1-2. Maudigu musinke ava ligwanekere nago vanavazinyetu wovanzi?

MUPOSITOLI Paurusa kwa korangedere Timoteusa kukwatera mo Vakriste navenye va sikise mo sirugana sawo sokuzuvhisa. (2 Tim. 4:5) Ose kusikisa mo epukururo lyaPaurusa nokurugana paapa twa hulira. Nye nampili ngoso, ose kuligwanekera nomaudigu. Vanavazinyetu wovanzi kuhepa uradi yipo va lihameke mo mokuzuvhisa. (2 Tim. 4:2) Gazadareni ko vanavazinyetu ava va tunga moyirongo omu va silika sirugana setu. Awo kuzuvhisa nampili ngomu va yi diva asi kuvhura va va ture modorongo.

² Vantu vaJehova kuligwanekera nomaudigu gomanzi aga aga va dompesa. Pasihonena, wovanzi kurugana novili dononzi yipo va gwane yihepwa yokureresa mapata gawo. Awo va kara neharo lyokurugana unene mokuzuvhisa, nye kapi ava kara nononkondo dononzi mosikondovike. Vamwe kapi ava rugana unene morwa kuvera-vera ndi ukurupe ndi kapi ava gendi. Ano vamwe kulizuvha asi awo kwato mulyo kwaJehova. Munazinyetu gomukadi Mary, * kwa tanta asi: “Ame kukondja unene yipo ni nyokere po malizuvho gange gomadona aga aga rorora nge panandunge. Makura ame kulizuvha unzoni morwa ayo kumana siruwo sange nononkondo dange edi ngano na hepa kuruganesa mokuzuvhisa.”

3. Yisinke natu ka zogera mosirongwa esi?

³ Yi kare asi maudigu musinke tuna kupita, Jehova kuvhura kutupa nonkondo tu ga lididimikire nokutwikira kumukarera paapa twa hulira. Komeho tu ka zogere omu Jehova natu vatera, tu zeni tu zogere omu ga nkondopekere Paurusa naTimoteusa va sikise mo sirugana sokuzuvhisa nampili ngomu va li gwanekerere nomaudigu.

4. Maudigu musinke ga ligwanekerere nago Paurusa?

⁴ Paurusa kwa ligwanekerere nomaudigu gomanzi. Age ga hepere nonkondo dokutunda kwaJehova apa va mu toonene nokumutura modorongo ntani napa va here kumudipaga. (2 Kol. 11:23-25) Paurusa kwa uyungire hena asi poyiruwo yimwe nga kara nomalizuvho gomadona. (Rom. 7:18, 19, 24) Age kwa kere hena noudigu ou wa fene ngwendi “nsonga morutu” ntani age kwa here asi ngano Karunga a u mu guse.—2 Kol. 12:7, 8.

5. Yisinke ga sikisire mo Paurusa nampili ngomu ga ligwanekerere nomaudigu?

⁵ Jehova kwa pere Paurusa nonkondo a sikise mo sirugana sokuzuvhisa nampili ngomu ga ligwanekerere nomaudigu. Tu tareni eyi ga sikisire mo Paurusa. Pasihonena, apa ga kere membo monomango moRoma, age kwa zuvhisilire vampitisili woVajuda ntani nampo navamwe vemepangero. (Yirug. 28:17; Fil. 4:21, 22) Age hena kwa zuvhisilire vanomeni womombara ntani nanavenye ava ngava mu dingura. (Yirug. 28:30, 31; Fil. 1:13) Posiruwo oso, Paurusa kwa tjenge hena nombilive edi da vaterere Vakriste kutunda kwanare dogoro ngesi. Sihonena saPaurusa kwa korangedere mbungakriste zomoRoma, ano eyi kwa vaterere vapuli vakwawo “va kare nomupampi mokuuyunga nonkango daKarunga va hana woma.” (Fil. 1:14) Nampili ngomu ukaro waPaurusa wa mu ninkisire a dire kurugana moomu ga yi harerere, nye age kwa rugene paapa ga hulira ntani azo kwa kere “mpito zongwa zokuhanesa Mbudi zoNgwa.”—Fil. 1:12.

