SIRONGWA SELIRONGO 18
RUSUMO 1 Rupandu kosizoweseso
Huguvara “Mupanguli gouzuni” gonkenda!
“NgoMupanguli gouzuni ove ngo rugana youhunga.”—GEN. 18:25.
OKU SINA DEMENENE SIRONGWA
Sirongwa esi nasi ka tu vatera tu ka kwate egano unene nkenda ezi ga kara nazo Jehova nouhungami kuhamena evhumbuko lyovantu wovadona.
1. Sirongwa musinke sokuhengagwida esi Jehova ga rongere Abirahamu?
AZO KWA kere nzogera ezi ga dilire kudivara Abirahamu. Kupitira momuengeli, Karunga kwa tanterere Abirahamu asi ta ka zonagura po sitata sa Sodoma naGomora. Mugara gomulimburukwi kwa kere nosinka. Age kwa pulire asi: “Ove ngo zonagura po vahungami kumwe novantu wovadona ndi? . . . Ove nokuyirugana si, ngoMupanguli gouzuni ove ngo rugana youhunga.” Jehova kwa vaterere nelididimiko kaume gwendi Abirahamu, a lironge sirongwa somulyo asi: Karunga kapi nga zonagura po vantu wovahungami.—Gen. 18:23-33.
2. Ngapi natu yi diva nawa-nawa asi apa Jehova a pangura vantu, age nkenye apa kuyirugana monkedi zouhunga ntani kulikida nkenda?
2 Ngapi omu natu yi diva nawa-nawa asi apa Jehova a pangura vantu, age kuvapangura mouhunga ntani nonkenda? Ose twa yi diva morwa Jehova ‘kumona eyi ya kara momutjima’ gomuntu. (1 Sam. 16:7) Age “ga diva nomutjima dovantu.” (1 Vah. 8:39; 1 Hist. 28:9) Edi kuna kara nonkango dokutetukisa. Jehova nondunge unene kutupitakana, yipo nye, kapi tatu vhuru nawa-nawa kukwata egano nokonda deyi a tulire po matokoro gongandi. Mupositoli Paurusa kwa uyungire kuhamena Jehova Karunga asi: “Yilye gokuvhura kudiva nawa-nawa matokoro gendi?”—Rom. 11:33.
3-4. Mapuro musinke natu vhura kulipura poyiruwo yimwe ntani yisinke natu ka zogera mosirongwa esi? (Johanesa 5:28, 29)
3 Nampili ngomu twa diva asi Jehova kurugana nkenye apa youhunga, nye nampo kuvhura tu li pure, mapuro aga ga pulire Abirahamu, kuvhura nampo tu lipure asi: ‘Ngoso vantu ava ga zonagwire Jehova mositata saSodoma naGomora kuvhura ngava kaparuke hena ndi? Jehova kuvhura nga ka ‘vhumbure vantu vamwe ava vadira kuhungama ndi’?’—Yirug. 24:15.
4 Tu zeni tu ka tare eyi twa diva kuhamena evhumbuko. Ntaantani tupu ka tu gwene ekwatogano lyepe lyokuhamena ava “ngava vhumbukira mwenyo gwanarunye” ntani nava “ngava mvhumbukira mpanguro.” a (Resa Johanesa 5:28, 29.) Ekwatogano eli kwa tu vatera tu kwate egano yininke yoyinzi eyi na tuka zogera mosirongwa esi ntani sokukwama ko. Pomuhowo tatu ka zogera eyi twa dira kudiva ntani neyi twa diva kuhamena omu Jehova a pangura pauhunga.
EYI TWA DIRA KUDIVA
5. Yisinke ya uyungire yimbapiratjangwa yetu pwanare kuhamena vantu ava va zonagwire mositata saSodoma naGomora?
5 Mosiruwo sanare moyimbapiratjangwa yetu ngava zogere mo eyi ngayi horokera vantu ava Jehova ga tere asi kapi va hungama. Ose kwa gazarere asi vantu ava ga zonagwire Jehova, pasihonena ava va tungire mositata saSodoma naGomora, kapi ngava va vhumbura. Nye konyima zokukona-kona nawa Bibeli ntani nokukanderera ko unene, ayo yina zere asi kapi tuna diva nawa-nawa. Morwasinke?
