ALLEN  * kwa tanta asi: “Ame kwa kere nosinka apa na dirukilire kombungakriste zapeke, kapi na divire nsene ngani ka gwana ko vakaume ndi nsene ngava ka tambura nge.” Allen ngesi kuna kutwikira kuyika mombungakriste ozo, azo kwa kara ure wonokilometa 1 400 nokugatunga.

Nove kuvhura o kare nosinka nsene kwa dirukira kombungakriste zapeke. Yisinke nayi kuvatera o yike? Yisinke no vhura kurugana nsene kuna kukudigopera mokuyika? Ntani ngapi womombungakriste nava vatera wovape va yike?

Gazadara ko kosihonena esi: Yitji kugusa siruwo mokukura nsene vana yi dura nokukayitapeka hena. Apa sitji ava si dura, nondandani daso kuditeta ko, makura apa ava ka si tapeka hena nondandani daso kutameka kukura. Mokulifana kudirukira kombungakriste zapeke kuvhura kugusa siruwo komeho o ka yike. Apa wa kere mombungakriste zeni ove wa kere nonondandani ndi vakaume ntani wa kere nelikwatakano lyewa naJehova. Ngesi wa hepa kutulisa po vakaume wovape yipo o yike. Yisinke ngayi ku vatera? Kutura pasirugana nompango domoBibeli. Tu konakone ko dimwe.

Muntu ogu a resa nkenye apa Nonkango daKarunga “kwa fana sitji esi va tapeka konontere domukuro gomema, esi asi yimi yiyimwa posiruwo sayo, yihako yaso hena kapi ayi rembuka, ano nayinye eyi a rugana kuragopa.”—Epis. 1:1-3.

Nonkango edi kulikida asi, sitji sa hepa mema yipo si twikire kuyima. Mokulifana Mukriste nage ga hepa kulironga nkenye apa Nonkango daKarunga mokunkondopeka elikwatakano lyendi naKarunga. Yipo nye, twikira kuresa Bibeli nkenye ezuva nokuza komapongo nkenye apa. Twikira kurugana elirongo lyanyaamoge lyoBibeli ntani noukareli wepata. Nayinye eyi ngo rugana mokunkondopeka elikwatakano lyoge naKarunga mombungakriste ezi wa kere, wa hepa simpe kutwikira kuyirugana.

“Kwafa vakweni nove ngava ku kwafe.”—Yis. 11:25.

Kulihameka nkenye apa mokuzuvhisa, ngaku kunkondopeka ntani nokukuvatera o yike mombungakriste zapeke. Kevin, mukuronambunga gumwe kwa tanta asi: “Kurugana uzuvhisi wokuvatera, kwa tu vaterere name namukadange, tu yike mombungakriste ezi twa dirukilire. Ose twa ya divire usimbu vanavazinyetu novazuvhisi wokukarerera nomukunda ogu ngatu zuvhisire.” Roger ogu ga dirukira kombungakriste zapeke ure wonokilometa 1 600 nokuga tungire kwa tanta asi: “Nkedi zongwa mokuyika mombungakriste ezi wa dirukira kuna kara pokupwaga mokuzuvhisa nkenye apa. Ntani kuvhura o pure vakuronambunga nsene kuvhura o vatere mwankenye eyi, nampo mokuzeresa Sinyanga soUhompa, kulizambera mokukagava ruha komapongo ndi nsene wa kara netuwa kuvhura o piture ko vapuli vakweni komapongo. Nkareso zoge zelizambero ngazi ninkisa vapuli vakweni va ku tambure.”

‘Omu li tambure.’—2 Kol. 6:13.

Twa hepa kutambura vanavazinyetu. Konyima apa Melissa nepata lyendi va dirukilire kombungakriste zapeke, awo kwa demenene kutulisa po vakaume  mombungakriste. Melissa kwa tanta asi: “Ngatu zogere novanavazinyetu komeho ntani konyima zepongo. Oyo ya tu vaterere tu zogere nawo momunene mevango lyokulikunda tupu.” Ntani ya va vaterere hena va dive usimbu madina govapuli vakwawo. Epata olyo ngali tambura vapuli vakwawo, ano ayo ya nkondopekere ukaume wawo nava womombungakriste. Age kwa tente hena asi: “Ose kwa geve nonomora detu kovanavazinyetu yipo va vhure kutugwana nsene pana kara yirugana yopampepo ndi nayimwe hena.”

Nsene kukudigopera kuzogera novantu, kuvhura o tameke kanunu-kanunu. Pasihonena, menya-menya nampili kapi ono yi hafere. Emenyuno ngali ninkisa vantu va ku hedere. Bibeli kututantera asi: “Yipara youzerere kukuhafesa.” (Yis. 15:30) Rachel ogu ga tunga ure nokugakulira kwa uyunga asi: “Ame nomuga, mpamwe kudigopera nge kuuyunga novanavazinyetu mombungakriste ezi na dirukira. Ame kupapara ogu ana hingire gelike yipo ni ka hingire nage. Nampo muntu ogo nomuga ngwendi nyame.” Ya wapa kulitulira po sitambo mokuzogera nava wovape mombungakriste yi kare asi komeho ndi konyima zankenye epongo.

