1. Etokoro musinke lyomulyo va hepa kutura po vantu navenye?

 VANTU va hepa kutura po etokoro lyomulyo neina. Ngava kwatesa ko Jehova Karunga ogu ga wapera kupangera uzuni mudima ndi ngava kwatesa ko nkore zaKarunga Satana Muzonaguli? Nkenye ogu ga hepa kuhorowora oku na hamena ntani kapi ta vhuru kuhama kuvali. Etokoro eli nava tura po ngali likida nsene asi ngava ka paruka narunye komeho ndi hawe. (Mat. 25:31-33, 46) Poudigu wounene, awo ngava ka gwana sidiviso sezoworo ndi sezonauko.—Ehor. 7:14; 14:9-11; Hes. 9:4, 6.

2. (a) Yisinke a li tu korangeda etjangwa lyomoVahebeli 10:35-39 tu rugane? (b) Ngapi omu buke zEhororo nazi tu vatera?

² Resa Vahebeli 10:35-39. Nsene asi ove kwa horowora mokukwatesa ko upangeli waJehova, diva asi ove kwa tura po etokoro lyouhunga. Ove ngesi kuna kuvatera wopeke yipo va ture po etokoro lyouhunga. Ove kuvhura kuruganesa mauzera aga ga kara mobuke zEhororo yipo o va vatere. Buke zEhororo kulikida eyi ngayi ka horokera ava ava rwanesa Jehova, nye hena azo kulikida mauwa aga ngava ka gwana ava ava kwatesa ko upangeli waJehova noulimburukwi. Yipo nye, twa hepa kulironga mausili aga gomulyo. Nsene tu yi rugana oyo, ayo ngayi tu vatera tu tokomene kutwikira kukarera Jehova. Ntani hena ose kuvhura tu ruganese eyi twa lironga mokuvatera wopeke yipo va tokore kukarera Jehova ntani nokutwikira kumukarera.

3. Yisinke natu ka zogera mosirongwa esi?

³ Mosirongwa esi tatu ka zogera mapuro aga gana kukwama ko: Yisinke ngayi horokera ava ava kwatesa ko upangeli waKarunga? Ntani yisinke ngayi horokera ava ava kwatesa ko sikasama sosigeha ge esi va tumbura mobuke zEhororo?

4. Mbunga musinke ga mwene mupositoli Johanesa meguru?

⁴ Memoneko lyomupositoli Johanesa, age kwa mwene nombunga mbali edi adi kwatesa ko upangeli waJehova ntani ado kwa gwene matungiko gomwenyo gwanarunye. Sivaro sombunga zokuhova kuna kara 144 000. (Ehor. 7:4) Awo kwava gusa pevhu yipo va ka tulise po epangero ndi Uhompa kumwe naJesus meguru. Awo ngava ka pangera kumwe naJesus evhu nalinye. (Ehor. 5:9, 10; 14:3, 4) Memoneko olyo, Johanesa kwava mwene awo vana sikama kumwe naJesus meguru poNdundu zaSiyoni.—Ehor. 14:1.

5. Yisinke ngayi ka horokera ntaantani vagwavekwa ava vana hupu po simpe pevhu?

⁵ Kutundilira mosiruwo sovapositoli, mayovi govantu kwava horowora yipo va hame kosivaro sovantu 144 000. (Ruk. 12:32; Rom. 8:17) Nye nampili ngoso, Johanesa kwa mu tanterere asi vagwavekwa tupu wovasesu yiwo ngava kara vazuni pomazuva gopouhura. Vagwavekwa owo ngava gwana “sinongweneso” sawo sokuhulilira esi ngasi likida asi Jehova ana va hafere komeho udigu wounene utameke. (Ehor. 7:2, 3; 12:17) Makura posiruwo soudigu wounene, vagwavekwa ava ngava kara simpe pevhu ngava va twara meguru yipo va ka lipakerere nanavenye ava va hamena mosivaro sovantu 144 000 ava va fa nare noulimburukwi. Awo ngava ka kara vapangeli kumwe naJesus moUhompa waKarunga.—Mat. 24:31; Ehor. 5:9, 10.

6-7. (a) Mbunga musinke hena zimwe ga mwene Johanesa ntani yinke va uyunga kuzihamena? (b) Morwasinke nonkango edi va tumbura mEhororo egaununo 7 da karera nomulyo koyihupwa yovagwavekwa ntani ‘nemukurumbunga lyovantu’?

