1-2. Yisinke nampo natu lipura kuhamena makanderero getu?

 WA LIPURA rumwe nsene asi Jehova kulimburura makanderero goge ndi? Nsene asi yimo, kapisi nyovelike o lizuvhu ngoso. Sinzi sovanavazinyetu nawo yimo va lizuvhire ngorooro ngoso, unene po apa ngava ligwanekere nomaudigu. Nsene asi ose kuna kuhepa, ayo kuvhura kutukarera udigu nose mokudimburura omu Jehova ana kulimburura makanderero getu.

² Tu zeni tu ka tare asi morwasinke natu karera nehuguvaro asi Jehova kulimburura makanderero govakareli vendi. (1 Joh. 5:15) Ta tu kazogera hena mapuro aga gana ku kwama ko: Morwasinke nampo poyiruwo yimwe ayi monekere ngwendi asi Jehova kapi ana kulimburura makanderero getu? Mononkedi musinke omu Jehova ana kulimburura makanderero neina?

3. Morwasinke Jehova ana harere tu kanderere kwendi?

³ Matjangwa kutuhuguvaresa asi Jehova ga tu hara unene ntani ose mulyo kwendi. (Hag. 2:7; 1 Joh. 4:10) Eyi yiyo ana kutuzigidira tu hundire evatero kwendi kupitira mekanderero. (1 Pet. 5:6, 7) Age ana hara kutuvatera tu kare pepi nendi ntani nokulididimikira maudigu aga atu ligwanekere nago.

4. Ngapi omu twa yi diva asi Jehova kulimburura makanderero govakareli vendi? (Tara hena efano.)

⁴ MoBibeli, rorunzi ose kuresa mo asi Jehova kwa limbwilire makanderero govakareli vendi. Kuvhura o gazadare ko sihonena simwe ndi? Sihonena simwe kuna kara saHompa Ndafita. Age kwa kere nononkore dononzi meparu lyendi mudima ntani rorunzi nga hundire evatero kwaJehova kupitira mekanderero. Sikando simwe, age kwa likwamberere kwaJehova asi: “HOMPA,  zuvha ekanderero lyange, purakena malikwambero gange! Ove Muhungami noMulimburukwi, zuvha nge.” (Epis. 143:1) Jehova kwa limbwilire makanderero gaNdafita gokumuzowora. (1 Sam. 19:10, 18-20; 2 Sam. 5:17-25) Oyo kwa ninkisire Ndafita a uyunge nehuguvaro asi: ‘Jehova kwa kara pepi nava navenye ava mu zigida.’ Nose kuvhura kukara nehuguvaro lyangoso.—Epis. 145:18.

5. Ngoso makanderero govakareli vaJehova womosiruwo sanare ngava ga limburura nkenye apa monkedi omu va yi ndindilire ndi? Gava sihonena. (Tara hena efano.)

⁵ Jehova kuvhura a dire kulimburura makanderero getu monkedi omu tuna yi ndindire. Eyi yiyo ya horokerere mupositoli Paurusa. Age kwa pulire Karunga a mu guse “rwiga morutu.” Paurusa kwa kanderere yikando yitatu kuhamena udigu ou. Jehova ga limbwilire makanderero ogo ndi? Yii, nye kapisi monkedi omu ga yi ndindilire Paurusa. Mevango lyokugusa po udigu owo, Jehova kwa mu pere nonkondo edi ga hepere yipo a twikire kumukarera noulimburukwi.—2 Kol. 12:7-10.

6. Morwasinke poyiruwo yimwe ayi monekere ngwendi asi Jehova kapi ana kulimburura makanderero getu?

⁶ Nose poyiruwo yimwe makanderero getu kuvhura va ga limburure monkedi omu tuna dili kuyindindira. Ose kuvhura tu kare nehuguvaro asi Jehova ga diva nawa-nawa omu na tu vatera. Age hena kuvhura ku “tu ruganena yoyinzi kupitakana pweyi atu hundire ndi atu gazara.” (Efe. 3:20) Morwa konda ozo, age kuvhura kulimburura makanderero getu posiruwo ndi monkedi ezi tuna dili kuyindindira.

