Ya ha mu kondera nkenye eyi mokukagwana mfeto
“Va ha mu hakana vantu mfeto zeni.”—KOROS. 2:18.
1, 2. (a) Mfeto musinke vana kundindira vakareli vaJehova? (b) Yisinke nayi tu vatera yipo ngatu ka gwane mfeto zetu? (Tara efano.)
NGWENDI Paurusa, vagwavekwa kwa kara nehuguvaro lyokuka ‘gwana mfeto ezi ga va zigidira Karunga’ meguru. (Fil. 3:14) Awo kuna kundindira va ka pangere naJesus Kristusa moUhompa wendi nokuka vatera vantu va ka sikilire mo. (Ehor. 20:6) Yosili, Karunga kwa va pa situmbukira sosinene! Nonzwi dapeke kwa kara nehuguvaro lyapeke. Awo kuna kundindira mokukaparuka pevhu narunye, ano eyi kuvaretera ruhafo rorunene.—2 Pet. 3:13.
2 Mokuvatera vagwavekwa va twikire kulimburukwa Jehova yipo ngava ka gwane mfeto zawo, Paurusa kwa va korangedere asi: “Omu gazare yemeguru.” (Koros. 3:2) Awo va hepere kugazadara nkenye apa komfeto zawo. (Koros. 1:4, 5) Yi kare asi kwa kara nehuguvaro lyokuza meguru ndi lyokukaparukira pevhu, nsene tu gazadara ko nkenye apa kweyi ga tu tumbwidira Karunga ngayi tu vatera tu ka gwane mfeto zetu.—1 Kol. 9:24.
3. Yisinke Paurusa ga rondwere vapuli vakwawo?
3 Paurusa kwa rondwere vapuli vakwawo kuhamena yininke eyi nayi va kondera mokukagwana mfeto zawo. Pasihonena, age kwa rondwere mbungakriste zoVakorosi kuhamena Vakriste woyimpempa ava va here kukarera Karunga pokukwama Veta zaMosesa mevango lyokutura epuro lyawo mwaKristusa. (Koros. 2:16-18) Paurusa kwa tumbwire hena yininke eyi nayi tu kondera nampili naina mokukagwana mfeto zetu. Pasihonena, age kwa fatwilire omu natu nyokera po madowo gomadona nomu natu kohonona po madiro kulizuvha novanavazinyetu ntani omu natu lididimikira maudigu mepata. Ose kuvhura simpe kugwanena mo uwa momapukururo ogo. Yipo nye, tu zeni tu ka konakone mapukururo gamwe aga ga kara mombilive ezi ga tjengerere Vakorosi.
DIPAGENI MADOWO GOMADONA
4. Morwasinke madowo gomadona ga karera siponga?
4 Apa Paurusa ga mene kudiworokesa vapuli vakwawo kuhamena mfeto zawo, age kwa va tanterere hena asi: “Ano omu dipage madowo aga aga rugana mweni, ngwendi gaga: ruhonda, nonyata noruho nomadowo gomadona nedowo lyokufukira yininke.” (Koros. 3:5) Madowo gomadona siponga unene morwa kuvhura kutuninkisa tu zumbanese mfeto zetu. Munazinyetugara gumwe ogu va tengwidilire mombunga konyima zokuhondera, kwa tanta asi: “Kapi na vhulire kulipangera nyamwange morwa edowo lyange kwa ya nkondoparere unene.”
