1. Yisinke ana harere Jehova vakareli vendi va rugane? (Tara hena efano.)

 YILYE ogu natu vhura kuhedera yipo a tu hengagwide ntani a tu pe mavyukiso? Ose twa diva elimbururo kepuro olyo. Ose kuvhura kuhedera Jehova Karunga kupitira mekanderero. Jehova kuna kutuzigida tu kanderere kwendi. Age kuna tu harere tu “kanderere nkenye apa.” (1 Tes. 5:17) Ose kuvhura kukanderera kwendi nemanguruko ntani noku mu pura a tu vyukise meparu lyetu mudima. (Yis. 3:5, 6) Mokumona asi Jehova Karunga gougavi, age kuuyunga asi ose kuvhura tu kanderere kwendi yikando yoyinzi.

2. Yisinke natu ka zogera mosirongwa esi?

² Ose kuhafera uhwi ou wokukanderera. Nye nampili ngoso, mokumona asi yininke yinzi atu rugana, ayo kuvhura kutudigopera kugwana siruwo sokukanderera. Ntani nampo kuvhura tu lizuvhe asi twa hepa kuwapukurura makanderero getu. Yokuhafesa yeyi asi ose kuvhura kugwana ekorangedo nomavyukiso moMatjangwa. Mosirongwa esi, ta tu ka zogera omu natu litulira po siruwo sokukanderera pokukakona-kona sihonena saJesus. Natu ka zogera hena omu natu wapukurura makanderero getu pokutumbura mo yininke yitano yomulyo.

3. Yisinke ga kwete egano Jesus kuhamena makanderero?

³ Jesus gayi kwete egano asi makanderero getu mulyo unene kwaJehova. Nare-nare komeho a wize pevhu, age ga mwene omu oGuhwe ngava limburura makanderero govagara novakadi wovalimburukwi. Pasihonena, Jesus kwa kere konyonga zoGuhwe apa va limbwilire makanderero gokutundilira komutjima govakareli  vendi, ngwendi makanderero gaHana, Ndafita, Eliya ntani novakareli vendi vamwe hena wovalimburukwi. (1 Sam. 1:10, 11, 20; 1 Vah. 19:4-6; Epis. 32:5) Eyi yiyo Jesus ga rongere varongwa vendi va kanderere nkenye apa ntani nehuguvaro!—Mat. 7:7-11.

4. Yisinke tuna kulirongera ko komakanderero gaJesus?

⁴ Jesus kwa tulilire po varongwa vendi sihonena esi nava kwama kupitira momakanderero gendi aga nga kanderere kwaJehova. Jesus nga kanderere yikando yoyinzi apa ga kere mosirugana sendi sokuzuvhisa. Age ga hepere kulitulira po siruwo sokukanderera morwa rorunzi nga kara noyirugana yoyinzi yokurugana ntani nga kara novantu wovanzi. (Mar. 6:31, 45, 46) Age nga pinduka ngurangura zonene yipo a kare nosiruwo sokukara gelike a kanderere. (Mar. 1:35) Sikando simwe, age kwa kanderere masiku nagenye komeho a ture po etokoro lyomulyo. (Ruk. 6:12, 13) Ntani Jesus kwa kanderere yikando yoyinzi mesiku lyendi lyokuhulilira komeho a ka fe, komeho tupu a ka sikise mo ruha roudigu unene mosirugana sendi pevhu.—Mat. 26:39, 42, 44.

5. Ngapi omu natu honena Jesus apa atu kanderere?

⁵ Sihonena saJesus kuturonga asi yikare asi yirugana yokuhura kupi tuna kara nayo, twa hepa kulitulira po siruwo sokukanderera. Ngwendi Jesus, twa hepa kulitulira po siruwo sokukanderera. Nampo kuvhura tu pinduke ngurangura zonene yipo tu kanderere ndi konyima zezuva kongurova. Nsene tu yi rugana, ose ngatu yilikida kwaJehova asi ose twa kara norupandu rorunene kouhwi ou wokulikarera. Munazinyetu gomukadi Lynne kudiworoka omu ga ya kere norupandu apa ga ya divire mulyo gokukanderera. Age kwa tanta asi: “Apa naya dimbwilire asi ame kuvhura kuuyunga naJehova nkenye apa, ayo kwa vaterere nge ni mu tare nga kaume kange gomunene ntani noku kara neharo lyokuwapukurura makanderero gange.” Tuna si huguvara asi sinzi setu yimo a tu lizuvhu nose ngoso. Yipo nye, tu zeni tu ka zogere ko yininke yitano yomulyo eyi natu vhura kutumbura momakanderero getu.

