1. Epukururo musinke Paurusa ga tjangerere vapuli vakwawo? (Tara efano.)

MUPOSITOLI Paurusa kwa tjenge mbilive zendi koVakriste womoKorosi apa ga kere modorongo moRoma koyiha yomvhura 60 dogoro 61. Mombilive ozo, age kwa va likidire hepero zokukara ‘nounongo wopampepo’ ndi kukara nomutaro ngwendi gwaJehova. (Koros. 1:9) Age kwa va tanterere hena asi: “Eyi ame kuna kuyimutanterera asi va ha mu pukisa vantu nononkango dawo dokupeya. Omu takamese, walye ava mu diinine po vantu nounongo nomasanseko goyimpempa aga ga tunda konompo dovantu nekepangero lyonompepo douzuni, ya hana si yokutunda kwaKristusa.” (Koros. 2:4, 8) Makura Paurusa tava fatwilire eyi magano gamwe ga karera epuko ntani neyi va ga harera vantu wovanzi. Pasihonena, ago kuninkisa vantu va lizuvhe asi awo nondunge unene ntani va pitakana wopeke. Mbilive ozo kwa zi tjangerere nositambo sokuvatera vapuli vakwawo va nyokere po magano noyirugana yepuko.—Koros. 2:16, 17, 23.

2. Morwasinke natu ka konakonena magano gepuko?

² Magano gepuko kuvhura ga tu ninkise tu dire kukwama  nompango daJehova ntani ago kuvhura kusesupika epuro lyetu. Magano ogo kwa tu kundama natuvenye morwa ago kupitira kotivi ntani kugagwana kointaneta nokoyirugana ndi kosure. Mosirongwa esi, tatu ka konakona eyi natu rugana mokunyokera po magano ogo. Ntani hena tatu ka tarurura magano gepuko gatano nomu natu ga nyokera po.

3. Egano musinke va pura vantu wovanzi ntani morwasinke?

³ “Kuvhura ni kare muntu gomuwa nampili kapi na pura mwaKarunga.” Moyirongo yoyinzi, vantu kwa pura egano olyo morwa nampo kapi va konakona nsene asi Karunga yipo ga kara. Eyi kuvaninkisa va kare nemanguruko lyokurugana nkenye eyi vana hara. (Resa Episarome 10:4.) Vamwe kulimona asi awo nondunge pokudira kupura mwaKarunga.

4. Ngapi no fatwilira muntu ogu ga pura asi kapi pwa kara Musiti?

⁴ Vantu ava va pura asi kapi pwa kara Musiti, mouhunga va kara ndi? Elimbururo kepuro olyo ureru. Mokumona asi nzugo muntu azi tungu kulikida asi yinamweyo nayo kweli ogu ga yi sita. Yinamweyo kwa kara nevhuliko lyokulivhukisa yene, eyi ya lisiga nonzugo morwa muntu ga hepa kuzitunga. Yilye ogu ga sita yinamwenyo? Bibeli kutanta asi: “Nkenye embo muntu a li tungu, nye mutungi gwanayinye, yige Karunga.”—Heb. 3:4.

5. Ngapi natu vatera muntu ogu ga pura asi age kuvhura kurugana yoyiwa nampili kapi ga pura mwaKarunga?

⁵ Ngapi natu vatera muntu ogu ga pura asi age kuvhura kurugana yoyiwa nampili kapi ga pura mwaKarunga? Bibeli kulikida asi vahapuli nawo va kara nonkareso zongwa. (Rom. 2:14, 15) Pasihonena, nawo kwa hara vakurona vawo nokuvafumadeka. Nye nsene va dira kukwama nompango daJehova, awo ngava tura po matokoro gepuko. (Jes. 33:22) Vantu wovanzi va yi dimburura asi pwa hepa evatero lyaJehova mokukohonona po maudigu gomouzuni. (Resa Jeremiya 10:23.) Yipo nye, twa hepa kunyokera po kugazara asi kuvhura kutokora kurugana yoyiwa nampili kapi twa pura mwaKarunga.—Epis. 146:3.

