SIRONGWA SELIRONGO 19
RUSUMO 22 Uhompa u wize pevhu!
Yisinke twa diva kuhamena omu Jehova nga pangura vantu komeho?
“Jehova kapi ga hara asi ngapa ka zonauke nampili gumwe.”—2 PET. 3:9.
OKU SINA DEMENENE SIRONGWA
Ose twa yi diva nawa-nawa asi apa Jehova nga pangura vantu komeho, age ngayi rugana monkedi zouhunga.
1. Morwasinke natu uyungira asi ose kuna kuparuka posiruwo sokuhafesa?
OSE kuna kuparuka mosiruwo sokuhafesa. Nkenye ezuva ose kuna kumona omu mauporofete gomoBibeli gana kusikilira mo. Pasihonena ose kuna kumona hompa gokoMuzogo nahompa gokoMbindakano, omu vana kulirwanesa morwa nkenye ogu ana hara kupangera uzuni. (Ndan. 11:40) Ose kuna kumona omu mbudi zongwa zokuhamena Uhompa waKarunga vana kuzizuvhisa uzuni naunye ntani mamiliyona govantu kuna kutokora kukarera Jehova. (Jes. 60:22; Mat. 24:14) Ntani ose kuna kugwana erongo lyokutunda kwaJehova “posiruwo souhunga.”—Mat. 24:45-47.
2. Ehuguvaro musinke natu kara nalyo nye yisinke twa hepa kudimburura?
2 Jehova kuna kutwikira kutuvatera tu kwate nawa egano, kuhamena yihorokwa yomulyo eyi yina kara komeho. (Yis. 4:18; Ndan. 2:28) Kuvhura tu kare nehuguvaro asi apa udigu wounene ngau tameka, ose ngatu diva nayinye eyi ngatu hepa kudiva yipo tu lididimikire noulimburukwi. Ntani yipo ngatu twikire kukara mouumwe posiruwo oso soudigu nye nampili ngoso twa hepa kudimburura asi koyili yininke yimwe yokomeho eyi twa dira kudiva. Mosirongwa esi pomuhowo tatu ka zogera nokonda deyi twa wapukwilira eyi twa uyunga kuhamena yihorokwa oyo. Ano konyima natu ka zogera yininke yimwe eyi twa diva kuhamena meho, ntani neyi ngaka rugana ko Guhyetu.
EYI TWA DIRA KUDIVA
3. Yisinke twa kwete egano pwanare apa udigu wounene ngau tameka ntani yisinke ya tu ninkisire tu gazare ngoso?
3 Pwanare ose kwa yi kwete egano asi apa udigu wounene ngau tameka vantu kapi ngava kara hena nompito zokutura epuro mwaJehova nokuparuka Harumagedoni. Ose kwa yi kwete egano monkedi zangoso, morwa ose kwa gazarere asi sihorokwa soruhanzo kwa fanekesere eyi ngayi horoka komeho. Pasihonena, ose kwa gazarere asi ngwendi moomu tupu vantu va dilire kuhwilira memuwato apa Jehova ga ‘zedilire evero’ kwato gumwe ogu nga pura mwaJehova nokumuparura konyima zapa udigu wounene ngau tameka.—Mat. 24:37-39.
4. Morwasinke natu dilira kuuyunga asi nayinye eyi ya horokere mosiruwo saNowa ngayi ka sikilira mo momunene komeho?
4 Ngoso kuvhura tu uyunge asi nayinye eyi ya horokere posiruwo soruhanzo kwa fanekesa eyi nga yi ka horoka komeho ndi? Hawe. Morwasinke? Morwa Bibeli kapi za yi uyunga ngoso. a Yimo, Jesus kwa hetakanesere “mazuva gaNowa” kekaro po lyendi nye age kapi ga uyungire asi nayinye eyi ya horokere mosiruwo saNowa nga yi ka sikilira mo momunene komeho, ngwendi apa Jehova ga zedilire emuvero lyekemuwato. Nye eyi kapi ayi tanta asi kapi tatu vhuru kulirongera ko kosihorokwa saNowa noruhanzo.
5. (a) Yisinke ga rugene Nowa eyi ya likidire asi ga kere nepuro? (Vahebeli 11:7; 1 Peturusa 3:20) (b) Ngapi sirugana setu sokuzuvhisa sina lifana nesi ga rugene Nowa?
