Sihorokwa oso sokutjilisa kwa tjindjire eparu lyange morwa ame kwa tamekere kudiva Karunga. Nye komeho ni ka simwitire eyi ya horokere masiku ogo, tanko ni mu tantere ko kuhamena yininke eyi ya horokerere nge apa na kere munona. Yininke oyo kwa ninkisire nge ni hare kulironga kuhamena Karunga.

Ame kwa hampuruka nge mo-1937 moFransa, modoropa Guesnain omu mwa kere mina. Otate kwa kere vanamina womakara, ame kwa lirongerere ko kwawo mulyo gokurugana unene. Otate kwa rongere nge ni nyenge udona. Awo kwa mwene vanamina wovanzi omu ngava va tekura momudona ntani awo kwa here kuvavatera. Eyi kwa va ninkisire va li hameke monombunga edi adi kondjere umanguruki wovanamina. Otate kwa va guvisire hena yirugana yoyidona eyi ngava rugana varuti. Sinzi sawo ngava paruka nawa, nye simpe awo ngava pura vanamina woruhepo va va pe ko yimaliwa nonondya. Yirugana yawo kwa handukisire otate, ano eyi kwa ninkisire otate va dire kuronga nge yokuhamena ukarelikarunga.  Ose kapi ngatu zogere kuhamena Karunga nampili rumwe.

Ngomu na kulire, name kwa nyengere udona. Sininke simwe sosidona ngani mono sesi asi vantu wovanzi kwa nyengere vanayirongo ava va tungire moFransa. Ame ngani dana mbara novana wovanayirongo ntani ngani yi hafere. Onane kwa kere Vapolish nye kapisi Vafransa.

Ame kwa zire moukwayita mo-1957. Eyi yiyo ya ninkisire nge ni ka kare monondundu daAlgeria masiku aga kani tumbura muhowo. Konyima zapa na li kwamberere kwaKarunga, ame kwa mwene sindongi somoyihwa nye kapisi mukwayita. Kwa hafesere nge sili. Sihorokwa oso ntani yita, kwa ninkisire nge ni lipure sitambo separu. Morwasinke twa karera kontunda zevhu? Karunga kutupakera sinka ndi? Ngatu kara nombili zanarunye ndi?

Konyima zapa na zire kembo kovakondi vange kepwizumuko, ame kwa li gwene na gumwe goNombangi daJehova. Age kwa pere nge Bibeli. Ame kwa tamekere kuziresa apa na tengwire koAlgeria. Etjangwa limwe eli lya gumine nge komutjima kuna kara Ehororo 21:3, 4. Alyo kutanta asi: “Nzugo zaKarunga pozili povantu . . . Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.” Nonkango odo kwa tetukisire nge. Ame kwa lipulire nsene asi ado usili. Posiruwo oso, kwato eyi na divire nawa kuhamena Karunga noBibeli.

Konyima zapa na mene sirugana sange soukwayita mo-1959, ame kwa li gwene namunazinyetu François. Age kwa rongere nge yirongwa yoyinzi moBibeli. Pasihonena, age kwa likidire nge moBibeli asi edina lyaKarunga yilyo Jehova. (Epis. 83:18, NW.) François kwa rongere nge hena asi Jehova nga ka ninka evhu li ka kare paradisa nokuka sikisa mo nonkango edi da kara mEhororo 21:3, 4.

Erongo olyo kwa gumine nge sili komutjima. Nye eyi ngava rongo varuti kwa handukisire nge morwa kapi ya liza noBibeli. Nye ame kwa fene ngwendi otate, kwa here kurugana ko yuma usimbu koudona ou ngava rugana varuti, kapi na kere nonkareso zokundindira.

François novakaume vange vamwe woNombangi, kwa vaterere nge ni liture. Awo kwa fatwilire asi sirugana setu ngoVakriste kapisi sokupangura vantu nye mokuvatantera mbudi zongwa zoUhompa waKarunga. Esi kuna kara sirugana esi ga rugene Jesus ntani esi ga tanterere varongwa vendi va rugane. (Mat. 24:14; Ruk. 4:43) Na hepere hena kuuyunga novantu monkedi zongwa yi kare asi yinke va pura. Bibeli kuuyunga asi “Mukereli gwaHompa kapi a kara nonompata. A kare nombili kovantu navenye.”—2 Tim. 2:24.