⁶ Konyima zapa Johanesa ga mwene mbunga zemeguru, age kwa mwene hena “emukurumbunga lyovantu.” Mokulisiga nosivaro sovantu 144 000, Bibeli kapi za tumbura sivaro sovantu ava ngava hamena kombunga ezi. (Ehor. 7:9, 10) Yisinke va uyunga kuvahamena? Johanesa kwa mu tanterere asi: “Ava yiwo va pita moudigu wounene ntani awo kwa kuhwa marwakani gawo nokuganinka ga zere kohonde zoNzwigona.” (Ehor. 7:14) Konyima zapa “emukurumbunga lyovantu” ngali pita moudigu wounene, awo ngava ka hafera mauwa gomanzi pevhu.—Epis. 37:9-11, 27-29; Yis. 2:21, 22; Ehor. 7:16, 17.

⁷ Yikare asi ngatu ka parukira meguru ndi paapa pevhu, twa hepa kuyipura asi ose ngatu ka mona esikiliromo lyeyi a tu resa mEhororo egaununo 7. Aso ngasi ka kara siruwo soruhafo konombunga nadinye odo mbali dovakareli vaKarunga. Ose ngatu ka hafa kweyi twa horowora kukwatesa ko upangeli waJehova. Yisinke hena azi tu tantere buke zEhororo kuhamena udigu wounene?—Mat. 24:21.

8. Ngapi omu ngau tameka udigu wounene ntani ngapi omu ngayi kundama sinzi sovantu?

⁸ Ngomu kava yi tumbwire mosirongwa sina ka pita, mapangero gouzuni ou ntaantani ngaga homokere Babironi zonene kutanta asi maukarelikarunga goyimpempa. (Ehor. 17:16, 17) Ano eyi ngayi twaredesa koudigu wounene u tameke. Ngoso eyi kutanta asi ayo ngayi ninkisa sinzi sovantu va tameke kukarera Jehova ndi? Hawe. Morwa mEhororo egaununo 6 kwa likida mo asi posiruwo oso, vantu ava ava dili kukarera Jehova ngava papara epopero komapangero ntani konongesefa dononene douzuni ou, yininke eyi va fanekesa konondundu. Mokumona asi vantu awo kapi ngava kwatesa ko Uhompa waKarunga, Jehova ngava tara asi awo varwanesi.—Ruk. 11:23; Ehor. 6:15-17.

9. Ngapi omu vantu vaJehova ngava lisiga novantu vapeke poudigu wounene ntani yitundwamo musinke ngayi kara?

 ⁹ Yosili, vakareli vaJehova wovalimburukwi ngava lisiga novantu vapeke posiruwo soudigu wounene. Azo yizo zelike mbunga zovantu ava ava karere Jehova ezi ngazi hupa po pevhu ntani awo kunyoka kukwatesa ko “sikasama.” (Ehor. 13:14-17) Ava ava rwanesa Jehova ngava handuka unene apa ngava mona vantu vendi kuna kutwikira kumukarera noulimburukwi. Ngoyitundwamo, mbunga zElipakerero lyonomuhoko ngazi homokera vantu vaKarunga uzuni mudima. Bibeli kutumbura ehomokero eli asi Gogo zaMagogo.—Hes. 38:14-16.

10. Ngomu va yi faturura mEhororo 19:19-21, yisinke nga rugana ko Jehova kehomokero lyovakareli vendi?

¹⁰ Yisinke nga rugana ko Jehova kehomokero eli lyedona? Jehova kututantera asi: “Ame ngani handuka unene.” (Hes. 38:18, 21-23) Ehororo egaununo 19 kufaturura eyi ngayi kwama ko. Jehova nga tuma Munendi yipo ngaya popere vantu vendi nokuyafunda nonkore dawo. Nombunga dovakwayita vemeguru omu mwa kwatera vaengeli novagwavekwa 144 000, ngava li pakerera kumwe naJesus yipo va rwise Gogo zaMagogo. (Ehor. 17:14; 19:11-15) Yitundwamo musinke ngayi kara morwa yita eyi? Vantu navenye nonombunga edi adi rwanesa Jehova ngava va zonagura po narunye!—Resa Ehororo 19:19-21.