6. Kuliza no 2 Vakolinte 12:9, 10, yisinke ya vaterere Paurusa a sikise mo sirugana sokuzuvhisa?

⁶ Paurusa ga yi dimbwilire asi nonkondo dokutunda kwa Jehova yido da mu vaterere a sikise mo sirugana sendi nye kapisi mononkondo damwene. Age kwa uyungire asi nonkondo daKarunga kwa “nenepere moupirankondo wendi.” (Resa 2 Vakolinte 12:9, 10.) Jehova kwa ruganesere mpepo zendi zokupongoka zi pe Paurusa nonkondo yipo a sikise mo sirugana sokuzuvhisa nampili ngomu va mu hepekere nokumutura modorongo ntani nokupita momaudigu gamwe.

7. Maudigu musinke ngano ga ninkisire Timoteusa yi mu karere udigu kusikisa mo sirugana sokuzuvhisa?

⁷ Timoteusa nga rugana kumwe naPaurusa. Nage ga hepere nonkondo daKarunga mokusikisa mo sirugana sokuzuvhisa. Timoteusa  nga gendi kumwe naPaurusa momarugendo goutumwa. Paurusa nga tumu hena Timoteusa a ze a ka dingure nombungakriste nokudikorangeda. (1 Kol. 4:17) Timoteusa nampo ga lizuvhire asi kwato udivi. Eyi yiyo nampo ya ninkisire Paurusa a tantere Timoteusa asi: “Walye ava ku dini morwaunona woge.” (1 Tim. 4:12) Ntani posiruwo esi, Timoteusa kwa kere hena nouvera ‘wokukora-kora.’ (1 Tim. 5:23) Nye Timoteusa gayi divire asi mpepo zokupongoka ngazi mu pa nonkondo yipo a zuvhise mbudi zongwa nokuvatera vapuli vakwawo.—2 Tim. 1:7.

8. Ngapi Jehova ana kuvatera vantu vendi neina?

⁸ Jehova kuna kugava neina ‘nonkondo dendi dononene’ kovantu vendi yipo di va vatere va twikire kumukarera noulimburukwi. (2 Kol. 4:7) Tu zeni tu ka zogere yininke yine eyi ga tu pa Jehova yipo yi tu nkondopeke ntani nokutuvatera tu twikire kumulimburukwa. Ayo kuna kara ekanderero, Bibeli, vapuli vakwetu ntani sirugana sokuzuvhisa.

9. Ngapi nali tu vatera ekanderero?

⁹ Kugwana nonkondo kupitira mekanderero. MoVaefeso 6:18, Paurusa kwa tu korangedere tu kanderere kwaKarunga “nkenye apa.” Ano Karunga ngatu nkondopeka. Jonnie ogu ga tunga moBolivia kwa limonena usili wononkango odo apa ga pitire momaudigu. Mukadendi novakondi vendi kwa verere unene posiruwo simwe tupu. Ayo kwa digoperere Jonnie mokuvapakera mbili navenye vatatu. Ozina kwa ya dogorokere ntani ayo kwa gusire siruwo sosire komeho mukadendi noguhwe va veruke. Apa Jonnie a diworoka maudigu aga ga pitire, age kwa tanta asi: “Apa ngani kara nosinka unene, ame ngani kanderere kwaJehova nokumutantera omu na lizuvhire, ano eyi kwa vaterere nge.” Jehova kwa pere Jonnie nonkondo a lididimikire. Ronald mukuronambunga gomoBolivia kwa zuvhire asi ozina vana kara nokankera. Awo kwa dogorokere konyima zokwedi kumwe. Yisinke ya mu vaterere a lididimikire? Age kwa tanta asi: “Apa ani kanderere kwaJehova, ame kumutantera nayinye omu nina kulizuvha. Na yi diva asi age kukwata nge nawa egano kupitakana nkenye gumwe ntani kupitakana nge nyamwange.” Poyiruwo yimwe kuvhura tu lizuvhe ngwendi kapi tatu vhuru kulididimikira maudigu ntani kuvhura tu dire kudiva eyi natu tumbura mekanderero. Nye Jehova kuna tu harere tu kanderere kwendi nampili yi kare udigu kufaturura omu tuna kulizuvha.—Rom. 8:26, 27.

