Ove kuhuguvara ndi kupapara egameno kwaJehova ndi?
“HOMPA nga parura vantu vendi, ava va mu huguvara kapi ngava va futisa.”—EPIS. 34:22.
1. Morwa kudira kusikilira mo, ngapi ava lizuvhu sinzi sovakareli vaKarunga wovalimburukwi?
“ORU ruhepo rwange ame muntu ame rureru oru!” (Rom. 7:24) Sinzi sovakareli vaKarunga wovalimburukwi kulizuvha ngwendi moomu ga lizuvhire mupositoli Paurusa. Morwa kudira kusikilira mo, pamwe ose kurugana eyi ayi dili kuhafesa Jehova ano ayo kutuninkisa tu lizuvhe udona. Vakriste vamwe ava va tura nonzo dononene kulizuvha asi Karunga kapi nga va dongwenena po.
2. (a) Yisinke va uyunga mEpisarome 34:22 eyi ayi likida asi vakareli vaKarunga kapisi hepero gava rorore malizuvho gounzoni? (b) Yisinke natu ka konakona mosirongwa esi? (Tara kakende “ Sirongwa ndi Sifanekeso?”)
2 Matjangwa kutukorangeda asi nsene tu papara egameno kwaJehova kapi ngaga tu rorora malizuvho gounzoni. (Resa Episarome 34:22.) Yisinke ya hamena mo mokupapara egameno kwaJehova? Yisinke twa hepa kurugana yipo Jehova a tu fire nkenda nokutudongwenena po? Tatu ka gwana malimbururo komapuro ogo pokukakonakona yitata yorugami mosiruwo soVaisraeli. Yitata oyo kwa yi tulisire po moVeta zegwanekero ezi za ya hege poPentekoste momvhura 33. Veta ozo Jehova ga zi tulisire po. Tatu lirongere ko koyitata yorugami omu Jehova a tara nzo, vananzo ntani ava ava litezurura. Pomuhowo tatu ka tarurura eyi Vaisraeli va karerere noyitata oyo.
“HOROWORENI YITATA YORUGAMI”
3. Yisinke ngava rugana Vaisraeli nsene gumwe ana dipaga mukwawo mowina?
3 Posiruwo soVaisraeli, Jehova kapi ya mu hafesere apa gumwe nga dipaga mukwawo. Nsene muntu ana dipaga mukwawo mowina, “vekoro lyene-lyene lyanakufa” va kere nononkondo dokumutokwera nage konomfa. (Num. 35:19) Monkedi zangoso yimo nye mudipagi nga futu nzo ezi ga tulire. Ntani oyo kwa ninkisire Sirongo sEtumbwidiro si kare sina kuhuka, morwa Jehova kwa tente asi: “Edipago kudirura ndi [kunyateka, NW] sirongo.”—Num. 35:33, 34.
4. Yisinke ngava rugana Vaisraeli nsene gumwe ana dipaga mukwawo momponyo?
4 Yisinke ngava rugana Vaisraeli nsene gumwe ana dipaga mukwawo momponyo? Nampili ngomu ya kere asi kapisi mowina ana yi ruganene, age simpe ga kere nounzoni morwa ana dipaga muntu. (Gen. 9:5) Nye Jehova kwa tente asi muntu gwangoso va hepere kumufira nkenda pokumupulisira a dukire kositata sorugami a ka gwane epopero. Age ga hepere kukakara kositata oso dogoro konomfa domupristeli gomunene.—Num. 35:15, 28.
5. Ngapi omu yitata yorugami nayi tu vatera tu dive nawa Jehova?
5 Jehova yige ga tulisire po yitata oyo yorugami. Age kwa pangerere Josuwa asi: “Tantera mbunga zange Israeli asi: ‘Horoworeni yitata yorugami.’” Awo va hepere ‘kugusa mo’ yitata yimwe. (Jos. 20:1, 2, 7, 8) Mokumona asi Jehova yige ga geve mpangera zokutura po yitata oyo, kuvhura tu lipure asi: Ngapi yitata oyo ayi tu vatere tu kwate egano nkenda ezi ga kara nazo Jehova? Ntani yisinke natu lirongera ko eyi twa hepa kurugana yipo tu papare egameno kwaJehova?
