1-2. Etokoro musinke lyomulyo va hepere kutura po Vajuda ava va tungire moBabironi? (Esira 1:2-4)

 HOMPA kwa geve ediviso asi Vajuda ava va kere nonkwate moBabironi ure wonomvhura 70, vana manguruka mokutengura kosirongo sawo, koIsraeli. (Resa Esira 1:2-4.) Jehova yige gelike tupu ga vhulire kuyisikisa mo eyi. Morwasinke tuna kuuyungira ngoso? Morwa Vababironi kwa divikwire asi kapi nga va mangurura nonkwate dawo. (Jes. 14:4, 17) Nye Babironi va ya zi zonagwire po ntani mupangeli gomupe kwa tanterere Vajuda asi kuvhura va tunde mo mosirongo. Ano ngoyitundwamo, nkenye Mujuda, unene po vanturagumbo, va hepere kutura po etokoro: nsene asi ta va tundu mo moBabironi ndi ta va kara moomo. Etokoro olyo nampo kapi lya kere lyoureru kutura po. Morwasinke?

² Ukurupe kwa ninkisire vamwe va dire ku za morugendo oro. Ntani mokumona asi sinzi soVajuda kwa va hampurukilire moBabironi, aso kwa kere sitata selike esi va divire. Kwawo, Israeli kwa kere sirongo esi va tungire vazinyakuru vawo. Vajuda vamwe nampo kwa kere nongawo moBabironi, yipo nye ayo nampo kwa va karerere udigu kusiga mambo gawo gomawa ndi nongesefa dawo noku ka tunga mosirongo esi va dilire kudiva.

3. Etungiko musinke lya ndindilire Vajuda wovalimburukwi ava va tengwire koIsraeli?

³ Vajuda wovalimburukwi va yidivire asi awo ngava gwanena mo mauwa gomanzi nsene va tengura koIsraeli, kupitakana nkenye malizambero aga va vhulire kutura po. Etungiko lyenene eli va vhulire kugwana kwa kwaterere mo ukareli wawo. Nampili ngomu moBabironi mwa kere nontembeli dovapagani dokupitaka po-50,  mositata oso kapi mwa kere ntembeli zaJehova. Amo kapi mwa kere sizambero esi ngano Vaisraeli va vhulire kuzamba nonzambo dawo kuliza noVeta zaMosesa, ntani kapi pwa kere vapristeli ava va vhulire kuzamba nonzambo dawo. Mokugwederera ko, mositata hena kwa kere mo vantu wovanzi ava ngava karere yikarunga yoyimpempa, kupitakana vantu ava va fumadekere Jehova ndi nompango dendi. Yipo nye mayovi goVajuda ava va here Jehova kwa ndindilire nononkondo mokutengura kosirongo sawo yipo va ka tengwidire po ukareli wousili.

4. Evatero musinke Jehova ga tumbwidilire Vajuda ava va tengwire koIsraeli?

⁴ Rugendo oru rorudigu roVajuda rokutunda koBabironi va ze koIsraeli ngano kwa va gusire makwedi gokusika kwa gane, nye Jehova kwa va tumbwidilire asi age nga gusa mo monzira zawo nkenye yilimbikiso eyi ngano ya va ninkisire va dire kutengura. Jesaya kwa tjenge asi: “Wapekereni HOMPA nzira mowiza! Hetakanesereni Karunga gwetu nzira momburundu!. . . . Mapompwa ga hetakane, mavega gomamanya ga yerakane.” (Jes. 40:3, 4) Gazara tupu sihorokwa esi momagano goge. Nzira ezi za pita momburundu, mokatji konondundu omu mwa dira kukara yidamenena. Varugenda nzira ngano va haferere kugenda mo! Ayo ngano ya va karerere ureru kugenda monzira zokuvyukilira mevango lyokuronda noku gurumuka monondundu nomoyindundu-gona ndi monomuramba. Awo ngano va genderere kugenda monzira ozo.

5. Edina musinke va rukire nzira zopasifanekeso ezi za kere pokatji kaBabironi naIsraeli?

⁵ Neina, yitaura yoyinzi ku yi dimbwilira kedina ndi konomora. Nzira zopasifanekeso ezi ga tjenge Jesaya nazo za kere nedina. Ose kuresa mo asi: “Ako ngaku kara nzira zonkungwasirongo, ezi ngava tumbura asi: “Nzira zokupongoka.” Munanzo nokugenda mo si.” (Jes. 35:8) Yisinke lya tembe etumbwidiro eli koVaisraeli vanare ntani yisinke lyatamba kwetu neina?

