1-3. (a) Ngapi omu natu tara usili womoBibeli? Yi fanekesa. (Tara mafano.) (b) Mapuro musinke natu ka zogera mosirongwa esi?

NAINA, vantu wovanzi kutengwida ko yininke eyi ava randa. Eyi kuhoroka nsene sininke esi vana randa kapisi yimo vana si ndindire ndi nampo sa zonauka ndi kapi tupu vana si hafere. Awo kutokora kusitengwida ko va ka si sintise ndi va ka si sige yipo va va tengwidire yimaliwa yawo.

² Nampili ngomu atu tengwida ko poyiruwo yimwe eyi atu randa, kapi ngatu tengwida ko ndi tu ‘randese’ ‘ediwo lyousili’ lyomoBibeli eli twa ‘randa.’ (Resa Yisewe 23:23; 1 Tim. 2:4) Mosirongwa sa ka pita, katu lirongere asi ose kuranda usili pokulitulira po siruwo tu u lironge. Ose hena kuranda usili pokuhageka yirugana yetu yokufuta yimaliwa yoyinzi nokutura po marunduruko monkedi omu atu paruka novanekoro novakaume. Ntani hena, ose kuhageka yirugana yetu yoyidona nokunyokera po nompo edi adi lirwanesa nonompango doBibeli. Nye nampili ngoso, mauwa aga twa gwana ga pitakana nayinye eyi twa zumbanesa.

³ Monkedi omu atu tara usili womoBibeli kwa lifana  nomugara gomosifanekeso saJesus. Mokulikida omu usili kuhamena Uhompa waKarunga wa kara nomulyo, Jesus kwa simwitire kuhamena murandi ogu ga paparere nombamba donongwa ano konyima ta ka gwana zimwe. Mbamba zina kwa kere nomulyo gomunene kwendi, yipo ga ka ‘randesere’ emona lyendi nalinye makura ta ya zi randa po. (Mat. 13:45, 46) Mokulifana, usili ou twa lironga kuhamena Uhompa waKarunga ntani nayimwe eyi twa lironga moNonkango daKarunga kwa kara nomulyo unene kwetu, ano eyi kwa tu tumangeda tu ture po malizambero yipo tu u gwane. Nsene tu twikira kuhara unene usili owo, kapi ngatu u “randesa.” Nye ehudi, vakareli vaKarunga vamwe kwa hageka kuhara usili, ano eyi kwa va ninkisa va u randese. Ngano kapisi yi tu horokere oyo. Mokulikida asi twa hara usili ntani kapi tuna hara kuurandesa, twa hepa kukwama epukururo lyomoBibeli ‘pokukara mousili nokuukwama.’ (Resa 3 Johanesa 2-4.) Kukwama usili kutanta asi kuutura muhowo meparu lyetu ntani kuparuka kuliza nonompango doBibeli. Tu zeni tu ka zogere mapuro aga: Yisinke ayi ninkisa vamwe va hare “kurandesa” usili ntani morwasinke? Ngapi natu nyokera po epuko lyangoso? Ntani yisinke nayi tu vatera tu twikire ‘kukara mousili nokuukwama’?

4. Morwasinke vamwe va ‘randeserere’ usili mosiruwo sovapositoli?

⁴ Mosiruwo sovapositoli, vamwe ava va tambwire mbudi zaJesus kwa ya hagekere kumukwama. Pasihonena, konyima zapa Jesus ga kutikire vantu mayovi pasitetu, awo kwa mu kweme dogoro kesinya kwina lyefuta lyaGalireya. Makura Jesus yipo ga uyungire yininke eyi ya va handukisire. Age kwa va tanterere asi: “Nsene mu dira kulya nyama zaMunwaMuntu, hena mu dire kunwa honde zendi, makura one mutupu mwenyo mone vene.” Mevango lyokumupura a va fatwilire eyi ga tembe, ayo kwa va pundukisire makura tava tanta asi: “Nonkango edi nondigu, yilye na vhura kudipurakena?” Makura ‘sinzi sovarongwa vendi yipo va mu sigire, kapi ngava gendi hena nendi.’—Joh. 6:53-66.

5, 6. (a) Morwasinke vamwe mosiruwo setu va hagekera kukwama usili? (b) Ngapi omu muntu na tameka kusiga usili nakauke-nakauke?

