Sara * kwa tanta asi: “Ame muntu gonomuga ntani kapi ani lizuvhu emanguruko apa ani kara novantu ava va dira kukara nonomuga ndi wokuhanduka. Nye ame kulizuvha umanguruki apa ani kara nomuntu gokugomoka ntani gokulinunupika. Ame kuvhura kumutantera omu nina kulizuvha ntani nomaudigu gange. Vakaume vange wovanene kuna kara vantu ava va linunupika ntani wougomoki.”

Nonkango daSara kulikida asi nsene tu kara nougomoki, vantu wovanzi ngava hara kutulisa po ukaume nose. Ntani sikara sougomoki, kuhafesa Jehova. Nonkango daJehova kututantera asi: “Kareni . . . nombili” ndi nougomoki. (Koros. 3:12) Yisinke ugomoki? Ngapi omu Jesus ga likidire ugomoki? Ntani ngapi sikara esi nasi tu vatera yipo tu kare noruhafo meparu?

Nsene tu kara nombili, ayo ngayi tu ninkisa tu kare nougomoki. Muntu gougomoki kutekura vakwawo nombili, nokulididimikira yinka yeparu ntani age kulipangera.

Vantu vamwe kugazara asi vantu ava va kara nougomoki vagova, nye eyi kapisi usili. Nkango zoRugereka ugomoki ngava zi ruganesa mokufaturura nkambe ezi va deura. Apa nkambe ava zi deura, azo kapi azi zumbanesa nonkondo dazo, nye azo ku zi vatera zi pangere nonkondo dazo. Mokulifana, nsene tu kara nougomoki ose ngatu li pangera ntani ngatu twikira kukara nombili novakwetu.

Nampo kuvhura tu gazare asi ose kapi twa kara nosikara sougomoki. Mokumona asi ose kuna kuparuka mouzuni ou wonyanya, poyiruwo yimwe kuvhura yi tu karere udigu kulikida sikara sougomoki. (Rom. 7:19) Yosili, twa hepa elituromo lyenene mokutunga po sikara sougomoki. Nampili ngoso, Jehova nga tu vatera kupitira mompepo zendi zokupongoka yipo tu kare nosikara esi. (Gar. 5:22, 23) Morwasinke natu litulira mo unene mokutunga po sikara sougomoki?

Sikara sougomoki kukoka vantu. Ngwendi Sara ogu tuna tumbura ketameko, ose kwa hara kukara novantu wougomoki. Jesus kuna kara gumwe ogu ga tulire po sihonena sosiwa sougomoki nombili. (2 Kol. 10:1) Nampili vanona ava va dilire kumudiva, kwa here kutulisa po ukaume nage.—Mar. 10:13-16.

Ugomoki kutuvatera ntani kuvatera vantu ava atu kara kara nawo. Nsene tu kara nougomoki, ose kapi ngatu nyegenya ndi tu handuke usimbu. (Yis. 16:32) Eyi ngayi tu vatera tu dire kulizuvha  unzoni morwa tuna koresa wopeke, unene po vantu ava twa hara. Nsene tu kara nougomoki, ayo ngayi tu vatera tu pangere nkareso zetu nomalizuvho getu, ntani wopeke ngava gwanena mo uwa.

Nampili ngomu Jesus ga kere noyirugana yoyinzi, age kwa likidire ugomoki kovantu navenye. Sinzi sovantu womomazuva gaJesus kwa kere nomaudigu gomanzi ntani va hepere epwizumuko. Gazara tupu omu va lizuvhire vantu apa Jesus ga va tanterere nonkango edi asi: “Wizeni kwange . . . yeeyi ame kwa gomoka, yiyo na linunupika momutjima”!—Mat. 11:28, 29.