Ame kwa tulire po malitjindjo makura yipo na gwene ekuho mo-1959 posigongi. Ame kwa li gwene namunazinyetu gomukadi Angèle ogu na here. Konyima yipo na tamekere kudingura  mbungakriste zawo, ano ose kwa likwere mo-1960. Age mukadi gomuwa, uhwi wokutunda kwaJehova.—Yis. 19:14.

Ngomu da pitire nomvhura, ame kwa lirongerere ko yirongwa yomulyo kovanavazinyetu wovagara woudivi. Sirongwa simwe somulyo esi na lirongere ko kuna kara asi mokuninka asi tu sikise mo yitumbukira youdigu ntudi twa hepa kulinunupika nokutura pasirugana egano lya kara moYisewe 15:22, eli ali tanta asi “Tambura mapukururo nagenye, moomu o vhulire.”

Mo-1964, yipo na tamekere kulimonena usili wononkango odo. Momvhura ozo, ame kwa tamekere sirugana sokudingura nombungakriste nokudikorangeda ntani nokunkondopeka vanavazinyetu. Nomvhura dange kwa kere 27 ntani kapi na kere noudivi. Yipo nye, ame ngani lipukaukire. Nye na hetekerere ko kulirongera ko kwawo. Ntani na lirongerere ko yirongwa yomulyo kwava va kere noudivi.

Tani diworoka eyi ya horokere apa na kere mutareli gomupe gonombungakriste. Konyima zapa na dingwire mbungakriste moParis, munazinyetu gumwe ogu ga kura pampepo kwa pulire nge nsene kuvhura tu zogere nendi. Makura yiyo na mu tanterere asi “nawa tupu.”

Age kwa pulire nge asi: “Louis, wolye a dingura ndokotora momambo?”

Makura tani mu limburura asi “vaveli.”

Age kwa uyungire asi: “Yousili. Nye ame kwa dimburura asi ove kuruganesa siruwo soge sosinzi pokukara kumwe nava va kura pampepo, pasihonena, mutareli gombungakriste. Mombungakriste zetu mwa kara vanavazinyetu wovanzi wokudompa nomutjima nava wovape ntani wonomuga. Awo nava yi hafera nsene o litulira po siruwo sokukara kumwe nawo ntani kuvhura o ze komambo gawo komuzuhwa.”

Epukururo olyo kwa kere nomulyo. Ayo kwa gumine nge sili komutjima mokumona omu ga hara nonzwi daJehova. Ame kwa nyokerere po kuligusa-gusa mo, nokutameka kutura pasirugana eyi ga uyungire. Tani pandura Jehova kweyi ga ruganesere munazinyetu gwina.

Mo-1969 ntani mo-1973 kwa tulire nge ni kare mugendesi goDepartemende zonondya poyigongi  youzuni mudima moColombes moParis. Posigongi somo-1973, twa hepere kugava nondya ure womazuva gatano kovantu wokusika po-60 000. Kapi na divire asi ngapi natu yi sikisa mo. Nye mokututompoka, na hepere kukwama egano lyomoYisewe 15:22, pokutambura magano govakwetu. Ame kwa pulire vanavazinyetu woudivi va vatere nge. Vamwe kwa kere womokatomeno, woyikwahidi, vatereki ntani novarandi. Nevatero lyawo, ose twa sikisire mo situmbukira esi sa monekere ngwendi udigu.

Mo-1973, name namukadange kwa tu zigidire tu ka rugane moBeteli zomoFransa. Situmbukira sange sokuhova naso kwa kere udigu. Na hepere kudiva nonkedi omu natu tuma yimbapiratjangwa kovanavazinyetu womomosirongo saCameroon, omu va silikire sirugana setu kutundilira mo-1970 dogoro 1993. Kapi na yi divilire asi nani yi sikisa mo. Munazinyetu gomugara ogu nga gendesa sirugana moFransa nampo ga yi dimbwilire, makura yipo ga uyungire asi: “Vanavazinyetu womoCameroon vana hepa sili unene nondya dopampepo. Twa hepa kuvapakera mbili.”