6. Kuliza nEhororo 4:10, 11, yisinke ya wapera Jehova?

⁶ Hamberera Jehova. Memoneko lyokutetukisa, mupositoli Johanesa kwa mwene vapangeli 24 meguru kuna kukarera Jehova. Awo kwa hamberere Karunga ntani kwa uyungire asi “Karunga gwetu gononkondo Jehova, ove wa wapera kukufumadeka nokukuyererepeka.” (Resa Ehororo 4:10, 11.) Vaengeli wovalimburukwi nawo va kara nonokonda dononzi deyi  nava hamberera nokufumadeka Jehova. Awo kwa kara meguru kumwe naJehova ntani va ya mudiva nawa momunene. Awo kumona yikara yendi moyininke eyi a rugana. Apa ava mono eyi a rugana Jehova, ayo kuvatumangeda va mu hamberere.—Joba 38:4-7.

7. Koyininke musinke natu vhura kuhamberera Jehova?

⁷ Nose tuna hara kuhamberera Jehova momakanderero getu. Ose kuvhura kuyirugana oyo pokumutantera eyi twa hara kumuhamena ntani neyi twa mu fumakedekera. Ngomu ono kuresa nokulironga Bibeli, hetekera ko kudimburura yikara yaJehova eyi o hafere po unene. (Joba 37:23; Rom. 11:33) Makura tantera Jehova omu o lizuvhu kuhamena yikara oyo. Ose kuvhura hena tu hamberere Jehova kweyi a tu vatere ntani novanavazinyetu navenye ava va hamena kepata lyetu lyopampepo. Age kutupakera mbili nkenye apa ntani kutupopera.—1 Sam. 1:27; 2:1, 2.

8. Nokonda musinke dimwe deyi natu pandwira Jehova? (1 Vatesaronika 5:18)

⁸ Pandura Jehova. Ose twa kara nonokonda dononzi deyi natu pandwira Jehova mekanderero. (Resa 1 Vatesaronika 5:18.) Ose kuvhura kumupandura koyininke nayinye yoyiwa eyi twa kara nayo morwa nkenye uhwi wouwa kutunda kwendi. (Jak. 1:17) Pasihonena, ose kuvhura tu mu pandure kuhamena omu evhu lyawapa ntani noyininke yokutetukisa eyi ga sita. Ose kuvhura hena kulikida rupandu pokumupandura keparu lyetu, ekoro lyetu, vakaume vetu ntani ehuguvaro lyetu. Ntani ose tuna hara kupandura Jehova kweyi a tu pulisire tu kare vakaume vendi.

9. Morwasinke twa hepera kutunga po nkareso zokukara norupandu kwaJehova?

⁹ Ose nampo kuvhura tu litulire po siruwo sokugazadara ko kuhamena nokonda dimwe deyi natu pandwira Jehova pamundinda. Neina sinzi sovantu womouzuni ou kapi va kara norupandu. Rorunzi vantu kudemenena koyininke eyi vana hara mevango lyokudemenena koyininke eyi nava vhura kurugana ko yipo va likide rupandu kweyi va kara nayo. Nsene tu tameka kuhonena nkareso zangoso, ayo kuvhura ngayi tu ninkise tu hundire yininke yoyinzi momakanderero getu mevango lyokupandura Jehova. Mokuninka asi yi dire kuhoroka oyo, twa hepa kutwikira kutunga po nkareso zokukara norupandu ntani twa hepa kulikida rupandu kwaJehova koyininke nayinye eyi a tu ruganene.—Ruk. 6:45.

10. Ngapi omu kukara nonkareso zorupandu ya vaterere munazinyetu gumwe gomukadi yipo a lididimikire? (Tara hena efano.)

¹⁰ Nkareso zorupandu kuvhura kutuvatera tu lididimikire maudigu. Tu zogereni sihonena saKyung-sook, esi sa kara moRuhungu romo-15 Murongagona 2015. Age kwa mu kwatekere kankera zomomapunga zosiponga unene. Age kwa tanta asi: “Uvera ou kwa dompesere nge sili unene. Ame kwa lizuvhire asi kwa zumbanesere nayinye ntani ame kwa kere nowoma wounene.” Yisinke ya mu vaterere yipo a lididimikire? Age kwa tanta asi nkenye masiku komeho a rare, age nga zi peguru lyonzugo zendi noku ka kanderera kuziguruka kuhamena yininke yitano eyi ga  karerere norupandu ezuva olyo. Eyi kwa mu vaterere a dire kukara nowoma wounene ntani kwa mu tumangedere a likide rupandu kwaJehova. Age ga limonena omu Jehova a vatere vakareli vendi wovalimburukwi apa ava ligwanekere nomaudigu gomanene ntani kwa ya dimbwilire asi pwa kara yininke yoyinzi yoyiwa meparu kupitakana maudigu aga atu li gwanekere nago. Ngwendi Kyung-sook, ose twa kara nonokonda dononzi deyi natu pandwira Jehova, nampili yi kare asi ose kuna kara noudigu. Kulikida rupandu rwetu kwendi kupitira mekanderero kuvhura kutuvatera tu lididimikire ntani noku kara tuna litura.