6. Ngapi sinzi sovantu ava tara ukarelikarunga?

⁶ “Kuvhura o kare noruhafo nampili kapi wa hamena koukarelikarunga.” Sinzi sovantu kwa pura egano olyo morwa awo kutara ukarelikarunga asi kwato mulyo. Ntani sinzi somaukarelikarunga kupukisa vantu pokuvaronga kuhamena mundiro gwanarunye nokuvapura va gave yigava ntani kukwatesa ko upolitika. Eyi yiyo vantu va dilira kuhara kuhamena koukarelikarunga. Awo kuvhura va uyunge asi: “Ame na pura mwaKarunga nye kapi na hara kuhamena koukarelikarunga.”

7. Ngapi omu ukareli wousili au retesa po ruhafo?

⁷ Kuvhura tu kare noruhafo pwa hana ukarelikarunga ndi? Muntu kuvhura a kare noruhafo nampili kapi ga hamena koukarelikarunga woyimpempa, nye ruhafo rosili kurugwana tupu nsene a kara nelikwatakano lyewa naJehova, Karunga goruhafo. Karunga kurugana nkenye eyi yipo tu gwanene mo uwa. Vakareli vaJehova kwa kara noruhafo morwa awo kuvatera wopeke. (Yirug. 20:35) Pasihonena, gazadara ko omu ukareli wousili au vatere mapata ga kare noruhafo. Ukareli  wousili kuturonga tu fumadeke valikwali vetu nokusikisa mo mugano gononkwara nokulilikida eharo nokunyokera po ruhonda ntani nokurera vanona monkedi zongwa. Ngoyitundwamo, ukareli wousili kuvatera vantu va kare mouumwe uzuni mudima.—Resa Jesaya 65:13, 14.

8. Ngapi natu ruganesa etjangwa lyaRukasa 11:28 mokuvatera vantu va dive eyi ayi reta ruhafo rosili?

⁸ Muntu kuvhura a kare noruhafo rosili ga hana kukarera Karunga ndi? Tarurura epuro eli asi, yisinke ayi ninkisa vantu va kare noruhafo? Vamwe kuhafera yirugana yawo ndi maudano. Ano vamwe kuvahafesa apa ava rere vekoro lyawo. Yininke nayinye oyo kuvhura kutuhafesa, nye kosili sininke simwe esi asi tu retere ruhafo rosili. Ose vantu kwa lisiga noyikorama, morwa ose kuvhura kudiva Musiti gwetu nokumukarera. Ose kwa tu sita tu gwane ruhafo pokuyirugana oyo. (Resa Rukasa 11:28.) Pasihonena, vakareli wousili kugwana ruhafo nekorangedo apa ava pongo kumwe mokukarera Jehova. (Epis. 133:1) Awo hena kugwana ruhafo apa ava paruka eparu lyokukuhuka napa ava kara mouumwe ntani va kara nehuguvaro lyokomeho.

9. (a) Egano musinke va kara nalyo wovanzi kuhamena eligwanekero panyama? (b) Morwasinke Bibeli za nyokesera kuligwanekera panyama nsene kapi wa kwara?

⁹ “Epuko musinke lya kara po mokuligwanekera panyama nsene kapi wa kwara?” Vantu kuvhura va tu tantere asi: “Twa hepa kuhafera eparu. Epuko musinke lya kara po mokuligwanekera panyama nsene kapi wa kwara?” Egano olyo epuko morwa alyo kwa lilimba noBibeli. * (Resa 1 Vatesaronika 4:3-8.) Jehova ga kara nononkondo dokututulira po noveta morwa yige ga tu sita. Age kwa tulisa po veta asi valikwali velike yiwo wokuvhura kuligwanekera panyama. Karunga kwa tu hara yiyo ga tu pa noveta ntani nose kugwanena mo uwa. Mapata aga aga sikisa mo noveta dendi kukara nombili neharo mokatji kawo. Jehova nga ka zonagura po ava ava dili kulimburukwa veta zendi.—Heb. 13:4.

