Mauporofete gamwe aga gana kara pokarata ezi kwa faturura yihorokwa eyi ya horokere posiruwo simwe. Mauporofete ogo kulikida asi ose kuna kuparuka “pehagero lyouzuni.” —Ndan. 12:4.

• Etjangwa Ehor. 11:7; 12:13, 17; 13:1-8, 12

  Uporofete “sikasama” ngasi pangera vantu pevhu nomvhura dokupitakana 3 000. Pomazuva gopouhura, mutwe gwaso gwauntambali ngava gu remeka. Konyima, mutwe ogo ngagu veruka ntani “uzuni naunye” ngau kwama sikasama oso. Satana nga ruganesa sikasama oso yipo a “rwise ruvharo rogo mukadi rukwawo.”

  Esikiliromo Konyima zoRuhanzo, pevhu kwa tamekere kukara po mapangero aga ngaga rwanesa Jehova. Konyima zonomvhura dokupitakana 3 000, poyita yokuhova youzuni mudima, epangero lyaBritaniya kwa zumbanesere nonkondo dalyo dononzi. Alyo kwa verukire ndi kwa gwene hena nonkondo apa lya tamekere kuruganena kumwe nepangero lyaAmerika. Pomazuva gopouhura, Satana kwa ruganesa mapangero nagenye gepevhu mokuhepeka vantu vaKarunga.

• Etjangwa Ndan. 11:25-45

  Uporofete Pomazuva gopouhura, hompa gokoMuzogo nahompa gokoMbindakano ngava lirwanesa.

  Esikiliromo Germany nepangero lyaBritaniya naAmerika kwa lirwanesa. Momvhura 1945, epangero lyaSoviet Union nava ava likwatesa ko kwa ya kere hompa gomupe gokoMuzogo. Momvhura 1991, epangero lyaSoviet Union kwa hege, konyima sirongo saRusia nava ava si kwatesa ko kwa tamekere kukara hompa gomupe gokoMuzogo.

• Matjangwa Jes. 61:1; Mara. 3:1; Ruk. 4:18

  Uporofete Jehova nga tuma “ntumi” zi ‘wapeke’ nzira, komeho Uhompa waMesiyasa u tameke kupangera. Ntumi ozo nga zi udisira “vahepwe Mbudi zoNgwa.”

  Esikiliromo Kutundilira momvhura 1870, C. T. Russell novakwawo kwa tamekere kukona-kona Bibeli unene yipo fatwilire wopeke usili. Momvhura 1881, awo kwa dimbwilire asi ayo mulyo kovantu vaKarunga va lihameke moyirugana yokuzuvhisa. Awo kwa pwagesere yirongwa ngwendi “Wanted 1 000 Preachers” ntani “Anointed to Preach.”

• Etjangwa Mat. 13:24-30, 36-43

  Uporofete Mugara nga kuna yilya mepya, ano konyima nkore ngazi wiza nokuya kuna mau mepya lyoyilya. Mau noyilya ngayi kura kumwe dogoro posiruwo sokuteza. Posiruwo oso, mau ngava ga hangura koyilya.

  Esikiliromo Kutundilira momvhura 1870, vantu kwa tamekere kumona elisigo pokatji koVakriste wousili nava woyipempa. Pomazuva gopouhura, Vakriste wousili kwa va pongaikire nokuvagusa ko koVakriste woyipempa.

• Etjangwa Ndan. 2:31-33, 41-43

  Uporofete Nompadi derova nosivera kwa kara kosihwi sefano eli va ruganesa koyivera yokulisiga-siga.

  Esikiliromo Erova kwa fanekesa vantu ava ali pangere epangero lyaBritaniya naAmerika, ava ava rwanesa epangero olyo. Vantu owo kuninkisa epangero olyo li dire kukara nononkondo unene ngwendi sivera.

• Etjangwa Mat. 13:30; 24:14, 45; 28:19, 20

  Uporofete “Yilya” ngava yi pongaika “koutara” ntani “mukareli gokulimburukwa gonondunge” ngava mu tumba a kare “mutunini govantu vendi.” Ntani “mbudi zongwa” ngava zi divisa “mwa za uzuni mudima.”

  Esikiliromo Momvhura 1919, mukareli gokulimburukwa gonondunge kwa mu tumbire yipo a pitisire vantu vaKarunga. Kutundilira momvhura ozo, valirongi woBibeli kwa zuvhisire unene mbudi zongwa. Naina, Nombangi daJehova kuna kuzuvhisa mbudi zongwa moyirongo yokupitakana po-200 ntani awo kuna kupwagesa yimbapiratjangwa yoBibeli momaraka gokupitakana po-1 000.

