1. Yisinke ya kutetukisire apa wa hetekerere ko kutantera wopeke mbudi zomoBibeli?

TO DIWOROKA apa wa dimbwilire asi ono gwana usili womoBibeli ndi? Ayo ya ku rerupilire kukwata egano marongo gomoBibeli aga wa lirongere. Ove kwa lizuvhire asi nkenye gumwe kuvhura a hafere marongo ogo. Ove wa yi pulire asi nonkango domoBibeli ngadi va vatera va hafe meparu nokukara nehuguvaro lyokomeho. (Epis. 119:105) Ove kwa tamekere kutantera ko vakaume novanekoro kuhamena usili ou wa lirongere. Nye yisinke ya horokere? Ayo kwa kutetukisire morwa sinzi sawo kapi va tambwire mbudi ezi wa va tanterere.

2-3. Ngapi sinzi sovantu womomazuva gaJesus va tere Jesus nombudi zendi?

² Kapisi yi tu tetukise nsene vantu kwa ku nyoka kutambura mbudi ezi atu va zuvhisire. Momazuva gaJesus, sinzi sovantu kwa nyokere kumupura nampili ngomu ga rugene yitetu eyi ya likidire asi Karunga kwa mu vaterere. Pasihonena, apa Jesus ga vhumbwire Rasarusa, aso kwa kere sitetu esi va pulire nampili ava ngava mu rwanesa. Nye nampili ngoso, vapangeli woVajuda kapi va yi pulire asi Jesus yige Mesiyasa. Awo kwa liyongere asi ngano va dipage Jesus naRasarusa!—Joh. 11:47, 48, 53; 12:9-11.

³ Jesus ga yi divire asi sinzi sovantu kapi ngava yi pura asi yige Mesiyasa. (Joh 5:39-44) Jesus kwa tanterere varongwa vavali vaJohanesa Mukuhwi asi: “Nye munerago nkenye ogu a dili kulimbilirwa mwarwange.” (Mat. 11:2, 3, 6) Morwasinke sinzi sawo va dililire kupura mwaJesus?

4. Yisinke natu ka lironga mosirongwa esi?

⁴ Mosirongwa esi ntani sokukwama ko, natu ka lironga nokonda dimwe deyi sinzi sovantu womosiruwo sanare va dilire kupura  mwaJesus. Natu ka tara hena eyi sinzi sovantu ava dilire kutambura mbudi zetu naina. Unene po natu ka lironga eyi twa hepera kukara nepuro lyokupama mwaJesus yipo ngatu dire kupulisira nkenye eyi yi tu kondere mokukara varongwa vendi.

5. Morwasinke nampo vamwe va gazarere asi Jesus kapisi yige Mesiyasa getumbwidiro?

⁵ Sinzi sovantu kwa nyokere kupura mwaJesus morwa ntundiliro zendi oku ga kulilire. Awo va yi dimbwilire asi Jesus kwa kere murongi gomunene ntani nga rugana yitetu. Nye awo kwa mu tere tupu asi munwa muhongi goyikungu. Ntani age kwa tundilire kositata saNasareta esi ngava tara vantu asi kwato mulyo. Nampili Natanayera ogu ga ya kere murongwa gwaJesus kwa uyungire pomuhowo asi: “MoNasareta nani kuvhura kutunda mo yoyiwa?” (Joh 1:46) Natanayera nampo kapi ga here mositata esi ga kere Jesus. Ndi nampo ga divire uporofete ou wa kara mwa Mika 5:2, ou va porofetere asi Mesiyasa ngava mu hampurukira moBeterehema nye kapisi moNasareta.

6. Yisinke ngano ya vaterere vantu womomazuva gaJesus va dimburure asi yige Mesiyasa?

⁶ Yisinke aga uyunga ko Matjangwa? Muporofete Jesaya kwa pumbire asi nonkore daJesus kapi ngadi kara nosinka kuhamena eparu lyaMesiyasa. (Jes. 53:8) Mauzera ogo nare va ga pumbire. Ngano asi vantu owo va li tulilire po siruwo sokupapara mauzera nagenye gouhunga, awo ngano va ya divire asi Jesus kwa mu hampurukilire moBeterehema ntani age kwa kere gezimo lyaNdafita. (Ruk. 2:4-7) Yipo nye, Jesus kwa ya mu hampurukilire kevango eli va pumbire mwaMika 5:2. Udigu musinke nye wa kere po? Vantu ngava genderere kutokora. Kapi va kere nomauzera nagenye, ano eyi kwa va ninkisire va dire kupura mwaJesus.