5. Ngapi omu natu likunga komaukaro aga naga tu retera siponga?
5 Ayo mulyo unene kutakamesa nsene kuna kara moukaro ou nau tu ninkisa tu dire kulimburukwa Jehova. Pasihonena, ya wapa kovantu ava vana kulivandekera va zogere komeho zosiruwo kuhamena kunyokera po kulikwatagura ndi kulincumita monkedi ezi nazi pindura malizuvho gawo ntani kukara pwavelike. (Yis. 22:3) Muntu kuvhura a gwire medowo lyokuhondera nsene a pwaga noyirugana ndi nsene kurugana kumwe nomuntu ga hana asi mulikwali gwendi. (Yis. 2:10-12, 16) Nsene o ligwanekera noukaro owo, lidivisa asi ove gumwe goNombangi daJehova, likida nkareso zongwa ntani diworoka asi kulihoresa kuvhura kureta yitundwamo yoyidona. Twa hepa hena kutakamesa nsene tuna guwu morwa kuvhura tu tambure nkenye eyi komuntu ogu ana kutulihoresa. Nsene kuna kara moukaro owo, hundira evatero kwaJehova ntani kovanavazinyetu yipo o dire kupulisira nkenye eyi yi ku kondere mokukagwana mfeto zoge.—Resa Episarome 34:18; Yisewe 13:20.
6. Yisinke natu diworoka kombinga zokuhorowora yilihafeso?
6 Mokudipaga madowo gomadona, twa hepa kunyokera po yilihafeso yokunyata ndi yoruhonda. Sinzi soyilihafeso ayi pitire konotivi nokoyikwambudi kwa lifana nonkareso zovantu womoSodoma naGomora. (Juda 7) Vantu ava ava wapaike yilihafeso eyi, kuninkisa vantu va gazare asi ruhonda kapisi epuko ntani kapi ayi reta yitundwamo yoyidona. Yipo nye, twa hepa kutakamesa asi kapisi tu horowore tupu nkenye yilihafeso. Mokukagwana mfeto zetu, twa hepa kunyokera po kuhorowora yilihafeso yoyidona.—Yis. 4:23.
“KARENI” NEHARO NOMBILI
7. Maudigu musinke naga vhura kuhoroka mombungakriste?
7 Natuvenye twa yi diva asi pokuyahama kombungakriste kuturetera ruhafo. Apa atu wiza komapongo, ose kuyalironga Nonkango daKarunga nokuyagwana makorangedo kovanavazinyetu. Eyi kutuvatera tu demenene komfeto zetu. Nampili ngoso, poyiruwo yimwe madiro kulizuvha kuhoroka mombungakriste. Nsene tu dira kugakohonona po, kuvhura tu linyenge ndi tu kare nonkoko novanavazinyetu.—Resa 1 Peturusa 3:8, 9.
8, 9. (a) Yikara musinke ngayi tu vatera tu ka gwane mfeto? (b) Yisinke nayi tu vatera tu tulise po mbili nsene munazinyetu ana tu koresa?
8 Ngapi natu nyokera po kulinyenga ndi kukara nonkoko novanavazinyetu? Paurusa kwa korangedere Vakorosi asi: “One ava ga horowora Karunga, vapongoki ava ga hara, kareni nonkenda nombili nomalinunupiko nekuruko nezaverero. Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa. Mwanayinye kareni neharo eli lya kwata nayinye kumwe, nomalikwata-kano gene-gene.”—Koros. 3:12-14.
9 Eharo ntani mbili kuvhura yi tu vatere tu ligusire po novakwetetu. Pasihonena, nsene tu lizuvha asi munazinyetu ana tu koresa, twa hepa kudiworoka apa twa koresere wopeke nomu va tu gusilire po. Yosili, ose kuhafa apa vakwetetu ava tu gusire po. (Resa Muudisi 7:21, 22.) Nye unene po, ose kupandura Karunga morwa Kristusa ga tu vatera tu kare mouumwe novanavazinyetu. (Koros. 3:15) Natuvenye kukarera Karunga gumwe tupu nokuzuvhisa mbudi zokulifana ntani sinzi setu kupita momaudigu gokulifana. Ano nsene tu kara neharo ntani nombili nokuligusira-gusira po, mbungakriste ngazi kara mouumwe. Eyi ngayi tu vatera tu demenene komfeto zetu.