6. Morwasinke nzira ezi za kere pokatji kaBabironi naIsraeli va zi tumbwilire asi zokupongoka?

⁶ “Nzira zokupongoka” kuna kara edina lyewa kuruka nzira! Morwasinke nzira ozo va zi tumbwilire asi zokupongoka? Nkenye Mujuda ogu nga rugana yirugana yoyidona kapi ngava mu pulisire a tunge mosirongo saIsraeli, yikare asi age kuhondera, kukarera yikarunga yoyimpempa, ndi kurugana nonzo dononene. Vajuda ava va tengwire va hepere ku ya kara “mbunga zokupongoka” kwaKarunga gwawo. (Deut. 7:6) Nye oyo kapi ya tente asi vantu ava va tundire moBabironi kapi va hepere kutura po malitjindjo mokuninka asi va hafese Jehova.

7. Malitjindjo musinke va hepere kutura po Vajuda vamwe? Tumbura ko sihonena.

⁷ Ngwendi moomu tupu ka tu yi tumbura, sinzi soVajuda kwa va hampurukilire moBabironi, ntani ayo kwa monekere asi sinzi sawo kwa yikire monkedi omu Vababironi ngava gazara kuhamena yininke ntani nomu ngava rugana yininke. Konyima zapa pwa pitire nomvhura dononzi konyima zapa Vajuda wokuhova va tengwire koIsraeli, Esira kwa ya dimbwilire asi Vajuda vamwe kwa ya tulisire po malikwatakano gononkwara kumwe novakadi wovapagani. (Ex. 34:15, 16; Esir. 9:1, 2) Ano konyima, ngoronera Nehemiya kwa ya mu tetukisire apa ga ya dimwbilire asi vanona ava va hampurukilire moIsraeli kapi va lirongere eraka lyoVajuda. (Deut. 6:6, 7; Neh. 13:23, 24) Ngapi omu vanona owo va lirongere kuhara nokukarera Jehova nsene asi kapi va vhulire kukwata egano Ruhebeli, eraka eli va ruganesere mokutjanga Nonkango daKarunga? (Esir. 10:3, 44) Yipo nye Vajuda owo va hepere kutura po malitjindjo gomanene, nye ayo ngano ya va karerere ureru kutura po malitjindo ogo moIsraeli, omu va ka tengwidilire po ukareli wousili.—Neh. 8:8, 9.

8. Morwasinke yihorokwa eyi ya horokere nare ya karera nomulyo kwetu neina? (Tara efano lyopontunda.)

 ⁸ Nye vamwe kuvhura va gazare asi, ‘ngoso eyi ya horokerere Vajuda nare-nare ya kara nomulyo kwetu neina ndi?’ Yimo, morwa eyi tuna kurugana kuvhura kuyihetakanesa kokugenda ‘moNzira zokupongoka.’ Yikare asi ose kwa hamena kovagwavekwa ndi ‘kononzwi dapeke,’ twa hepa kutwikira kugenda ‘moNzira zokupongoka.’ Ayo ngayi tu vatera tu twikire kukarera Jehova ngesi ntani komeho apa Uhompa waKarunga ngau ka reta mauwa pevhu. b (Joh. 10:16) Kutundilira mo-1919 mosiruwo setu, mamiliyona govagara novakadi ntani novanona kwa tunda mo moBabironi zonene, ndi asi maukarelikarunga goyimpempa noku tameka kugenda monzira ozo zopasifanekeso. Nove nampo kuna kara gumwe govantu owo. Vantu kwa tameka kugenda monzira ozo koyiha yonomvhura-100 dina ka pita, nye vamwe kwa tameka kuwapayika nzira ozo komeho zonomvhura odo.

