1-2. Yisinke ga uyungire mutjangi gumwe ntani yisinke natu ka zogera mosirongwa esi?

VANTU wovanzi neina kuuyunga asi va pura mwaJesus nye awo kapi ava limburukwa eyi nga rongo. (2 Tim. 4:3, 4) Mutjangi gumwe kwa tente asi: “Ngano asi neina pevhu pwa kara mugara ogu a uyunga ngwendi eyi ga uyungire Jesus apa ga kere pevhu, kuvhura tu nyoke kumupurakena ngwendi moomu vantu va nyokere kupurakena Jesus ndi? . . . Elimbururo kuna kara asi: Nhi, kuvhura tu nyoke kumupurakena.”

² Apa Jesus ga ya kere pevhu, vantu wovanzi va zuvhire eyi nga rongo ntani va mwene yitetu eyi nga rugana nye kapi va mu pulire. Morwasinke? Mosirongwa sa kapita ka tu lirongere nokonda deyi vantu va nyokerere kupurakena eyi nga uyunga Jesus neyi nga rugana. Tu zeni tu ka zogere ko hena nokonda ne mosirongwa esi. Ngomu natu ka lironga, natu ka dimburura hena nokonda edi adi ninkisa vantu va dire kupurakena kovarongwa vaJesus ntani nomu natu nyokera po eyi nayi tu kondera mokukarera Jehova.

3. Yisinke ga rugene Jesus eyi ya ninkisire vamwe va punduke?

³ Apa Jesus ga ya kere pevhu, age nga li tulire po siruwo sokukara novantu wokulisiga-siga. Age nga li nonongawo novapangeli ntani nga kara novantu woruhepo nava ngava hepeke. Ntani age kwa fililire nkenda vantu ava ngava tara asi “vananzo.” Vantu vamwe wokulinenepeka kwa va pundukisire yininke  eyi nga rugana Jesus. Awo kwa pulire varongwa vendi asi: “Yinke muna kulira oku tomu nu kumwe noVafutisi womutero novananzo?” Makura Jesus ta va limburura asi: “Ava va kanguka kapi va hepa muhakuli, vaveli ntani yiwo va mu hepa. Ame kapi na wizira asi ni ya zigide vahungami, vananzo na wizira asi va litezurure.”—Ruk. 5:29-32.

4. Kuliza neyi ga pumbire Jesaya, yisinke ngano Vajuda va ndindilire ko kwaMesiyasa?

⁴ Yisinke aga uyunga ko Matjangwa? Komeho Mesiyasa a wize pevhu, muporofete Jesaya kwa fatwilire asi vantu kapi ngava tambura Mesiyasa. Jesaya kwa pumbire asi: “Vantu ngava mu swaura, tava mu zumbu . . . ngwendi gogu asi vantu kulikudumika koyipara asi va dire kumutara, ngava mu swaura, kapi ngava mu tara eho.” (Jes. 53:3) Uporofete kwa tente asi vantu ngava nyoka Mesiyasa, ano Vajuda womomazuva gaJesus va hepere kuyindindira asi Jesus ngava mu nyoka.

5. Ngapi sinzi sovantu ava tara varongwa vaJesus neina?

⁵ Nose kuna kumona udigu wokulifana neina ndi? Nhi. Sinzi sovampitisili womaukarelikarunga kuhafa apa ava tambura vantu wokudivikwa nonongawo momaukarelikarunga gawo. Vampitisili owo, kutambura vantu owo nampili ngomu ava rugana yininke eyi ga nyenga Karunga. Vampitisili owo kutara vakareli vaJehova asi kwato mulyo morwa sinzi sovantu womouzuni yimo ava va tara ngoso. Ngomu tupu ga yi uyungire Paurusa asi Karunga kwa horowora “ava va swaura.” (1 Kol. 1:26-29) Nye nampili ngoso, Jehova kutara vakareli vendi navenye wovalimburukwi asi mulyo.

