1. Udigu musinke va ligwanekera nawo sinzi sovanavazinyetu?

 WA LI TULIRA PO rumwe sitambo sopampepo nye ya ku digoperere kusisikisa mo ndi? b Nsene yimo, kapisi nyovelike ayi horokere. Pasihonena, Philip kwa here kuwapukurura makanderero gendi ntani yikando eyi nga kanderere, nye age ngayi mu digopere kugwana siruwo sokukanderera. Sitambo saErika kwa kere sokulivinduka kuza kepongo lyomokuzuvhisa, nye age simpe nga hulilire hambara nkenye epongo. Tomáš kwa hetekerere ko yikando yongandi yipo a rese Bibeli nazinye. Age kwa uyunga asi: “Ame kapi ngani hafere kuresa Bibeli. Ame kwa hetekerere ko kuresa Bibeli yikando yitatu, nye pwankenye siruwo, ame ngani resa tupu dogoro mobuke zaLevitikus makura tani hageke.”     

2. Morwasinke nayi dilira kutudompesa nsene asi twa kara nositambo sopampepo esi twa dira kusikisa mo simpe?

² Ya ha kudompesa nsene asi ove ngesi kuna kara nositambo esi wa dira kusikisa mo simpe. Nampili kusikisa mo sitambo sosinunu, rorunzi kwa hepa siruwo ntani nelituromo lyenene. Mokumona asi ono hara kusikisa mo sitambo soge, ayo kulikida nawa-nawa asi ove kutara elikwatakano lyoge naJehova asi mulyo unene ntani wa kara neharo lyokumuruganena paapa wa hulira. Jehova kuhafera elituromo lyoge. Age kapi a ndindire ko yoyinzi koge kupitakana pweyi no vhura kumupa. (Epis. 103:14; Mika 6:8) Yipo nye, apa o litulire po sitambo, divilisa asi ove kuna kusisikisa mo. Yisinke no vhura kurugana yipo o sikise mo sitambo esi wa li tulira po? Tu zeni tu ka zogere ko magano gamwe.

3. Morwasinke kukara neharo lyenene lyokusikisa mo sitambo ya karera nomulyo?

³ Ayo ya kara nomulyo o kare neharo lyenene lyokusikisa mo yitambo yoge yopampepo. Nsene o kara neharo lyenene lyokusikisa mo sitambo soge, ove ngo rugana unene yipo o si sikise mo. Ose kuvhura kuhetakanesa eharo lyetu lyokusikisa mo sitambo kompepo ezi azi sindike wato kevango oku una tamba. Nsene mpepo zi twikira kupepa, mudugi ndi musingi kuvhura a ka sike kevango eli ana tamba. Ntani nsene kukara mpepo zonene, age kuvhura a ka sike usimbu oku ana tamba. Mokulifana, nsene tu kara neharo lyenene lyokusikisa mo yitambo yetu, ayo ngayi tu rerupira kusikisa mo yitambo yetu. Munazinyetu gomugara David gomoEl Salvador kwa uyunga asi: “Nsene o kara neharo lyenene lyokusikisa mo sitambo soge, ove ngo hetekera ko unene paapa wa hulira. Ove ngo hetekera ko mokudira kupulisira nkenye eyi yipo yi ku kondere o dire kusikisa mo sitambo soge.” Makura yinke no rugana yipo o kare neharo lyenene lyokusikisa mo sitambo soge?