⁵ Ehudi, vamwe mosiruwo setu nawo kwa hageka kukwama usili. Awo kwa va pundukisa marunduruko mekwatogano lyetu lyoMatjangwa ndi nampo eyi ga rugana munazinyetu gumwe ogu ga kara noyitumbukira yoyinene. Vamwe nampo kapi lya va hafesere epukururo eli va va pere ndi awo kwa siga usili morwa kudira kulizuvha novapuli vakwetu. Ano vamwe kwa va pukisa varwanesi usili makura yiyo va ya tameka ‘kuzumba’ Jehova nokuligusa ko kombunga zendi. (Heb. 3:12-14) Oyo ngano kapi ya va horokera, nsene ngano va twikilire kukwama usili nokuhuguvara mwaJesus ngwendi moomu ga yi rugene mupositoli Peturusa. Apa Jesus ga pulire vapositoli vendi nsene asi nawo kwa here kumusiga, Peturusa ta limburura asi: “Hompa, kwalye natu za? Ove nyove wa kara nononkango domwenyo gwanarunye.”—Joh. 6:67-69.

⁶ Vamwe kwa ya tameka kusiga usili nakauke-nakauke va hana kuyidivira. Vantu vangoso kwa fana ngwendi wato ou una kutunda pezenga u pupe nakauke-nakauke u ze petondo. Bibeli kwa yi singonona  asi ngwendi kuna ‘kuzaaza nompepo.’ (Heb. 2:1) Muntu ogu a sigi usili monkedi zangoso, kapi ayi ruganene mowina. Nye nampili ngoso, age kutura elikwatakano lyendi naJehova mosiponga, ano konyima ta ya li zumbanesa. Ngapi natu yi nyokera po oyo?

7. Yisinke natu rugana yipo tu nyokere po kurandesa usili?

⁷ Mokukwama usili, twa hepa kulimburukwa konompangera daJehova nadinye. Twa hepa kutura usili muhowo meparu lyetu nokuparuka kuliza nonompango doBibeli. Mekanderero lyendi, hompa Ndafita kwa tumbwidilire Jehova asi ‘nga mu limburukwa.’ (Epis. 86:11) Ndafita kwa tokomenene kulimburukwa ndi kukwama usili. Nose twa hepa kutokomena kukwama usili. Nsene tu dira kuyirugana oyo, kuvhura ngatu tameke kukara nomasinganyeko kuhamena usili ou twa tambura nokurugwira koyininke yoyidona eyi twa siga. Ngano tu twikireni kukwama usili. Kapisi tu limburukwe tupu konompangera dimwe, nye twa hepa kukwama ‘usili mudima.’ (Joh. 16:13) Tu konakoneni yininke yitano eyi twa rugene yipo tu rande usili. Eyi ngayi tu vatera tu nyokere po kurugwira koyininke yimwe yoyidona eyi twa siga apa twa ya randa usili.—Mat. 6:19.

8. Ngapi omu Mukriste na vhura kusiga usili nakauke-nakauke? Gava sihonena.

⁸ Siruwo. Mokunyokera po kusiga usili nakauke-nakauke, twa hepa kuruganesa nawa siruwo setu. Nsene kapi tuna kutakamesa, kuvhura ngatu tameke kuruganesa siruwo sosinzi koyilihafeso nokutara koIntaneta ntani kutarera tivi. Nampili ngomu yininke oyo ya dira kukara epuko, siruwo esi twa hepa kuruganesa koyininke yimwe yopampepo ntani kelirongo lyanyamwetu kuvhura tu si manene koyininke oyo. Tara eyi ya horokerere munazinyetu gedina Emma. * Kutunda unona wendi, age nga hafere kuronda nonkambe. Age nga ruganesa nkenye mpito ezi nga gwana mokuronda nonkambe. Konyima zosiruwo, age kwa ya tamekere kulivera kuhamena siruwo esi nga hepeke. Nye, ga ya tulire po marunduruko yipo a ruganese siruwo sendi monaruwa. Sihonena saCory Wells ogu nage nga dana udano wokuronda nonkambe, sa mu vaterere. * Emma ngesi kuruganesa siruwo sosinzi koyininke yopampepo nokukara kumwe novanekoro novakaume ava ava karere Jehova. Age ngesi kulizuvha mbili ntani ga kara nelikwatakano lyewa naJehova morwa ga diva asi age kuna kuruganesa nawa siruwo sendi.