5 Apa Nowa ga zuvhire marondoro gokutunda kwaJehova age kwayi likidire asi ga kere nepuro pokutunga emuwato. (Resa Vahebeli 11:7; 1 Peturusa 3:20.) Mokulifana vantu ava ava zuvhu mbudi zongwa zokuhamena Uhompa waKarunga va hepa kurugana ko yuma. (Yirug. 3:17-20) Peturusa kwa tumbwire Nowa asi mugara “ogu nga zuvhisa uhungami.” (2 Pet. 2:5) Nye nampili ngoso ngwendi moomu tupu katu yi lirongere mosirongwa kasi pitire kapi tuna diva nsene Nowa ga zuvhisilire nkenye muntu ogu ga kere pevhu komeho ruwize Ruhanzo. Naina ose kuna kuzuvhisira vantu ava va kara mouzuni ntani kuna kuyirugana noupampi. Nye nampili ngomu tuna kurugana paapa twa hulira, kapi tatu vhuru kuzuvhisira kwankenye ogu ga tunda pevhu komeho uhura u wize. Morwasinke?
6-7. Morwasinke tuna kuuyungira asi kapi tatu vhuru kuzuvhisa kwankenye muntu ogu ga tunga pevhu komeho uhura u wize?
6 Gazadara ko kweyi ga uyungire Jesus kuhamena sirugana setu sokuzuvhisa. Age kwa pumbire asi mbudi zongwa ‘ngava zi zuvhisa mouzuni mudima zi kare umbangi konomuhoko nadinye.’ (Mat. 24:14) Uporofete ou kwa ku u sikisa mo unene momazuva getu kupitakana pwanare. Mbudi zoUhompa ngesi kuzigwana momaraka gokupitakana po-1 000 ntani kupitira kointaneta zetu jw.org sinzi sovantu ava va kara pevhu kuna kulironga mbudi zongwa zokuhamena Uhompa waKarunga.
7 Nampili ngoso, Jesus kwa tanterere hena varongwa vendi asi kapi ngava mana “yitata nayinye yaIsraeli” eyi kutanta asi kapi ngava zuvhisira nkenye muntu komeho a wize. (Mat. 10:23; 25:31-33) Nonkango daJesus kwa tamba hena mosiruwo setu. Vantu wovanzi naina kwa tunga komavango oku kwa kara masiliko aga aga dili kutupulisira tu zuvhise noumanguruki. Ntani hena vakeke wovanzi kuna kuvahampuruka mwankenye minute. Ose kurugana paapa twa hulira yipo tu zuvhise mbudi zongwa kovantu ‘wokonomuhoko nadinye nokomarudi nagenye ntani nokomaraka nagenye.’ (Ehor. 14:6) Nye usili wou asi komeho uhura u wize kapi tatu vhura kuzuvhisira kwankenye muntu ogu ga tunga pevhu.
8. Epuro musinke natu vhura kulipura kuhamena omu Jehova ngaka pangura vantu komeho? (Tara hena mafano.)
8 Kuliza neyi tuna zogere, yisinke ngayi horokera ava ngava dira kugwana mpito zokuzuvha mbudi zongwa komeho udigu wounene u tameke? Ngapi omu Jehova naMunwendi ngava ka pangura vantu owo? (Joh. 5:19, 22, 27; Yirug. 17:31) Etjangwa oku sina demenene sirongwa esi kutanta asi Jehova kapi ana hara asi ‘ngapa ka zonauke nampili gumwe.’ Nye age kuna hara asi “navenye va litezurure”. (2 Pet. 3:9; 1 Tim. 2:4) Nampili ngomu twa diva yininke oyo kuhamena Jehova nye age kapi ga tu tantera omu ngaka pangura vantu ava va dilire kukara nompito zokuzuvha kombudi zongwa. Nye nampili ngoso age kapi ga hepa kututantera eyi ga rugana neyi ngaka rugana.
Ngapi omu Jehova nga ka pangura vantu ava va dilire kugwana mpito zokuzuvha mbudi zongwa komeho udigu wounene u tameke? (Tara paragarafu 8) c
9. Yisinke ga tu tantera Jehova moBibeli?
9 Jehova kwa tu tantera yininke yimwe moBibeli eyi ngaka rugana. Pasihonena Bibeli kututantera asi Jehova ngaka vhumbura vantu wokudira kuhungama ava va dilire kugwana mpito yipo va purakene kombudi zongwa ntani nokutjindja yirugana yawo yoyidona. (Yirug. 24:15; Ruk. 23:42, 43) Eyi kuretesa po hena mapuro gamwe gomulyo.