4. Yisinke natu vhura kukanderera? (Vafilipi 2:13) (Tara hena efano.)

⁴ Kanderera yipo o kare neharo lyenene lyokusikisa mo sitambo soge. Kupitira mompepo zendi zokupongoka, Jehova kuvhura a ku tumangede o sikise mo sitambo soge. (Resa Vafilipi 2:13.) Poyiruwo yimwe ose kulitulira po sitambo morwa twa yi diva asi twa hepa kulitulira po sitambo ntani oso kuna kara sininke sosiwa kurugana. Nye kuvhura tu dire kukara nawa-nawa neharo lyokusisikisa mo. Owo yiwo ukaro ga li gwanekera nawo munazinyetu gomukadi Norina gomoUganda. Age kwa li tulilire po sitambo sokurugana elirongo lyoBibeli, nye age kapi ga kere neharo lyenene lyokusikisa mo sitambo esi morwa kwa lizuvhire asi age kapisi murongi gomuwa. Yisinke ya mu vaterere? Age kwa uyunga asi: “Ame kwa tamekere kupura Jehova nkenye ezuva yipo a vatere nge ni kare neharo lyenene lyokurugana elirongo lyoBibeli. Ame ngani wapukurura nkedi zange zokuzuvhisa ngomu ngani kanderere kwaJehova. Konyima zomakwedi gongandi, ame kwa ya dimbwilire asi eharo lyange lyokurugana elirongo lyoBibeli lina nkondopara. Momvhura zoozo, ame kwa ya tamekere malirongo gavali goBibeli.”

5. Yininke musinke natu vhura kuteda ko eyi nayi tu vatera tu nkondopeke eharo lyetu lyokusikisa mo sitambo setu?

⁵ Teda ko kweyi ga ku ruganena Jehova. (Epis. 143:5) Mupositoli Paurusa kwa tedere ko konkenda zaKarunga zonene ezi ga mu likidire ntani eyi kwa mu tumangedere a ruganene unene Jehova. (1 Kol. 15:9, 10; 1 Tim. 1:12-14) Mokulifana, moomu ono kuteda ko unene kweyi ga ku ruganena Jehova, yimo hena ngo kara neharo lyenene lyokusikisa mo sitambo soge. (Epis. 116:12) Koneka eyi ya vaterere munazinyetu gomukadi ogu ga tunga moHonduras yipo a sikise mo sitambo sendi sokukara muzuvhisi gokukarerera. Age kwa tanta asi: “Ame kwa gazadarere ko omu Jehova ga hara nge. Age kwa reta nge kombunga zovantu vendi. Age kupakera nge mbili ntani kupopera nge. Apa na gazadarere ko koyininke oyo, eharo lyange lyokuhara Jehova kwa ya nkondoparere ntani ame kwa here kurugana unene yipo ni tameke uzuvhisi wokukarerera.”

6. Yisinke hena nayi tu vatera yipo tu kare neharo lyokusikisa mo sitambo setu?

⁶ Demenena komauwa aga ngo gwanena mo nsene o sikisa mo sitambo soge. Koneka eyi ya vaterere Erika ogu ka tu tumbura, yipo a sikise mo sitambo  sendi sokulivinduka. Age kwa tanta asi: “Ame kwa ya dimbwilire asi ngani zumbanesa yoyinzi apa ngani hulilire kepongo lyomoyirugana yokuzuvhisa. Nye nsene ni livinduka kukasika, ame kuvhura kuka limorora novanavazinyetu ntani nokukara kumwe nawo. Ame hena kuvhura kuka purakena komagano gomulyo aga naga vhura kuvatera nge yipo ni hafere sirugana sokuzuvhisa ntani nokuwapukurura nkedi zange zomokuzuvhisa.” Erika kwa demenene komauwa gokulivinduka ntani age kwa sikisire mo sitambo sendi. Mauwa musinke no vhura kudemenena? Nsene asi sitambo soge kuna kara sokuwapukurura nkedi zokuresa ereso lyoge lyoBibeli ndi makanderero goge, gazadara ko omu nayi vhura kunkondopeka elikwatakano lyoge kumwe naJehova. (Epis. 145:18, 19) Nsene asi sitambo soge kuna kara sokutunga po sikara soSikriste, demenena omu nayi vhura kukuvatera yipo o nkondopeke ukaume woge kumwe novanavazinyetu. (Koros. 3:14) Ngapi nsene o hetekera ko kutjanga nokonda nadinye deyi ono harere kusikisa mo sitambo soge? Tara-tara po nkenye ezuva. Tomáš, ogu ka tu tumbura, kwa uyunga asi: “Moomu nina kukara nonokonda dononzi deyi nani sikisira mo sitambo sange, yimo hena ayi vatere nge yipo ni dire kuhageka kusikisa mo sitambo sange.”

