1-2. Kuliza nEpisarome 40:5, yininke musinke ga tu pa Jehova, ntani morwasinke natu ka yi zogerera mosirongwa esi?

JEHOVA Karunga gougavi. Gazadara kuhamena yininke yimwe eyi ga tu pa. Age kwa tu pa evhu li kare embo lyetu ntani kwa sita uruvi wetu monkedi zokutetukisa ntani age hena kwa tu pa Nonkango dendi Bibeli. Mokumona asi Jehova kwa tu pa yininke yitatu oyo, ose twa kara nevega oku natu tunga. Ose hena kuvhura kugazara nokuuyunga novakwetu ntani kuvhura tu gwane malimbururo komapuro getu.—Resa Episarome 40:5.

² Mosirongwa esi tatu ka zogera yininke oyo yitatu ga tu pa Jehova. Nsene tu gazadara yininke oyo, ayo ngayi tu vatera tu kare norupandu ntani ngayi tu ninkisa tu hafese Musiti gwetu Jehova. (Ehor. 4:11) Ayo hena ngayi tu vatera tu zuvhisire vantu ava va pura melisinto.

3. Ngapi omu evhu lya lisiga nonoplaneta dapeke?

³ Kuvhura tu dimburure unongo ou ga kara nawo Karunga, nsene tu kona-kona monkedi omu ga sita evhu. (Rom. 1:20; Heb. 3:4) Kugusa ko evhu, Karunga kwa sita noplaneta dokulisiga-siga edi adi likunduruka kezuva. Nye Karunga kwa sita evhu monkedi zokulikarera yipo yinamwenyo yi twikire kuparuka.

4. Ngapi omu Karunga ga horora unongo wendi monkedi omu ga sita evhu? Gava sihonena.

⁴ Evhu kwa kara ngwendi sikepa esi sina kupupa mefuta. Nye pwa kara malisigo pokatji kosikepa esi sina zura vantu ntani nevhu. Pasihonena, vantu ava vana kara mosikepa kapi tava vhuru kuparuka nsene va dira kuruganesa yininke  eyi ga tu pa Karunga, ngwendi mpepo zokuheseresa, mema ntani nonondya. Awo hena kapi tava vhuru kuparuka nsene va twikira kukara nonyata mosikepa. Mokulisiga, pevhu kwa kara po mabiliyona goyinamwenyo. Alyo kugava mpepo zokuheseresa, mema ntani nonondya edi twa hepa. Yininke oyo kapi ayi pu po pevhu. Nampili ngomu yininke yokunyata ayi twikire kukara pevhu, evhu kumoneka simpe nawa ntani yinamwenyo kutwikira simpe kuparuka. Ngapi omu ayi horoka eyi? Jehova kwa sita evhu monkedi zokulikarera yipo yininke yokunyata va twikire kuyiruganesa mononkedi dokulisiga-siga. Tu tareni omu aga gendi mema nompepo ezi atu heseresa.

5. Ngapi omu azi gendi mpepo ezi atu heseresa ntani yisinke ayi likida?

⁵ Oxygen kuna kara edina lyompepo ezi ayi heseresa yinamwenyo, kukwatera mo vantu. Yinamwenyo kuruganesa mpepo zokuheseresa zonzi nkenye mvhura. Ayo hena kupwagesa mpepo ezi ava tumbura asi carbon dioxide ezi ya dira kuhepa. Nye yinamwenyo kapi ayi vhuru kumana mpepo zokuheseresa nazinye. Ntani pevhu kapi apa zura mpepo ezi twa dira kuhepa ava tumbura asi carbon dioxide. Ngapi omu ayi horoka? Jehova kwa sita yimeno yokulisiga-siga eyi ayi ruganesa carbon dioxide nokugava mpepo ezi atu heseresa ndi Oxygen. Monkedi omu azi gendi mpepo ezi atu heseresa kulikida asi nonkango edi da kara moYirugana 17:24, 25, usili. Ado kwa tanta asi: “Karunga . . . yige a pe nayinye mwenyo nomunku.”

6. Ngapi omu aga gendi mema, ntani yisinke ayi likida? (Tara kakende “ Mema kuna kara uhwi wokutunda kwaJehova.”)

⁶ Pevhu kwa kara po mema morwa evhu kapi lya kara ure ndi pepi unene nezuva. Ngano evhu kwa henyena nakauke pepi nezuva, ngano mema nagenye ga pwira. Ntani pevhu ngano kapi pwa kara yinamwenyo morwa upyu unene. Ngano evhu kwa kere ure nakauke nezuva, ngano pevhu napenye kwa kara po materengenze. Mokumona asi Jehova kwa tura evhu pevega lyouhunga, eyi kuninkisa mema ga kare pevhu yipo yinamwenyo yi twikire kuparuka. Apa ezuva ali temene mema aga ga kara pevhu nemefuta, eyi kuninkisa mema ga ze meguru nokukara maremo. Mema aga aga zi meguru nkenye mvhura, kuvhura kugwaneka moyidiva nayinye eyi ya kara pevhu. Konyima zomazuva murongo, mema ogo kutengura pevhu apa azi roko mvhura ndi apa ayi gu yiteregenze. Ago kutengwira mefuta nokomavega gapeke, ano konyima ago kutengwira hena meguru. Monkedi ezi, mema kutwikira kukara pevhu ntani ayo kulikida asi Jehova ga kara nounongo ntani nononkondo.—Joba 36:27, 28; Muud. 1:7.