6. Yihonena musinke yimwe yovantu wokudira kuhungama ava ga pangwire Jehova ntani yisinke twa dira kudiva?
6 Pwa kara yihorokwa yoyinzi yomoBibeli eyi ayi tu tantere omu Jehova ga pangwire vantu wokudira kuhungama. Pasihonena, Jehova kwa zonagwire po vantu navenye posiruwo soruhanzo kugusa ko Nowa nepata lyendi. Age hena kwa ruganesere Vaisraeli yipo va zonagure po nomuhoko ntambali edi da tungire moSirongo sEtumbwidiro. Ntani age kwa ruganesere muengeli gumwe a dipage vakwayita woVaasiliya 185 000 mesiku limwe. (Gen. 7:23; Deut. 7:1-3; Jes. 37:36, 37) Ngoso Bibeli kututantera asi Jehova ga tokora asi vantu navenye ava va fire kapi nga ka va vhumbura ndi? Hawe, Bibeli kapi za yi uyunga oyo. Morwasinke tuna kuuyungira ngoso?
7. Yisinke twa dira kudiva kuhamena vantu ava va zonagwire moruhanzo ndi mosirongo saKanani? (Tara efano lyopontunda.)
7 Kapi tuna diva omu Jehova ga pangwire nkenye muntu ntani kapi tuna diva hena nsene asi vantu ava va fire va kere nompito zokulironga kuhamena Jehova ntani nokulitezurura. Apa Bibeli azi uyunga kuhamena siruwo soruhanzo, azo kuuyunga asi Nowa “nga . . . zuvhisa uhungami.” (2 Pet. 2:5) Nye azo kapi azi uyunga asi apa Nowa ga tungire emuwato, age kwa zuvhisilire hena nkenye muntu gepevhu ogu gaya ligwanekerere nezonauko lyoruhanzo. Mokulifana, kapi tuna diva nsene vantu navenye wovadona ava va tungire mosirongo saKanani va kere nompito zokulironga kuhamena Jehova nokutura po malitjindjo.
Nowa nepata lyendi kuna kutunga emuwato. Kapi tuna diva nawa-nawa nsene asi Nowa ga wapayikire sirugana sokuzuvhisira vantu navenye posiruwo esi vatungire emuwato komeho ruhanzo ruwize (Tara paragarafu 7)
8. Yisinke twa dira kudiva kuhamena vantu womoSodoma naGomora?
8 Ngapi kuhamena vantu ava ga zonagwire Jehova mositata saSodoma naGomora? Mugara gomulimburukwi Roto, nage kwa parukilire moSodoma. Nye Roto ga zuvhisilire vantu navenye ndi? Hawe. Awo kwa kere vantu wovadona, nye ngoso navenye va yi divire asi yipi yoyiwa neyi yoyidona ndi? Diworoka asi vagara womositata oso kwa here kukwatera kononkondo vagenda vaRoto. Bibeli kutanta asi mombunga ozo zovagara kwa hamenene mo ‘vanona novakondi.’ (Gen. 19:4; 2 Pet. 2:7) Ngoso Karunga gonkenda Jehova kapi nga ka vhumbura vantu owo ndi? Kapi ta tu diva. Jehova kwa tanterere Abirahamu asi mositata oso kapi mwa kere nampili vantu murongo wovahungami. (Gen. 18:32) Yipo nye, awo kwa kere vantu wovadona ntani Jehova kwa va tengekere morwa yirugana yawo yoyidona. Ngoso kuvhura tu uyunge asi kwato gumwe gwawo ngava ka pindura koufe apa ‘ngava ka vhumbura vantu wokudira kuhungama ndi’? Kapi tuna diva eyi ngayi horoka.