7. Yisinke ya vaterere Julio namukadendi yipo va sikise mo sitambo sawo?

⁷ Kara kumwe nava nava vhura kukukorangeda yipo o sikise mo sitambo soge. (Yis. 13:20) Koneka eyi ya vaterere Julio ntani namukadendi yipo va sikise mo sitambo sawo sokutamununa sirugana sawo sokuzuvhisa. Age kwa tanta asi: “Ose kwa horowere vakaume ava ngava tu korangeda yipo tu sikise mo sitambo setu ntani ose ngatu zogere nawo kuhamena sitambo setu. Sinzi sawo kwa sikisire mo yitambo yokulifana, yipo nye awo va vhulire kutupa ko magano gomawa. Vakaume vetu ngava tu pura hena omu yitambo yetu yina kutugenda po ntani awo ngava tu korangeda apa twa hepere ekorangedo.”

8. Yisinke ngayi vhura kuhoroka nsene tu sikisa mo sitambo setu dogoro apa ngatu kara tupu neharo lyenene lyokusikisa mo sitambo setu? (Tara hena efano.)

⁸ Poyiruwo yimwe natuvenye kapi atu kara neharo lyokusikisa mo sitambo setu. Eyi ngesi kutanta asi kapi ta tu vhuru kusikisa mo sitambo setu ndi? Hawe. Mokuyifanekesa, mpepo kuvhura kusindika nononkondo wato yipo u ka sike oku una tamba. Nye nampili ngoso, mpepo zalisiga-siga mononkondo ntani mazuva gamwe kuvhura nga ku dire kukara mpepo. Ngoso eyi kutanta asi musingi ndi mudugi gowato kapi na vhura kutwikira norugendo rwendi ndi? Hawe. Pasihonena, mawato gamwe kwa kara notumahina to ku ga gendesa, ano gamwe kwa kara noyirapo. Yipo nye, musingi ndi mudugi gowato kuvhura a ruganese simwe soyininke oyo yipo a twikire kuza kevango oku ana tamba. Eharo lyetu lyenene lyokusikisa mo sitambo setu kuvhura kulihetakanesa kompepo. Mazuva gamwe kuvhura li nkondopare kupitakana mazuva makwawo, ano mazuva gamwe, kuvhura tu dire kukara neharo lyenene lyokusikisa mo sitambo setu. Yipo nye nsene tu litulira po tupu sitambo dogoro apa ngatu kara tupu neharo lyokusikisa mo sitambo setu, kuvhura ngatu dire kusisikisa mo. Nye ngwendi moomu tupu mudugi ndi musingi gowato a papara nonkedi dapeke yipo a ka sike kevango oku ana tamba, nose kuvhura tu hetekere ko kusikisa mo sitambo setu nampili ngomu atu dili kukara neharo lyangoso lyokuyirugana poyiruwo yimwe.  Yimo, eyi kapisi ureru kuyirugana. Nye ove ngo hafa apa ngo sikisa mo sitambo soge. Komeho tu ka zogere eyi natu vhura kurugana, tu zeni tu ka zogere ko mapuro gamwe aga natu vhura kulipura.

9. Ngoso ayo epuko kusikisa mo sitambo setu apa atu lizuvhu asi kapi tuna kara neharo lyenene lyokuyirugana ngoso ndi? Faturura.