9. Kuliza naJesaya 57:14, monkedi musinke sirugana sokuwapeka “Nzira zokupongoka” va si rugene?

⁹ KoVajuda ava va tundire moBabironi, Jehova kwa yi tere asi yilimbikiso eyi ngano va ligwanekerere nayo kwa yi gusire mo monzira. (Resa Jesaya 57:14.) Nye ngapi kuhamena “Nzira zokupongoka” zomomazuva getu? Nomvhura dononzi edi da twaredesere ko-1919, Jehova kwa ruganesere vagara ava va mu tjilire yipo va vatere wopeke va tunde mo moBabironi zonene. (Hetakanesa Jesaya 40:3.) Awo kwa rugene sirugana esi sa kere hepero mokuwapayika nzira zopampepo, yipo va vatere vantu wonomutjima donongwa va tunde mo moBabironi zonene nokuhwilira moParadisa zopampeo, omu ukareli wousili waJehova va u tengwidilire po. Yisinke ya hamenene mo mosirugana esi sokuwapeka nzira? Tu tareni yirugana yimwe eyi eyi va rugene mokuwapeka nzira ezi.

10-11. Ngapi omu kunduruka nokutoroka Bibeli ya ninkisa ediwo lyomoBibeli li li hane? (Tara hena efano.)

¹⁰ Kunduruka. Bibeli ngava zi tjangurura nomawoko dogoro momvhura 1450. Sirugana oso kwa gusire siruwo sosire ntani matjangururo goBibeli kwa kere udigu ku ga gwana ntani kwa kere ndiro unene. Nye apa va fabilikire ehina lyokunduruka lyepe, ayo kwa ya kere ureru kunduruka Bibeli ntani noku zi gavera.

¹¹ Etoroko. Monomvhura dononzi, Bibeli kwa kere tupu meraka lyoRuratina, eli ngava kwata tupu egano vantu ava va lironga. Apa vantu va tamekere kunduruka, vantu ava va tjilire Karunga kwa litulire mo unene mokutoroka Bibeli momaraka gomanzi aga ngava uyunga vantu. Eyi kwa rerupilire varesi woBibeli yipo va hetakanese eyi ngava va rongo vampitisili womaukarelikarunga neyi azi rongo Bibeli sili.

12-13. Gava sihonena esi sina kulikida omu valirongi woBibeli wokutundilira koyiha yo-1835 va tamekere kutura poruzera marongo gomaukarelikarunga goyimpempa.

¹² Yiruganeso yokulironga Bibeli. Valirongi woBibeli ngava gwanene mo uwa unene mweyi ngava resa moNonkango daKarunga. Nye vampitisili womaukarelikarunga ngava handuka apa valirongi ava woBibeli va tamekere kutantera ko wopeke eyi va lirongere. Pasihonena, kutundilira mo-1835, vagara vamwe kwa tamekere kunduruka yitaratate eyi ya tulire poruzera marongo gomaukarelikarunga goyimpempa.

¹³ Koyiha yomvhura 1835, mugara gumwe ogu ga tjilire Karunga gedina Henry Grew kwa ndurukire sitaratate esi sa zogerere kuhamena ukaro wovafe. Mositaratate oso, age kwa yi likidire kutundilira momatjangwa asi muntu kukara nomwenyo ogu agu dili kufa nsene asi Karunga yige ga gu mu pa, nye kapisi nsene asi age kwa mu hampuruka nomwenyo ogu agu dili kufa, ngwendi moomu tupu nga di yi rongo nongereka dononzi. Mo-1837, munangereka gedina George Storrs kwa gwene etjangururo lyositaratate  oso ngomu ga singire ehina lyokorutenda. Age kwa si resere ntani kwa yi pulire asi ana gwana usili womulyo. Age kwa tokwere kutantera ko wopeke eyi ga lirongere. Mo-1842, age kwa geve elikwamo lyoyiuyungwa eli lya kere nosiparatjangwa sosiwa esi asi “An Inquiry—Are the Wicked Immortal?” Yininke eyi ga tjenge George Storrs kwa kundamene mudinkantu gedina Charles Taze Russell.

14. Mononkedi musinke munazinyetu Russell ntani novakwawo va gwanenene mo uwa mosirugana sokuwapeka nzira zopampepo mosiruwo sanare? (Tara hena efano.)

¹⁴ Mononkedi musinke munazinyetu Russell ntani novakwawo va gwanenene mo uwa mosirugana sokuwapeka nzira zopampepo mosiruwo sanare? Apa ngava kona-kona Bibeli, awo ngava tara mauzera monobuke deraka ntani momatoroko goBibeli aga va pwagesere komeho va ya tameke nosirugana sawo. Awo hena kwa gwanenene mo mauwa momapaparo gomoBibeli govagara ngwendi Henry Grew, George Storrs ntani na vamwe. Munazinyetu Russell ntani novakwawo kwa kwatesere ko sirugana sokuwapeka nzira zopampepo pokupwagesa nobuke dononzi noyitaratate eyi ya zogera kuhamena yirongwa yomoBibeli.