6. Yisinke ga uyungire Jesus mwaMateusa 11:25, 26 ntani ngapi natu mu honena?

⁶ Yisinke natu rugana tu divilise asi kapi tuna kuhageka kukarera Jehova? (Resa Mateusa 11:25, 26.) Ya ha ku pukisa monkedi omu vantu womouzuni ava tara vantu vaKarunga. Diva asi Jehova kuruganesa vantu wokulinunupika va sikise mo mpango zendi. (Epis. 138:6) Ntani gazadara ko eyi ga sikisa mo pokuruganesa vantu ava ava tara mouzuni ou asi kwato nondunge.

7. Morwasinke Jesus ga tumbwilire Vafalisayi asi vayilipaki ntani yisinke va gazarere apa va yi zuvhire?

⁷ Jesus kwa uyungire nouradi pokutura vampitisili womaukarelikarunga poruzera morwa kapi ngava rongo vantu va karere Karunga. Pasihonena, Jesus kwa tulire poruzera uyilipaki woVafalisayi ava va kere nosinka unene sokulikuhwa komawoko kupitakana kupakera mbili vakondi vawo. (Mat. 15:1-11) Ayo nampo ya tetukisire varongwa vaJesus apa va zuvhire nonkango odo. Awo kwa mu pulire asi: “Ono diva tupu asi Vafalisayi, apa vana zuvhu nkango ozo, kuna va koro?” Jesus makura ta va limburura asi: “Nkenye sikunwa, esi ga dira kukuna Tate gemeguru, ngava si dura mo. Va sigeni tupu: awo kwa twika, yiyo hena ava pitisire vatwiku.” (Mat. 15:12-14) Nampili ngomu vampitisili womaukarelikarunga ya va handukisire eyi ga uyungire Jesus, nye Jesus kapi ga hagekere kuuyunga usili.

8. Ngapi ga yi likidire Jesus asi Karunga kapi a hafere marongo gomaukarelikarunga nagenye?

⁸ Jesus kwa tulire hena poruzera marongo goyimpempa gomaukarelikarunga. Age kapi ga uyungire asi Karunga kutambura marongo gomaukarelikarunga nagenye. Nye age kwa fatwilire asi vantu wovanzi ngava genda monzira zokungwanyunuka ezi azi twara kokudona, ano wovasesu ngava genda monzira zokulikokera ezi azi twara komwenyo. (Mat. 7:13, 14) Jesus kwa yi zeresere nawa asi vamwe ngava moneka ngwendi kukarera Karunga nye nani kapi ava mu karere. Age kwa rondwere asi: “Omu tjire vaporofete woyimpempa, ava ava  mu wizire monomudwaro dononzwi, ano nye monda zawo mambungu aga aga kwata, taga papagura. Koyiyimwa yawo yiko ngomu va divira.”—Mat. 7:15-20.

9. Marongo musinke gamwe goyimpempa gomaukarelikarunga aga Jesus ga tulire poruzera?

⁹ Yisinke aga uyunga ko Matjangwa? Uporofete womoBibeli kwa pumbire asi Mesiyasa nga kara noupampi monzugo zaJehova. (Epis. 69:9; Joh. 2:14-17) Upampi owo kwa tumangedere Jesus a ture poruzera marongo gomaukarelikarunga goyimpempa ntani neyi ngava rugana. Pasihonena, Vafalisayi kwa pulire asi mwenyo gomuntu gokufa kutwikira kuparuka, nye Jesus kwa rongere asi vafe kuna rara. (Joh. 11:11) Vasadukayi kapi va yi pulire asi evhumbuko yiko ngali kara, nye Jesus kwa vhumbwire kaume kendi Rasarusa. (Joh. 11:43, 44; Yirug. 23:8) Vafalisayi ngava rongo asi Karunga kutokora yininke nayinye eyi ngayi tu horokera komeho ndi eyi ngatu rugana, nye Jesus kwa rongere asi vantu kuvhura va tokore vene nsene asi tava karere Karunga ndi hawe.—Mat. 11:28.