Ove kuvhura o hafere kuzogera nava wovape mombungakriste pomuhowo, nye ngomu nasi ya pita po siruwo kapi to yi hafere hena. Posiruwo oso wa hepa kukondja unene yipo o twikire kutulisa po vakaume wovape.

Yitji yimwe kugusa siruwo yipo nondandani dayo di simbame nawa mevhu eli ava yi tapeke. Mokulifana, ayo kugusa siruwo komuntu mokuyika mombungakriste zapeke. Nsene wa kara siruwo sosire mombungakriste ezi wa dirukira nye simpe kuna kukudigopera kuyika tarurura nompango edi:

“Walye atu rorokeni kurugana uwa, yeeyi nsene tu dira kudwapa, ngano ngatu ka sika ko komuzangu.”—Gar. 6:9.

Wa hepa kupulisira siruwo yipo o yike. Pasihonena, vanavazinyetu ava ava zi koSikora zaGiliyata, kuvadeura mokukara vatumwa. Vanavazinyetu owo kukara mosirugana sawo nomvhura dononzi komeho zokutengura koyirongo yawo mokukadingura. Pokutunga moyirongo yougeni kuvavatera va lidive novapuli vakwawo nokulironga nompo dawo.

Alejandro, ogu ga diruka yikando yoyinzi ga yi dimburura asi ayo kugusa siruwo komuntu komeho a ka yike. Age kwa tanta asi: “Konyima zapa twa dirukire sikando sokuhulilira, mukadange kwa tente asi vakaume vendi navenye moveli mombungakriste zapeke.” Alejandro ga diworokesere mukadendi asi oyo yiyo ga uyungire hena nomvhura mbali da kapita apa va dirukire. Nye nomvhura nadinye odo mbali mukadendi kwa here kuzogera novantu ntani ga ya tulisire po vakaume.

“Walye o pura asi: ‘Yinke ya waperere yininke pwanare?’ Epuro olyo kapisi lyonondunge.”—Muud. 7:10.

Wa ha hetakanesa mbungakriste ezi wa dirukira nezi wa kere nare. Pasihonena, nampo vanavazinyetu mombungakriste ezi ono dirukire kapi va mangurukira nawa-nawa nkenye ogu ndi awo nampo kwa mangurukira unene vantu. Mevango lyokuvapangura, demenena po unene koyikara yawo  yoyiwa ngamoomu no hara nove va ku tekure. Sinzi sovanavazinyetu ava va diruka kwava ninkisa va li pure asi: “Ame kwa hara ‘vapuli vakwetu’ ndi”?—1 Pet. 2:17.

“Omu hundire ngava mu pe.”—Ruk. 11:9.

Twikira kukanderera. David, mukuronambunga gumwe kwa tanta asi: “Kapisi o litulikire yininke komutjima. Jehova yige gelike gokuvhura kukuvatera. Yipo nye, twa hepera kukanderera!” Rachel ogu tuna tumbura nare kwa kwatesere ko nonkango odo pokutanta asi: “Apa name namugara gwange atu lizuvhu ngwendi kapi tuna hamene kombungakriste, ose kukanderera kwa Jehova a tu vatere tu dive nsene asi ose kuna kurugana eyi nayi tu ninkisa tu lipore ko kombungakriste. Makura ose kuhetekera ko kukara kumwe novanavazinyetu.”

Vakurona, nsene vana veni kuna kuvadigopera mokuyika, kanderereni nawo kuhamena ukaro owo. Va vatereni va gwane vakaume wovape pokukara nomapongasano.

Ngapi omu no vatera wovape mombungakriste zeni? Tunga po ukaume nawo. Gazadara ko koyininke eyi ngano no hafera nsene omu pe, makura va ruganena yininke oyo. (Mat. 7:12) Kuvhura o va zigide koukareli wepata ndi o tarere nawo elikwamo lyoTivi lyoNombangi daJehova. Kuvhura hena o pwage nawo mokuzuvhisa. Nsene o va zigida mu ya lye kumwe nawo, ngayi va hafesa ntani kapi ngava yi divara. Pwa kara nonkedi dimwe hena omu no vhura kuvatera wovape.

Carlos kwa tanta asi: “Apa twa ka sikire kombungakriste ezi twa dirukilire, munazinyetukadi gumwe kwa tu likidire yitora yombiliha. Ayo kwa tu vaterere sili unene.” Vanavazinyetu ava va tunga koyirongo yapeke ngava yi hafera pokulironga omu nava dwara momukarompepo gomomukunda gweni. Kuvhura hena o va fatwilire omu nayi va tompoka kuzuvhisira momukunda gweni pokuvatantera eyi va pura vantu womomukunda ogo.

Allen, ogu tuna tumbura ketameko kwa kara mombungakriste zapeke ure wokupitakana po mvhura zimwe. Age kwa tanta asi: “Ame na hepere kukondja unene mokudiva vanavazinyetu. Ngesi awo kuna kara ngwendi ekoro lyange ntani nina hafa.” Allen ga yi dimburura asi pokudirukira kombungakriste zapeke kapi ga zumbanesa vakaume. Nye ga gwana vakaume wovape ava ngava karerera.