A “SINGWENENE VAGENDESI OMU YINA GENDI”
6, 7. (a) Yisinke ngava rugana vagendesi nsene gumwe ana dipaga mukwawo momponyo? (Tara efano pepenuno 8.) (b) Morwasinke mudipagi ga heperere kuhedera vagendesi?
6 Posiruwo soVaisraeli, nsene muntu ana dipaga mukwawo momponyo ga hepere kudukira kositata sorugami a ka “singwenene vagendesi omu yina gendi.” Awo va hepere kumutambura. (Jos. 20:4) Konyima zosiruwo, tava mu tumu kositata oku wa horokerere unzoni yipo vagendesi vamo va ka mu pangure. (Resa Numeri 35:24, 25.) Nsene va ka dimburura asi kwa yi rugene momponyo tava mu tengwida kositata sorugami.
7 Morwasinke mudipagi ga heperere kuhedera vagendesi? Ayo kwa yi rugene mokukuhura mbunga zoVaisraeli ntani yipo Jehova a mu fire nkenda. Mulirongi gumwe goBibeli kwa tjenge asi nsene muntu ogo a dira kuhedera vagendesi “tali retere mwene udigu.” Age kwa tente hena asi: “Muntu ogo kuvhura va mu dipage morwa kudira kulimburukwa mpangera zaKarunga.” Age ga hepere kupapara evatero nokutambura mavyukiso. Nsene ngano kapi ga dukilire kositata sorugami esi ga horowere Jehova, gekoro lyene-lyene lyanakufa ga kere nononkondo dokumudipaga.
8, 9. Morwasinke Mukriste ogu a tura nzo zonene ga hepera kuhedera vakuronambunga va mu vatere?
8 Mukriste ogu a tura nzo zonene ga hepa kuhedera vakuronambunga va mu vatere. Morwasinke ya karera nomulyo? Konda zokuhova, Jehova yige ga tura po vakuronambunga va pangure nonzo dononene. (Jak. 5:14-16) Zauvali, vakuronambunga kuvatera munanzo ali tezurure yipo Karunga a mu fire nkenda ntani a nyokere po nkareso zokuzona-zona. (Gar. 6:1; Heb. 12:11) Zautatu, vakuronambunga kwa va horowora ntani va gwana edeuro mokuhengagwida nokukorangeda ogu ana litezurura a dire kulizuvha unene kukora komutjima ntani unzoni. Jehova kutumbura vakuronambunga vangoso asi “uvando womvhura.” (Jes. 32:1, 2) Karunga kutulikida nkenda kupitira movakuronambunga.
9 Sinzi sovakareli vaKarunga kwa gwana ehengagwido pokupapara mbatero kovakuronambunga. Pasihonena, munazinyetu Daniel kwa tulire nzo zonene, nye makwedi gomanzi ga kere nowoma kuhedera vakuronambunga. Age kwa tanta asi: “Konyima zosiruwo tani ya lizuvhu asi yininke yina lipiti kapi tava vhuru kuvatera nge hena vakuronambunga. Nye nkenye apa na kere nosinka asi ngava kwata nge kweyi nina kurugana. Apa ngani kanderere, nkenye apa ngani lizuvhu asi na hepa kuhundira Jehova a gusire nge po kweyi na rugene.” Konyima Daniel ga ya hederere vakuronambunga. Age kwa tanta asi: “Ame na kere nowoma kuvahedera. Nye konyima zokuzogera nawo, na lizuvhire ngwendi kuna gusa nge mudigo pomapepe. Ngesi nina kara nemanguruko lyokukanderera kwaJehova pwa hana yilimbikiso.” Daniel ngesi ana kara nezwi lyewa lyokomutjima ntani age mukwafimbunga.