⁹ Jehova ana hara tu mu karere noruhafo ntani neharo lyokutundilira komutjima. (Epis. 100:2; 2 Kol. 9:7) Ngoso kuvhura nye tu sikise mo sitambo setu sopampepo nsene kuna kulizuvha asi kapi ta tu vhuru kusisikisa mo ndi? Tu tareni sihonena somupositoli Paurusa. Age kwa uyungire asi: “Nye ame kupangera rutu rwange ngwendi moomu ava pangere mupika.” (1 Kol. 9:25-27) Nampili apa Paurusa ga dilire kukara neharo lyokurugana eyi ga mu harerere Jehova a rugane, age kwa li sininikire mwene yipo a yi rugane. Ngoso Jehova ga haferere sirugana saPaurusa ndi? Yimo! Ntani Jehova kwa mu tungikire morwa elituromo lyendi.—2 Tim. 4:7, 8.

10. Mauwa musinke ngatu gwana nsene tu hetekera ko kusikisa mo sitambo setu nampili apa atu dili kukara neharo lyokusisikisa mo?

¹⁰ Mokulifana, Jehova kumuhafesa apa atu mono kuna kuhetekera ko kusikisa mo sitambo setu nampili apa atu dili kukara neharo lyenene lyokuyirugana ngoso. Age kuhafa morwa ga yi diva asi nampili yi kare asi ose kapi twa hara eyi atu rugana, ose kuyiruganena morwa twa mu hara. Ngwendi moomu tupu Jehova ga tungikire Paurusa, age nga tu tungika morwa elituromo lyetu. (Epis. 126:5) Ntani moomu tuna kulimonena matungiko gokutunda kwaJehova, ose kuvhura ngatu tameke kulizuvha asi tuna kara neharo lyenene lyokusikisa mo sitambo setu. Munazinyetu gomukadi Lucyna ogu ga tunga moPoland kwa tanta asi: “Poyiruwo yimwe ame kapi ani hara kuza mokuzuvhisa, unene po apa ani lizuvhu eroroko. Nye nampili ngoso, ruhafo oru ani lizuvhu konyima zokukatunda mokuzuvhisa kuna kara etungiko sili lyewa.” Yipo nye, tu zeni tu ka tare eyi natu rugana apa atu dili kukara neharo lyenene lyokusikisa mo sitambo setu.

11. Ngapi omu Jehova na vhura kutuvatera yipo tu kare nelipangero?

¹¹ Kanderera kwaJehova yipo a ku vatere o kare nelipangero. Elipangero kuna kara evhuliko lyokupangera malizuvho noyirugana yetu. Rorunzi nkango ozo kutanta asi kunyokera po kurugana yininke yoyidona. Nye nampili ngoso, ose twa hepa elipangero yipo tu rugane yininke yoyiwa, unene po nsene asi ose kuna kurugana sininke sosidigu ndi nsene asi kapi tuna kara neharo lyokusirugana. Diworoka asi elipangero kuna kara sikara simwe soyiyimwa yompepo, yipo nye, pura Jehova a ku pe ko mpepo zokupongoka zi ku vatereyipo o tunge po sikara oso somulyo. (Ruk. 11:13; Gar. 5:22, 23) David, ogu ka tu tumbura, kwa faturura omu makanderero ga mu vatera. Age kwa here kurugana nkenye apa elirongo lyanyamwendi lyoBibeli. Age kwa tanta asi: “Ame ngani pura Jehova yipo a vatere nge ni tunge po elipangero. Nevatero lyendi, ame na tamekere kurugana elirongo lyanyamwange lyoBibeli ntani ngani yi rugana nkenye apa.”

