1. Yisinke twa lirongere pepongo lyankenye mvhura lyomo-2023?

 PEPONGO lyankenye mvhura lyomo-2023, a ose kwa gwene ekwatogano lyepe koyininke yimwe eyi twa pura ntani ose kwa gwene madiviso gokuhafesa kuhamena sirugana setu sokuzuvhisa. Pasihonena, ose kwa lirongere asi vantu vamwe nampo ngava ka gwana mpito zokukalipakerera kumwe novantu vaJehova konyima zapa Babironi zonene ngava zi zonagura po. Ose kwa gwene hena madiviso asi kutundilira mwaMangundu 2023, vazuvhisi woUhompa kapi hena ngava rapota yirugana eyi ava rugana mokuzuvhisa. Ngoso malitjindjo ogo kuninkisa sirugana setu sokuzuvhisa si dire kukara nomulyo unene ndi si dire kukara pangenderera ngwendi nare ndi? Hawe.

2. Morwasinke sirugana sokuzuvhisa sina karere pangenderera nkenye ezuva? (Marukusa 13:10)

² Sirugana sokuzuvhisa sina kara nomulyo unene nkenye ezuva. Morwasinke? Morwa siruwo sisupi sina hupu ko komeho uhura u wize. Tu tareni eyi ga uyungire Jesus kuhamena sirugana sokuzuvhisa pomazuva gopouhura. (Resa Marukusa 13:10.) Kuliza nosihorokwa esi sa kara mwaMateusa, Jesus kwa uyungire asi mbudi zongwa ngava zi zuvhisa mouzuni mudima komeho “uhura” u wize. (Mat. 24:14) Nonkango odo kwa tamba kouzuni waSatana ou ngau haga po. Jehova ga tura po nare “ezuva nosiruwo”  apa ngau wiza uhura wouzuni. (Mat. 24:36; 25:13; Yirug. 1:7) Nkenye ezuva eli lina kupita, ose kuna kuhedera kouhura wouzuni. (Rom. 13:11) Yipo nye, twa hepa kutwikira kuzuvhisa dogoro uhura wouzuni ngau wize.

3. Yisinke ayi tu tumangeda tu zuvhise?

³ Pana kara epuro lyomulyo eli twa hepa kugazadara ko, alyo kuna kara asi: Morwasinke a tu zuvhisire mbudi zongwa? Konda kuna kara asi eharo yilyo a li tu tumangeda tu zuvhise. Apa atu zuvhisa, ose kuyilikida asi twa hara mbudi zongwa, twa hara vantu, nye unene po morwa twa hara Jehova ntani nedina lyendi. Tu zeni tu ka zogere yitwa eyi, simwe nasimwe.

OSE KUZUVHISA MORWA TWA HARA MBUDI ZONGWA

4. Ngapi omu atu lizuvhu apa atu gwana mbudi zongwa?

⁴ Gazadara ko omu wa lizuvhire apa wa limonenene yininke yokuhafesa meparu lyoge, pasihonena apa nampo mukeke va mu hampurukire mepata lyeni ndi apa wa gwene yirugana eyi wa ndindilire nononkondo. Twa si huguvara asi ove kwa hefe sili unene ntani wa here kutantera ko vekoro lyoge novakaume woge kuhamena mbudi ozo. Ove nampo kwa lizuvhire monkedi zokulifana apa wa zuvhire mbudi zokuhafesa po unene ezi asi, mbudi zongwa zoUhompa waKarunga.

5. Ngapi omu wa lizuvhire apa wa lirongere sikando soge sokuhova usili womoBibeli? (Tara hena mafano.)

⁵ Gazadara ko omu wa lizuvhire apa wa lirongere sikando sokuhova usili womoBibeli. Ove kwa lirongere asi Guhyetu gemeguru ga ku hara ntani ana hara o ya hamene kepata lyendi ntani wa lirongere asi age kwa tumbwidira mokukahagekesa po kukora noruhepo rwetu. Ove wa lirongere hena asi ezuva limwe ngoka mona vahali woge ava va fa kuna kuvavhumbura mouzuni woupe. Ntani yinzi hena yimwe eyi wa lirongere. (Mar. 10:29, 30; Joh. 5:28, 29; Rom. 8:38, 39; Ehor. 21:3, 4) Yininke oyo wa lirongere kwa ku hafesere unene. (Ruk. 24:32) Ove kwa here eyi wa lirongere ntani wa here kutantera ko wopeke eyi wa lirongere.​—Hetakanesa Jeremiya 20:9.