10. Mapuro musinke gamwe natu lipura?
10 Vantu navenye ava ngava fa poudigu wounene kapi hena ngava kava vhumbura ndi? Matjangwa gayi zeresa nawa-nawa asi vantu ava ava rwanesa Jehova ntani nava ngaka zonagura po Jesus novakwayita vendi poHarumagedoni kapi ngava kava vhumbura. (2 Tes. 1:6-10) Nye ngapi kuhamena vantu ava ngava fa posiruwo soudigu wounene morwa uvera ndi ukurupe ndi nampo morwa siponga ndi muntu mukwawo gava dipagere? (Muud. 9:11; Sak. 14:13) Vantu ava kuvhura va kare vamwe wovantu “wokudira kuhungama” ava ngava ka vhumbura mouzuni woupe ndi? Kapi tuna diva.
EYI TWA DIVA
11. Ngapi omu vantu ngava ka va pangura poHarumagedoni?
11 Koyili yininke yimwe eyi twa diva kuhamena yihorokwa yokomeho. Pasihonena ose twa yi diva asi poHarumagedoni vantu ngava ka va pangura, kuliza nomu vana kutekura vamumbya vaKristusa. (Mat. 25:40) Ava ngava ka pangwira kononzwi kuna kara vaava ngava kwatesa ko vagwavekwa naKristusa. Ose twayi diva hena asi konyima zapa udigu wounene ngau tameka, vagwavekwa vamwe ngava kara pevhu ntani kapi ngava va twara meguru dogoro karuwogona tupu kana hupu ko Harumagedoni zi tameke. Apa vagwavekwa vamwe ngava kara pevhu vantu vamwe wonomutjima donongwa ngava kara nompito zokuvakwatesa ko ntani nosirugana esi vana kurugana. (Mat. 25:31, 32; Ehor. 12:17) Morwasinke mausili ogo gana karere nomulyo?
12-13. Yisinke nampo vamwe ngava rugana, apa ngava mona Babironi zonene vana zi zonagura po? (Tara hena mafano.)
12 Konyima zoudigu wounene, vantu vamwe ava ngava mona sihorokwa sezonauko ‘lyaBabironi zonene’ ngava diworoka asi nomvhura dononzi Nombangi daJehova ngadi zuvhisa kuhamena sihorokwa esi. Ngoso vantu vamwe ava ngava mona sihorokwa esi ngava tameka kutura epuro mwaJehova ndi?—Ehor. 17:5; Hes. 33:33.
13 Nsene ngayi horoka oyo ayo ngayi lifana nosihorokwa esi sa horokere moEgipite momazuva gaMosesa. Diworoka asi “mbunga zovanayirongo” kwa lipakerere noVaisraeli apa va tundire moEgipite. Vamwe kwa tulire epuro mwaJehova apa va mwene mahepeko murongo aga ga rondwere Mosesa. (Ex. 12:38) Nsene ukaro wokulifana ngau ka horoka konyima zapa Babironi zonene ngava ka zi zonagura po ayo ngayi ka tu guvisa apa ngatu ka mona vantu kuna kuwiza va ya lipakerere kumwe nose mokukarera Jehova komeho uhura u wize ndi? Hawe. Tuna hara kuhonena Karunga gwetu gemeguru, “Karunga gonkenda, mutjima gwendi muwa, age kapi a handuka usimbu ano eharo lyendi lyanarunye ntani age nkenye apa kusikisa mo nonkango dendi.” b—Ex. 34:6.
Vamwe ava ngava mona ezonauko ‘lyoBabironi zonene’ ngava diworoka asi Nombangi daJehova nomvhura dononzi kwa zuvhisa kuhamena sihorokwa oso (Tara paragarafu 12-13) d
14-15. Ehuguvaro lyomuntu lyokukamuvhumbura kwa korera kosiruwo esi ga fire ndi oku ga tunga ndi? Faturura. (Episarome 33:4, 5)
14 Poyiruwo yimwe ose nampo kuvhura kuzuvha gumwe kuna kuuyunga asi: “Hansa nsene gumwe gekoro lyange a fa komeho udigu wounene u tameke yipo ngava kamuvhumbure.” Koyili yimwe ayi va ninkisa va uyunge nonkango odo. Nye ehuguvaro lyomuntu lyokukamuvhumbura kapi lya korera posiruwo esi ga fire. Jehova age Mupanguli gomuwa ntani kupangura pauhunga. (Resa Episarome 33:4, 5.) Ose tuna kara nehuguvaro asi ‘Mupanguli gouzuni’ ou nga rugana youhunga.—Gen. 18:25.