7. Morwasinke sinzi sovantu neina ava dilire kutambura vantu vaJehova?

⁷ Nose kuligwanekera noudigu wokulifana neina ndi? Nhi. Mouzuni mudima, vantu vaJehova kwa kara nonkareso zokulinunupika, sinzi sovantu kuvatara asi awo “kapi va lironga ntani vantuuntu tupu.” (Yirug. 4:13) Vantu vamwe kulizuvha asi vantu vaJehova kapi tava vhuru kuronga vantu kuhamena Bibeli morwa kapi va za konosure domulyo domaukarelikarunga. Vamwe kuuyunga asi Nombangi daJehova kuna kara “ukarelikarunga womoAmerika,” nye usili wou asi sinzi soNombangi daJehova kapisi yimo va tunga. Vamwe simpe kwa va tantera asi Nombangi daJehova kapi da pura mwaJesus. Nomvhura dononzi da kapita Nombangi daJehova ngava di zigida asi ‘vantu woukorokotji’ ntani asi “ngereka zoyirumbu.” Sinzi sovantu kapi va hara kukara vamwe woNombangi daJehova morwa kwa zuvha nombudi odo ntani kapi va diva usili wene-wene kuhamena vantu vaJehova.

8. Kuliza noYirugana 17:11, yisinke nava rugana vantu nsene vana hara kudiva nawa asi wolye vakareli vaKarunga?

⁸ Yisinke nayi vatera vantu va dive usili kuhamena vakareli vaJehova? Vantu va hepa kuhetekera ko kudiva nawa mauzera kuhamena yuma yongandi. Eyi yiyo ga tokomenene kurugana mutjangi gumwe goBibeli Rukasa. Age kwa rugene unene yipo a lironge “yininke nayinye moomu ya likwama.” Age kwa here varesi vendi “va dive usili woyininke” eyi va zuvha kuhamena Jesus. (Ruk 1:1-4) VaJuda womoBereya nawo kwa kere ngwendi Rukasa. Apa va zuvhire mbudi zongwa kuhamena Jesus, awo kwa hetakanesere mbudi ozo kumwe noMatjangwa goRuhebeli. (Resa Yirugana 17:11.) Vantu va hepa kukonakona mauzera monkedi zokulifana. Va hepa kuhetakanesa eyi  ava va rongo vantu vaKarunga kumwe neyi aga uyunga Matjangwa. Va hepa hena kuresa eyi va rugana vantu vaJehova momazuva getu. Nsene va rugana nawa epaparo komauzera gamwe kuhamena yuma yongandi, kapi ngava pulisira yininke eyi ava zuvhu yi va pukise.

9. Yisinke ya horokere apa Jesus ga nyokere kulikida sidiviso seguru?

⁹ Vantu vamwe womosiruwo sanare kapi yava gwanene po eyi gava rongere Jesus. Awo simpe kwa here kumona yoyinzi. Awo kwa here Jesus ayi likide asi yige sili Mesiyasa pokuvalikida “sidiviso seyi yeguru.” (Mat. 16:1) Awo nampo kwa here ayi rugane morwa nampo kapi va kwete egano etjangwa lyaNdaniyera 7:13, 14. Nye nampili ngoso, siruwo saJehova sokusikisa mo uporofete owo kapi sa sikire mo. Eyi ga rongere Jesus ngano ya va gwanene po mokuyipura asi yige Mesiyasa. Apa ga nyokere kuvalikida silikido esi va mu pulire, awo kwa nyokere kupura mwendi.—Mat. 16:4.

10. Ngapi Jesus ga sikisire mo eyi ga tjenge Jesaya kuhamena Mesiyasa?

¹⁰ Yisinke aga uyunga ko Matjangwa? Muporofete Jesaya kwa tjenge kuhamena Mesiyasa asi: “Age kapi nga zigira ndi a ziguruke, ndi asi a zuvhikise ezwi lyendi monzira.” (Jes. 42:1, 2) Jesus kwa rugene sirugana sendi monkedi zo kuwapera ga hana kulipaparera mfumwa. Age kapi ga tungire nontembeli dononene ntani kapi nga dwara yikoverero yokulikarera youkarelikarunga ndi a hare vantu va mu tumbure koyitumbwisiso yoyinene youkarelikarunga. Apa Jesus ga kere mompanguro, age kapi ga hetekerere ko kurugana yitetu komeho zahompa Herodesa yipo asi ngano a mu hafese. (Ruk. 23: 8-11) Yimo, Jesus ga rugene yitetu yimwe, nye sirugana sokuzuvhisa yiso sa kere nomulyo unene kwendi. Age kwa tanterere varongwa vendi asi “Yeeyi yiyo na wizira.”—Mar. 1:38.