10. Ngapi omu Vakriste nava nyokera po ruhonda?

¹⁰ Nonkango daKarunga kuturonga omu natu nyokera po ruhonda. Nkedi zimwe kuna kara pokulikunga kweyi atu tara. Jesus kwa tente asi: “Nkenyogu a tara mukadi, nye a mu dovaukire, nare ana mu honderere momutjima. Nsenesi eho lyoge ly[o]rulyo tali hara kukupukisira konzo, li korora mo o li zugumine kwina.” (Mat. 5:28, 29) Yipo nye, Mukriste ga hepa kunyokera kutarera mafano goruhonda ndi kupurakena konomusika dokupindura madowo gomadona. Mupositoli Paurusa kwa tjangerere Vapuli vakwawo asi: “Omu dipage madowo aga aga rugana mweni, ngwendi gaga: ruhonda.” (Koros. 3:5) Twa hepa hena kulikunga kweyi atu gazara neyi atu rugana.—Efe. 5:3-5.

11. Yisinke nampo nayi tu tumangeda tu hare kukondjera yirugana yokufuta nawa?

¹¹ “Kukara noyirugana yokufuta nawa  kureta ruhafo.” Vantu kuvhura va tu korangede tu ruganese siruwo nonkondo detu mokukondjera yirugana yokufuta nawa yipo asi tu ngawope nokufumana ndi tu divikwe. Egano olyo kuvhura li tu kundame nose morwa sinzi sovantu kugazara asi kukara noyirugana yokufuta nawa kureta ruhafo.

12. Yirugana yokufuta nawa kuvhura kuturetera ruhafo rosili ndi?

¹² Yirugana yokufuta nawa kuvhura kuturetera ruhafo rosili ndi? Hawe. Diworoka asi Satana kwa here efumano nye kapi ga gwanena mo ruhafo, ano ngesi ana kara nehandu lyenene. (Mat. 4:8, 9; Ehor. 12:12) Yirugana yokufuta nawa kapi ayi tu retere ruhafo ngwendi oru atu gwana pokuronga vantu kuhamena Karunga ntani meho zongwa. Ayo hena kuninkisa vantu va lirumbasane ntani va kare nomfudu. Nayinye oyo kapi ayi va retere ruhafo morwa ayo kwa kara “ngwendi mpepo tupu ono kutjida.”—Muud. 4:4.

13. (a) Mutaro musinke natu kara nago koyirugana? (b) Yisinke ya reterere Paurusa ruhafo?

¹³ Twa hepa yirugana meparu ntani kapi ya kara epuko kupapara yirugana eyi twa hara. Nye kapisi yiyo nayi kara sininke somulyo po meparu lyetu. Jesus kwa tente asi: “Muntu simpe a vhuru kukerera ohekuru vavali, morwa na nyenga po gumwe, ta hara po mukwawo, ndi na korera kwagumwe, ta nusa po mukwawo. None nokuvhura si kukerera Karunga nomamona.” (Mat. 6:24) Ose kugwana ruhafo apa atu litura mo unene mokukarera Jehova nokuronga wopeke kumuhamena. Mupositoli Paurusa nage ga yi limonene oyo. Pomuhowo, age kwa kondjerere yirugana nye apa ga tamekere kuzuvhisira vantu nokuvamona omu ngava tambura mbudi zaKarunga, ya mu reterere ruhafo. (Resa 1 Vatesaronika 2:13, 19, 20.) Yosili, kwato hena yirugana ayi tu retere ruhafo ngwendi kuronga vantu kuhamena Jehova.