Yikando yoyinzi ngani zi ni ka ligwane novakuronambunga womoyirongo eyi ya likundama naCameroon. Vakuronambunga owo wouradi ntani wonondunge kwa tulire po mawapaiko yipo va tume yimbapiratjangwa nkenye apa kovanavazinyetu womoCameroon. Jehova ga tu tungikire. Nomvhura dokusika ko-20, vakareli vendi womosirongo oso, ngava gwana Ruhungu nkenye apa ntani simbapiratjangwa semepongo lyomokatji kosivike esi ngava tumbura asi Our Kingdom Service.

Kutunda tupu apa twa tamekere kulivandekera naAngèle, ame na mwene yikara yendi  yopampepo. Ano yikara oyo ame kwa ya yi mwene nawa-nawa mononkwara detu. Mezuva eli twa li kwere kongurova, age kwa pulire nge ni kanderere kwaJehova asi ngatu mu karera paapa twa hulira. Jehova ga limbwilire ekanderero olyo.

Angèle kwa vatera nge hena ni huguvare unene mwaJehova. Pasihonena, apa va tu zigidire tu ka rugane koBeteli mo-1973, kapi na here kuza morwa na here unene sirugana sokudingura nombungakriste. Nye Angèle kwa diworokesere nge asi ose kwa li gava kwaJehova, yipo nye twa hepa kurugana nkenye eyi zina kututantera mbunga zaJehova. (Heb. 13:17) Name na kwatesere ko eyi ga uyungire makura yipo twa zire koBeteli. Mukadange nondunge ntani ga hara Jehova. Yikara eyi kwa nkondopeka nonkwara detu ntani kwa tu vatera tu ture po matokoro gomawa meparu lyetu.

Nampili ngomu tuna kurupa, Angèle mukadi gomuwa ogu ga hara kuvatera. Pasihonena, mokuninka asi tu ze konosikora, ose kurugana unene tu dive eraka lyoRuhingilisa morwa sinzi sonosikora kudi ronga moRuhingilisa. Yipo nye, ose ngatu zi mombungakriste zoRuhingilisa nampili ngomu twa kere koyiha yonomvhura 70. Mokumona asi ame kwa kara moKomitiye zomoBeteli, ngayi digopere nge kugwana siruwo sokulironga eraka lyapeke. Nye natuvenye naAngèle ngatu livatere-vatere. Ngesi nomvhura detu koyiha yo-80, ose kutwikira kuliwapaikira mapongo nomokuzuvhisa moRuhingilisa nomoRufransa. Ose hena kuhetekera ko kulihameka momapongo nomokuzuvhisa. Jehova ga tungika elituromo lyetu lyokulironga Ruhingilisa.

Mo-2017, ose kwa li monenene etungiko limwe. Name naAngèle kwa tu zigidire kosikora zovaKomitiye womoBeteli novakadi vawo ezi za karerere koWatchtower Educational Center moPatterson, moNew York.

Jehova yige Murongi Gomunene po. (Jes. 30:20) Yipo nye, natuvenye yi kare asi tuvanona ndi tuvakondi, ose kugwana erongo lyewa po. (Deut. 4:5-8) Nayi dimburura asi vadinkantu ava ava purakene kwaJehova ntani kovanavazinyetu ava va kara noudivi, kutura po ezokomeho ntani nokutura po matokoro gomawa. Yisewe 9:9 kutudiworokesa asi: “Ronga munandunge, nga kare nye munandunge unene, ronga muhungami, ediwo lyendi ngali vhuke.”

Poyiruwo yimwe, ame kudiworoka masiku aga na kere monondundu daAlgeria, ure wonomvhura 60 dina ka pita. Ame kapi na divire asi eparu lyange ngali ya litjindja komeho. Ame na lirongera ko yoyinzi kwava wopeke. Jehova kwa tu pa eparu lyewa namukadange. Ose tuna tokomene kutwikira kulirongera ko kwaGuhyetu gemeguru ntani kovanavazinyetu woudivi ava va mu hara.