15. Yihorokwa musinke yomulyo eyi ya horokere mo-1919?

¹⁵ Mo-1919, Babironi zonene, kwa zumbanesere nonkondo dazo dokupangera vantu vaKarunga. Momvhura ozo, “mukareli gokulimburukwa gonondunge” kwa tamekere kurugana yipo a vatere vantu wonomutjima donongwa va tameke kugenda ‘moNzira zokupongoka.’ (Mat. 24:45-47) Sirugana esi va rugana vamwe mosiruwo sanare mokuwapayika nzira ezi kwa vatera vantu ava va tameka kugenda monzira ozo yipo va lironge yoyinzi kuhamena Jehova ntani nositambo sendi. (Yis. 4:18) Awo ngano va ya tamekere kuparuka kuliza nonompango daJehova. Jehova kapi ga ndindira ko kovantu vendi va ture po malitjindjo aga va hepere kutura po posikando simwe. Nye mevango lyoyo, age kwa twikira kuvatera vantu vendi va wapukurure yininke eyi va pura. (Tara kakende “ Jehova kutwikira kuvatera vantu vendi va wapukurure yininke eyi va pura.”) Gazara tupu omu ngatu ka hafa apa ngatu ka hafesa Karunga  gwetu moyininke nayinye eyi ngatu ka rugana!—Koros. 1:10.

16. Kutundilira mo-1919, yisinke va rugana ko mokuwapukurura “Nzira zokupongoka?” (Jesaya 48:17; 60:17)

¹⁶ Nkenye esi sitaura sa hepa ku si wapukurura nkenye apa yipo si kare moukaro wouwa. Kutundilira mo-1919, sirugana sokuwapeka “Nzira zokupongoka” kwa twikira, yipo vantu wovanzi va tunde mo moBabironi zonene. Mukareli gokulimburukwa gonondunge kwa tamekere kurugana ntani mo-1921, age kwa pwagesere siruganeso sokulironga Bibeli novantu, esi va pwagesere nositambo sokuvatera vantu yipo va lironge usili womoBibibeli. Simbapiratjangwa oso, The Harp of God, esi va torokere momaraka 36, kwa si pwagesere mosivaro sokusika hambara komamiliyona ntazimwe. Ntani vantu wovanzi kwa lironga usili pokuruganesa simbapiratjangwa esi. Ano ngesi, ose tuna kara nosimbapiratjangwa sosipe Hafera eparu narunye! esi atu ruganesa mokurugana malirongo goBibeli. Pomazuva aga gopouhura, Jehova kuna kuruganesa mbunga zendi yipo zi twikire kugava nondya dopampepo mokutuvatera natuvenye yipo tu twikire kugenda ‘moNzira zokupongoka.’—Resa Jesaya 48:17; 60:17.

17-18. Kupi a zi twaredesa “Nzira zokupongoka?”

¹⁷ Ose nampo kuvhura tu uyunge asi apa nkenye ogu a tambura elirongo lyoBibeli, age ku ya kara nompito zokugenda ‘moNzira zokupongoka.’ Vamwe kugenda mo tupu siruwo sosisupi makura ta va tundu mo. Vamwe kwa tokomena kugenda monzira ezi dogoro ngava ka sike kevango eli vana tamba. Evango musinke olyo?

¹⁸ Vantu ava va kara nehuguvaro lyokukaparukira meguru, “Nzira zokupongoka” ku va twaredesera moparadisa zaKarunga zemeguru. (Ehor. 2:7) Kwa va va kara nehuguvaro lyokukaparukira pevhu nzira ezi nga zi va twaredesa va ka sikiliremo kehagero lyoNomvhura Eyovi dEpangero lyaJesus Kristusa. Nsene asi ove kuna kugenda monzira ozo neina, wa ha gazara kuhamena yininke eyi wa siga yipo o gende monzira ozo. Ntani wa ha tunda mo monzira ozo dogoro ngo ka sike mouzuni woupe! Ta tu ku harere o gende po nawa monzira ezi.