kudilya nadinye nsene va di ku pa. Ntudi wa hepa kuhorowora edi ono hepa. Mokulifana, nsene kapi ono kuvhura kuresa nokutarera nayinye eyi atu gwana kointaneta, ya ha ku dompesa. Resa nokutarera tupu eyi ono kuvhura ko. Tu zeni tu ka konakone eyi ayi tanta kulironga ntani neyi natu rugana nsene kuna kulironga, yipo tu gwanene mo mauwa.

8. Yisinke natu rugana nsene kuna kulironga Ruhungu ntani ngapi natu gwanena mo mauwa?

⁸ Kulironga kutanta asi kudemenena kweyi ono kuresa yipo o lirongere ko yuma. Kapi ya gwanena po tupu kuresa sirongwa nokutenda malimbururo. Nsene kuna kuliwapaikira Ruhungu rwElirongo, pomuhowo resa etwaromo ketamekero lyosirongwa. Konyima zoyo, tara siparatjangwa noyiparatjangwagona ntani mapuro gerugururomo. Makura resa nye sirongwa nasinye kuliwora. Koneka ntanto ezi azi howo mwankenye paragarafu. Azo nkenye apa kufaturura eyi yina kara moparagarafu. Ngomu ono kuresa sirongwa nasinye, gazadara ko omu noparagarafu dina kukwatesa ko yiparatjangwagona ntani nomu yina lizi kumwe nosirongwa. Didilika nonkango doudigu ntani yitwa eyi ono hara kukarugana epaparo yipo yi ku zerere nawa.

9. (a) Morwasinke natu demenena unene komatjangwa nsene kuna kulironga Ruhungu ntani ngapi natu yi rugana? (b) Kuliza naJosuwa 1:8, yisinke hena natu rugana, kugusa ko kuresa matjangwa?

 ⁹ Ruhungu rwElirongo kutuvatera tu kwate egano Bibeli. Yipo nye, demenena komatjangwa, unene po aga nava ka resa mombungakriste. Koneka omu nonkango domovelise dina kukwatesa ko magano gomonoparagarafu. Teda ko komatjangwa aga ono kuresa, ntani nomu no ga sikisa mo meparu lyoge.—Resa Josuwa 1:8.

10. Kuliza noVahebeli 5:14, morwasinke vareti nava rongera vana vawo poUkareli wepata, omu nava lironga nokurugana epaparo?

¹⁰ Sinzi sovareti kwa hara vana vawo va hafere Ukareli wepata. Nampili ngomu vareti va hepa kugazadara ko komeho zosiruwo eyi nava ya rugana poUkareli wepata, kapisi hepero kurugana ukareli wepata omu mwa hamena yidanauka ndi kufanayika nkenye sivike. Kuvhura mu tarere elikwamo lyoBroadcast poUkareli weni wepata ano poyiruwo yimwe kuvhura mu rugane Ukareli wepata omu mwa hamena yifanayika. Pasihonena, kuvhura mu faneke wato waNowa. Nye nampili ngoso, ayo mulyo kuronga vana veni yipo va dive omu nava lironga. Vanona va hepa kudiva omu nava liwapaikira komapongo ntani nomu nava rugana epaparo yipo va dive omu nava ka limburura nsene gumwe ka pulire epuro kosure. (Resa Vahebeli 5:14.) Nsene va lironga pwanyamwawo kembo, ayo ngayi va vatera va ka purakene nawa komapongo nokoyigongi, nampili pwa hana novidiyo. Vakurona va hepa kutokora asi siruwo sokuhura kupi nava ruganesa poUkareli wepata kuliza nonomvhura dovanona.

11. Morwasinke ya karera nomulyo tu ronge varongwa vetu omu nava lironga vene?

¹¹ Vantu ava atu lirongo nawo Bibeli, nawo va hepa kudiva omu nava lironga. Apa atu tameke kulironga nawo Bibeli, ayo kutuhafesa apa atu va mono vana liwapaikire mobuke ezi atu lirongo nawo ndi vana liwapaikire yokomapongo. Nye twa hepa hena kuvaronga omu nava rugana epaparo ntani nomu nava lironga pwanyamwawo. Nsene va diva kuyirugana oyo, apa ngau horoka udigu, awo kapi ngava za kovantu womombungakriste yipo va ka pure eyi nava rugana, nye ngava rugana epaparo moyimbapiratjangwa yetu pwavene.