12. Ngapi omu etjangwa lyomwaMuudisi 11:4 ali tu vatere tu sikise mo yitambo yetu?

¹² Wa ha ndindira dogoro maukaro ngaga waperere. Mouzuni ou, ayo kumoneka asi ose kapi ngatu kara nomaukaro gokuwaperera. Nsene tu ndindira asi dogoro maukaro ngaga wape, ose kuvhura ngatu dire kusikisa mo sitambo setu. (Resa Muudisi 11:4.) Munazinyetu gomugara Dayniel kwa tanta asi: “Kapi pwa kara maukaro gokuwaperera. Yipo nye, kapisi tu ndindire, nye twa hepa tupu kutameka.” Munazinyetu gomugara Paul ogu ga tunga moUganda kwa tumbura ko hena konda zimwe zeyi natu dilira kurangapeka yininke. Age kwa uyunga asi: “Nsene tu tameka nampili apa ayi tu digopere, Jehova ngatu vatera.”—Mara. 3:10.

13. Mauwa musinke ngatu gwanena mo nsene tu sikisa mo yitambo yetu nakauke-nakauke?

¹³ Tameka nakauke-nakauke. Ose kuvhura tu dire kukara neharo lyokusikisa mo sitambo setu morwa sitambo setu kuvhura si moneke ngwendi udigu unene kusisikisa mo. Nsene asi yiwo ukaro wa kara nawo owo, kuvhura o tameke kusikisa mo sitambo soge nakauke-nakauke ndi? Nsene asi sitambo soge kuna kara sokutunga po sikara songandi, kuvhura o tameke kusilikida mononkedi dononunu ndi? Nsene asi sitambo soge kuna kara sokuresa Bibeli nazinye, kuvhura o litulire po siruwo sosisupi esi no vhura kuresa ndi? Tomáš ogu ka tu tumbura ketameko,  age kwa mu digoperere kusikisa mo sitambo sendi sokuresa Bibeli nazinye momvhura. Age kwa tanta asi: “Ame kwa ya dimbwilire asi eyi na tokwere kuresa kwa kere yinzi unene kwange. Makura yipo na tokwere kuresa hena, nye sikando esi, ame kwa tokwere kuresa ruha rumwe rwegaununo nkenye ezuva ntani nokuteda ko. Ano ngoyitundwamo ame kwa tamekere kuhafera ereso lyange lyoBibeli.” Moomu Tomáš’ga ya tamekere kuhafera kuresa Bibeli, yimo hena ya ya mu vatererere a tameke kuresa Bibeli siruwo sosire. Ano konyima, age kwa resere Bibeli nazinye. c

14. Yininke musinke yimwe eyi nayi tu ninkisa yi tu karere udigu kusikisa mo yitambo yetu?

¹⁴ Yi kare asi twa kara neharo lyokusikisa mo sitambo setu ndi nsene asi twa kara nelipangero, ose simpe kuvhura kuligwanekera noyininke eyi nayi vhura kutuninkisa yi tu karere udigu kusikisa mo sitambo setu. Pasihonena, ose kuvhura kuligwanekera noyininke eyi tuna dili kundindira eyi nayi vhura kumana siruwo setu yipo tu dire kusikisa mo sitambo setu. (Muud. 9:11) Ose kuvhura kuligwanekera noudigu ou na u tu dompesa ntani ou na u tu ninkisa tu dire kukara nononkondo dononzi. (Yis. 24:10) Morwa ose kapi twa sikilira mo, ose kuvhura kurugana mapuko aga naga tu ninkisa yi tu karere udigu kusikisa mo sitambo setu. (Rom. 7:23) Ndi kuvhura tu lizuvhe eroroko. (Mat. 26:43) Yisinke nayi tu vatera tu nyokere po yininke eyi nayi tu ninkisa yi tu karere udigu kusikisa mo yitambo yetu?