10. Morwasinke sinzi sovantu ava dilire kutambura marongo getu?

¹⁰ Nose kuna kumona udigu wokulifana neina ndi? Nhi. Vantu wovanzi kapi ava tambura eyi atu rongo morwa ose kuruganesa Bibeli tu yi likide asi marongo gamwe gomaukarelikarunga, yipempa. Vampitisili womaukarelikarunga kuronga vantu vawo asi Karunga kuhwika vantu wovadona momundiro. Awo kuruganesa erongo olyo lyoyipempa yipo va kumbagere vantu. Ngovakareli vaJehova ava ava karere Karunga geharo, ose kuronga vantu va kwate egano asi erongo olyo yipempa. Vampitisili womaukarelikarunga kuronga hena asi mwenyo gomuntu kutwikira kuparuka apa a fu muntu. Ngano asi erongo olyo usili, eyi ngano kulikida asi kapi ngaku kara evhumbuko. Nye ose kuruganesa Bibeli tu yi likide asi erongo olyo yipempa. Ntani nampili ngomu vampitisili womaukarelikarunga ava rongo asi nkenye yininke eyi atu rugana Karunga nare ga yi tokora, nye ose kuronga asi nkenye muntu ga kara noumanguruki nsene asi ta karere Karunga ndi hawe. Ngapi ava lizuvhu vampitisili  womaukarelikarunga apa atu tura marongo gawo goyipempa poruzera? Rorunzi awo kuhanduka.

11. Kuliza nononkango daJesus da kara mwaJohanesa 8:45-47, yisinke ana harere Karunga vantu vendi va rugane?

¹¹ Ngapi omu natu nyokera po kupunduka? Nsene twa hara usili, twa hepa kutambura nokulimburukwa Nonkango daKarunga. (Resa Johanesa 8:45-47.) Mokulisiga naSatana Muzonaguli, ose twa hepa kukwaterera kousili. Kapi tuna hara kurugana yininke eyi ya lilimba neyi twa pura. (Joh. 8:44) Karunga kuna harere vantu vendi va ‘nyenge udona nokuhama kouwa’ ngwendi moomu tupu ga yi rugene Jesus.—Rom. 12:9; Heb. 1:9.

12. Morwasinke sinzi soVajuda ya va pundukisilire monkedi omu Jesus va mu dipagere?

¹² Konda musinke zimwe ezi za ninkisire Vajuda womosiruwo saJesus va punduke? Paurusa kwa tente asi: ‘Ose kuudisa Kristusa ogu va pamparere kositji, mbudi zokulimbikisa Vajuda.’ (1 Kol. 1:23) Morwasinke nkedi ezi va dipagere Jesus za pundukisilire sinzi soVajuda? Monkedi omu va dipagere Jesus kositji, kwawo kwa yi mwene asi age mukorokotji ntani munanzo nye kapisi Mesiyasa.—Deut. 21:22, 23.

13. Yininke musinke va dilire kudimburura vantu ava da pundukisire nomfa daJesus?

¹³ Vajuda vamwe ava da pundukisire nomfa daJesus kapi va yi dimbwilire asi Jesus kapi ga peke unzoni, nye vantu kwa mu rundilire tupu nokumutekura momudona. Ava va pangwire Jesus kapi va mu pangwire mouhunga. Vapanguli womompanguro zonene zoVajuda kapi va pangwire Jesus kuliza nonoveta. (Ruk. 22:54; Joh. 18:24) Mevango lyokupurakena komaumbangi ntani neyi va rundilire Jesus, vapanguli “kwa paparere Jesus umbangi woyimpempa asi va mu twaredese konomfa.” Nye maumbangi gawo goyipempa kapi ga lizire kumwe, makura mupristeli gomunene yipo ga hetekerere ko kuninka Jesus a uyunge yininke yepuko yipo va mu gwane unzoni. Eyi va rugene kwa li rwanesere noveta. (Mat. 26:59; Mar. 14:55-64) Konyima zapa Jesus va mu vhumbwire, vapanguli owo kwa futire yimaliwa yoyinzi  kovakwayita woVaroma ava va kungire ntoko zaJesus yipo va hanese mbudi zoyipempa kuhamena konda zeyi ntoko zaJesus za karerere siporongwa.—Mat. 28:11-15.