“A DUKIRE KOSITATA SIMWE POYO”
10. Yisinke ga hepere kurugana muntu ogu ana dipaga mukwawo momponyo yipo va mu fire nkenda?
10 Muntu ogu ana dipaga mukwawo momponyo ga hepere kurugana ko yuma yipo va mu fire nkenda. Age ga hepere kudukira kositata sorugami sopopepi. (Resa Josuwa 20:4.) Mokuninka asi a paruke ga hepere kudukira usimbu kositata oso nokukakara kooko. Ga hepere kutura po malizambero ngwendi kusiga yirugana yendi nembo lyendi ntani kukakara mositata oso dogoro konomfa domupristeli gomunene. * (Num. 35:25) Ayo ya kere hepero kutura po malizambero ogo. Ngano ga tundire mo mositata oso, ayo ngano ya likidire asi kapi ga lizuvhire unzoni kweyi ga dipagere mukwawo ntani nage ngano va mu dipagere.
11. Yisinke na rugana Mukriste pokulikida asi kapi ana kuhepeka mawoko-woko nkenda zaKarunga?
11 Ava ava tura nonzo dononene va hepa kurugana ko yuma yipo Karunga ava fire nkenda. Awo va hepa kusiga nonzo dawo, kapisi dononene delike nye hena nedi dononunu edi adi twaredesa muntu a ka ture nzo zonene. Mupositoli Paurusa kwa tjenge eyi va rugene Vakriste womoKolinte mokulitezurura. Age kwa tjenge asi: “Tareni tupu nye eyi lya mu retera eguwo lyekeharo lyaKarunga. Lyene elipangero tupu nye, wene uradi tupu nye, wene utondwe wonzo tupu nye, sene sinka tupu nye, lyene ediworoko tupu nye, wene upampi tupu nye, gene maliwapaiko tupu nye gokunyokera udona.” (2 Kol. 7:10, 11) Nsene tu kara neharo lyokunyokera po kuzona-zona ngatu likida Jehova asi ose twa kara nosinka keparu lyetu ntani kapi tuna kuhepeka mawoko-woko nkenda zendi.
12. Yisinke ga hepa kunyokera po Mukriste, yipo Karunga a mu fire nkenda?
12 Yisinke ga hepa kunyokera po Mukriste, yipo Karunga a mu fire nkenda? Age ga hepa kunyokera po eyi ga hara nsene asi ta yi mu ninkisa a ture nzo. (Mat. 18:8, 9) Nsene vakaume woge kukuzeda mokurugana eyi ayi dili kuhafesa Jehova, ove ngo twikira kukara nawo ndi? Nsene kukudigopera mokuruganesa yikorwesa monaruwa, ngo nyokera po maukaro aga ngaga kuninkisa o nwe unene ndi? Nsene kukudigopera kupangera malizuvho geligwanekero panyama, ngo nyokera po kutarera nomuvi doruhonda ndi nkenye eyi ngayi vhura kupindura madowo goruhonda ndi? Ayo kuguvisa nsene o lizuvha asi Jehova ana kusigilire. Nye kureta ruhafo rorunene pokulizuvha asi Jehova nga kulikida ‘eharo lyendi narunye.’—Jes. 54:7, 8.
‘NGOMU ZE KO MU KA VANDE’
13. Morwasinke natu uyungira asi mudipagi kwa kere megameno ntani noruhafo mositata sorugami?
13 Apa ga kere mositata sorugami, mudipagi ga kere megameno. Kombinga zoyitata oyo, Jehova kwa tente asi: ‘Ngomu ze ko, mu ka vande.’ (Jos. 20:2, 3) Jehova kapi ga pulisilire asi mudipagi gwina va mu pangure hena ko nzo zendi. Ntani hena gekoro lyanakufa nage kapi va mu pulisilire kuhwilira mositata oso asi aka dipage mudipagi gwina. Yipo nye mudipagi kapi ga hepere kukara nowoma, morwa age kwa kere megameno lyaJehova mositata sina. Sitata oso kapi sa kere ngwendi dorongo morwa age ga vhulire kurugana nokuvatera vakwawo ntani kukarera Jehova. Yosili age ngano ga kere simpe noruhafo!
