1, 2. (a) Sininke musinke somulyo po kwetu? (b) Yininke musinke atu hafere ntani morwasinke? (Tara mafano.)

SININKE musinke somulyo po koge? Kuvhura o si sintise nesi sa hana mulyo ndi? Ngovakareli vaJehova, sininke somulyo po meparu lyetu kuna kara elikwatakano lyetu naJehova ntani kapi atu gazara kulisintisa noyininke ya hana mulyo. Nonkango daKarunga nado hena mulyo kwetu morwa ado kutuvatera tu kare vakaume vaJehova.—Koros. 1:9, 10.

² Jehova yige Murongi gwetu, age kuturonga usili ou wa kara moNonkango dendi, Bibeli. Age kwa tu ronga eyi ali tanta edina lyendi ntani ga tu ronga hena yikara yendi. Age kwa tu hara unene yiyo ga tumine Munwendi gelike a huru aya tu fire. Jehova kuturonga kuhamena Uhompa woUmesiyasa ntani age kwa pa vagwavekwa ehuguvaro lyokukaparukira meguru ano ‘nonzwi dapeke’ ehuguvaro lyokukaparukira pevhu moParadisa. (Joh. 10:16) Age hena kuturonga omu twa hepa kuparuka. Ose kuhafera yininke oyo morwa ayo kutuvatera tu hedere  pepi noMusiti gwetu. Ntani ayo kutuhafesa nokutuvatera tu mone eparu asi mulyo.

3. Jehova kutupura yimaliwa yipo tu rande usili ndi?

³ Jehova, Karunga gougavi. Age kwa geve Munwendi aya tu fire. Jehova kuvatera hena ava ava papara usili yipo va u gwane. Age kapi a ndindire ko kwetu tu mu fute yipo tu gwane usili. Sikando simwe, mugara gedina Simoni kwa here kugava yimaliwa komupositoli Peturusa yipo a gwane unankondo wokugava mpepo zokupongoka. Nye, Peturusa ta mu limburura asi: “Yimaliva yoge ngo ze kumwe nayo moMundiro gwanarunye [ezonauko lyanarunye], morwa ono gazara asi uhwi waKarunga o u rande noyimaliva.” (Yirug. 8:18-20) Yisinke nye ayi tanta ‘kuranda usili’?

4. Yisinke natu ka konakona kuhamena usili mosirongwa esi?

⁴ Resa Yisewe 23:23. Pwa hepa elituromo mokulironga usili womoNonkango daKarunga. Mokugwana usili owo ntudi twa hepa kulizambera. Mutjangi goYisewe kwa tanta asi nsene tuna ‘randa usili’ ndi nsene tuna u gwana, twa hepa kutakamesa asi kapisi tu u ‘randese’ ndi tu u zumbanese. Tu zeni tu ka konakone eyi ayi tanta “kuranda” usili ntani neyi twa hepa kufuta yipo tu u gwane. Eyi tayi ka tu vatera tu hare unene usili ntani tu tokomene mokudira ‘kuurandesa.’ Ntani tatu ka lironga hena asi kuranda usili kwa kara nomulyo unene.

5, 6. (a) Ngapi natu randa usili twa hana kuruganesa yimaliwa? Yi fanekesa. (b) Mauwa musinke au tu retere usili?

⁵ Nampili ngomu atu dili kuhepa kufutira yininke yimwe, kapi yina kutanta asi kapi tatu vhuru kurugana ko yuma yipo tu yi gwane. Nkango zoRuhebeli “kuranda” va tumbura moYisewe 23:23 kuvhura kutanta hena asi “kugwana.” Nonkango odo kulikida asi twa hepa kurugana ko yuma yipo tu gwane sininke somulyo. Kuvhura tu yi fanekese ngesi: Tu tante asi positanda kuna kudivisa po asi vantu va hepa kugusa mabanana mawoko-woko. Ngoso mabanana ogo kuvhura ga tu wizire gene membo ose twa hana kukagasimba ndi? Hawe. Twa hepa kurugana ko yuma pokuza tu ka ga simbe. Mabanana ogo gomawoko-woko, nye mokugagwana twa hepa kuza positanda tu ka ga simbe. Mokulifana, kapi twa hepa yimaliwa mokuranda usili. Nampili ngoso, twa hepa kurugana ko yuma mokuugwana.