12. Yitambo musinke yimwe no vhura kulitulira po ngomu ono kulironga?

¹² Nsene ove muntu ogu ga dira kuhara kulironga, kuvhura o gazare asi kapi ngayi kutompoka kulironga. Nye kuvhura yi ku tompoke. Tameka pokuruganesa siruwo sosisupi pokulironga, ano mwaza siruwo ruganesa siruwo sosire. Kara nositambo ngomu ono kulironga. Sitambo setu sosinene kuna kara sokuhedera pepi naJehova. Kuvhura hena o litulire po sitambo sokulimburura epuro eli ga ku pura gumwe ndi sokurugana epaparo koudigu ou ono kuligwanekera nawo.

13. (a) Faturura eyi na vhura kurugana mudinkantu ogu ana hara kufatwilira varongwa vakwawo eyi ga pura. (b) Ngapi omu no sikisa mo egano eli lya kara moVakorosi 4:6?

¹³ Ove mudinkantu ogu o dimbi sure ndi? Nampo varongwa vakweni navenye kwa pura melisinto. Ano ono hara kuvatantera eyi azi rongo Bibeli kuhamena elisinto, nye kwa kulizuvha asi kapi to vhuru kuyisikisa mo. Eyi kulikida asi wa hepa kulironga! Pana kara nokonda mbali deyi noyiruganena: (1) yipo o yi pure nawa-nawa asi Karunga yige ga sita yininke nayinye ntani (2) yipo o dive omu no limburura nsene gumwe a ku pura kuhamena eyi wa pura. (Rom. 1:20; 1 Pet. 3:15) Komeho o ka va limburure, lipura asi: ‘Morwasinke varongwa vakwetu va pulira melisinto?’ Makura rugana epaparo moyimbapiratjangwa yetu. Ayo kapi ya kara udigu kufatwilira varongwa vakweni eyi wa pura. Sinzi sovantu kwa pura melisinto morwa pweli gumwe ogu va fumadeka ga yi va tantera. Nsene o diva ko elimbururo limwe ndi gavali, ayo kuvhura kuvatera unene muntu ogu ga pura melisinto.—Resa Vakorosi 4:6.

14-16. (a) Yisinke no rugana yipo o dive nawa nobuke domoBibeli edi wa dira kudiva? (b) Faturura omu matjangwa aga gana kara moparagarafu naga ku vatera o kwate nawa egano buke zaAmosa. (Tara hena kakende “ Mona momagano goge eyi ono kuresa moBibeli!”)

¹⁴ Tu tante asi sivike esi kepongo ta tu ka lironga kuhamena buke zomoBibeli ezi ga tjanga muporofete ogu nampo wa dira kudiva nawa. Pomuhowo wa hepa kukara neharo lyokudiva eyi ga tjenge muporofete ogo. Ngapi omu no yi rugana?

¹⁵ Pomuhowo, lipura asi: ‘Yisinke na diva kuhamena mutjangi ogu goBibeli? Yilye edina lyendi? Kupi ga tungire ntani yisinke nga rugana? Nsene o diva mauzera gamwe kuhamena mutjangi, ayo ngayi kuvatera o kwate egano konda zeyi ga ruganesere nonkango noyifanekeso eyi atu gwana mobuke ozo. Ngomu ono kuresa Bibeli, koneka nonkango edi nadi kuvatera o kwate egano asi muntu musinke ga kere.

¹⁶ Ntani diva siruwo esi va tjenge buke ozo. Kuvhura o gwane mauzera ogo konyima zoBibeli zoNew World Translation of the Holy Scriptures koruha “Table of the Books of the Bible.” Ndi kuvhura o tare ruha “Vaporofete novahompa vaJuda nava vaIsraeli” oru rwa kara mobuke Mauzera gomoNonkango daKarunga, pepenuno 14-17. Nsene buke ezi muna kulironga kuna kara zouporofete, diva eyi ya horokere posiruwo esi va tjenge buke ozo. Nkareso musinke zondona va kere nazo vantu, eyi ya ninkisire Jehova a tume muporofete ogo? Wolye ga  parukire nawo posiruwo sendi? Mokudiva nawa eyi ya horokere, wa hepa kutara monobuke dimwe domoBibeli. Pasihonena, mokukwata egano eyi ya horokere posiruwo somuporofete Amosa, kuvhura tu gwane mauzera gamwe mobuke zo-2 Vahompa ntani 2 Vahistoli. Ntani kuvhura o konakone buke zaHoseya, ogu ga parukire posiruwo simwe naAmosa. Nsene o tara monobuke odo, ayo ngayi ku vatera o kwate egano siruwo esi ga parukire Amosa.—2 Vah. 14:25-28; 2 Hist. 26:1-15; Hos. 1:1-11; Amosa 1:1.