9. Yisinke twa dira kudiva kuhamena Saromo?
9 MoBibeli kwa kara mo hena yihorokwa yovantu wovahungami ava va rugene yininke yoyidona konyima. Sihonena simwe kuna kara sahompa Saromo. Age ga divire Jehova nomu na mukarera ntani Jehova kwa mu tungikire unene, nye konyima ga tamekere kukarera yikarunga yoyipempa. Nonzo dendi kwa handukisire unene Jehova ntani kwa ninkisire muhoko goVaisraeli gu hepe unene. Apa Saromo ga fire, Bibeli kutanta asi kwa mu horekere kevango oku va horekere ozinakuru ndi mositata soguhwe Ndafita. (1 Vah. 11:5-9, 43; 2 Vah. 23:13) Nye mokumona asi age kwa mu horekere kevango olyo, ngoso ayo kutanta asi ngava ka mu vhumbura ndi? Bibeli kapi za yi uyunga. Vamwe kuvhura va gazare asi Saromo ngava ka mu vhumbura morwa Bibeli kuuyunga asi “ogu a fu, kumanguruka mo mononzo dendi.” (Rom. 6:7) Nye eyi kapi yina kutanta asi navenye ava va fa ngava ka va vhumbura, morwa nampili muntu a fe kapi ayi likida asi nga gwana mpito zokuparuka hena. Evhumbuko kuna kara uhwi ou a gava Karunga geharo. Age kuugava kovantu ava ana hara ngava ka mu karere narunye. (Joba 14:13, 14; Joh. 6:44) Saromo nga ka gwana uhwi owo ndi? Jehova gelike ga diva elimbururo. Twa yi diva asi Jehova nga rugana youhunga.
EYI TWA DIVA
10. Ngapi omu a lizuvhu Jehova kuhamena kuzonagura vantu? (Hesekiyeli 33:11) (Tara hena efano.)
10 Resa Hesekiyeli 33:11. Jehova kututantera omu a lizuvhu apa a pangura vantu. Nevatero lyompepo zokupongoka, Peturusa kwa temwininine nonkango domuporofete Hesekiyeli apa ga tjenge asi “Jehova . . . kapi ga hara asi ngapa ka zonauke nampili gumwe.” (2 Pet. 3:9) Nonkango odo kutuhengagwida. Ose twa yi diva asi Jehova kapi a tokora kuzonagura po muntu narunye pwa hana konda zongwa. Age kwa zura nkenda ntani kulikida nkenda ogu zina wapere.
Pevhumbuko lyovantu wokudira kuhungama, vantu wokulisiga-siga ngava kagwana mpito yipo va kalironge kuhamena Jehova (Tara paragarafu 10)
11. Wolye ngava dira ku ka vhumbura ntani ngapi twa yi diva?
11 Yisinke twa diva kuhamena vantu ava ngava dira kuvhumbura? MoBibeli kwa kara mo tupu yihonena yongandi. b Jesus kwa yi likidire asi Judasa Isikalyoto kapi ngava ka mu vhumbura. (Mar. 14:21; tara hena Joh. 17:12 ntani study note.) Judasa ga yi divire asi eyi ga rugene kapi ya hafesere Jehova naMunendi. Nye nampili ngoso, age ga twikilire kuyirugana. (Tara Mar. 3:29 ntani study notes.) Jesus kwa uyungire hena asi vampitisili vamwe womaukarelikarunga ava ngava mu rwanesa, ngava fa ntani kapi ngava ka va vhumbura. (Mat. 23:33; tara Joh. 19:11 ntani study note “the man.”) Ntani mupositoli Paurusa kwa rondwere asi varwanesi usili wokudira kulitezurura kapi ngava va vhumbura.—Heb. 6:4-8; 10:29.
12. Yisinke twa diva kuhamena nkenda zaJehova? Gava yihonena.
12 Nye yisinke twa diva kuhamena nkenda zaJehova? Ngapi omu ga yi likida asi “kapi ga hara asi ngapa ka zonauke nampili gumwe”? Koneka yihonena yavamwe ava Jehova ga likidire nkenda nampili ngomu va tulire nonzo dononene. Hompa Ndafita kwa tulire nonzo dononene kukwatera mo ruhonda ntani edipago. Nye Ndafita kwa litezwilire, makura Jehova yipo ga mulikidire nkenda nokumugusira po. (2 Sam. 12:1-13) Hompa Manase kwa rugene yininke yoyidona unene hambara eparu lyendi nalinye. Nye nampili ngomu ga rugene yininke yoyidona unene, Jehova kwa likidire nkenda Manase nokumugusira po morwa ga litezwilire. (2 Hist. 33:9-16) Yihonena eyi kulikida asi Jehova kulikida nkenda nsene ana dimburura asi yina kara hepero. Age nga ka vhumbura vantu ava morwa va dimbwilire asi va tulire nonzo dononene ntani va litezwilire.