6. Yisinke ono lirongere ko kosihonena saErnest naRose?

 ⁶ Tu tareni sihonena esi sina ku kwama ko. Munazinyetu gomugara Ernest b kwa kere nonomvhura murongo apa oguhwe va dogorokere. Ernest kwa uyunga asi: “Ame ngani lipura asi ‘otate va za meguru ndi? Ndi awo va dongonokerera po narunye?’ Ame ngani fire mfudu vanona vakwetu ava va kere novaguhya vawo.” Ernest nga zi nkenye apa komayendo noku ka tongamena komeho zontoko zoguhwe makura ta kanderere asi: “Na kanderere Karunga, na hara kudiva asi kupi vana kara otate.” Konyima zonomvhura 17 kutunda apa otate vendi va dogorokere, Ernest kwa tamekere kulironga Bibeli. Age kwa hefe sili apa ga lirongere asi vafe kapi ava paruka hena, awo kwa kara ngwendi monompofu dononene ntani Bibeli kwa tumbwidira asi komeho ngaku ka kara evhumbuko. (Muud. 9:5, 10; Yirug. 24:15) Posiruwo esi, age ga gwene malimbururo komapuro aga nga li pura nomvhura dononzi. Ernest kwa haferere unene mausili gomoBibeli aga ga lirongere. Mukadendi Rose kwa tamekere kulironga Bibeli ntani nage kwa haferere eyi ga lirongere. Awo kwa gwene ekuho mo-1978. Awo kwa zuvhisire mausili gomulyo aga va lirongere pokutantera ko vekoro lyawo noupampi, vakaume vawo ntani navamwe hena. Ngoyitundwamo, Ernest naRose kwa vatera vantu wokupitakana po-70 va dive Jehova ntani nokugwana ekuho.

7. Yisinke atu rugana morwa twa hara unene usili womoBibeli? (Rukasa 6:45)

⁷ Yosili apa a tu hara usili ou wa kara moBibeli, ayo kututumangeda tu tantere ko wopeke. (Resa Rukasa 6:45.) Ose kulizuvha ngwendi varongwa vaJesus womosiruwo sanare ava va uyungire asi: “Kapi tatu hageke kuuyunga kuhamena yininke eyi twa mona neyi twa zuvha.” (Yirug. 4:20) Ose kwa hara usili unene, makura eyi kututumangeda tu tantere ko vantu wovanzi.

OSE KUZUVHISA MORWA TWA HARA VANTU

8. Yisinke ayi tu tumangeda tu zuvhisire vantu mbudi zongwa? (Tara kakende “Hara vantu​—Tulisa po varongwa.”) (Tara hena efano.)

⁸ Ose kwa hara vantu ngwendi moomu tupu Jehova naJesus va va hara. (Yis. 8:31; Joh. 3:16) Ose kufira nkenda ava va dira “kudiva Karunga” ntani ava va “hana ehuguvaro.” (Efe. 2:12) Maudigu gawo kuvhura ga va ninkise va lizuvhe ngwendi mekero lyere vana kara. Nye ose twa kara norugodi ropasifanekeso rokuvakokesa mo, oru rwa tamba kombudi zongwa zoUhompa waKarunga. Mokumona asi ose twa va hara ntani kuvafira nkenda, tuna hara kurugana paapa twa hulira yipo tu va zuvhisire mbudi zongwa. Mbudi ezi ava lirongo kuvhura kuvavatera va kare nehuguvaro ntani va hafe nampili ngesi. Ntani kuvhura kuvavatera  va kare nompito zokukahafera “mwenyo gousili” mouzuni woupe.​—1 Tim. 6:19.