10. Kuliza noVahebeli 4:12, morwasinke ya karera nomulyo kuresa Bibeli nokuteda ko?

¹⁰ Kutunkondopeka kupitira moBibeli. Paurusa nga resa Matjangwa a gwane nonkondo nehengagwido, nose twa hepa kurugana yokulifana. (Rom. 15:4) Nsene tu resa Bibeli nokuteda ko, Jehova nga tu vatera tu dimburure omu Bibeli nazi tu vatera. (Resa Vahebeli 4:12.) Ronald ogu katu tumbura ketameko kwa tanta asi: “Nina hafa kweyi na li tulilire po sitambo sokuresa Bibeli nkenye ngurova. Ame kuteda nkenye apa kuhamena yikara yaJehova ntani nomu a pakere mbili vakareli vendi. Eyi kuvatera nge ni gwane nonkondo.”

11. Ngapi Bibeli za nkondopekere munazinyetu gumwe gomukadi ogu ga guvire?

¹¹ Nsene tu teda ko koNonkango daKarunga, ose ngatu tara maudigu getu monkedi zouhunga. Tu tareni omu Bibeli za vaterere mufisayendi gumwe. Mukuronambunga gumwe kwa pere ko egano mufisayendi ogo,  a rese buke zaJoba a lirongere ko yirongwa yomulyo. Apa ga yi rugene, age pomuhowo kwa kuyaukire Joba morwa magazaro gendi gomadona. Ngomu ga mwene sihorokwa saJoba momagano, makura ta rondora Joba asi: “Wa ha gazara tupu kuhamena maudigu goge.” Makura konyima mufisayendi ogo ta dimburura asi nani nage kwa kere nonkareso ngwendi zaJoba. Eyi kwa mu vaterere a rundurure mutaro gwendi nokumunkondopeka a lididimikire ruguwo rwendi.

12. Ngapi Jehova a tu pe nonkondo kupitira movapuli vakwetu?

¹² Kutunkondopeka kupitira movapuli vakwetu. Nkedi zimwe omu Jehova a nkondopeke Vakriste kuna kara kupitira movapuli vakwetu. Paurusa kwa tjenge asi age kwa here kugwana “ekwafo” kovapuli vakwawo. (Rom. 1:11, 12) Mary ogu tuna tumbura ketameko kuyihafera kukara kumwe novapuli vakwawo. Age kwa tanta asi: “Jehova kwa ruganesa vanavazinyetu ava va dilire kudiva maudigu gange. Awo ngava korangeda nge nokutjangera nge tukarata, eli yilyo evatero na hepere. Ayo mulyo hena kupura vanavazinyetu wovakadi ava va pita moudigu wokulifana va ku tantere eyi va rugene ko. Vakuronambunga kuvatera nge nkenye apa ni dimburure asi name mulyo mombungakriste.”

13. Ngapi natu linkondopeka-nkondopeka komapongo?

¹³ Mapongo kuna kara mpito zongwa zokulikorangeda-korangeda. Nsene komapongo ono kara, kuvhura o nkondopeke vakweni pokuvatantera asi wa va hara ntani nokuvapandura koyirugana yawo. Pasihonena, mukuronambunga gumwe Peter kwa tanterere zinya ogu ga kwara muhapuli asi: “Ayo kutukorangeda mokukumona kuna kuwiza komapongo. Ove nkenye apa kuwiza novana woge ntazimwe ntani nokugava malimbururo.” Nonkango odo kwa mu gumine sili komutjima makura ta uyunga asi: “Nonkango doge da korangeda nge unene.”

14. Ngapi asi tu kundama sirugana sokuzuvhisa?

¹⁴ Kutunkondopeka kupitira mosirugana sokuzuvhisa. Apa atu zuvhisire wopeke, ose kulizuvha epwizumuko nokukara noruhafo yi kare asi vantu kwa ku tambura mbudi zetu ndi hawe. (Yis. 11:25) Munazinyetu gomukadi Stacy ga limonena omu sirugana sokuzuvhisa sa mu nkondopeka. Apa gumwe gekoro lyawo va mu gusire mombunga, age kwa guvire unene nokulipura asi, ‘koyili ngano na hepere kurugana ko ndi?’ Stacy ngayi mu digopere kuhageka kugazara udigu owo. Yisinke ya mu vaterere a lididimikire udigu owo? Sirugana sokuzuvhisa kwa mu vaterere. Ngomu nga zuvhisa, age kwa tamekere kudemenena kovantu ava nga zuvhisire. Age kwa tanta asi: “Posiruwo oso, Jehova kwa vaterere nge ni gwane murongwa ogu ga ya tulire po ezokomeho. Eyi kwa korangedere nge unene. Sininke esi sa vatera nge unene meparu lyange kuna kara sirugana sokuzuvhisa.”