11. Sihorokwa musinke somulyo unene esi va tumbura mobuke zEhororo?

¹¹ Gazadara ko tupu omu ngava lizuvha vakareli vaJehova wovalimburukwi apa ngava paruka ezonauko lyononkore daKarunga. Aso ngasi kara siruwo soruhafo unene! Nampili ngomu meguru ngamu kara ruhafo apa Babironi zonene ngava zi zonagura po, nye koyili yimwe eyi ngayi reta ruhafo rorunene. (Ehor. 19:1-3) Aso kuna kara sihorokwa somulyo unene esi va tumbura mobuke zEhororo, “ekwareko lyoNzwigona.”—Ehor. 19:6-9.

12. Ngomu va yi likida mEhororo 21:1, 2, siruwo musinke ngali kara ekwareko lyoNzwigona?

¹² Siruwo musinke ngali kara ekwareko lyoNzwigona? Komeho yita yaHarumagedoni yi tameke, vagwavekwa navenye 144 000 ngava kara meguru. Nye nampili ngoso, oso kapisi yiso siruwo ngali kara ekwareko lyoNzwigona. (Resa Ehororo 21:1, 2.) Ekwareko lyoNzwigona ngali kara konyima zoyita yaHarumagedoni ntani apa nonkore nadinye daKarunga ngava di zonagura po.—Epis. 45:3, 4, 13-17.

13. Yisinke ali tanta ekwareko lyoNzwigona kwava va hamena mo?

¹³ Yisinke ali tanta ekwareko lyoNzwigona kwava va hamena mo? Ngwendi moomu tupu nonkwara adi gwanekedesa mugara nomukadi, mokulifana nonkwara edi dopasifanekeso doNzwigona ngadi gwanekedesa Hompa Jesus Kristusa kumwe ‘nomufuko’ gwendi, vagwavekwa 144 000. Sihorokwa oso somulyo ngasi tulisa po epangero lyepe eli ngali pangera evhu nalinye nomvhura eyovi.—Ehor. 20:6.

14-15. Kuliza nEhororo egaununo 21, kosininke musinke va va hetakanesa vagwavekwa 144 000? (Tara efano lyopontunda.)

¹⁴ Ehororo egaununo 21 kwa hetakanesa vagwavekwa 144 000 kositata sosiwa unene esi ava tumbura asi “Jerusarema zompe.” (Ehor. 21:2, 9) Sitata oso kwa kara nomamanya 12 getateko aga va tjanga “madina 12 govapositoli woNzwigona.” Morwasinke nonkango odo da hafeserere Johanesa? Morwa age kwa mwene edina lyendi eli va tjenge pwalimwe lyomamanya ogo. Azo kwa kere mfumwa zonene kwendi.—Ehor. 21:10-14; Efe. 2:20.

¹⁵ Sitata esi sopasifanekeso kapi sa li fana noyitata yikwawo. Sitaura sositata kwa si  ruganesa kongorodo zene-zene, nombamba 12 ano matateko gositata kwagafuwisire nomamanya gondiro ntani mafanayiko gaso kwa kere gokuzira mo. (Ehor. 21:15-21) Nye mupositoli Johanesa ga yi dimbwilire asi koyili eyi ga dilire kumona. Eyi yiyo nye Johanesa ga uyungilire asi: “Mositata oso kapi na mwene mo ntembeli, yeeyi Jehova Karunga Munankondo nadinye ntani Nzwigona, yiwo ntembeli zaso. Sitata oso kapi sa hepa ezuva ndi kwedi kusiminikire, yeeyi uyerere waKarunga yiwo wa si temenene, ntani Nzwigona yizo ramba zaso.” (Ehor. 21:22, 23) Ava va hamena koJerusarema zompe ngava ka kara kumwe naJehova. (Heb. 7:27; Ehor. 22:3, 4) Yipo nye, Jehova naJesus yiwo ntembeli ezi za kara mositata oso.