7. Morwasinke nampo natu tjindjira eyi atu kanderere? Gava sihonena.

⁷ Ose kuvhura tu tjindje eyi atu kanderere apa atu ya kwata nawa egano mpango zaJehova. Tu tareni sihonena saMartin Poetzinger. Konyima tupu zapa ga kwere, munazinyetu Poetzinger kwa mu tulire modorongo mokamba zaNazi. Pomuhowo age kwa pulire Jehova a mu pwagese mo mokamba zounkwate yipo a ka pakere mbili mukadendi ntani noku ka twikira nosirugana sokuzuvhisa. Nye nampili ngoso, konyima zoyivike yivali, kwato eyi ga mwene eyi ya likidire asi Jehova ana hara kumumangurura mo mokamba zounkwate. Makura yipo ga tamekere kukanderera asi: “Jehova, na kanderere, likida nge eyi ono harere nge ni rugane.” Makura yipo ga tamekere kugazadara ko yininke eyi va ligwanekerere nayo vanavazinyetu wovagara womokamba ozo. Sinzi sawo kwa kere nosinka sosinene kuhamena vakadi vawo ntani novana vawo. Makura munazinyetu Poetzinger yipo ga kanderere asi: “Jehova, mpandu kositumbukira sange sosipe esi ono pe nge. Vatera nge yipo ni nkondopeke vanavazinyetu noku va  korangenda.” Age kwa rugene yokulifana ngomu ga kere monokamba ure wonomvhura ntane edi da kweme ko!

8. Sininke musinke somulyo twa hepa kudiworoka nsene kuna kukanderera?

⁸ Twa hepa kudiworoka asi Jehova ga kara nositambo ntani ngaka si sikisa mo kuliza nosiruwo esi ga tura po. Sitambo oso kwa kwatera mo ku ka gusilira po maudigu nagenye aga gana kuretesa po ruhepo oru runa vhuka neina. Maudigu ngwendi yimpagwa, mauvera ntani nomfa. Jehova ngaka sikisa mo sitambo sendi kupitira moUhompa wendi. (Ndan. 2:44; Ehor. 21:3, 4) Nye nampili ngoso, posiruwo esi, Jehova kuna kupulisira Satana a pangere uzuni. b (Joh. 12:31; Ehor. 12:9) Nsene asi Jehova a gusa po maudigu nagenye govantu ngesi, ayo ngano ta yi moneka asi Satana kuna kupangera nawa uzuni. Yipo nye, nampili ngomu tuna kundindira Jehova ngaka sikise mo matumbwidiro gendi, eyi kapi yina kutanta asi age kapi a tu vatere. Tu zeni tu ka zogereni ko nonkedi dimwe omu Jehova a tu vatere.

9. Ngapi omu Jehova na vhura kutuvatera neina apa atu hepa kutura po matokoro? Yifanekesa.

⁹ Age kutupa unongo. Jehova kwa tumbwidira asi nga tu pa unongo ou twa hepa yipo tu ture po matokoro gomawa. Unene po ose kuhepa unongo wokutunda kwaKarunga apa atu tura po matokoro aga ngaga kundama eparu lyetu mudima, pasihonena nsene asi ngatu kara vadike ndi asi ngatu kwara. (Jak. 1:5) Tu tareni sihorokwa samunazinyetu gomukadi Maria. c Age kwa kere muzuvhisi gokukarerera, apa ga ligwene namunazinyetu gumwe gomugara. Age kwa tanta asi: “Moomu twa tulisire po ukaume wounene, yimo hena twa li here unene. Nayidivire asi na hepere kutura po etokoro. Makura yipo na kanderere unene yikando yoyinzi kuhamena ukaro owo. Ame nahepere mavyukiso gokutunda kwaJehova nye hena nayi divire asi Jehova kapi ta vhuru kutulira nge po etokoro.” Age kulizuvha asi Jehova ga limbwilire makanderero gendi gokuhamena unongo. Monkedi musinke? Ngomu ga rugene epaparo moyimbapiratjangwa yetu, age kwa ya gwene yirongwa eyi ya mu vaterere a gwane malimbururo komapuro aga nga li pura. Age hena kwa purakenene kevyukiso lyewa eli va mu pere ozina. Evyukiso olyo, kwa vaterere Maria a konakone malizuvho gendi. Ano moruhura, age ga vhulire kutura po etokoro lyewa.

