AYO kutuhengagwida apa ava tu likida nkenda. Ose kuhafa apa atu ya diva asi kweli ogu ga hara kutupakera mbili. Mokumona asi nkenye gumwe kwa hara va mu likide nkenda, ngapi natu tunga po sikara esi?

Kulikida nkenda kwa hamena mo kukara nosinka kwava wopeke, ntani ayo kuyilikida mononkango nomoyirugana. Kukara nosikara esi sonkenda kapi ayi tanta asi kulikida tupu nonkedi donongwa nsene mokatji kovantu. Nye kulikida nawa-nawa nkenda kutanta asi kukara neharo lyenene nefirosinka. Ntani hena, nkenda zangoso kuna kara ruha royiyimwa yompepo zokupongoka zaKarunga eyi va hepa kutunga po Vakriste. (Gar. 5:22, 23, NW) Mokutuvatera tu tunge po nkenda, tu konakoneni omu Jehova naMunwendi va tu likida sikara esi nomu natu va honena.

Jehova kugazadara ko wopeke nokulikida nkenda navenye, kukwatera mo “ava va ha pandura novadona.” (Ruk. 6:35) Pasihonena, Jehova “kupumisira ezuva vadona novawa, age hena kurokesera mvhura vahungami novanzoni.” (Mat. 5:45) Yipo nye, nampili ava va dira kupura asi Jehova yige Musiti nawo kugwanena mo mauwa mweyi a gava morwa nkenda zendi ntani kuvhura va hafe.

Sihonena sosiwa omu Jehova ga likidire nkenda kuna kara eyi ga rugene kwaAdamu naEva. Apa va zonene, awo ‘kwa tungire yihako youkuzu va livive.’ Nye, Jehova ga divire asi ngava hepa yidwara yokuwapera mokuparuka ponze zosikunino saEdeni pevhu eli lya zulire “mega noyihwa nononhonho.” Makura Jehova yipo ga va ruganenene “yidwara yoyipapa yoyikorama.”—Gen. 3:7, 17, 18, 21.

Nampili ngomu Jehova a likida nkenda “vadona novawa,” age kwa hara kulikida nkenda unene po kovakareli vendi wovalimburukwi. Pasihonena, momazuva gaSakaliya, muengeli kwa guvire morwa vantu kwa hagekere kutungurura ntembeli moJerusarema. Jehova kwa purakenene koyinka yomuengeli nokumulimburura “nononkango dehengagwido.” (Sak. 1:12, 13) Jehova kwa rugene hena yokulifana komuporofete Eliya. Sikando simwe, muporofete ogu kwa guvire unene yipo ga pulire Jehova a mu dipage. Jehova kwa purakenene koyinka yaEliya makura ta tumu muengeli a ya mu nkondopeke. Ntani hena, Karunga kwa hengagwidire muporofete ogo a lizuvhe asi kapisi gelike ana kara. Konyima zokumuhengagwida nokumuvatera, age ga vhulire kutwikira nosirugana sendi. (1 Vah. 19:1-18) Yilye ga likida po nawa-nawa sikara saJehova sonkenda?

Jesus kwa divikwire asi muntu gonkenda ntani gokugazadara ko wopeke. Age kapi ga kere ukenya ndi a pangere vakwawo. Age kwa tente asi: “Wizeni kwange namuvenye, one ava wa rorora udigu, ni ya mu pwizumukise. (Mat. 11:28-30) Vantu ngava kwama Jesus morwa yeeyi ga kere nonkenda. Ano “nkenda,” hena za tumangedere Jesus a kutike vantu nokuverura vaveli ntani nokuvaronga “yoyinzi” kuhamena Oguhwe.—Mar. 6:34; Mat. 14:14; 15:32-38.

Jesus hena nga tekura nawa wopeke nokuvakwata egano. Yosili, nampili ngomu nga roroka Jesus poyiruwo yimwe, age simpe nga tambura navenye ava ngava papara evatero kwendi. (Ruk. 9:10, 11) Pasihonena, age kapi ga tugumukilire mukadi ogu ga gumine kosikoverero sendi morwa kuhara a veruke, nampili ngomu ga nyete pampo. (Lev. 15:25-28) Jesus kwa fililire nkenda mukadi ogu ga hepere ure wonomvhura murongo nambali makura ta mu tantere asi: “Munwange, epuro lyoge lina ku parura, zende nombili, ove hena o veruke koudigu woge.” (Mar. 5:25-34) Esi kuna kara sihonena sosiwa unene kuhamena nkenda.

Moyihonena eyi tuna zogere, tuna dimburura asi nkenda kuzilikida nawa-nawa moyirugana. Jesus kwa likidire mulyo gokurugana ko yuma mosifanekeso soMusamaliya gonkenda. Nampili ngomu Vasamaliya noVajuda va dilire kulihara, mugara gumwe goMusamaliya kwa vaterere mugara goMujuda ogu va veke yininke yendi ntani va toonene dogoro kuhara kufa. Nkenda yizo za tumangedere Musamaliya ogo a rugane ko yuma. Age kwa pakerere mbili yironda yomugara ogo. Musamaliya ogo kwa futire hena mwenyahotera a pakere mbili mugara ogo ga remanene ntani ga liwapaikilire hena kufuta nkenye yihepwa.—Ruk. 10:29-37.

Nkenda kuvhura hena kuzilikida kupitira mweyi atu uyunga. Bibeli kutanta asi: “Esivano ngali ku hakana erago, nye nonkango donongwa tadi ku hafesa.” (Yis. 12:25) Nsene tu kara nonkenda ngatu vhura kukorangeda wopeke, ano ayo ngayi va hafesa. * Nonkango detu donongwa ngadi likida asi twa va hara. Eyi ngayi va vatera hena va lididimikire maudigu aga ngava ligwanekera nago.—Yis. 16:24.