14. Yisinke va pumbire moMatjangwa kuhamena nomfa daMesiyasa?

¹⁴ Yisinke aga uyunga ko Matjangwa? Nampili ngomu Vajuda wovanzi va dilire kuyindindira asi Mesiyasa nga fa, konekeni eyi ga pumbire Matjangwa asi: “Age kwa gava mwenyo gwendi, tava mu varwilire kosigwana sovanzoni. Age kwa gusa evega lyovananzo wovanzi, ta kanderere asi va va dongwenene po.” (Jes. 53:12) Yipo nye, Vajuda kapi va kere ngano nokonda zokupunduka monkedi omu Jesus va mu dipagere.

15. Marundiro musinke va rundira Nombangi daJehova aga ga ninkisa vamwe va dire kutambura mbudi zetu?

¹⁵ Nose kuna kumona udigu wokulifana neina ndi? Nhi. Jesus kwa mu rundilire nokumugwana unzoni woyipempa, ano eyi yiyo dina kupita Nombangi daJehova neina. Tu tareni ko yihonena yimwe. Kutundilira mo-1930 dogoro 1950, moAmerika mwa kere nompanguro dononzi omu vanavazinyetu ngava popere umanguruki wawo wokukarera Jehova. Vapanguli vamwe ngava tu tekura momudona. MoQuebec moKanada, ngereka ntani sirongo saKanada ngayi ruganene kumwe yipo va hagekese po sirugana setu. Vazuvhisi wovanzi ngava va tura modorongo morwa yeeyi ngava zuvhisire vamusinda vawo kuhamena Uhompa waKarunga. MoNdovesiranda, epangero lyaNazi kwa dipagere vanavazinyetu wovagara wovadinkantu wovanzi. Monomvhura edi da ntaantani, vanavazinyetu wovanzi womoRusia kwa va kwata nokuvatura monodorongo morwa yeeyi ava zogere novantu kuhamena Bibeli. Epangero kwa tanta asi ayo yirugana youkorokotji. Bibeli zetu New World Translation of the Holy Scriptures zemeraka lyoruRusia kwa zi silika ku zi ruganesa ntani kuzi tumbura asi yirugana youkorokotji morwa yeeyi va ruganesa mo edina Jehova.

16. Ngomu va yi likida mwa-1 Johanesa 4:1, morwasinke natu nyokerera po nombudi doyipempa kuhamena Nombangi daJehova?

¹⁶ Ngapi omu natu nyokera po kutupundukisa? Diva usili wene-wene kuhamena yuma yongandi. PEudiso lyaJesus lyopoNdundu, age kwa rondwere varongwa vendi asi: ‘Vantu ngava mu uyungira yoyidona nayinye moyimpempa-mpempa tupu.’ (Mat. 5:11) Satana yige a retesa po yipempa eyi. Age kuruganesa varwanesi va hanese yipempa kuhamena vantu ava va hara usili. (Ehor. 12:9, 10) Twa hepa kunyokera po yipempa oyo. Twa ha pulisira yipempa eyi yi tu tjilise ndi yisesupike epuro lyetu.—Resa 1 Johanesa 4:1.