10, 11. (a) Morwasinke ya karera siponga kukara nomfudu? (b) Ngapi natu nyokera po kukara nomfudu?
10 Yihonena yomoBibeli kutudiworokesa asi mfudu kuvhura zi tu kondere mokukagwana mfeto. Pasihonena, Kaini kwa fililire mfudu mumbyendi Abeli makura tamu dipaga. Kora naDatani ntani Abiramu kwa fililire mfudu Mosesa makura tava mu rwanesa. Hompa Sauru nage kwa fililire mfudu Ndafita yiyo nye ga harerere kumudipaga. Eyi yiyo nye da uyungira Nonkango daKarunga asi: “Yeeyi oku kwa kara mfudu nomakoto, yiko hena kwa kara epiyagano noyikara nayinye yoyidona.”—Jak. 3:16.
11 Nsene tu tunga po sikara seharo nombili, kapi ngatu kara no mfudu. Bibeli kwa tanta asi: “Eharo kwa kwata nedidimiko nounambili; eharo kapi lya paka mfudu.” (1 Kol. 13:4) Mokunyokera po kukara nomfudu, twa hepa kutara yininke ngamoomu ayi tara Karunga. Twa hepa kutara vanavazinyetu ngorutu rumwe ndi asi awo kwa hamena kombungakriste. Eyi ngayi tu vatera tu likide eharo lyosiumbya kovanavazinyetu. Bibeli kwa tanta asi: “Ano nsene va fumadeka po rumwe, makwawo nago taga ru hafesa ko.” (1 Kol. 12:16-18, 26) Yipo nye, nsene munazinyetu ana hafa nose twa hepa kumuhafesa ko mevango lyokumufira mfudu. Tu tareni sihonena saJonatana munwahompa Sauru. Mevango lyokufira mfudu Ndafita apa vamu tulire a kare hompa, age kwa korangedere Ndafita. (1 Sam. 23:16-18) Nose kuvhura tu honene Jonatana pokukara neharo nombili.
KONDJERENI MFETO NGEPATA
12. Epukururo musinke ngali vatera vemepata ngava ka gwane mfeto?
12 Nsene navenye vemepata va kwama nompango domoBibeli, awo ngava kara nombili noruhafo ntani ngayi va vatera va ka gwane mfeto. Mapukururo musinke ga geve Paurusa komapata mombilive zendi koVakorosi? Age kwa tjenge asi: “One vakadi, omu limburukwe kovagara veni, moomu ya wapera Hompa. One vagara, omu hare vakadi veni, nokuvapakera si nyanya. Anone vanona, omu limburukwe kovakurona veni mwankenye eyi, yeeyi yimo ga hara Karunga. One oguhya ko, walye omu tugumukire unene vana veni, neisi va mu suwurukwa.” (Koros. 3:18-21) Naina, nose kuvhura tu gwanene mo uwa mombilive zaPaurusa.
13. Ngapi munazinyetukadi ogu ga kwara muhapuli na tezwilisa mugara gwendi?
13 Nampo ove o munazinyetukadi ogu ga kwara muhapuli. Yisinke no rugana nsene kulizuvha asi mugara goge ku kutekura momudona? Nampo no handuka nokumutangwisa. Nye oyo kuvhura yi rundurure ukaro ndi? Nampili a hageke nkareso zendi, ayo kuvhura ngayi mu tezwilise ndi? Hawe. Nye nsene o fumadeka mugara goge ngomutwe gepata, mepata ngamu kara mbili ntani ngomu yererepeka Jehova. Ove ngo tezwilisa 1 Peturusa 3:1, 2.
mugara goge ntani ngayi mu vatera mu ka gwane mfeto.—Resa14. Yisinke no rugana nsene kulizuvha asi mukadoge gomuhapuli kapi aku fumadeke?