Mokumona asi kwa tu ungire tu “fane Karunga,” natuvenye kuvhura tu tunge po sikara sonkenda. (Gen. 1:27) Pasihonena, Paurusa ogu va kwete nokumutwara koRoma, kwa ka kere menomeno lyaJulius mukondi govakwayita woVaroma. Julius kwa ka tekwire Paurusa nonkenda ‘nokumusiga a ka tarere po vakwawo.’ (Yirug. 27:3) Apa pwa pitire mazuva, vantu womosirudi saMalita kwa “haferere unene” Paurusa novakwawo ava sa tekerere sikepa. Vantu woposirudi oso kwa hwamekere hena mundiro yipo oPaurusa va lidurure. (Yirug. 28:1, 2) Nye nampili ngomu vantu vena va likidire nkenda, ayo kapi ayi tanta asi azo twa hepa kuzilikida tupu poyiruwo yimwe.

Mokuhafesa Karunga, nkenda za hepa kukara ruha romparukiso zetu. Eyi yiyo Jehova a tu tanterere tu ‘kare’ nonkenda. (Koros. 3:12) Nye, ayo kapi ayi tu rerupire mokulikida sikara esi nkenye apa. Morwasinke? Kuvhura tu dire kulikida nkenda morwa nomuga nowoma ntani marwaneso ndi  nampo simpe kuna kukondja mokunyokera po nkareso zokuligazara tupu nyamwetu. Nampili ngoso, kuvhura tu funde po maupirankondo ogo nevatero lyompepo zokupongoka ntani pokuhonena omu Jehova a likida nkenda.—1 Kol. 2:12.

Koyili eyi twa hepa kuwapukurura meparu lyetu yipo tu likide nkenda ndi? Kuvhura tu lipure asi: ‘Ame mu purakeni gomuwa ndi? Ame na kara nosinka koyihepwa yava wopeke ndi? Siruwoke na hura kulikida nkenda kovageni ndi kwankenye ogu?’ Makura kuvhura tu litulire po sitambo sokulidiva nawa novakwetu, unene po womombungakriste. Monkedi zangesi ose ngatu diva maukaro gawo neyi vana hepa. Ntani hena, twa hepa kuhetekera ko kulikida nkenda wopeke mononkedi omu tuna hara va tu likide nkenda nsene asi ngano nyose tuna kara moukaro wawo. (Mat. 7:12) Ano Jehova nga tu vatera tu tunge po nkenda nsene tu mu hundira.—Ruk. 11:13.

Apa Paurusa ga tumbwire yikara eyi ya mu vaterere a kare muudisi gombudi zaKarunga, age kwa tumbwire hena “nkenda.” (2 Kol. 6:3-6) Vantu kwa here Paurusa morwa ga kere nosinka kwawo ntani ga yi likidire eyi moyirugana nomononkango. (Yirug. 28:30, 31) Mokulifana, nose kuvhura tu kokere vantu kousili pokuvalikida nkenda. Nsene tu likida nkenda kwava ava tu rwanesa, ngayi va vatera va dire kuhanduka unene nokukara vana gomoka. (Rom. 12:20) Ano konyima, kuvhura ngava purakene kombudi zomoBibeli.

Wovanzi ava ngava ka vhumbwira pevhu moParadisa, ngava ka hafa pokukalimonena nkenda, nampo sikando sawo sokuhova. Ano eyi ngayi ka va ninkisa nawo va ka likide nkenda kwava wopeke. Nkenye ogu nga ka nyoka kulikida nkenda nokuvatera wopeke kapi nga ka paruka narunye moparadisa. Mokulisiga, ava nga ka pulisira Karunga va ka paruke narunye ngava ka litekura neharo nonkenda. (Epis. 37:9-11) Ee, omu tupu uzuni owo ngau ka kara mompora nemegameno! Nye, komeho u wize, ngapi natu gwanena mo uwa ngesi mokulikida nkenda?

Bibeli kutanta asi muntu gerago ndi gonkenda ‘kuliruganena mwene uwa.’ (Yis. 11:17) Vantu kwa hara kuhedera muntu gonkenda ntani awo kwa hara kulikida muntu gwangoso nkenda. Jesus kwa tente asi: “Ove kuliruganena nyamoge uwa, nsene wa ragopa.” (Ruk. 6:38) Eyi yiyo nye, muntu gonkenda a karere nkenye apa novakaume wovawa.

Mupositoli Paurusa kwa tumangedere womombungakriste zomoEfeso ‘va likara-kare nombili, oku tava lifira-fire nkenda, oku tava lidongwenene-dongwenene po.’ (Efe. 4:32) Mbungakriste kugwanena mo mauwa apa navenye ava kara mombili nokulikida nkenda ntani nokupapara nompito mokulivatera-vatera. Vantu vangoso kapi ava gazara kuruganesa nonkango donondona ndi dokukoresa. Mevango lyokulihameka morugambo, awo kutokomena kuruganesa eraka lyawo mokuvatera wopeke. (Yis. 12:18) Ngoyitundwamo, vantu womombungakriste kuyapama nokutwikira kukarera Jehova noruhafo.

Yosili, nkenda kuna kara sikara esi ava likida mononkango nomoyirugana. Apa atu likida nkenda, ose kuhonena Karunga gwetu, Jehova. (Efe. 5:2) Ayo hena kupameka nombungakriste ntani kukokera wopeke koukareli wousili. Ngano wopeke va tu dive asi ose vantu ava atu likida nkenda nkenye apa!