9. Erondoro musinke atu tantere vantu ntani morwasinke? (Hesekiyeli 33:7, 8)

⁹ Eharo lyokuhara vantu kututumangeda hena tu va rondore kuhamena ehagero lyouzuni ou woudona eli lina kara pepi. (Resa Hesekiyeli 33:7, 8.) Ose kufira nkenda vantu navenye kukwatera mo vekoro lyetu ava ava dili kukarera Jehova. Vantu wovanzi kutwikira tupu kuparuka va hana kudiva eyi yina kuwiza, awo kuna kara “udigu wounene ou wa dilire kukara po kutunda ketameko lyouzuni dogoro ngesi, wangoso kapi ngau kara ko hena.” (Mat. 24:21) Twa hara kuvatantera eyi ngayi ka horoka posiruwo sompanguro apa maukarelikarunga nagenye goyipempa ngava ga zonagura po, ano konyima ntani ngava zonagura po uzuni ou naunye woudona poyita yaHarumagedoni. (Ehor. 16:14, 16; 17:16, 17; 19:11, 19, 20) Tuna si huguvara asi vantu wovanzi ngava purakena kombudi zetu nokutokora kukarera Jehova ngesi. Nye yisinke ngayi horokera ava ava dili kutupurakena ngesi kukwatera mo vamwe vekoro lyetu?

10. Morwasinke yina karere nomulyo unene tu twikire kurondora vantu kuhamena yihorokwa eyi yina kara popepi?

¹⁰ Ngomu ka va yi tumbwire mosirongwa sina ka pita, nampo Jehova kuvhura nga parure vantu ava ngava tameka kutura epuro mwendi apa ngava mona Babironi zonene vana zi zonagura po. Nsene asi yimo ngoso, ayo yina kara nomulyo tu twikire kuvarondora kuhamena eyi ngayi ka horoka komeho. Gazadara ko kositwa esi: Yininke eyi tuna kutantera vantu ngesi, nampo kuvhura ngava ka yi diworoke komeho. (Hetakanesa Hesekiyeli 33:33.) Ayo nampo ngayi va ninkisa va ka diworoke erondoro eli va zuvha kwetu ntani nampo ngayi ka va tumangeda va ka tameke kukarera Jehova kumwe nose. Ngwendi munomeni godorongo gomoFilipi ogu ga tamekere kukarera Jehova konyima tupu zapa lya horokere ekankamo lyevhu, nampo vamwe ava ava dili kupurakena ngesi kombudi zetu, ngava ka litjindja konyima zapa Babironi zonene ngava ka zi zonagura po.​—Yirug. 16:25-34.

OSE KUZUVHISA MORWA TWA HARA JEHOVA NTANI NEDINA LYENDI

11. Monkedi musinke atu yererepeke nokufumadeka Jehova? (Ehororo 4:11) (Tara hena mafano.)

¹¹ Konda zomulyo po unene zeyi a tu zuvhisire mbudi zongwa kuna kara asi morwa twa hara Jehova ntani nedina lyendi lyokupongoka. Ose kutara sirugana sokuzuvhisa asi azo kuna kara nkedi ezi a tu hamberere Karunga gwetu ogu twa hara. (Resa Ehororo 4:11.) Ose kukwatesa ko nomutjima nagunye asi: Karunga gwetu gononkondo Jehova, ove wa wapera kukufumadeka nokukuyererepeka. Ose  kumufumadeka nokumuyererepeka apa atu tantere ko wopeke maumbangi aga aga likida asi age kwa “sita yininke nayinye” ntani asi ose kuparuka morwa yige ga tu pa eparu. Ose hena kuruganesa siruwo setu, nonkondo detu ntani noyiweka yetu yipo tu liture mo paapa twa hulira mosirugana sokuzuvhisa kuliza noukaro wetu. (Mat. 6:33; Ruk. 13:24; Koros. 3:23) Yosili ose kuhafera kuuyunga kuhamena Karunga gwetu ogu twa hara. Ayo hena kututumangeda tu tantere ko wopeke edina lyendi ntani neyi lya karera po. Morwasinke?