11. Morwasinke varongwa vaJesus va heperere kukara nouradi konyima zapa Jesus ga tengwire meguru?

¹¹ Pura Jehova a ku vatere o kare nouradi mokuzuvhisa. Komeho tupu Jesus a tengure meguru, age kwa diworokesere varongwa vendi situmbukira sawo sokugavera umbangi kumuhamena “moJerusarema, moJudeya nazinye nomoSamaliya dogoro mouzuni naunye.” (Yirug. 1:8; Ruk. 24:46-48) Konyima tupu zosiruwo sosisupi, vampitisili woVajuda yipo va kwete mupositoli Peturusa naJohanesa noku va twara komeho zosigongi somasimbi. Awo kwa pangerere vagara ava wovalimburukwi asi va hageke kuzuvhisa ntani kwa va tjilisire hena. (Yirug. 4:18, 21) Yisinke ga rugene ko Peturusa naJohanesa?

12. Kuliza noYirugana 4:29, 31, yisinke va rugene varongwa?

¹² Peturusa naJohanesa kwa limbwilire matjiliso govampitisili womaukarelikarunga goVajuda pokuuyunga asi: “Tokoreni nsene asi yokupurakena kweni ndi kwaKarunga yiyo yoyiwa po kwaKarunga. Nye ose kapi tatu hageke kuuyunga kuhamena yininke eyi twa mona neyi twa zuvha.” (Yirug. 4:19, 20) Apa Peturusa naJohanesa va va mangwilire, varongwa kwa kanderere kwaJehova kuhamena kurugana mpango zendi. Awo kwa kanderere asi: “Tu vatera ose vakareli woge tu twikire kuzuvhisa nonkango doge nouradi.” Jehova ga limbwilire ekanderero olyo lyokutundilira komutjima.—Resa Yirugana 4:29, 31.

13. Yisinke natu lirongera ko kosihonena saJin-hyuk?

¹³ Ose kuvhura kuhonena varongwa vaJesus pokutwikira kuzuvhisa nampili apa mapangero aga tu pangere tu hageke. Tu zogereni kuhamena sihonena samunazinyetu gomugara Jin-hyuk, ogu va tulire modorongo morwa kudira kulihameka moupolitika. Apa ga kere modorongo, age kwa mu pere situmbukira sokupakera mbili vanadorongo ava va tulire va li karere velike. Age kwa mu pulisilire a zogere tupu nawo kuhamena yininke eyi va hepere, nye kapi va mu pulisilire a zogere nawo kuhamena Bibeli. Age kwa kanderere kwaJehova yipo a mu pe ko uradi nonondunge yipo a zuvhise pwankenye mpito. (Yirug. 5:29) Age kwa uyunga asi: “Jehova kwa limbwilire makanderero gange poku pange uradi nounongo yipo ni tameke malirongo goBibeli aga ngani ruganene pomavero ntani nkenye elirongo lyoBibeli nga li gusa nominute ntano. Ano masiku, ame ngani tjanga nombilive edi ngani gava ezuva lyokukwama ko kovanadorongo vakwetu. Nose kuvhura kukara nehuguvaro asi Jehova ngatu vatera tu sikise mo sirugana setu sokuzuvhisa. Ngwendi Jin-hyuk, ose kuvhura kukanderera kwaJehova yipo a tu pe ko uradi nounongo.

14. Yisinke nayi vhura kutuvatera nsene asi ose kuna kuligwanekera nomaudigu? (Episarome 37:3, 5)

¹⁴ Pura Jehova a ku vatere o lididimikire maudigu. Sinzi setu kuna kuligwanekera nomauvera, maudigu gopamalizuvho, kufisa muntu ogu twa hara, udigu wemepata, mahepeko, ndi maudigu gamwe hena. Ntani yininke ngwendi mauvera gomukagu noyita kwa tu ninkisa yi tu karere udigu unene kulididimikira maudigu. Tantera Jehova kuhamena omu ono kulizuvha. Mu tantera kuhamena ukaro woge ou ono kuligwanekera nawo ngwendi moomu tupu o tantere  kaume koge udigu woge. Kara nehuguvaro asi Jehova ‘nga ku kwafa.’—Resa Episarome 37:3, 5.