15. Morwasinke no dilira kuhageka nsene pa horoka yuma eyi nayi kuninkisa yi ku karere udigu kusikisa mo sitambo soge? Faturura. (Episarome 145:14)

¹⁵ Diworoka asi nsene pa horoka yuma eyi nayi kukondera mokusikisa mo sitambo soge, ayo kapi ayi tanta asi yina kusumpire. Bibeli kuuyunga asi ose kuvhura ngatu ligwanekere nomaudigu yikando yoyinzi. Nye nampili ngoso, azo za yi zeresa hena asi ose kuvhura kuhetekera ko kusikisa mo sitambo setu unene po nevatero lyaJehova. (Resa Episarome 145:14.) Munazinyetu gomugara Philip, ogu ka tu tumbura, kwa uyunga kuhamena eyi ayi tanta kusikisa mo yitambo. Age kwa tanta asi: “Ame kapi ani demenene koyikando eyi ani dili kusikisa mo yitambo  yange, nye mevango lyoyo, ame kudemenena koyikando eyi ani tameke hena kusikisa mo sitambo sange.” David, ogu ka tu tumbura, kwa tanta asi: “Ame kapi ani tara yininke eyi ayi ninkisa nge ni dire kusikisa mo sitambo sange ngoyilimbikiso, nye ngonompito omu nani yi likida asi ame na hara Jehova.” Pokutwikira kusikisa mo sitambo soge nampili apa ayi kara udigu, ove kuyilikida kwaJehova asi ono hara kumuhafesa. Gazara tupu omu Jehova a hafa apa a ku mono omu ono kuhetekera ko kusikisa mo sitambo soge.

16. Yisinke no lirongera ko nsene pa horoka yuma eyi ayi ku kondere o dire kusikisa mo sitambo soge?

¹⁶ Lirongera ko koyiruwo apa ayi horoka yininke eyi ayi ku kondere mokudira kusikisa mo sitambo soge. Gazadara ko eyi ya yi retesere po ntani lipura nyamoge asi ‘yisinke nani vhura kurugana yipo ngayi dire kuhoroka hena?’ (Yis. 27:12) Poyiruwo yimwe nsene asi ayo kukudigopera kusikisa mo sitambo soge, ayo kuvhura kulikida asi ove kapi to vhuru kusikisa mo sitambo oso. Nsene asi nampo owo yiwo ukaro ono kuligwanekera nawo, gazadara ko hena kuhamena sitambo soge nsene asi kuvhura o si sikise mo. d Jehova kapi ngaku tara asi yina kusumpire kweyi wa dira kusikisa mo sitambo esi wa li tulira po.—2 Kol. 8:12.

17. Morwasinke natu gazadarera ko kuhamena yininke eyi twa sikisa mo nare?

¹⁷ Diworoka eyi wa sikisa mo. Bibeli kuuyunga asi “Karunga muhungami, kapi nga divara yirugana yeni.” (Heb. 6:10) Yipo nye, nove kapisi o divare yininke eyi wa sikisa mo. Gazadara ko yininke eyi wa sikisa mo nare. Ayo kuvhura yi kare asi ove kwa tulisa po nare ukaume naJehova noku tantera ko wopeke kumuhamena ndi kugwana ekuho. Ngwendi moomu tupu ya ku tompoka ntani nomu wa sikisire mo yitambo yoge yopampepo eyi wa li tulilire po nare, ove kuvhura o twikire kusikisa mo sitambo soge esi wa li tulira po ngesi.—Fil. 3:16.

18. Yisinke twa hepa kudiworoka ngomu tuna kuhetekera ko kusikisa mo sitambo setu? (Tara hena efano.)

¹⁸ Nevatero lyaJehova, ove kuvhura kusikisa mo sitambo soge, ngwendi moomu a yi hafesa musingi ndi mudugi gowato apa a ka sika kevango eli ana tamba. Nye diworoka asi sinzi sovasingi ndi vadugi wowato nawo kuhafera nzira zawo. Mokulifana, hetekera ko nkenye apa kumona omu Jehova ana kukuvatera ntani oyo ngayi kuvatera yipo o hafe ngomu ono kuhetekera ko kusikisa mo sitambo soge. (2 Kol. 4:7) Nsene o twikira, ove ngo gwana matungiko gomanzi.—Gar. 6:9.