16. Yisinke ngayi ka horokera vantu ava ngava ka paruka monomvhura eyovi depangero lyoUhompa waKarunga?

¹⁶ Ayo kuhafesa vagwavekwa apa ava gazadara ko sitata oso. Nye ava va kara nehuguvaro lyokukaparukira pevhu nawo va kara nokonda zongwa zeyi nava haferera sitata oso. Monomvhura eyovi depangero lyoUhompa waKarunga, Jerusarema zompe ngazi ka reta mauwa gomanzi. Johanesa kwa mwene omu mauwa ogo gana kupupa ngwendi “mukuro gomema gomwenyo.” Komaruha nagenye gomukuro kwa kere ko “yitji yomwenyo” eyi ya kere nomahako ‘gokuverwisa nomuhoko.’ (Ehor. 22:1, 2) Vantu navenye ava ngava ka paruka ngava ka gwana mpito zokukagwanena mo mauwa moyininke nayinye oyo yoyiwa. Vantu navenye ava ava limburukwa Jehova ngava ka sikilira mo kanunu-kanunu. Kapi ngaku ka kara mauvera nokukora ntani mahodi goruguwo.—Ehor. 21:3-5.

17. Ngwendi moomu va yi likida mEhororo 20:11-13, wolye ngava ka gwanena mo mauwa monomvhura eyovi depangero lyaKarunga?

¹⁷ Wolye ngava hafera mauwa aga tuna tumbura? Pomuhowo kuna kara emukurumbunga lyovantu ava ngava ka pita moudigu wounene ntani novanona ava ngava reta mouzuni woupe. Nye Ehororo egaununo 20 kwa tumbwidira hena asi vafe ngava kava vhumbura. (Resa Ehororo 20:11-13.) Vantu ‘wovahungami’ ava va fa nare ntani nava “va dira kuhungama” ava va dilire kugwana mpito zokulironga kuhamena Jehova, ngava kava tengwidira keparu paapa pevhu. (Yirug. 24:15; Joh. 5:28, 29) Ayo ngoso kutanta asi nkenye gumwe ngava ka mu vhumbwira paapa pevhu monomvhura eyovi depangero lyaKarunga ndi? Hawe. Vantu wovadona ava va nyokere mpito zokukarera  Jehova komeho va fe, kapi ngava kava vhumbura. Awo va kere nompito ntani va yi likidire asi kapi vana hara kukaparuka moparadisa.—Mat. 25:46; 2 Tes. 1:9; Ehor. 17:8; 20:15.

18. Yisinke ngayi ka horokera vantu ava ngava ka paruka pevhu konyima zehagero lyonomvhura eyovi?

¹⁸ Kehagero lyonomvhura eyovi, vantu navenye ava ngava ka paruka pevhu ngava ka sikilira mo. Kwato hena ogu ngaka kara nonzo ezi twa pinga kwaAdamu. (Rom. 5:12) Efingiliro lyonzo ezi ga retesa po Adamu ngava ka li gusa po. Eyi kutanta asi vantu ava ngava ka paruka pevhu ngava ka sikilira mo kehagero lyonomvhura eyovi.—Ehor. 20:5.

19. Morwasinke ngapa ka karera eheteko lyokuhulilira?

¹⁹ Ose twa yi diva asi Jesus ga twikilire kulimburukwa Karunga nampili ngomu Satana ga mu hetekere. Kuvhura vantu navenye wokusikilira mo ngava ka twikire kulimburukwa Jehova apa Satana ngava ka mu pa mpito zokuvaheteka ndi? Nkenye gumwe nga hepa kulikida ulimburukwi wendi kwaJehova apa Satana ngava ka mu mangurura monomango kouhura wonomvhura eyovi. (Ehor. 20:7) Ava ngava ka likida ulimburukwi wawo kwaJehova peheteko eli lyokuhulilira, ngava ka gwana mwenyo gwanarunye ntani ngava ka hafera umanguruki wene-wene. (Rom. 8:21) Ava ava rwanesa Jehova ngava kava zonagura po narunye kumwe noMuzonaguli nonompepo dendi donondona.—Ehor. 20:8-10.

20. Ngapi omu ono kulizuvha kuhamena mauporofete gokuhafesa aga ga kara mobuke zEhororo?

²⁰ Ngapi omu ono kulizuvha pokudiva yininke eyi va tumbura mobuke zEhororo? Ove ono hafa pokulimona nyamoge momauporofete aga ndi? Tuna si huguvara asi mauporofete aga gana kutumangeda o tantere ko wopeke yipo nawo va ya karere Karunga moukareli wousili. (Ehor. 22:17) Mokumona asi tuna zogere yininke eyi ngayi horoka komeho, ose tuna hafa sili unene ntani tuna hara kuuyunga ngwendi mupositoli Johanesa ogu ga tente asi: “Amen! Wiza, Hompa Jesus.”—Ehor. 22:20.