12. Ngapi omu atu zeresa edina lyaJehova mosirugana sokuzuvhisa?

¹² Eharo lyetu lyokuhara Jehova kututumangeda tu zerese edina lyendi. (Mat. 6:9) Eyi kutanta asi tuna hara kulizeresa edina lyaKarunga ndi kutantera ko wopeke yininke yoyidona eyi ga uyunga Satana kuhamena Jehova, eyi ya dira kukara usili. (Gen. 3:1-5; Joba 2:4; Joh. 8:44) Tuna hara kutantera ko vantu ava atu zuvhisire kuhamena Karunga gwetu gedina Jehova. Tuna hara nkenye gumwe a dive asi eharo kuna kara sikara sosinene po saJehova ntani asi age kupangura monkedi zongwa zouhungami ntani asi Uhompa wendi ntaantani tupu ngau ka hagekese po maruhepo nagenye noku ka vatera vantu va ka kare mombili ntani noruhafo. (Epis. 37:10, 11, 29; 1 Joh. 4:8) Apa atu tantere vantu yininke eyi, ose kuzeresa edina lyaKarunga, Jehova. Ose hena kuhafa apa a tu yi rugana oyo morwa tuna diva asi kuna kusikisa mo eyi lya karera po edina lyetu, Nombangi daJehova. Morwasinke tuna kuuyungira ngoso?

13. Morwasinke atu lizuvhire mfumwa mokututumbura asi Nombangi daJehova? (Jesaya 43:10-12)

¹³ Jehova kwa tu horowora tu kare Nombangi dendi. (Resa Jesaya 43:10-12.) Nomvhura dongandi dina ka pita, mbilive zokutunda koMbungagendesi kwa tente asi: “Mfumwa zonene ezi twa kara nazo kuna kara mokututumbura  asi ose Nombangi daJehova.” Morwasinke? Tu tareni kosihonena esi. Nsene ono hara gumwe a ka ku karere po mbangi mompanguro, ove no horowora ogu wa diva ntani ogu wa huguvara. Mokulifana, mokumona asi Jehova ga tu horowora tu kare Nombangi dendi, ayo kulikida asi ga tu diva nawa ntani ga tu huguvara asi kuvhura tu tantere ko wopeke asi age yige gelike Karunga gousili. Ose kulizuvha mfumwa morwa yeeyi twa kara Nombangi dendi ntani ose kuruganesa nkenye mpito tu divise edina lyendi ntani nokuyilikida asi yininke nayinye yoyidona eyi va uyunga kuhamena edina lyendi, yipempa. Apa atu yi rugana ngoso, ose kusikisa mo nawa-nawa eyi lya karera po edina lyetu, Nombangi daJehova.​—Epis. 83:18; Rom. 10:13-15.

NGATU TWIKIRA KUZUVHISA DOGORO UHURA NGAU WIZE

14. Yininke musinke yokuhafesa eyi nampo ngayi ka horoka komeho?

¹⁴ Ose tuna hafa sili unene ngomu tuna kundindira eyi yina kuza yi ka horoke komeho. Nevatero lyaJehova, ose tuna kara simpe nehuguvaro yipo ngatu mone simpe vantu wovanzi vana kutameka kukarera Jehova, komeho udigu wounene ngau tameke. Ntani tuna hafa sili pokudiva asi nampili poudigu wounene, vantu wovanzi nampo ngava tunda mo mouzuni waSatana nokuyalipakerera nose yipo tu hamberere Jehova.​—Yirug. 13:48.

15-16. Yisinke natu twikira kurugana ntani dogoro posiruwo musinke?

¹⁵ Posiruwo esi, ose tuna kara nosirugana esi twa hepa kurugana. Aso kuna kara sirugana esi ngatu dira kukarugana hena komeho. Sirugana oso kuna kara sokuzuvhisa mbudi zongwa zoUhompa waKarunga. Nye twa hepa kurondora hena vantu kuhamena yihorokwa eyi ngayi horoka ntaantani. Vantu va hepa kuyidiva asi uhura wouzuni ou woudona pepi-pepi una kara. Makura apa siruwo sompanguro ngasi wiza, vantu ngava yi diva asi mbudi ezi nga tu zuvhisa kwatunda kwaJehova.​—Hes. 38:23.

¹⁶ Yisinke tuna tokomene kurugana? Ngano eharo lyokuhara mbudi zongwa neli lyokuhara vantu, nye unene po eharo lyokuhara Jehova ntani nedina lyendi, li tu tumangede tu twikire kuzuvhisa noupampi dogoro Jehova nga uyunge asi sirugana sokuzuvhisa “sina pu.”