7. Mononkedi musinke natu likida rupandu kouhwi ou va tumbura mEpisarome 115:16?

⁷ Yisinke nayi tu vatera tu kare norupandu kwaJehova kweyi ga sita evhu noyininke eyi ya kara po? (Resa Episarome 115:16.) Nkedi zimwe kuna kara pokuteda koyininke eyi ga sita Jehova. Eyi ngayi tu ninkisa tu pandure Jehova koyininke eyi ga tu pa. Ntani nsene tu zeresa komavango oku twa kara, ayo ngayi likida asi twa kara norupandu.

8. Morwasinke natu uyungira asi uruvi kwa u sita monkedi zokutetukisa?

⁸ Uruvi womuntu kwa u sita monkedi zokutetukisa. Awo kutameka kukura apa mukeke a kara simpe mezimo. Posiruwo oso, nonsipa domouruvi dokusika  komayovi kwa liforomene nkenye minute. Vakonakoni kwa tanta asi mouruvi womukondi kwa kara mo nonsipa dokusika koyiha yomabiliyona 100. Eyi yiyo ayi ninkisa uruvi womuntu u kare nomukumo gokusika ponokilogarama 1.5. Koneka yininke yimwe yokutetukisa eyi au rugana uruvi.

9. Yisinke yina kulikida asi kuuyunga kuna kara uhwi wokutunda kwaKarunga?

⁹ Kuuyunga kuna kara sininke sokutetukisa. Gazara kuhamena eyi ayi horoka nkenye apa atu uyunga. Nkenye apa atu tumbura nkango, nondunge kuruganena kumwe nononsipa 100 edi da kara keraka, nomulihu, nonomurungu, nonompanda ntani nonturo. Mokuninka asi nkango o zi tumbure mouhunga, nonsipa odo nadinye da hepa kuruganena kumwe. Ekonakono eli va rugene momvhura 2019, kwa likida asi mukeke ogu vana hampuruka kuvhura kuzuvha nokukwata egano nonkango dimwe. Ekonakono olyo kwa liza neyi va pura valirongi vamwe. Awo kwa tanta asi natuvenye kwa tu reta nevhuliko lyokudimburura nokulironga maraka gokulisiga-siga. Eyi kulikida asi kuuyunga kuna kara uhwi wokutunda kwaKarunga.—Ex. 4:11.

10. Ngapi omu natu likida asi ose twa kara norupandu kouhwi wokuuyunga ou ga tu pa Jehova?

¹⁰ Nsene tu fatwilira vantu ava va pura melisinto nokonda deyi twa pulira asi Karunga yige ga sita yininke nayinye, ose ngatu likida asi twa kara norupandu kouhwi wokuuyunga ou ga tu pa Jehova. (Epis. 9:1; 1 Pet. 3:15) Vantu ava va pura melisinto kutanta asi evhu nanayinye eyi ya kara po kwato ogu ga yi sita. Nsene tu ruganesa Bibeli ntani noyitwa yimwe eyi tuna zogere mosirongwa esi, ose ngatu popera Guhyetu gemeguru ntani nokufatwilira wonomutjima donongwa eyi twa pulira asi Jehova yige Musiti geguru nevhu.—Epis. 102:25; Jes. 40:25, 26.

11. Morwasinke tuna kuuyungira asi uruvi womuntu kuna kara sininke sokutetukisa?

¹¹ Monkedi omu atu diworoka yininke kuna kara sininke sokutetukisa. Pwanare, mutjangi gumwe kwa tente asi muntu kuvhura kudiworoka eyi ga resa monobuke dononene dokusika pomamiliyona 20. Nye ekonakono eli ka va rugene ntaantani kulikida asi muntu kuvhura kudiworoka yininke yoyinzi kupitakana opo. Mokumona asi ose kudiworoka yininke, ngapi omu ayi tu vatere?