13. (a) Morwasinke Jehova ga likidilire nkenda koVaninivhe? (b) Yisinke Jesus ga uyungire konyima kuhamena Vaninivhe?
13 Ose twa diva hena nkenda ezi ga likidire Jehova koVaninivhe. Karunga kwa tanterere Jona asi “Udinikarunga wovantu vamo nina u mono.” Nye nampili ngoso, apa Vaninivhe va litezwilire, Jehova kwa va gusilire po nonzo dawo. Age kwa likidire nkenda zonene kupitakana Jona. Karunga kwa diworokesere muporofete gwendi ogu ga handukire asi Vaninivhe kapi va divire elisigo pokatji kouwa noudona. (Jona 1:1, 2; 3:10; 4:9-11) Konyima, Jesus kwa ruganesere sihorokwa oso yipo a ronge vantu kuhamena uhungami nonkenda ezi ga kara nazo Jehova. Jesus kwa tente asi mezuva lyompanguro Vaninivhe ava va litezwilire “ngava ka va vhumbura.”—Mat. 12:41.
14. Yisinke ngayi ka horokera Vaninivhe ava ngava “vhumbukira mpanguro”?
14 Yisinke za tamba Bibeli apa azi uyunga asi “Vaninivhe ngava ka va vhumbura”? Jesus kwa rongere asi komeho vantu ngava ‘vhumbukira mpanguro.’ (Joh. 5:29) Age kwa tembe kosiruwo sonomumvho eyovi apa nga pangera ngaHompa posiruwo esi “vahungami nava va dira kuhungama” ngava va vhumbura. (Yirug. 24:15) Ava va dira kuhungama ngava “vhumbukira mpanguro.” Eyi kutanta asi konyima zapa ngava va vhumbura, Jehova naJesus ngava va tarera nsene ngava limburukwa nokutura pasirugana yininke eyi ngava lironga. Nsene Muninivhe ogu ngava pindura koufe nga nyoka kukarera Jehova, age ngava mu zonagura po. (Jes. 65:20) Nye ava ngava tokora kukarera Jehova noulimburukwi ngava gwana mpito zokuparuka dogoro narunye.—Ndan. 12:2.
15. (a) Morwasinke natu dilira kuuyunga asi vantu womoSodoma naGomora kapi ngava ka va vhumbura? (b) Ngapi omu natu vhura kukwata egano nonkango edi da kara mwaJuda 7? (Tara kakende “Yisinke ga tembe Juda?”)
15 Apa Jesus ga uyungire kuhamena vantu womoSodoma naGomora, age kwa tente asi “Ezuva lyoMpanguro” ngali rerupira vantu womoSodoma naGomora kupitakana vantu ava va mu nyokere nomarongo gendi. (Mat. 10:14, 15; 11:23, 24; Ruk. 10:12) Yisinke ga tembe Jesus? Kuvhura tu tante asi posikando esi, Jesus kwa ruganesere tupu sifanekeso. Nye apa ga tente asi Vaninivhe ngava vhumbukira mpanguro, ayo usili ga uyungire. Yipo nye, apa Jesus ga uyungire kuhamena vantu womoSodoma naGomora, age kapi ga ruganesere sifanekeso. “Ezuva lyoMpanguro” eli ga tumbwire Jesus moyihorokwa nayinye yivali kwa tamba kezuva lyokulifana. Vantu womoSodoma naGomora kwa rugene yininke yoyidona ngwendi Vaninivhe. Nye Vaninivhe vagwene mpito zokulitezurura. Diworoka eyi ga uyungire Jesus kuhamena ava ngava “vhumbukira mpanguro.” Age kwa tente asi nga mu hamena vantu “ava va rugana yoyidona.” (Joh. 5:29) Yipo nye, ayo kumoneka asi nampo vantu vamwe womoSodoma naGomora ngava gwana mpito zoku ka va vhumbura. Ano ose nampo ngatu ka gwana mpito zoku ka va ronga kuhamena Jehova naJesus kristusa.