17-18. Kuliza noyihonena eyi vana tumbura ndi yimwe eyi wa diva, faturura omu kudemenena komauzera aga aga moneka ngwendi kwato mulyo nayi tu vatera tu hafere kulironga Bibeli.

¹⁷ Ya wapa kukara neharo lyokuhara kudiva ko yoyinzi nsene kuna kuresa Bibeli. Pasihonena, nampo ove kuna kuresa buke zaSakaliya egaununo 12, omu va uyunga kuhamena nomfa daMesiyasa. (Sak. 12:10) Movelise zo-12 kwa uyunga mo asi ‘epata lyaNatani’ ngali di guvisa nomfa daMesiyasa. Mevango lyokugenderera kuresa nonkango odo nokutwikira, hageka tanko kuresa nokulipura mapuro aga: ‘Morwasinke lya guvilire epata lyaNatana? Kupi no vhura kugwana mauzera gamwe?’ Wa hepa kurugana epaparo. Mauzera gamwe kuvhura kugagwana mwa-2 Samwere 5:13, 14, omu va tumbura asi Natana kwa kere munwaNdafita. Ntani kuvhura o gwane hena mauzera gamwe mwaRukasa 3:23, 31, omu va uyunga asi Mariya zinyaJesus, kwa kere gomoruvharo rwaNatana. (Tara Ruhungu rwaSiwogedi 2017, epe. 32 para. 4) Mauzera aga kutetukisa sili! Yimo, twa yi diva asi Jesus kwa tundilira moruvharo rwaNdafita.  (Mat. 22:42) Nye vana vaNdafita kwa pitakanene po-20. Ayo kutetukisa pokudiva asi Sakaliya kwa pumbire asi vepata lyaNatani ngayi va guvisa pokuzuvha nomfa daJesus morwa age kwa kere gomoruvharo rwawo.

¹⁸ Tara hena sihonena simwe. Megaununo lyokuhova lyaRukasa, ose kuresa mo asi muengeli Ngabiliyera kwa tanterere Mariya asi age nga hampuruka munona ogu nga kara “Munene, age ngava mu tumbura asi MunwaKarunga gekeguru-guru. Ano Hompa Karunga nga mu pa uhompa wazinakuru Ndafita. Age nga pangera rudi rwaJakopo dogoro narunye.” (Ruk. 1:32, 33) Pokumana kuresa novelise odo, nampo kuvhura tu demenene kononkango edi ga uyungire Ngabiliyera asi ngava mu tumbura asi: “MunwaKarunga gekeguru-guru.” Nye Ngabiliyera kwa uyungire hena asi Jesus nga “pangera” ngaHompa. Kuvhura tu lipure omu nonkango odo da kundamene Mariya. Ngoso age kwa gazarere asi Jesus nga pinganena po hompa Herodesa mouhompa ndi? Ngano Jesus ga ya kere hompa, eyi kutanta asi Mariya ngano ga kere zinyahompa ntani epata lyawo ngano kwa tungire mombara zahompa. Nye Bibeli kapi za tanta asi Mariya ga uyungire yininke yokufana ngoso, ndi a pure nsene kuvhura nage a ka kare mouhompa ngwendi moomu va yi rugene varongwa vavali vaJesus. (Mat. 20:20-23) Mauzera aga kulikida asi Mariya kwa kere mukadi gokulinunupika!

19-20. Kuliza naJakopo 1:22-25 ntani 4:8, sitambo musinke twa hepa kukara naso nsene kuna kulironga?

¹⁹ Diworokeni asi sitambo setu sosinene seyi atu lirongere Nonkango daKarunga kuna kara sokuhedera pepi naJehova. Ntani tuna hara kudiva omu twa “fana” yipo tu vhure kutura po marunduruko tu hafese Jehova. (Resa Jakopo 1:22-25; 4:8.) Yipo nye, twa hepa kukanderera kwaJehova nkenye apa komeho tu tameke kulironga. Twa hepa kumuhundira yipo tu gwanene mo uwa mweyi tuna kulironga ntani nokuparuka kuliza nomu ga yi harera.

²⁰ Natuvenye ngano tu kareni ngwendi mugara ogu va faturura mepisarome asi: “Age kwa tokomena kuresa Veta zaHOMPA, oku ta zi konakona mutenya nomasiku. . . . Nayinye eyi a rugana kuragopa.”—Epis. 1:2, 3.