12. Yisinke ayi tu ninkisa tu lisige noyikorama?

¹² Vantu yiwo velike va kara nevhuliko lyokulironga nkareso zongwa, pokudiworoka eyi ya va horokera. Eyi kutuninkisa tu vhure kutjindja monkedi omu atu gazara nomu atu paruka. (1 Kol. 6:9-11; Koros. 3:9, 10) Ntani ayo kutuvatera tu deure ezwi lyetu lyokomutjima, yipo tu dimburure yininke yoyiwa neyi yoyidona. (Heb. 5:14) Ayo kutuvatera hena tu likide eharo  nonkenda ntani nokuhonena yininke eyi a tara Jehova asi youhunga.

13. Kuliza nEpisarome 77:11, 12, ngapi omu natu ruganesa uhwi wokudiworoka?

¹³ Nsene tu diworoka omu Jehova ga tu vatera nokutuhengagwida, ose ngatu likida asi twa kara norupandu kouhwi ou ga tu pa Jehova wokudiworoka yininke. Nsene tu yi rugana, ayo ngayi tu vatera tu kare nehuguvaro asi Jehova nga tu vatera komeho. (Resa Episarome 77:11, 12; 78:4, 7) Twa hepa hena kudiworoka yininke yoyiwa eyi ava tu ruganene wopeke ntani nokugava rupandu. Vakonakoni kwa tanta asi vantu ava ava pandura kwa kara noruhafo. Ya wapa hena kuhonena Jehova pokudivara ko yininke yimwe. Pasihonena, nampili ngomu Jehova a diworoka yininke nayinye, nye age kutugusira po apa atu litezurura nokudivara mapuko getu. (Epis. 25:7; 130:3, 4) Ntani age ana hara nose tu rugane yokulifana apa vakwetu ava tu zonene nokutuhundira tu va gusire po.—Mat. 6:14; Ruk. 17:3, 4.

14. Ngapi omu natu likida rupandu kouruvi ou ga tu pa Jehova?

¹⁴ Nsene tu ruganesa uruvi wetu mokuyererepeka Jehova, ayo ngayi likida asi ose twa kara norupandu kouhwi ou ga tu pa. Vantu vamwe kuruganesa uruvi wawo mokulihafesa vene. Awo kutokora vene asi yisinke yoyiwa neyi yoyidona. Mokumona asi Jehova yige ga tu sita, eyi kulikida asi age ga diva asi yipi yoyiwa po kwetu kupitakana nyamwetu. (Rom. 12:1, 2) Apa atu paruka kuliza nonompango dendi, ose kukara nombili. (Jes. 48:17, 18) Ntani ose kudiva asi yisinke eyi twa hepa kurugana meparu. Ayo kuna kara kuyererepeka Musiti gwetu nokumuhafesa.—Yis. 27:11.

15. Ngapi omu Bibeli azi likida asi Jehova ga hara vantu navenye?

¹⁵ Bibeli kuna kara uhwi weharo ou ga tu pa Karunga. Guhyetu gemeguru kwa pitisilire vagara va zi tjange morwa ga tu hara unene. Kupitira moBibeli, Jehova  kulimburura mapuro getu gomulyo aga atu lipura. Pasihonena, kupi twa tundilira? Yisinke sitambo separu? Ntani yisinke ngayi ka tu horokera komeho? Jehova kuna hara vana vendi navenye va gwane malimbururo komapuro ogo. Kutunda kwanare, age kwa ruganesa vagara yipo va toroke Bibeli momaraka gomanzi. Naina, Bibeli kwa zi toroka momaraka gokupitakana po-3 000. Kwato hena buke zimwe ezi va toroka nokuzihanesa unene ngwendi Bibeli. Yi kare asi kupi va tunga vantu ndi eraka musinke ava uyunga, vantu navenye va kara nompito zokulironga Bibeli momaraka aga ava uyunga.—Tara kakende “ Omu Bibeli va zi toroka momaraka gomoAfrika.”

16. Kuliza naMateusa 28:19, 20, ngapi omu natu likida asi twa kara norupandu kouhwi woBibeli?

¹⁶ Nsene tu resa Bibeli nokuteda ko ntani nokutura pasirugana eyi tuna kulironga, ose ngatu likida asi twa kara norupandu kouhwi woBibeli ou ga tu pa Jehova. Ose hena ngatu likida rupandu nsene tu tantera ko wopeke eyi azi uyunga Bibeli.—Epis. 1:1-3; Mat. 24:14; resa Mateusa 28:19, 20.

17. Mauhwi musinke tuna zogere mosirongwa esi ntani yisinke ngatu ka zogera mosirongwa sokukwama ko?

¹⁷ Mosirongwa esi tuna zogere mauhwi gatatu aga ga tu pa Jehova. Ago kuna kara evhu, uruvi ntani Bibeli. Nye pwa kara hena mauhwi gamwe aga ga tu pa Jehova aga aga dili kumoneka. Mauhwi ogo ngatu ka ga zogera mosirongwa sokukwama ko.