• Matjangwa Ndan. 12:11; Ehor. 13:11, 14, 15

  Uporofete Sikasama sonombinga mbali ngasi tantera vantu vepevhu va rugane “efano lyosikasama” ntani aso ngasi tura “mwenyo mefano lyosikasama.”

  Esikiliromo Epangero lyaBiritaniya naAmerika kwa tulisire po mbunga zelipakerero lyoyirongo ndi League of Nations. Yirongo yapeke kwa tamekere kukwatesa ko mbunga ozo. Konyima, hompa gokoMuzogo nage kwa hamenene mombunga zelipakerero lyoyirongo kutundilira momvhura 1926 dogoro 1933. Vantu kwa tamekere kugazara asi mbunga ozo ngazi retesa po mbili mouzuni mudima. Uhompa waKarunga yiwo welike tupu wokuvhura kuretesa po mbili pevhu nalinye. Vantu kwa pura yininke yokulifana kuhamena mbunga zelipakerero lyonomuhoko ndi UN.

• Etjangwa Ndan. 8:23, 24

  Uporofete Hompa gononkondo ndi goyimpempa “nga reta ezonauko lyedona.”

  Esikiliromo Epangero lyaBritaniya naAmerika kwa dipaga vantu wovanzi nokuzonagura yininke yoyinzi. Pasihonena, poyita yauvali youzuni mudima, epangero lyaAmerika kwa zugumine noboma mbali douhungu unene mosirongo simwe esi ngasi dili kulizuvha kumwe naBritaniya ntani naAmerika. Noboma edi kwa retere yitundwamo yoyidona kupitakanena.

• Matjangwa Ndan. 11:31. NW; Ehor. 17:3, 7-11

  Uporofete “Sikasama sosigeha ge” sonombinga murongo ngasi tunda mosirongo sokonhi ntani aso ngasi kara hompa gwauntantatu. Buke zaNdaniyera kwa fanekesa hompa ogo ‘kosininke sosidona esi asi reta ezonauko.’

  Esikiliromo Mbunga zelipakerero lyoyirongo (League of Nations) kwa hege po posiruwo soyita yauvali youzuni mudima. Konyima zoyita, vahompa kwa tulisire po mbunga zelipakerero lyonomuhoko ndi UN. Ngwendi mbunga zelipakerero lyoyirongo, vantu kwa geve mfumwa ezi za wapera Uhompa waKarunga kombunga zelipakerero lyonomuhoko. Mbunga zelipakerero lyonomuhoko ngazi homokera maukarelikarunga goyimpempa.

• Matjangwa 1 Tes. 5:3; Ehor. 17:16

  Uporofete Mapangero ngaga divisa asi “nayinye mompora, kutupu upyakadi” ntani konyima “nombinga murongo” dosikasama ngadi homokera “hondedi”nokumuzonagura po. Ano konyima mapangero ngava ga zonagura po.

  Esikiliromo Mapangero ngaga divisa asi awo yina va tompoka kuretesa po mbili mouzuni mudima. Konyima mapangero aga aga kwatesa ko mbunga zelipakerero lyonomuhoko (UN) ngaga zonagura po maukarelikarunga goyimpempa. Esi ngasi kara sidiviso setameko lyoudigu wounene. Udigu wounene ngau ka haga po apa Jesus nga ka zonagura po uzuni waSatana poHarumagedoni.

• Matjangwa Hes. 38:11, 14-17; Mat. 24:31

  Uporofete Gogo nga homona vantu vaKarunga. Konyima, vaengeli ngava pongaika “vahoroworwa vendi.”

  Esikiliromo Hompa gokoMuzogo nomapangero gamwe gomouzuni, ngava homokera vantu vaKarunga. Konyima zehomono eli, vagwavekwa ava ngava hupa po ngava va pongaika nokuvatwara meguru.

• Matjangwa Hes. 38:18-23; Ndan. 2:34, 35, 44, 45; Ehor. 6:2; 16:14, 16; 17:14; 19:20

  Uporofete “Ogu ga rondere” ponkambe “zonzera” nga “pwaga ngwendi mufundi” nokuzonagura po Gogo kumwe novakwayita vendi. “Sikasama” tava si “zugumine mekurudiva lyomundiro,” ntani emanya tali myona sihwi sefano.

  Esikiliromo Jesus, Hompa goUhompa waKarunga, nga ka zowora vantu vaKarunga. Jesus kumwe novantu 144 000 ntani novaengeli ngava ka zonagura po nomuhoko edi ngadi homokera vantu vaKarunga. Konyima zoyita oyo, uzuni waSatana ngau ka haga po.