14. Morwasinke sinzi sovantu ava yi kwatesere ko asi kuvhura kukohonona po maudigu gavene?

¹⁴ “Vantu kuvhura kukohonona po maudigu gavene.” Sinzi sovantu kukwatesa ko egano olyo. Nsene asi egano olyo  usili, ngano vantu kapi va hepa mavyukiso gaKarunga ntani awo ngano kuvhura kurugana yavene. Awo hena kukwatesa ko egano olyo morwa mauzera gamwe kulikida asi yita, ukorokotji, mauvera ntani ruhepo kuna kusesupa. Erapoto limwe kwa tanta asi: “Konda zeyi maudigu gana ku sesupira morwa vantu kwa tokora kurugana ko yuma.” Nye ayo usili asi vantu vana kara noudivi mokukohonona po maudigu ndi? Mokugwana elimbururo, tu konakoneni maudigu ogo momunene.

15. Yisinke yina kulikida asi maudigu kuna kuligwederera?

¹⁵ Yita: Vantu wokusika pomamiliyona 60 ndi kupita opo kwa fa moyita yokuhova neyi yauvali youzuni mudima. Kutunda pena, vantu kwa twikira kurwa yita. Mo-2015, sivaro sovantu ava va tjwayuka morwa yita ndi mahepeko kwa ka sika pomamiliyona 65. Ano mo-2015 ko mwelike, kwa yi ngungunyikira asi vantu wokusika pomamiliyona 12.4, kwa tjwayuka momambo gawo. Ukorokotji: Nampili ngomu wa sesupa moyirongo yimwe, nye simpe pana vhuka maudigu gamwe ngwendi nyanya, uteroriste ntani nagamwe hena. Vantu va yi dimburura hena asi ufuki una ligwederere. Vantu kapi ava vhuru kugusa po ukorokotji. Mauvera: Gamwe va hetekera ko kugahakura. Nye kuliza nerapoto lyomo-2013, vantu wokusika pomamiliyona ntane wokonhi zonomvhura 60 kufa kouvera womutjima, kankera ntani uvera wosuka. Ruhepo: Kutunda momvhura 1990 dogoro mo-2012, sivaro sovantu ava vana kuhepa unene moAfrika kwa ligwederera kunda pomamiliyona 280 dogoro pomamiliyona 330.

16. (a) Morwasinke ya karera asi Uhompa waKarunga yiwo welike wokuvhura kugusa po maudigu? (b) Mauwa musinke va tumbura mwaJesaya ntani moMapisarome ngau ka reta Uhompa?

¹⁶ Mapangero gouzuni ou kugapangera vantu ava va liharera tupu uwa wavene. Yipo nye, awo kapi ava vhuru kugusa po yita, ukorokotji, mauvera ntani ruhepo. Uhompa waKarunga welike ngau ka gusa po maudigu ogo. Tu tareni eyi Jehova nga ka ruganena vantu. Yita: Uhompa waKarunga ngau ka gusa po eyi ayi retesa po yita ngwendi ufuki, ukarelikarunga woyimpempa ntani Satana. (Epis. 46:8, 9) Ukorokotji: Uhompa waKarunga kuna kuronga mamiliyona govantu va lihara-hare nokulihuguvara-huguvara. Kwato hena epangero lyapeke a li yi rugana oyo. (Jes. 11:9) Mauvera: Jehova nga ka vatera vantu vendi va ka sikilire mo. (Jes. 35:5, 6) Ruhepo: Jehova nga ka ru hagekesa po ntani nga ka pa vakareli vendi eparu lyewa kupitakana maungawo gomouzuni ou.—Epis. 72:12, 13.

17. Ngapi omu no nyokera po magano gepuko?

¹⁷ Nsene o zuvha egano eli lya dira kuliza neyi wa pura, tara eyi za uyunga ko Bibeli ntani zogera namunazinyetu ogu ga kara noudivi. Konakona hena konda zeyi ava li tarere asi egano lyewa neyi lya karera epuko ntani nomu no li nyokera po. Kuvhura tu nyokera po magano gepuko pokukwama epukururo lyaPaurusa eli ga tjangerere Vakorosi asi: “Omu kare nounongo momalikaro nava va dira kupura, . . . mu dive kulimburura nkenye ogu ana kumupura.”—Koros. 4:5, 6.