10. Kuliza noVafilipi 4:13, yisinke a rugana Jehova yipo a vatere vakareli vendi? Gava sihonena. (Tara hena efano.)

¹⁰ Age kutupa nonkondo tu lididimikire. Ngwendi moomu tupu Jehova ga yi rugene kwaPaurusa, nose ngatu pa nonkondo edi twa hepa yipo tu lididimikire maudigu getu. (Resa Vafilipi 4:13.) Koneka omu Jehova ga vaterere munazinyetu gomugara Benjamin a lididimikire maukaro goudigu. Hambara udinkantu wendi naunye, Benjamin nepata lyawo kwa tungire  monokamba dovanayirongo moAfrika. Benjamin kwa tanta asi: “Ame ngani kanderere kwaJehova nkenye apa noku mu pura a penge ko nonkondo yipo ni rugane eyi ayi mu hafesa. Jehova kwa limbwilire makanderero gange pokupange mbili zomomutjima, nouradi yipo ni twikire kuzuvhisa ntani kwa pere nge yimbapiratjangwa, eyi ya vaterere nge ni kare pepi nendi.” Age kwa tanta hena asi: “Apa na resere yihorokwa yovanavazinyetu ntani nokudimburura omu Jehova ga va vaterere va lididimikire maudigu, kwa nkondopekere nge yipo ni twikire kukara mulimburukwi.”

11-12. Ngapi omu Jehova na vhura kuruganesa epata lyetu lyopampepo yipo a limburure makanderero getu? (Tara hena efano.)

¹¹ Age kuruganesa epata lyetu lyopampepo. Mesiku lyokuhulilira komeho Jesus a ka gave eparu lyendi, age kwa kanderere nelituromo. Age kwa likwamberere kwaJehova yipo wopeke va dire kugazara asi age nga swaura Karunga. Mevango lyokumupopera komaswauro, Jehova kwa vaterere Jesus pokutuma muengeli yipo aya mu nkondopeke. (Ruk. 22:42, 43) Jehova kuvhura hena kutuvatera nose pokuruganesa munazinyetu gongandi yipo a tu bele ndi aya tu dingure. Natuvenye kuvhura kupapara nonkedi yipo tu uyunge “nonkango donongwa” kovapuli vakwetu.—Yis. 12:25.

¹² Tuzogereni kuhamena sihonena samunazinyetu gomukadi Miriam. Konyima tupu zoyivike yongandi, konyima zapa mugara gwendi ga dogorokere, Miriam kwa kere gelike pembo ntani kwa guvire. Age kwa lilire unene ntani ga hepere kuuyunga nagumwe. Age kwa tanta asi: “Ame kapi na kere nononkondo dokubela nkenye ogu, makura yipo na kanderere kwaJehova. Ngomu na lilire nokukanderera, makura funguna zange yipo za lilire. Mukuronambunga ogu ga kere kaume kange, yige ga toonene nge ngodi.” Miriam kwa gwene ehengagwido komukuronambunga ogo ntani namukadendi. Age gayi pura nawa-nawa asi Jehova yige ga tumangedere munazinyetu gomugara ogo yipo a mu bele.

13. Gava sihonena kuhamena omu Jehova na vhura kuruganesa vantu ava ava dili kumukarera yipo a limburure makanderero getu.

¹³ Age kuvhura kuruganesa vantu ava ava dili kumukarera. (Yis. 21:1) Poyiruwo yimwe, Jehova kulimburura makanderero govakareli vendi pokuruganesa vantu ava ava dili kumukarera yipo va va vatere. Pasihonena, age kwa tumangedere  Hompa Aretaserekesesi yipo a pulisire Nehemiya a tengure koJerusarema yipo a ka vatere kutungurura sitata. (Neh. 2:3-6) Neina, Jehova kuvhura kutumangeda vantu ava ava dili kumukarera yipo va tu vatere nsene tuna hepa mbatero.

14. Ngapi omu sihonena saSoo Hing sina kukorangeda? (Tara hena efano.)

¹⁴ Munazinyetu gomukadi gedina Soo Hing kwa lizuvhire asi Jehova kwa mu vaterere kupitira mevatero lyandokotora gwendi. Munendi gomumati kuvera mauvera gomouruvi. Apa nage namugara gwendi va ligwanekerere nehudi lyenene, awo kwa hagekere yirugana yawo yipo va pakere mbili munawo. Ano ngoyitundwamo, awo kwa kere noudigu woyimaliwa. Soo Hing kwa tanta asi age kwa lizuvhire asi kapi hena ta yi mu tompoka mokutwikira kulididimikira maudigu. Age kwa kanderere kwaJehova nokumupura yipo a mu vatere. Makura ndokotora yipo ga tokwere kugwana ko nkedi omu na vhura kumuvatera ntani nepata lyendi. Eyi kwa va twaredesere va gwane evatero kepangero ntani nokugwana evango lyombiliha oku va vhulire kutunga. Konyima, Soo Hing kwa uyungire asi: “Ose twa limonenene omu Jehova ga tu vaterere. Yosili age ‘kuzuvha makanderero.’”—Epis. 65:2.