11. Magano musinke gepuko va kara nago vamwe neina?

¹¹ Nose kuna kumona udigu wokulifana naina ndi? Nhi. Naina sinzi sovantu kuhafera matungo gomanene gomaukerelikarunga  nomu ga fuura ntani nomu ava tumbura vampitisili vawo komadina gomulyo. Ntani sinzi sovantu kwa hara hena yipito eyi va dira kudiva oku ya tundilira. Vantu ava ava kara pomapongo gomaukarelikarunga ogo kapi ava lirongo yoyinzi kuhamena Karunga nositambo sendi. Nye mokulisiga, vantu ava ava kara momapongo getu goSikriste, kulironga eyi ana hara Jehova tu rugane. Yinyanga yetu yoUhompa ya zera nawa, nye kapi va yi fuwisa noyininke yondiro. Ava ava pitisire kapi ava dwara yikoverero yokulikarera ntani kapi va kara noyitumbwisiso yokulikarera yomulyo. Eyi atu rongo vantu neyi twa pura kwa tunda moBibeli. Nampili ngoso, sinzi sovantu kunyoka kutambura mbudi ezi atu va tantere morwa awo kugazara asi kapi atu kara noyilika yoyinene ntani asi eyi atu rongo kapi ayi lizi neyi va hara.

12. Ngomu va yi faturura moVahebeli 11:1, 6, ngapi natu tunga po epuro?

¹² Ngapi omu natu nyokera po kutupukisa? Mupositoli Paurusa kwa tanterere Vakriste ava va tungire moRoma asi: “Ano epuro kutunda mokuzuvha Mbudi. Ano ozo Mbudi kutunda mokuudisa Kristusa.” (Rom. 10:17) Yipo nye, ose kutunga po epuro lyokupama pokulironga Matjangwa nye kapisi pokulihameka moyipito eyi za likida Bibeli asi ayo epuko nampili yi kare asi yiwa. Twa hepa kutunga po epuro lyokupama kuliza nediwo lyousili morwa “nsene o pira epuro, nokuza si Karunga komutjima.” (Resa Vahebeli 11:1, 6.) Yipo nye, kapi twa hepa silikidiso semeguru esi nasi tu likida asi twa gwana usili. Nsene tu twikira kulironga nawa Bibeli, ose ngatu dimburura asi twa gwana usili ntani ngayi tu vatera tu dire kukara nomasinganyeko.

13. Yisinke ya ninkisire sinzi sovantu va dire kupura mwaJesus?

¹³ Momazuva gaJesus, varongwa vaJohanesa Mukuhwi kwa tetukire morwa varongwa vaJesus kapi ngava dilire. Jesus kwa fatwilire asi kapi va hepere kudilira morwa age kwa kere simpe muzuni. (Mat. 9:14-17) Nampili ngoso, Vafalisayi ntani navamwe ava va rwanesere  Jesus kwa nyokere kupura mwendi morwa kapi ga kweme nompo dawo. Awo kwa handukire morwa Jesus nga verura vaveli mezuva lyEsabata. (Mar. 3:1-6; Joh. 9:16) Awo ngava uyunga asi ngava kwama nompangera dEsabata nye nampili ngoso awo ngava pulisire vantu va rugane ngesefa montembeli. Awo kwa handukire unene kweyi Jesus ga va tulire poruzera. (Mat. 21:12, 13, 15) Sinzi sava ga zuvhisilire mosinagoge zaNasareta kwa handukire unene apa Jesus ga ruganesere sihonena soVaisraeli mokuvalikida asi kapi va kere nonkareso zongwa ntani kapi va kere nepuro. (Ruk. 4:16, 25-30) Sinzi sovantu kapi va pulire mwaJesus morwa kapi ga rugene eyi va here.—Mat. 11:16-19.

14. Morwasinke Jesus ga dilire ku kwatesa ko nompo edi da li limbire noMatjangwa?

¹⁴ Yisinke aga uyunga ko Matjagwa? Jehova kwa uyungire kupitira momuporofete Jesaya asi: “Vantu ava kuuyunga asi awo kukerera nge, nye nonkango dawo kutupu mulyo, ano nomutjima dawo, ure name da kara, ukereli wawo neisi kwa kara tupu panompangera dopasiuntu nopaupingwakoro, ou ava diworoka tupu.” (Jes. 29:13) Apa Jesus ga nyokerere po nompo edi da dilire kuliza noMatjangwa, age kwa kere mouhunga. Vantu ava va gazarere asi noveta nonompo mulyo unene kupitakana Bibeli, kwa nyokere Jehova naMesiyasa.