14 Nampo ove o munazinyetugara ogu ga kwara muhapuli. Yisinke no rugana nsene kulizuvha asi mukadoge kapi aku fumadeke? Ove ngo mu tugumukira yipo asi aku tjire ndi? Oyo ngano kapi ngayi wapa. Karunga kuna ku harere o honene Jesus pokuruganesa nawa upangeli woge. (Efe. 5:23) Jesus kuruganesa upangeli wendi monaruwa. (Ruk. 9:46-48) Pokukwama sihonena saJesus, ove ngo tezwilisa mukadoge aya lipakerere nove mokukarera Jehova.
15. Ngapi omu munazinyetugara na likida mukadendi eharo?
15 Bibeli kupukurura vagara asi: “One vagara, omu hare vakadi veni, nokuvapakera si nyanya.” (Koros. 3:19) Mugara kufumadeka mukadendi pokupurakena komagano gendi ntani age kugatara asi mulyo. (1 Pet. 3:7) Nampili ngomu mugara a dili kurugana nkenye eyi a uyunga mukadendi, nye simpe kuvhura a ture po matokoro gomawa nsene a purakena kwa mukadendi. (Yis. 15:22). Mugara kapi a sininike mukadendi a mu fumadeke, nye nkareso zendi yizo azi ninkisa mukadendi a mu fumadeke. Mugara ogu ga hara mukadendi novana vendi, ngava kara noruhafo mepata ngomu vana kukarera Jehova ntani ngava ka gwana mfeto.
Ngapi natu kohonona po maudigu mepata yipo tu ka gwane mfeto? (Tara paragarafu 13-15)
VADINKATU, YA HA MU KONDERA NKENYE EYI MOKUKAGWANA MFETO!
16, 17. Ngomudinkantu, ngapi no nyokera po nkareso zokudira kutambura mapukururo govakondi woge?
16 Nampo ove simpe o mudinkantu. Pamwe kulizuvha asi vakurona woge kapi ava kukwata egano ndi asi awo kukutulira po noveta dononzi. Eyi kuvhura yi ku ninkise o hare kuhageka kukarera Jehova. Nye nsene o hageka kukarera Jehova, ngo ya dimburura asi kwato ogu ga kuhara ngwendi moomu va kuhara vakondi woge nava womombungakriste.
17 Ngapi ngo diva asi vakurona woge va kuhara nsene kapi ava ku pukurura? (Heb. 12:8) Diworoka asi kapi va sikilira mo, eyi kuvhura yikuninkise o dire kuhafera monkedi omu ava ku pukurura. Yipo nye mevango lyokuhanduka nsene tava kupukurura, tarurura konda zeyi vana ku pukwilire. Hetekera ko kulitura nokupurakena nawa yipo o lirongere ko. Bibeli kututantera asi: “Vantu wonondunge awo kugazara nawa ntani vana kuuyunga, ano muntu gonondungezuni kwa kara nompepo za tenda.” (Yis. 17:27, NW) Litulira po sitambo sokutambura mapukururo nokulirongera ko yi kare asi monkedi musinke vana ga gava. (Yis. 1:8) Diworoka asi alyo etungiko lyenene nsene vakurona woge kukarera Jehova, morwa awo ngava kuvatera o ka gwane mfeto.
18. Morwasinke ono tokomenene ku ka gwana mfeto?
18 Ose kuna kundindira meho zongwa yi kare asi ose kwa kara nehuguvaro lyokuka parukira meguru ndi moparadisa pevhu. Ayo ngayi ka sika mo morwa Jehova yige ga yi tumbwidira. Karunga kwa tanta kuhamena paradisa asi: “Sirongo ngasi zura ediwo lyaHOMPA.” (Jes. 11:9) Karunga nga ka ronga navenye ava ngava ka paruka moparadisa. Oso kuna kara sininke sosiwa natu vhura kundindira. Yipo nye, tu diworokeni nkenye apa eyi gatu tumbwidira Jehova, twa ha pulisira nkenye eyi yi tu kondere mokukagwana mfeto.