16. Yisinke a konakona Jehova yipo a dive asi yilye nga vhumbura? (Jeremiya 17:10)
16 Resa Jeremiya 17:10. Movelise ezi, ose kuresa mo eyi twa diva kuhamena monkedi omu Jehova a pangura. Eyi twa diva yeyi asi Jehova nkenye apa ‘kukonakona magazaro nonomutjima dovantu.’ Kuhamena evhumbuko lyokomeho, age ngaka yi rugana ‘kuliza neyi ga rugana’ muntu. Jehova nga ka likida nkenda apa nga mona asi zina fire ku zi likida. Yipo nye, kapisi tu uyunge asi muntu gongandi kapi ngava ka mu vhumbura ntudi yikare asi tuna yi diva nawa-nawa morwa Bibeli yimo azi uyunga!
‘MUPANGULI GOUZUNI’ NGA KA ‘RUGANA YOUHUNGA’
17. Yisinke ngayi ka horokera vantu ava va fa?
17 Kutunda tupu apa Adamu naEva va kwatesere ko Satana ntani nokurwanesa Jehova, vantu mabiliyona kwa fa. ‘Nomfa kuna kara nkore’ zonene. (1 Kol. 15:26) Yisinke ngayi horokera vantu navenye owo? Sivaro sosinunu tupu sava 144 000 sovarongwa vaKristusa wovalimburukwi ngava gwana eparu lyokudira kufa meguru. (Ehor. 14:1) Ano vantu wovanzi kukwatera mo vagara novakadi ava va hara Jehova ngava ka hamena ‘mevhumbuko lyovahungami’ ntani ngava ka paruka narunye pevhu nsene tupu ngava twikira kukara vahungami monomvhura eyovi edi nga pangera Jesus ntani meheteko lyokuhulilira. (Ndan. 12:13; Heb. 12:1) Ntani posiruwo sooso sonomvhura eyovi, ‘vantu wokudira kuhungama,’ kukwatera mo ava va dilire kugwana mpito zokukarera Jehova ndi ‘ava va rugene yininke yoyidona,’ ngava ka gwana mpito yipo va ka tjindje nkareso zawo noku ka kara vakareli vaJehova wovalimburukwi. (Ruk. 23:42, 43) Nye nampili ngoso, vantu vamwe ngava rugana yoyidona ntani awo kwa tokomenene kurwanesa Jehova nositambo sendi, makura age kwa tokora asi kapi ngava ka gwana evhumbuko.—Ruk. 12:4, 5.
18-19. (a) Morwasinke natu karera nehuguvaro asi apa Jehova nga ka pangura vantu ava va fa, age nga ka va pangura monkedi zouhunga? (Jesaya 55:8, 9) (b) Yisinke ngatu ka zogera mosirongwa sokukwama ko?
18 Kuvhura tu uyunge asi apa Jehova a pangura vantu, age ku va pangura monkedi zouhunga ndi? Yimo! Ngwendi moomu ga yi kwete egano nawa-nawa Abirahamu, Jehova “mupanguli gouzuni,” gokusikilira mo, gonondunge ntani gonkenda. Age kwa deura Munendi ntani kwa mu pa nonkondo nadinye dokupangura. (Joh. 5:22) Jehova naJesus va diva eyi yakara monomutjima dovantu. (Mat. 9:4) Yipo nye, apa ava pangura nkenye muntu, awo nkenye apa ‘kuyirugana monkedi zouhunga’!
19 Tu tokomeneni kuhuguvara mwaJehova ntani mwanayinye eyi a rugana. Ose twa yi diva asi kapi va tu pa situmbukira sokupangura, nye age ga kara nositumbukira oso! (Resa Jesaya 55:8, 9.) Twa yi pura nawa-nawa asi Jehova naMunendi Jesus ngava pangura monkedi zongwa zouhunga ntani twa yi diva asi Hompa gwetu Jesus, nga honena oGuhwe pokupangura monkedi zouhunga ntani zonkenda. (Jes. 11:3, 4) Yisinke natu uyunga ko kuhamena monkedi omu Jehova naJesus ngava ka pangura vantu poudigu wounene? Yisinke twa dira kudiva? Ntani yisinke twa diva? Sirongwa sokukwama ko ngasi ka limburura mapuro ogo.
RUSUMO 57 Zuvhisira vantu navenye
b Kuhamena Adamu naEva ntani Kaini, tara Ruhungu, romo 1 Murongagona 2013, epe 12, nonkango dokonhi.