Ngapi natu tunga po ugomoki ngwendi Jesus? Apa atu lirongo Nonkango daKarunga, ose kudimburura omu Jesus nga ruganene kumwe novantu nomu nga kohonona po maudigu. Apa atu ligwanekere nomaudigu aga aga tu ninkisa tu dire kukara nougomoki, ose kuhonena Jesus poku ga lididimikira. (1 Pet. 2:21) Koneka yininke yitatu eyi ya vaterere Jesus a kare nougomoki.

Jesus kwa kere muntu gokulinunupika. Jesus kwa tente asi age kwa ‘gomoka, yiyo ga linunupika momutjima.’ (Mat. 11:29) Bibeli nkenye apa kutumbura ugomoki nelinunupiko kumwe morwa yikara eyi yivali kwa likwatakana.—Efe. 4:1-3.

Elinunupiko kutuvatera tu dire kuhanduka usimbu. Yisinke ga rugene Jesus apa vantu va mu rundilire asi age “makurulya nomakurunwa”? Monkedi ezi ga parukire Jesus kwa likidire nawa-nawa asi eyi va uyungire vantu kapi ya kere usili. Ntani mokumona asi age kwa linunupikire, age kwa tente asi: “Ukonentu waKarunga kumoneka moyirugana yawo asi awo kwa hungama.”—Mat. 11:19.

Nsene gumwe a uyunga momudona mpo zetu ntani noku twa tundilira, twa hepa kulikida sikara sougomoki. Mukuronambunga gomoAfrika Mbindakano gedina Peter kwa tanta asi: “Apa vantu ava handukisa nge, ame kulipura asi ‘Ngano Jesus yige ana kara moukaro wange, yisinke ngano na rugana?’” Ntani age kwa tanta hena asi: “Ame na lironga kudira kulitara nyamwange asi ame mulyo kupitakana wopeke.”

Jesus ga yi divire asi vantu kapi va sikilira mo. Varongwa vaJesus kwa here kurugana youhunga. Nye mokumona asi awo kapi va sikilire mo, poyiruwo yimwe awo kapi ngava rugana youhunga. Pasihonena, komeho Jesus va ka mudipage, Peturusa, naJakopo, ntani naJohanesa kwa kumaukire mevango lyokurugana eyi ga va tanterere Jesus. Age kwa uyungire asi: “mwenyo ago mureru kupura usimbu, nye rutu kapi rwa paka nonkondo.” (Mat. 26:40, 41) Mokumona asi Jesus ga yi divire asi varongwa vendi kapi va sikilira mo, age kapi ga va handukilire.

Munazinyetu Mandy pomuhowo kwa here kudemenena komapuko govakwawo. Nye ngesi age kuhetekera ko kuhonena Jesus ogu ga likidire ugomoki. Age kwa tanta asi: “Ame kuhetekera ko kudiworoka asi vantu navenye kapi va sikilira mo ntani ame kuhonena Jehova pokudemenena koyikara yoyiwa yovakwetu.” Nsene o honena Jesus pokutara wopeke asi kapi va sikilira mo, kuvhura ngayi kuvatere yipo o kare nougomoki.

Jesus kwa kere nehuguvaro asi Jehova nga mu vatera. Jesus kwa mu tekwire momudona apa ga kere pevhu. Vantu kapi va mu kwete egano, vamwe kwa mu nyengere ntani nga va mu hepeke. Nye nampili ngoso, age kwa twikilire kukara nougomoki morwa age “nayinye kwa yi sigililire Karunga ogu a pangura mouhunga.” (1 Pet. 2:23) Jesus ga yi divire asi oGuhwe vemeguru ngava mu vatera ntani ngava tengeka ava va dilire kumutekura nawa.

Nsene tu handuka morwa kuna tu tekura momudona, kuvhura tu rugane yininke ya dira kuhungama. Eyi yiyo Bibeli azi tu rondwere asi: “Muntu kapi a rugana mehandu eyi ya hungama kosipara saKarunga.” (Jak. 1:20) Mokumona asi kapi twa sikilira mo, kuvhura tu rugane yininke eyi ya dira kuhungama nampili tuna kara nokonda zeyi natu handukira.