15. Morwasinke sinzi sovantu va nyengera Nombangi daJehova neina?

¹⁵ Nose kuna kumona udigu wokulifana neina ndi? Nhi. Sinzi sovantu kuvaguvisa apa Nombangi daJehova ava dili kulihameka moyilika eyi ya dira kuliza nomatjangwa, ngwendi yipito yehampuruko ntani Krismesa. Vamwe kuva handukisa apa Nombangi daJehova ava dili kulihameka moyilika yosirongo ndi apa ava dili kukwama nongendeseso doponomfa edi da dira kuliza noBibeli. Vantu vangoso nampo kwa yi pura nawa-nawa asi Jehova kutambura ukarelikarunga wawo. Nye awo kapi ava hafesa Jehova nsene asi awo kwa hara nompo douzuni kupitakana marongo gomoBibeli.—Mar 7:7-9.

16. Kuliza nEpisarome 119:97, 113, 163-165, yisinke twa hepa kurugana ntani yisinke natu nyokera po?

¹⁶ Ngapi omu natu nyokera po kutupukisa? Twa hepa kuhara unene noveta nonompango daJehova. (Resa Episarome 119:97, 113, 163-165.) Nsene twa hara Jehova, ngatu nyokera po nompo nadinye edi adi dili kumuhafesa. Ntani kapi ngatu pulisira nkenye eyi yi kare nomulyo unene kwetu kupitakana omu twa hara Jehova.

17. Yisinke va ndindilire ko vantu wovanzi kwaJesus eyi ya va ninkisire va dire kumukwama?

¹⁷ Vamwe kwa here Jesus a rugane ko yuma kepangero lyawo. Awo kwa ndindilire ko kwaMesiyasa ava mangurure mo moveta zoVaroma. Nye Jesus kwa nyokere apa va mu sininikire a kare hompa gwawo. (Joh. 6:14, 15) Vapristeli ntani na vamwe kwa kere nosinka asi Jesus kuvhura a rete elitjindjo kepangero. Ano ayo ngano ya handukisire Varoma nokugusa unankondo ou va pere vapristeli. Sinzi soVajuda kwa kere nosinka unene kuhamena upolitika, ano eyi kwa va ninkisire va nyoke kukwama Jesus.

18. Mauporofete musinke gomoBibeli ga zogera kuhamena Mesiyasa aga va dilire kupakera mbili sinzi sovantu?

¹⁸ Yisinke aga uyunga ko Matjangwa? Nampili ngomu mauporofete gamwe ga pumbire asi Jesus nga kara Hompa gononkondo, nye mauporofete gamwe kwa likidire asi nga hova tanko kutufira kononzo. (Jes. 53:9, 12) Nye morwasinke Vajuda va karerere nomagano gepuko  kuhamena Mesiyasa? Momazuva gaJesus, sinzi sovantu kapi va pulire nkenye uporofete ou wa dilire kureta po malitjindjo komaudigu gawo.—Joh. 6:26, 27.

19. Magano musinke gamwe ga ninkisa vamwe va dire kutambura mbudi zetu neina?

¹⁹ Nose kuligwanekera noudigu wokulifana neina ndi? Nhi. Sinzi sovantu neina kunyoka kupurakena kombudi zetu morwa kapi atu lihameke moupolitika. Awo kwa tu harera nose ngano tu lihameke momahoroworo. Nye, nsene tu pulisira vahompa vepevhu va tu pangere, ose ngoso ngwendi kuna kunyoka Jehova mupangeli gwetu. (1 Sam. 8:4-7) Vantu kulizuvha asi nose twa hepa kudika nosure noyipangero ntani nokurugana yimwe eyi nayi vatera vantu womomukunda. Awo kunyoka kutambura mbudi zetu morwa ose kulitura mo unene mosirugana setu sokuzuvhisa mevango lyokukohonona maudigu gomouzuni.

20. Kuliza nononkango daJesus edi da kara mwa Mateusa 7:21-23, kosinke natu demenena po unene?

²⁰ Ngapi omu natu nyokera po kutupukisa? (Resa Mateusa 7: 21-23.) Twa hepa kudemenena unene kosirugana esi ga tu tantera Jesus asi tu si rugane. (Mat. 28:19, 20) Twa ha pulisira yininke yomouzuni ou yi tu donganese. Ose twa hara vantu ntani twa kara nosinka kwawo, nye twa yi diva asi nkedi zongwa po zo kuvavatera kuna kara pokuvazuvhisira kuhamena Uhompa waKarunga ntani pokuvavatera va tunge po ukaume naJehova.

21. Yisinke natu tokomena kurugana?

²¹ Mosirongwa esi, tuna lirongo mo nokonda ne edi da ninkisire sinzi sovantu va dire kupurakena kwaJesus momazuva gendi ntani eyi ya ninkisa vamwe neina va dire kupurakena kovarongwa vaJesus. Ngoso eyi yiyo yelike twa hepa kunyokera po ndi? Hawe. Mosirongwa sokukwamako ngatu ka tarurura nokonda ne hena dimwe. Tu tokomeneni kukwama Jesus nokunkondopeka epuro lyetu!