⁶ Resa Jesaya 55:1-3. Nonkango daJehova edi ga tjenge Jesaya kulikida eyi ayi tanta kuranda usili. Monovelise odo, Jehova kwa hetakanesere Nonkango dendi komema nomasini ntani kovhinyu. Ngwendi moomu tupu mema aga tendeke ogu ana fu enota, Nonkango daKarunga kutupwizumukisa. Ntani ngwendi moomu masini aga pameke rutu romunona nokumuvatera a kure, Nonkango daKarunga nado kutuvatera tu pame nokukura pampepo. Nonkango daJehova kwa kara hena ngwendi vhinyu. Monkedi musinke? Bibeli kwa tanta asi vhinyu kuhafesa. (Epis. 104:15) Yipo nye, pokututantera tu “rande vhinyu,” age kuna tu harere tu dive asi nsene tu paruka kuliza noNonkango dendi, ngatu hafa. (Epis. 19:8) Jehova kwa ruganesere yifanekeso oyo mokutuvatera tu mone mauwa gokulironga nokusikisa mo Nonkango dendi. Apa atu litura mo mokugwana usili, ayo kwa fana ngwendi kuna kuranda usili noyimaliwa. Ngesi tu zeni tu ka konakone nonkedi ntano omu natu randa usili.

7, 8. (a) Morwasinke pwa hepera siruwo mokuranda usili? (b) Malizambero musinke ga tulire po mukadi gumwe ogu nga dimbi sure ntani yitundwamo musinke ya kere?

⁷ Siruwo. Esi kuna kara sininke simwe esi twa hepa mokuranda usili. Pwa hepa siruwo mokupurakena kombudi zoUhompa nokuresa Bibeli noyimbapiratjangwa nokurugana elirongo lyanyamwetu lyoBibeli nokuliwapaikira ntani kuwiza komapongo. Twa hepa kuruganesa nkenye karuwo tuna gwana tu demenene koyininke yomulyo po. (Resa Vaefeso 5:15, 16.) Siruwo sokuhura kupi ayi gusa mokudiva madi goBibeli? Oyo kwa korera koukaro womuntu. Yinzi unene natu lironga kuhamena unongo waJehova noyirugana yendi. (Rom. 11:33) Ruhungu oru va hovere kupwagesa kwa fanekesere usili “kombya” nokutanta asi: “Kapisi zi ku gwanene po tupu mbya zimwe. Ngano asi zimwe kwa gwanena po ngano kapi pwa hepa dononzi. Twikira kupongaika nokupapara ko dononzi.” Kuvhura tu lipure asi: ‘Ediwo lyokuhura kupi na lironga kuhamena Jehova?’ Nampili apa ngatu ka paruka narunye, ose simpe ngatu twikira kulironga kuhamena Jehova. Naina, ya kara nomulyo asi tu litulire po siruwo kuliza noukaro wetu yipo tu rande usili. Tu tareni sihonena sagumwe ogu ga here kudiva usili.

⁸ Mariko, * mukadi goMuyapani, kwa zire a ka dimbe sure mositata saNew York moAmerika. Posiruwo oso age kwa kere moukarelikarunga ou wa tamekere moYapani mo-1959. Munazinyetu gomukadi ogu a rugana uzuvhisi wokukarerera kwa gwene Mariko apa ga zuvhisire tunda embo zende embo. Mariko kwa haferere eyi ga lirongere makura ta pura muzuvhisi ogo a lironge nage ruvali mosivike. Nampili ngomu nga rugana nokuza kosure, age kwa tamekere kuza komapongo. Age kwa sesupikire hena siruwo esi nga ruganesa koyininke ya hana mulyo yipo a kare nosiruwo sokulironga usili. Malizambero aga ga tulire po Mariko kwa mu vaterere a lironge yoyinzi nokuhedera pepi Jehova. Konyima zomakwedi gongandi makura tava mu kuhu. Ano konyima zomakwedi ntanzimwe yipo ga tamekere uzuvhisi wokukarerera mo-2006, age ngesi simpe muzuvhisi gokukarerera.

9, 10. (a) Ngapi kuranda usili ayi kundama mutaro gwetu koyininke yopanyama? (b) Yisinke ga sigire mudinkantu gumwe ntani ngapi omu ana kulizuvha kuhamena etokoro lyendi?

⁹ Yininke yopanyama. Mokuranda usili, kuvhura yi kare asi tatu hageke yirugana yetu yokufuta yimaliwa yoyinzi. Apa Jesus ga tanterere Peturusa naAndiliyasa ava va kere vakwati wonomfi va kare “vakwati wovantu,” awo kwa ‘sigire makwe gawo.’ (Mat. 4:18-20) Eyi kapi yina kutanta asi ava ava ya lirongo usili va hepa kusiga yirugana yawo. Awo va hepa kurugana yipo va rere mapata gawo. (1 Tim. 5:8) Nye, apa ava ya lirongo usili va hepa kurundurura mutaro gwawo koyiweka nokudemenena kweyi yomulyo po meparu. Jesus kwa yi zeresere oyo apa ga tente asi: “Walye omu lipongaikire emona pevhu . . . Nye omu lipongaikire emona meguru.” (Mat. 6:19, 20) Tu tareni sihonena somudinkantu gumwe gomukadona.