9. Ngapi omu kukondjera yininke yopanyama nayi ninkisa vamwe va hageke kukwama usili?

⁹ Yininke yopanyama. Nsene tuna hara kutwikira kukwama usili, twa hepa kukara nehetakano koyininke yopanyama. Apa atu ya lirongo usili, ose kuyatameka kutura yininke yopanyama mevango lyauvali. Ose kuhafa apa atu tura po marunduruko gangoso yipo tu kwame usili. Nye mwaza siruwo, kuvhura tu ya mone omu wopeke vana kuhafera eparu nokuranda yikwakonentu yondiro. Eyi kuvhura yi tu ninkise tu tameke kulizuvha asi ose kuna kuzumbanesa. Ose kuyalizuvha asi kapi yina tu gwanene po meparu makura tatu ya tameke kukondjera  emona. Eyi yiyo ya horokerere Demasa. Age kwa “dowokere unene uzuni,” ano eyi kwa mu ninkisire a hageke kurugana kumwe naPaurusa. (2 Tim. 4:10) Morwasinke Demasa ga sigilire Paurusa? Bibeli kapi za yi uyunga. Nye, age nampo kwa here unene yininke yopanyama kupitakana yopampepo ndi nampo kapi ga kere neharo lyokurugana hena naPaurusa. Ngano kapisi tu tengwire konkareso zokudowokera emona morwa azo ngazi tu ninkisa tu dire kuhara usili.

10. Mokukwama usili, yisinke natu nyokera po?

¹⁰ Ava twa hara. Mokutwikira kukwama usili, twa hepa kunyokera po makondjeso gokutunda kovanekoro ndi kovakaume vetu. Apa twa tamekere kukwama usili, ose kwa ya tulire po marunduruko monkedi omu natu paruka novantu ava ava dili kukarera Jehova ntani vanekoro. Vamwe va ya tu kwete egano ano vamwe ngava tu rwanesa. (1 Pet. 4:4) Nampili ngomu atu hetekere ko kukara nombili nawo, twa hepa kutakamesa asi kapisi tu teze nompango daJehova yipo tu va hafese. Ose ngatu twikira kukara nombili kumwe novanekoro. Nampili ngoso, kuliza 1 Vakolinte 15:33, vakaume vetu wovanene po va hepa kukara vaava ava karere Jehova.

11. Ngapi natu nyokera po yirugana nomagazaro gomadona?

¹¹ Yirugana nomagazaro gomadona. Navenye ava ava kwama usili va hepa kupongoka. (Jes. 35:8; resa 1 Peturusa 1:14-16.) Apa twa tamekere kukwama usili, ose kwa tulire po marunduruko yipo tu vhure kusikisa mo nompango daJehova. Ano vamwe va hepere kutura po marunduruko gomanene. Yi kare asi marunduruko musinke twa tura po, ngano kapisi tu tengwire koyirugana yoyidona eyi twa siga. Ngapi natu nyokera po kutengwira koyirugana yangoso? Twa hepa kugazadara ko kweyi ga tu ruganena Jehova yipo tu kare tuna pongoka. Age kwa geve Munwendi, Jesus Kristusa. (1 Pet. 1:18, 19) Mokutwikira kukara nelikwatakano lyewa naJehova, twa hepa kudiworoka omu nzambo zosizoweseso za kara nomulyo kwetu.

12, 13. (a) Morwasinke natu tarera yipito ngamoomu ayi tara Jehova? (b) Yisinke natu ka konakona ngesi?

¹² Nompo edi adi lirwanesa noBibeli. Vanekoro novarugani vakwetu ntani vanasure vakwetu kuvhura va tu pure tu lihameke moyipito yawo. Ngapi natu yi nyokera po nsene kuna kutukondjesa tu lihameke moyipito ntani monompo edi ga nyenga Jehova? Ose kuvhura kuyinyokera po nsene tu yi tara ngamoomu ayi tara Jehova. Kuvhura hena tu rugane mapaparo moyimbapiratjangwa yetu yipo tu dive oku ya tundilira yipito oyo. Nsene tu lidiworokesa nokonda domoMatjangwa deyi atu dilire kudana yipito oyo, ngayi tu vatera tu dive asi ose kuna kurugana yininke “eyi ya za Hompa komutjima.” (Efe. 5:10) Nsene tu huguvara Jehova noNonkango dendi, kapi ngatu ‘pakera mbili eyi ava uyunga’ vantu.—Yis. 29:25.

