Komeho a ka fe, Jesus kwa pukwilire vapositoli vendi va nyokere po kuliharera mfumwa mokatji kovapuli vakwawo. Age kwa va tanterere asi: “Ohompa wouzuni ou kupangera nomuhoko dawo, ano vapangeli kuvatumbura asi vakwafi wovantu. Nye one mwa ha kara ngoso.”—Ruk. 22:25, 26.

Wolye vakwafi wovantu ava ga tente Jesus? Mafano noyimaliwa yoyitenda ntani matjango kwa likida asi Vagereka noVaroma ngava gava mfumwa kovantu wokudivikwa novapangeli pokuvatumbura asi vakwafi wovantu ndi asi Euergetes. Awo ngava va tumbura monkedi ozo morwa ngava gava ekwafo kovantu.

Vahompa vamwe yimo ngava va tumbura ngoso. Vamwe vawo kuna kara vapangeli vaEgipite: Ptolemy III Euergetes ogu ga pangerere koyiha yomvhura 247 dogoro 222 komeho zokuwiza Jesus pevhu ntani Ptolemy VIII Euergetes II kutunda koyiha yomvhura 147 dogoro 117 komeho zokuwiza Jesus pevhu. Ano vamwe hena ava ngava tumbura asi vakwafi kuna kara vapangeli woVaroma, pasihonena, Julius Caesar ogu ga pangerere momvhura 48 dogoro 44 komeho zokuwiza Jesus pevhu ntani Augustus ogu ga pangerere momvhura 31 komeho zokuwiza Jesus pevhu dogoro momvhura 14. Herodesa hompa gwaJudeya nage ngava mu tumbura ngoso morwa nampo yeeyi ga vaterere vantu vendi apa va kere merumbu pokuvapa rukokotwa noyidwara.

Mulirongi goBibeli goMundovesi, Adolf Deissmann kwa tanta asi vantu wovanzi ngava ruganesa ntumbwisiso mukwafi, ntani asi ya kere ureru kugwana matjango omu mwa kere ntumbwisiso ozo.

Yisinke nye ga tembe Jesus apa ga tanterere varongwa vendi asi: “Nye one mwa ha kara ngoso”? Age ngoso kwa va nyokesere va dire kuvatera vantu ndi? Hawe. Jesus kwa kere nosinka morwa vantu wovanzi ngava vatere wopeke nositambo sepuko.

Vanangawo ava va parukire posiruwo saJesus, kwa here va moneke kovantu asi awo vantu wovawa pokugava yimaliwa mokukwatesa ko yilika nomaudano komavango gokulisiga-siga. Nye, sitambo sawo kwa here va divikwe ndi va va horowore. Mauzera gamwe kwa likida asi: “Nampili ngomu vamwe ngava vatere vantu, awo ngava yi ruganene morwa upolitika.” Nkareso zangoso yizo ga tanterere Jesus varongwa vendi nava nyokera po.

Konyima zonomvhura dongandi, mupositoli Paurusa kwa nkondopekere sitwa sokulifana sokugava yuma nokonda zouhunga. Age kwa tjangerere vapuli vakwawo womoKolinte asi: “Nkenye muntu a gave moomu ana yi gazarere momwenyo gwendi, kapisi nomutjimakoka ndi asi yi tunde momusininko; yeeyi Karunga kwa hara ava ava gava neharo lyewa.”—2 Kol. 9:7.