¹⁰ Maria kwa tamekere udano wogolf ndi wombara, age simpe kapi ana tameke kudimba sure. Age kwa ya twikilire noudano ou apa ga ya zire kosekondere ano morwa age kwa kere mudani gomuwa yipo va mu futilire po kounivesiti. Age kwa here  unene udano ou ntani sitambo sendi kwa kere sokutwikira kudana udano owo yipo a gwane yimaliwa yoyinzi. Konyima ta ya tameke kulironga Bibeli. Maria kwa haferere eyi ga lirongere ntani nomarunduruko aga ga tulire po. Age kwa tanta asi: “Moomu na rundwilire nkareso nomparukiso zange kuliza nonompango doBibeli, yimo na ya gwene ruhafo.” Maria ga ya dimbwilire asi kapi tayi mu tompoka kukondjera yininke yopanyama neyi yopampepo posikando simwe. (Mat. 6:24) Yipo ga sigire sitambo esi ga kere naso soudano wogolf nokuhara kungawopa nokufumana. Age ngesi, muzuvhisi gokukarerera ntani age kwa tanta asi: “Ngesi nina hafa unene.”

11. Yisinke ayi horokere malikwatakano getu nava wopeke apa atu randa usili?

¹¹ Ava twa hara. Apa atu ya tameke kuparuka kuliza nousili womoBibeli, pamwe kapi atu ya likwatakana novakaume ntani vanekoro. Morwasinke? Jesus kwa kanderere po varongwa vendi asi: “Va lipongwera nousili. Nonkango doge yido usili.” (Joh. 17:17) Nonkango “va lipongwera” kuvhura hena kutanta asi: “Va litulira.” Apa atu ya tambura usili, ose kapi atu ya hamene hena kouzuni morwa ose kuyahageka kukwama yomouzuni. Vantu kuya tu tara monkedi zapeke morwa mparukiso zetu kuyarunduruka. Ose kuyatameka kuparuka kuliza nonompango domoBibeli. Nampili ngomu twa hara kulikwatakana novakaume ntani vanekoro, vamwe kuligora ko kwetu ndi kuturwanesa morwa ukareli wetu. Eyi kapi ayi tu tetukisa morwa Jesus kwa tente asi: “Ano ava ga tunga nawo muntu, yiwo ngava kara wonkore zendi woowo.” (Mat. 10:36) Age kwa tu tumbwidira hena asi nsene tu twikira kuranda usili ngatu gwana mauwa gomanzi kupitakana eyi tuna kuzumbanesa.—Resa Marukusa 10:28-30.

12. Yisinke ya horokere apa munangesefa gumwe goMujuda ga ya lirongere usili?

¹² Aaron munangesefa gumwe goMujuda, kutunda unona wendi age kwa mu rongere asi ayo epuko kutumbura edina lyaKarunga. Nampili ngoso, Aaron kwa here kudiva usili. Ayo kwa mu hafesere apa gumwe goNombangi ga mu likidire asi pokutura nondandazwi kumwe nonondanda ne domoRuhebeli, edina lyaKarunga kuvhura kulitumbura asi “Jehova.” Age kwa hefe sili makura tazi kosinagoge a ka tantere ko varongi woVajuda eyi ga lirongere. Nye, awo kwa ka mu tekwire monkedi ezi ga dilire kundindira. Mevango lyokumuhafesa ko, awo tava mu fizagere nokumutjida. Vekoro lyendi nawo kapi va mu haferere. Nye nampili ngoso, age kwa twikilire kuranda usili ntani ga twikilire kukara gumwe goNombangi daJehova eparu lyendi nalinye. Ngwendi Aaron, twa hepa kuyindindira asi malikwatakano getu novakaume ntani nava vekoro kuvhura ngaga teke po apa ngatu ya lironga usili.

13, 14. Mokuranda usili, marunduruko musinke twa hepa kutura po? Gava sihonena.