15 Yipo nye ehuguvaro lyomuntu lyokukaparuka narunye kapi lya korera oku ga tunga. Jehova kapi nga pangwira vantu “koyikombo” morwa asi yeeyi va tungire moyirongo omu va dilire kugwana mpito zokuzuvha mbudi zoUhompa. (Mat. 25:46) Mupanguli gouhunga gouzuni naunye ga kara nosinka sosinene kovantu ava kupitakana sinka esi twa kara naso kwawo. Kapi tuna diva omu Jehova nga gendesa yininke eyi poudigu wounene. Nampo vantu vamwe ngava kara nompito zokulironga kuhamena Jehova nokutura epuro mwendi apa nga divisa edina lyendi kovantu navenye mouzuni.—Hes. 38:16.
Konyima zapa udigu wounene ngau tameka, nampo vamwe ava ngava mona yihorokwa oyo ngava ka litjindja ndi?
16. Yisinke twa ya diva kuhamena Jehova? (Tara hena efano.)
16 Kupitira moBibeli ose twa ya dimburura asi Jehova kwa hara unene vantu. Age kwa geve Munwendi yipo a tu fire natuvenye yipo ngatu ka gwane mpito zokukaparuka narunye. (Joh. 3:16) Natuvenye kulimonena nkenda zaJehova. (Jes. 49:15) Age ga tu diva natuvenye komadina getu. Age ga tu diva nawa yipo nye, nampili tu fe age ngaka tu vhumbura morwa age kudiworoka nkenye eyi kutuhamena ntani neyi ngatu rugana apa twa kere vazuni. (Mat. 10:29-31) Yosili ose twa kara nokonda zongwa zeyi natu yi pulira nawa-nawa asi Guhyetu gemeguru ngaka pangura nkenye ogu monkedi zongwa zouhunga ntani nonkenda.—Jak. 2:13.
Ose twa yi pura nawa-nawa asi Jehova nga pangura nkenye gumwe monkedi zongwa zouhunga ntani zonkenda (Tara paragarafu 16)
17. Yisinke ngatu ka zogera mosirongwa sokukwama ko?
17 Mokumona asi tuna kwata egano nawa mauzera aga ayo kutuvatera tu dimburure asi sirugana sokuzuvhisa kuna kara pangenderera. Morwasinke tuna kuuyungira ngoso? Ntani yisinke nayi tu tumangeda tu zuvhise mbudi zongwa twa hana kuhageka? Mosirongwa sokukwama ko ngatu ka zogera momunene malimbururo komapuro aga.
RUSUMO 76 Ngapi o lizuvhu?
a Komauzera kuhamena konda zeyi va tulira po ewapukururo eli, tara moRuhungu romo-15 Nsinano 2015, siparatjangwa “Ngesi yimo wa yi harera” epe. 7-11.
b Konyima zapa Babironi zonene ngava zi zonagura po, vakareli vaJehova navenye ngava va heteka pehomokero lyaGogo zaMagogo. Nkenye ogu nga lipakerera novantu vaKarunga konyima zezonauko lyoBabironi zonene, nage nga ligwanekera neheteko olyo.
c EFATURURO LYEFANO: Mafano gatatu gana kulikida konda zeyi nampo vantu vamwe ngava dilira kugwana mbudi zetu: (1) Mukadi ogu ga tunga kevango oku kwa kara vantu wovanzi woukarelikarunga umwe tupu, (2) valikwali ava va tunga mosirongo omu va silika sirugana setu ntani oku kwa kara siponga unene (3) mugara ogu ga tunga kevango lyokoure unene ntani oku ava dili kuza vantu.
d EFATURURO LYEFANO: Mukadi gomudinkantu ogu ga hagekere kukarera Jehova, kuna kudiworoka eyi ga lirongere kuhamena “Babironi zonene.” Age ana tokora kutengura kwaJehova nokovakondi vendi woNombangi. Nsene yi horoka oyo, ose tuna hara kuhonena Guhyetu gemeguru ogu ga kara nonkenda pokuhafa nsene munanzo ana tengura kwendi.