17. Ngapi yihorokwa eyi ya horokere komeho Jesus va ka mu dipage ya ninkisire vamwe va punduke?

¹⁷ Komeho tupu Jesus va ka mu dipage, gumwe govapositoli vendi 12 kwa mu horwere. Ano mupositoli gwendi gumwe kwa mu patanene yikando yitatu ntani vapositoli vendi navenye kwa mu zumbire masiku gendi gokuhulilira komeho va ka mu dipage. (Mat. 26:14-16, 47, 56, 75) Jesus kapi ya mu tetukisire morwa ga yi uyungire nare asi yimo ngayi horoka. (Joh. 6:64; 13:21, 26, 38; 16:32) Apa vantu va mwene yininke oyo, vamwe nampo ya va pundukisire nokuuyunga asi ‘nsene asi vapositoli vaJesus yimo va kara ngoso, ame kapi nina hara kukara gumwe gwawo.’

18. Mauporofete musinke gokuhamena Jesus ga ya sikilire mo komeho tupu a fe?

¹⁸ Yisinke aga uyunga ko Matjangwa? Nomvhura dononzi komeho Jesus a wize pevhu, Nonkango daKarunga kwa pumbire asi Mesiyasa ngava mu horora noyimaliwa 30 yosisiliveli.  (Sak. 11:12, 13) Matjangwa kwa pumbire hena asi kaume gumwe gwaJesus yige ngaya mu horora. (Epis. 41:9) Muporofete Sakaliya kwa tjenge asi: “Mu dipaga, makura nonzwi ngadi liharagane.” (Sak. 13:7) Mevango lyokuvapundukisa yihorokwa eyi, epuro lyovantu wonomutjima donongwa kwa peme apa va mwene mauporofete gokuhamena Jesus kuna kusika mo.

19. Yisinke va diva vantu wonomutjima donongwa?

¹⁹ Nose kuna kumona udigu wokulifana neina ndi? Nhi. Mosiruwo setu, Nombangi dimwe kwa siga usili nokukakara varwanesi usili ntani nokuhetekera ko kupukisa wopeke. Awo kwa hanesa magano gepuko kuhamena Nombangi daJehova kupitira monosaitunga, konoradiyo, konotivi ntani kointaneta. Nye magano ogo kapi aga pukisa vantu wonomutjima donongwa. Awo va yi diva asi yininke oyo ngayi horoka morwa Bibeli za yi pumba.—Mat. 24:24; 2 Pet. 2:18-22.

20. Yisinke natu rugana yipo magano gava va siga usili ga dire kutupundukisa? (2 Timoteusa 4:4, 5)

²⁰ Ngapi omu natu nyokera po kutupundukisa? Twa hepa kunkondopeka epuro lyetu pokulironga nkenye apa nokukanderera nkenye apa ntani pokulitura mo unene moyirugana eyi ga tu pa Jehova. (Resa 2 Timoteusa 4:4, 5.) Nsene tu kara nepuro, kapi ngayi tu tjilisa apa ngatu zuvha nombudi doyimpempa. (Jes. 28:16) Nsene tu twikira kuhara Jehova noNonkango dendi ntani novanavazinyetu, ose kapi ngatu pulisira vantu ava va siga usili va tu pundukise.

21. Ehuguvaro musinke twa hepa kukara nalyo nampili ngomu vantu ava dili kupurakena kombudi zetu?

²¹ Mosiruwo sovapositoli, vantu wovanzi kwava pundukisire ntani awo kwa nyokere kupurakena Jesus. Nye vamwe hena wovanzi ngava kwama Jesus kukwatera mo gumwe gomosigongi somasimbi ntani “mbunga zovapristeli.” (Yirug. 6:7; Mat. 27:57-60; Mar. 15:43) Mokulifana naneina, vantu wovanzi kwa tokora kukwama Jesus. Morwasinke? Morwa va diva usili ou wa kara moMatjangwa ntani va u hara. Nonkango daKarunga kutanta asi: “Ava va hara Veta zoge kwa kara nompora zonzi, ako kutupu eyi yokuvaganda.”—Epis. 119:165.