Kara nepuro asi Jehova nga ku dongwenena po (Tara paragarafu 14-16)
14. Ehuguvaro musinke va hepa kukara nalyo Vakriste nsene vana litezurura?
14 Vakareli vaKarunga ava va tura nonzo dononene simpe kulizuvha unzoni nampili ngomu va litezurura. Ano vamwe kulizuvha asi Jehova kapi nga divara nonzo dawo. Nsene yimo o lizuvhu ngoso, kara nehuguvaro asi Jehova kudivara nonzo detu apa atu gusire po. Daniel ogu tuna tumbura nare ga ya yi limonene oyo. Konyima zapa vakuronambunga va mu pukwilire nokumuvatera a kare nezwi lyewa lyokomutjima, age kwa tanta asi: “Ame kwa lizuvhire ngwendi kuna gusa nge mudigo pomapepe. Kapi na ya lizuvhire hena unzoni. Nsene nzo zina piti, zina piti tupu. Jehova kwa uyunga asi age kugusa mausima getu nokugatura ure. Kapi ngo ga mona hena.” Apa ga kere mudipagi mositata sorugami, kapi ga hepere kukara nowoma asi nava mu dipaga. Mokulifana, konyima zapa Jehova atu dongwenene po kapisi tu kare nosinka asi ngatu diworokesa hena nonzo detu.—Resa Episarome 103:8-12.
15, 16. Mokumona asi Jesus ga tu zowora ntani age Mupristeli goMunene, ehuguvaro musinke natu kara nalyo kuhamena nkenda zaKarunga?
15 Ose twa kara nokonda zonene zeyi natu karerera nehuguvaro asi Jehova ngatu fira nkenda. Konyima zapa Paurusa ga uyungire asi ga lizuvhire unzoni morwa kudira kulimburukwa Jehova nawa-nawa, age kwa tente asi: “Ame tani pandwire Karunga mwaJesus Kristusa, Hompa gwetu.” (Rom. 7:25) Nampili ngomu nga lizuvhu unzoni kononzo dendi danare edi ga litezwilire, Paurusa ga kere nehuguvaro asi Karunga ga mu gusira po kupitira mwaJesus. Morwa Jesus ga tu zowora ose kuvhura tu kare nombili nezwi lyewa lyokomutjima. (Heb. 9:13, 14) NgoMupristeli goMunene age kuvhura ‘kuparura ava ava wiza kwaKarunga, va gendere mwendi. Yeeyi age gokukarerera dogoro narunye, a va kandererere kwaKarunga.’ (Heb. 7:24, 25) Posiruwo soVaisraeli, mupristeli gomunene nga va vatere yipo Jehova a va dongwenene po nonzo dawo. Mokulifana, nose kuvhura kukara nehuguvaro asi Jesus ngoMupristeli gwetu goMunene ngatu vatera yipo Karunga a “tu fire nkenda, zi tu kwafe paapa tuna zi hepere.”—Heb. 4:15, 16.
16 Papara uvando mwaJehova ntani tura epuro monzambo zaJesus. Wa ha gazara asi sizoweseso kwa tamba tupu kombunga zovantu. Nye kara nepuro asi nove kuvhura o gwanene mo uwa mosizoweseso. (Gar. 2:20, 21) Kara nepuro asi kupitira mosizoweseso Jehova nga ku dongwenena po nonzo doge. Ntani kara nepuro asi morwa sizoweseso kuvhura o kare nehuguvaro lyokukaparuka naruye. Nzambo zaJesus kuna kara uhwi ou ga ku pa Jehova.
17. Morwasinke ono harere kupapara egameno kwaJehova?
17 Yitata yorugami kulikida nkenda ezi ga kara nazo Jehova. Kupitira moyitata oyo, Karunga kapi tupu ga nkondopekere upongoki weparu nye hena kwa likidire omu vakuronambunga ava tu vatere neyi ya hamena mo mokulitezurura ntani neyi natu yi pulira asi Jehova kutugusira po. Ove kuhuguvara ndi kupapara egameno kwaJehova ndi? Kwato hena kumwe kwapeke natu gwana egameno. (Epis. 91:1, 2) Mosirongwa sokukwama ko, ngatu ka tarurura omu yitata yorugami nayi tu vatera tu honene uhungami waJehova nonkenda zendi.
^ para. 10 Kuliza novalirongi woVajuda, vanekoro vene-vene wogu ana dipaga mukwawo momponyo nawo va dirukire va ka tunge nendi mositata sorugami.