Munazinyetu gomoGermany gedina Cathy nga gazara asi: ‘Nsene kapi ono kulipopera nyamoge, kwato ogu na ku popera.’ Nye age kwa tjindjire magano gendi apa ga tamekere kuhuguvara mwaJehova. Age kwa tanta hena asi: “Ngesi ame kapi ani lipopere hena nyamwange nkenye apa. Nye ame kulikida ugomoki morwa na yi diva asi Jehova nga ka rugana ko yuma koyininke yoyidona eyi yina kuhoroka mouzuni.” Nsene o huguvara Jehova ngwendi Jesus nsene kuna kukutekura momudona,  ayo ngayi kuvatera o twikire kukara nougomoki.

Jesus kwa tente asi ugomoki kutuvatera tu kare noruhafo. Age kwa tente asi: “Vantu woruhafo vaava vakara nougomoki.” (Mat. 5:5, NW) Koneka omu ugomoki au tu vatere momaukaro aga gana kukwamako.

Ugomoki kutuvatera nsene kuna kuligwanekera nomaudigu mononkwara. Munazinyetu gomoAustralia gedina Robert kwa tanta asi: “Ame ngani uyungire mukadange nonkango dokukoresa sili. Nye kapi to vhuru kutjindja nonkango donondona edi ono uyunga. Ame kwa lizuvhire udona apa namwene mukadange a guwu morwa nonkango donondona edi na mu uyungilire.”

“Natuvenye kupuka popanzi” kupitira mononkango ntani yininke eyi atu uyunga twa hana kugazadara ko, kuvhura kureta maudigu mononkwara. (Jak. 3:2) Nsene tu kara nougomoki poyiruwo yangoso, ayo ngayi tu vatera tu pangere eraka lyetu.—Yis. 17:27.

Robert kwa rugene unene yipo a tunge po ugomoki nelipangero. Uwa musinke ga limonena? Age kwa tanta asi: “Ngesi apa atu ligwanekere nomaudigu, ame kuhetekera ko kupurakena nawa nokuuyunga nougomoki ntani nokudira kuhanduka. Ngesi ose kapi tuna kuligwanekera nomaudigu gomanzi mononkwara detu.”

Ugomoki kutuvatera tu lizuvhe novakwetu. Vantu ava ava handuka usimbu, kapi va kara novakaume wovanzi. Nye ugomoki kutuvatera tu ‘kondjere mbili novakwetu.’ (Efe. 4:2, 3) Cathy ogu tuna tumbura ketameko kwa tanta asi: “Ugomoki kuvatera nge nampili ngomu ayi kara pamwe udigu kurugana kumwe novantu vamwe.”

Ugomoki kureta mbili momutjima. Bibeli kwa kwatakanesa “unongo ou wa tunda meguru” kumwe nombili. (Jak. 3:13, 17) Muntu gougomoki kwa kara ‘nombili momagazaro.’ (Yis. 14:30) Martin ogu ga rugana unene mokutunga po sikara sougomoki kwa tanta asi: “Ngesi ame kapi ani sininike vakwetu va rugane eyi na hara ntani kapi ani handuka usimbu. Ntani ame ngesi nina kara noruhafo.”

Mokuninka asi tu kare nosikara sougomoki, twa hepa kulitura mo unene. Munazinyetu gumwe kwa tanta asi: “poyiruwo yimwe, ame kuhanduka unene.” Nye Jehova ogu a tu korangeda tu tunge po sikara sougomoki, nga tu vatera. (Jes. 41:10; 1 Tim. 6:11) Age kuvhura a tu ‘wapeke’ ntani kuvhura a tu “nkondopeke.” (1 Pet. 5:10) Konyima, ose ngatu kara ngwendi Paurusa ogu ga kere ‘nougomoki nombili zaKristusa.’—2 Kol. 10:1.