15. Ngapi omu makanderero naga tu vatera tu ‘lididimikire maudigu’? Gava sihonena.

¹⁵ Kukanderera nkenye apa nga ku tuvatera tu “lididimikireni momaudigu.” (Rom. 12:12) Jehova ga diva eyi vana kuligwanekera nayo vakareli vendi. Age “kuzuvha nkugo zawo.” (Epis. 145:18, 19) Muzuvhisi gokukarerera gedina Kristie gonomvhura 29 gayi limonena oyo. Age kwa tamekere kuvera hararasi. Ano ngoyitundwamo, age kwa ya kere nomagazaro gomanzi. Ano konyima, age kwa ya dimbwilire asi ozina kwa va kwatekere uvera wosiponga ou ngano wa va ninkisire va fe. Kristie kwa tanta asi: “Ame kwa kanderere kwaJehova nelituromo yipo a penge ko nonkondo edi nahepere yipo nilididimikire nkenye ezuva. Ame kwa hetekerere ko kukwama nkenye apa elikwamo lyokurugana yininke youkareli pokuza komapongo ntani pokurugana elirongo lyanyamwange lyoBibeli.” Age kwa gwederera ko asi: “Kukanderera kwa vaterere nge nilididimikire yiruwo yoyidigu. Ame nayi divire asi Jehova ga liwapayikilire kuvatera nge nkenye apa. Egano olyo kwa vaterere nge nilizuvhe ko hansa. Nampili ngomu maudigu gange ga dilire kuhaga po, Jehova kwa limbwilire makanderero gange poku pa nge mbili zomomutjima ntani kwa vaterere nge ni kare nina litura.” Twa ha divareni asi “Jehova ga diva omu a parura vantu wovahungami momaudigu gawo.”—2 Pet. 2:9.

16. Morwasinke twa hepera evatero lyaJehova yipo tu nyokere po maheteko?

¹⁶ Pura Jehova a ku vatere yipo o nyokere po maheteko. Ngovantu wokudira kusikiliramo, twa hepa kutwikira kurwanesa po maheteko gokurugana yininke yoyidona. Satana kuna kurugana paapa ga hulira yipo atu ninkise tu ligwanekere unene nomaheteko. Nkedi zimwe omu a hetekere ko kuzonagura magazaro getu, kuna kara kupitira moyilihafeso yokunyata. Yilihafeso yangoso kuvhura kutuninkisa tu kare nomagazaro gomadona aga naga tu ninkisa tu dire kurugana youhunga kosipara saJehova ntani  aga naga tu ninkisa tu ture nzo zonene.—Mar. 7:21-23; Jak. 1:14, 15.

17. Konyima zokukanderera kwaJehova yipo a tu vatere, yisinke twa hepa kurugana yipo tu nyokere po eheteko? (Tara hena efano.)

¹⁷ Ose twa hepa evatero lyaJehova nsene tuna hara yi tu tompoke kunyokera po maheteko gokurugana yininke yoyidona. Jesus kwa hundilire Jehova mekanderero lyosihonena pokuuyunga asi: “Tu vatera ga dire kutufunda maheteko ntani tu popera koMudona.” (Mat. 6:13) Jehova ana hara kutuvatera, nye twa hepa kumupura yipo a tu vatere. Konyima zokukanderera kwaJehova yipo a tu vatere, nose twa hepa kurugana paapa twa hulira yipo tu nyokere po yininke eyi nayi tu tura meheteko. Ose kuvhura kuhetekera ko kurugana paapa twa hulira yipo tu nyokere po kuresa nokupurakena komagano gepuko aga gana vhuka mouzuni ou waSatana. (Epis. 97:10) Ose kuvhura kuzwida nondunge detu nomagazaro gomawa pokuresa nokulironga Bibeli. Kuza komapongo ntani noku lihameka mokuzuvhisa ngayi tuvatera tu kare nomagazaro gomawa. Ntani Jehova kwa tu tumbwidira asi kapi ngatu tarerera tu pite momaheteko aga ngatu dira kuvhura kulididimikira.—1 Kol. 10:12, 13.

18. Yisinke twa hepa kurugana natuvenye kuhamena kukanderera?

¹⁸ Nkenye gumwe gwetu ga hepa kukanderera unene yipo a twikire kulimburukwa Jehova pomazuva aga goudigu gopouhura. Litulira po siruwo nkenye ezuva yipo o kanderere kwaJehova kutundilira komutjima. Jehova kuna tu harere tu ‘mu tantere maudigu getu nagenye.’ (Epis. 62:8) Hamberera Jehova ntani mu pandura kwanayinye eyi a rugana. Mu pura a ku vatere yipo o kare nouradi mokuzuvhisa. Likwambera a ku vatere yipo o lididimikire nkenye udigu ntani yipo o nyokere po nkenye eheteko eli novhura kuligwanekera nalyo. Wa ha pulisira nkenye eyi ndi nkenye ogu a ku hagekese kukanderera kwaJehova nkenye ezuva. Nye ngapi omu Jehova a limburura makanderero getu? Ngatu ka zogera epuro olyo lyomulyo mosirongwa sokukwama ko.