15. Yisinke ya vaterere munazinyetu gumwe gomukadi yipo a dimburure asi Jehova kwa limbwilire makanderero gendi?

¹⁵ Makanderero getu kapi ava ga limburura nkenye apa mononkedi dokutetukisa. Nye malimbururo aga atu gwana, kuna kara malimbururo aga twa hepa yipo tu twikire kulimburukwa Guhyetu gemeguru. Yipo nye, dimburura nonkedi omu Jehova a limburura makanderero goge. Munazinyetu gomukadi gedina Yoko kwa lizuvhire asi Jehova kapi ga limbwilire makanderero gendi, makura yipo ga tamekere kutjanga mobuke yininke eyi ga hundilire Jehova. Konyima zapa pwa pitire siruwo sosire, age kwa tere mobuke zendi noku dimburura asi Jehova ga limbwilire sinzi somakanderero gendi, kukwatera mo gamwe aga ga divarere. Poyiruwo noyiruwo, twa hepa kugazadara ko omu Jehova ana kulimburura makanderero getu.—Epis. 66:19, 20.

16. Ngapi omu natu likida epuro kombinga zomakanderero getu? (Vahebeli 11:6)

¹⁶ Ose kapi tupu atu yi likida asi twa kara nepuro pokukanderera kwaJehova, nye hena ose kuyilikida asi twa kara nepuro pokutambura nkenye nkedi ezi a limburura makanderero  getu. (Resa Vahebeli 11:6.) Tu tareni sihonena saMike namukadendi Chrissy. Awo kwa kere nositambo sokukarugana koBeteli. Mike kwa uyunga asi: “Ngovalikwali, ose kwa tulire mo foroma yikando yoyinzi ntani twa kanderere kwaJehova yikando yoyinzi kuhamena sitambo esi, nye kapi va tu tambwire.” Mike naChrissy kwa twikilire kukara nehuguvaro asi Jehova ga divire nkedi zongwa po omu na vhura kuvaruganesa mosirugana sendi. Awo kwa twikilire kurugana eyi va hepere kurugana ko pokukara vazuvhisi wokukarerera oku kwa hepere evatero ntani pokukwatesa ko yirugana yokutunga mavango goukareli wetu. Neina awo kuna kara mosirugana sokudingura nombungakriste. Mike kwa tanta asi: “Jehova kapi nga limburura nkenye apa makanderero getu monkedi omu twa yi ndindilire, nye age kwa ga limburura mononkedi edi twa dilire kundindira.”

17-18. Kuliza nEpisarome 86:6, 7, ehuguvaro musinke natu vhura kukara nalyo?

¹⁷ Resa Episarome 86:6, 7. Muepisarome Ndafita gayi divire nawa-nawa asi Jehova ga zuvhire makanderero gendi ntani ngaga limburura. Nove kuvhura kukara nehuguvaro lyokulifana. Yihonena eyi tuna zogere mosirongwa esi kutuhuguvaresa asi Jehova kuvhura kutupa unongo ntani nononkondo edi twa hepa yipo tulididimikire. Age kuvhura kuruganesa epata lyetu lyopampepo ndi nampili vantu ava ava dili kumukarera posiruwo esi yipo va tu vatere mononkedi dimwe.

¹⁸ Nampili ngomu Jehova a dili kulimburura nkenye apa makanderero getu monkedi ezi tuna yi ndindire, ose twa yi diva asi age ngaga limburura. Age nga tu pa eyi tuna hepa ntani ngayi tu pa posiruwo esi tuna yi hepere. Yipo nye, twikira kukanderera ntani nokuyipura asi Jehova nga kuzuvha apa ngo kanderera nokukara nehuguvaro asi Jehova nga ku pakera mbili ngesi ntani age ngaka ‘kutika nayinye moufenkenda wendi’ mouzuni woupe ou una kuwiza.—Epis. 145:16.