¹³ Kukwama usili kuna kara sininke esi twa hepa kurugana nkenye ezuva. Yisinke nayi tu vatera tu twikire kukwama usili? Tu zeni tu ka konakone nonkedi ntatu.

14. (a) Ngapi omu ngayi tu vatera nsene tu twikira kuranda usili? (b) Ngapi unongo nonondunge ya kara nomulyo kwetu?

¹⁴ Nkedi zokuhova, twikira kulironga  Nonkango daKarunga nokugazadara ko momunene eyi ono kuresa. Ntani litulira po siruwo sokulironga Nonkango daKarunga nkenye ezuva. Nsene o yi rugana, ngo hara unene usili ntani ngayi ku vatera o tokomene mokudira kuurandesa. Kugusa ko kuranda usili, Yisewe 23:23 kutanta asi twa hepa hena kuranda ‘unongo nonondunge.’ Kapi ya gwanena po tupu kukara nediwo, nye twa hepa kusikisa mo usili ou twa lironga. Nondunge kutuvatera tu kwate egano marongo gaJehova. Ano unongo kutuvatera tu ture ediwo lyetu pasirugana. Poyiruwo yimwe, usili kutuvatera tu dimburure apa twa hepa kuwapukurura. Nsene tu yi dimburura ngoso, twa hepa kurugana ko yuma usimbu-simbu. Ya kara nomulyo unene kuyirugana morwa ayo kwa pitakana sisiliveli.—Yis. 8:10.

15. Ngapi usili ou va fanekesa koliva nau tu popera?

¹⁵ Zauvali, tokomena kusikisa mo usili ou o lirongo nkenye ezuva. Bibeli kwa fanekesa usili koliva oru nga dwara mukwayita mombunda. (Efe. 6:14) Liva ngaru vatere mukwayita nokupopera mbunda zendi. Nye, mokuninka asi ru mu popere, ga hepere kurukokera nawa. Kapi ngaru vhuru kumupopera nsene kapi ana ru kokere. Ngapi omu usili ou va fanekesa koliva nau tu popera? Nsene tu kwaterera kousili, awo ngau tu popera komagazaro gomadona ntani ngau tu vatera tu ture po matokoro gomawa. Nsene kuna kutuzeda ndi kuna kara moudigu, usili womoBibeli ngau tu tumangeda tu rugane youhunga. Ngwendi moomu tupu mukwayita nga dwara nkenye apa liva pokuza koyita, nose twa hepa kutokomena kukwama usili nkenye ezuva. Liva oru nga dwara mukwayita kwa kere ko hena nswakero omu nga zweke rufuro rwendi. Tu zeni tu ka tare nkedi zimwe hena omu natu tokomena kukwama usili.

16. Ngapi ayi tu vatere apa atu rongo wopeke usili?

¹⁶ Zautatu, litura mo unene mokuronga wopeke usili womoBibeli. Monkedi zangoso, ove ngo ruganesa “Nonkango daKarunga” edi va fanekesa korufuro. (Efe. 6:17) Natuvenye kuvhura tu wapukurure monkedi ezi atu rongo yipo tu ‘toone nawa Nonkango daKarunga dousili.’ (2 Tim. 2:15) Ngomu tuna kuruganesa Bibeli mokuvatera wopeke va rande usili nokunyokera po yimpempa, ngayi tu vatera tu dive nawa usili nokuuhara unene. Ntani hena ngayi tu vatera tu twikire kukwama usili.

17. Morwasinke usili wa karera nomulyo koge?

¹⁷ Usili kuna kara uhwi womulyo ou ga tu pa Jehova. Uhwi owo kwa tu vatera tu tunge po elikwatakano naGuhyetu gemeguru. Dogoro paapa, Jehova yinzi ga tu ronga, nye age hena kwa tumbwidira asi nga ka twikira kuturonga momunene ngomu ngatu ka paruka narunye. Yipo nye, hafera usili ngwendi mbamba zomulyo, ntani twikira ‘kuranda usili, nye wa ha u randesa.’ Nsene o yi rugana oyo, ngo kara ngwendi hompa Ndafita ogu ga tumbwidilire Jehova asi ‘nga mu limburukwa.’—Epis. 86:11.