15. Yisinke ono lirongere ko kononkango daMary?

¹⁵ Ukaro wovantu kuninkisa vamwe va lizuvhe ngwendi kapi vana kurugana unene mokuzuvhisa. Nsene yimo o lizuvhu ngoso, diworoka asi Jehova kumuhafesa nsene o rugana paapa wa hulira. Tu tareni hena sihonena saMary. Apa ga dirukilire kombungakriste zemeraka lyapeke, age kwa lizuvhire ngwendi kapi ta vhuru kuyisikisa mo. Age kwa tanta asi: “Poyiruwo yimwe, ngani gava tupu egano lyoureru ndi kuresa velise ndi kugava sitaratate.” Eyi kwa mu ninkisire a lizuvhe asi kapi ga kere noudivi ngwendi vakwawo ava ngava uyunga eraka olyo. Nye ga ya rundwilire mutaro gwendi. Ga ya dimbwilire asi Jehova kuvhura  a mu ruganese nampili ngomu nga dili kuuyunga nawa eraka. Age kwa tanta asi: “Eyi azi uyunga Bibeli ureru ntani usili owo kuvhura kurundurura eparu lyovantu.”

16. Yisinke nayi vatera ava va kara neharo lyokuzuvhisa nye awo kapi ava vhuru kutunda momambo?

¹⁶ Jehova ga yi diva asi ose vamwe kwa hara kuzuvhisa nye kapi atu vhuru kutunda membo tu ka zuvhise. Age kuvhura kutuvatera tu zuvhisire ava ava tu pakere mbili ndi vandokotora novanesa. Nsene tu hetakanesa yirugana yetu yanare neyi tuna kurugana ngesi, ngatu dompa mutjima. Nye nsene tu dimburura omu Jehova ana kutuvatera, ngatu kara nononkondo dokulididimikira nkenye udigu.

17. Kuliza naMuudisi 11:6, morwasinke natu twikilira kuzuvhisa nampili kapi tuna kumona yitundwamo usimbu?

¹⁷ Kapi tuna diva asi mbuto musinke zokuhamena kousili tuna ku kuna ezi ngazi kara nonondandani nokutameka kukura. (Resa Muudisi 11:6.) Pasihonena, munazinyetu gomukadi Barbara gonomvhura dokoyiha 80 nga zuvhisa nkenye apa noterefona ntani nokutjanga nombilive. Mombilive zendi zimwe, kwa tulire mo Ruhungu rwaKudumonkuru-Pembagona 2014 rosiparatjangwa asi: “Eyi ga ku ruganena Karunga.” Ga hana kuyidivira, age kwa tumine nombilive kovalikwali ava va gusire mombunga. Awo ngava resa nombilive odo nkenye apa. Nturagumbo kwa lizuvhire ngwendi Jehova kuna kumuuyungisa. Valikwali owo kwa tamekere kuza komapongo. Awo kwa ya kere hena Nombangi daJehova konyima zonomvhura dokupitakana 27, kutunda apa va va gusire mombunga. Gazara tupu omu ya korangedere Barbara nokumunkondopeka apa ga mwene yitundwamo yoyiwa morwa mbilive zina!

18. Yisinke natu rugana yipo tu gwane nonkondo dokutunda kwaKarunga?

¹⁸ Jehova kwa tu pa yininke yoyinzi mokutuvatera tu gwane nonkondo. Pasihonena, age ga tu pa ekanderero, Bibeli, vapuli vakwetu ntani sirugana sokuzuvhisa. Nsene tu ruganesa yininke eyi, ngatu yi likida asi ose twa mu huguvara ntani kuvhura a tu vatere. Tu twikireni kuhuguvara mwaGuhyetu gemeguru ogu a hafere “kugava nonkondo kwanavenye ava ava hama kwendi nomutjima nagunye.”—2 Hist. 16:9.