¹³ Yirugana nomagazaro gomadona. Apa atu ya lirongo usili nokutameka kuparuka kuliza nonompango doBibeli, twa hepa kutokomena kutura po marunduruko momparukiso zetu. Koneka eyi ga tjenge Peturusa asi: ‘Omu limburukwe kwaKarunga, kapisi mu kwama-kwame hena madowo goukaro weni wanare, apa mwa dilire kudiva yuma. Omu kare vapongoki moukaro weni naunye.’ (1 Pet. 1:14, 15) Mokuranda usili, vantu ava va tungire mositata saKolinte esi sa zulire yirugana yokunyata va hepere kutura po marunduruko momparukiso zawo. (1 Kol. 6:9-11) Mokulifana nanaina, vantu wovanzi kutura po  marunduruko gokulifana apa ava lirongo usili. Peturusa kwa diworokesere Vakriste womomazuva gendi asi: “Yeeyi eyi ngomu rugana nare yosipagani ngano ya gwana nye. One kwa kere moruhonda nomomadowo nomounkorwe nomomakurulya nomonombunga dokunwa oku tomu kerere vakarunga woyimpempa momudona.”—1 Pet. 4:3.

¹⁴ Devynn naJasmine kwa kere nonkorwe nomvhura dononzi. Nampili ngomu Devynn ga divire yirugana yomombanga, age kapi ga gwene yirugana yokukarerera morwa unkorwe wendi. Jasmine kwa kere muntu gokuhanduka usimbu ntani gonyanya. Ezuva limwe ta ligwana novanavazinyetu wovatumwa age ana korwa. Vatumwa owo yipo va tulire po mawapaiko va ka lironge nendi Bibeli, nye sivike esi sa kweme ko apa va zire pembo lyawo tava ka mu gwana age ana korwa kumwe namugara gwendi. Awo kapi va yi ndindilire asi vatumwa owo kuvhura va ya va dingure. Nye, sikando sokukwama ko yininke kwa ya rundurukire. Jasmine naDevynn kwa litulire mo unene mokulironga Bibeli ntani awo kwa tulire pasirugana eyi va lirongere. Ano momakwedi tupu gatatu, tava tokora kuhageka kunwa marovhu ntani tava likwara paveta. Marunduruko aga va tulire po kwa tumangedere sinzi sava womomukunda gwawo va tameke kulironga Bibeli.

15. Sininke musinke hena asi ya tu karere udigu apa atu randa usili ntani morwasinke?

¹⁵ Nompo edi adi lirwanesa nonompango doBibeli. Apa atu ya lirongo asi nompo detu kapi adi hafesa Karunga, ayo kutudigopera mokudisiga. Vamwe ureru kusiga nompo dawo edi da dira kuliza noMatjangwa, ano vamwe kuvadigopera kudisiga, pasihonena mpo zokufumadeka vafe morwa kutjira kuguvisa vanekoro novarugani vakwawo ntani vakaume. (Deut. 14:1) Yihonena yavamwe ava va likidire uradi kuvhura kutuvatera tu ture po marunduruko. Tu konakoneni eyi va rugene Vakriste womoEfeso mosiruwo sovapositoli.

16. Mokuranda usili, yisinke va rugene Vakriste womoEfeso?

¹⁶ Sitata saEfeso kwa divikwire koumpure ou ngava rugana mo. Yisinke va rugene ava ngava rugana youmpure komeho va ya kare Vakriste? Bibeli kwa faturura asi: “Wovanzi hena ava ngava ruganesa youmpure, tava pongaike nobuke dawo, makura tava di hwike komeho zovantu navenye. Mulyo gwado apa va gu varwire, tava gwana mayovi nomurongo ntano moyimaliva yosisiliveli. Yimo nye ngoso da lihanene nonkango daHOMPA tadi korerere.” (Yirug. 19:19, 20) Vakriste owo wovalimburukwi kwa tulire po malizambero gomanene ano Jehova ga va tungikire.

17. (a) Mokuranda usili, malizambero musinke twa hepa kutura po? (b) Mapuro musinke ngatu ka zogera mosirongwa sokukwama ko?

¹⁷ Malizambero musinke wa tura po yipo o rande usili? Natuvenye kwa ruganesa siruwo setu. Vamwe vetu kwa randa usili pokusiga yininke yopanyama nokutura po marunduruko monkedi omu atu paruka novanekoro novakaume. Ano ose vamwe kwa rundurura mparukiso zetu nokusiga nompo edi da dira kuliza noMatjangwa. Yi kare asi malizambero musinke twa tura po, ose twa yi pura asi usili ou twa gwana mulyo unene kupitakana nkenye eyi natu zumbanesa. Usili owo kwa tu vatera tu kare nelikwatakano lyewa naJehova. Apa atu gazadara ko komauwa aga aga tundu mokudiva usili, eyi kututumangeda tu dire kuurandesa. Yisinke nayi tu ninkisa tu hare kurandesa usili? Ntani ngapi natu nyokera po epuko lyangoso? Mapuro ogo ngatu ka ga zogera mosirongwa sokukwama ko.