1, 2. (a) Yisinke ga limbwilire Jesus apa Peturusa ga mu tanterere asi yi ka fire mo? (Tara efano.) (b) Morwasinke ga limbwilire ngoso Jesus?

VARONGWA vaJesus kwa va tetukisire eyi va zuvhire. Awo kwa ndindilire asi Jesus ntaantani tupu a tengwidire Vaisraeli nonkondo dokupangera vene sirongo sawo, nye Jesus kwa va tanterere asi ntaantani va ka mu hepeke nokumudipaga. Mupositoli Peturusa yige ga hovere kuuyunga a tantere Jesus asi: “Karunga ngano ta kwafa tupu yi ka fire mo Hompa, ya ha ku horekera ngano!” Jesus ta mu limburura asi: “Tunda po pwange, Satana. Kwange ove o muzapukisi, yeeyi ove kapi wa kara nomagazaro gaKarunga, gosintu ntani wa kara nago.”—Mat. 16:21-23; Yirug. 1:6.

² Pokuuyunga nonkango odo, Jesus kwa likidire asi magazaro gaKarunga ga lisiga naga govantu womouzuni ou ana kupangera Satana. (1 Joh. 5:19) Nonkango edi ga uyungire Peturusa kwa likidire nkareso ezi va kara nazo vantu mouzuni zokuligazara tupu vene. Nye Jesus ga divire asi Oguhwe kwa  mu harerere a liwapaikire mokuyahepa nokuyafira vantu. Nonkango edi Jesus ga tanterere Peturusa kwa likidire asi age kwa kere nomagazaro gaJehova, nye kapisi gouzuni ou.

3. Morwasinke ya karera udigu kukara nomagazaro ngwendi gaKarunga?

³ Ngapi kuhamena ose? Ose kwa kara nomagazaro ngwendi gaKarunga ndi govantu ava ava dili kukarera Karunga? NgoVakriste, ose kukondja mokurugana eyi ayi hafesa Karunga. Nye ngapi kuhamena magazaro getu? Ose kuhetekera ko kugazara nokutara yininke ngamoomu ayi tara Jehova ndi? Apo pwa hepa elituromo mokuyirugana oyo. Nye ayo ureru kukara nomagazaro gomouzuni, morwa mpepo zouzuni kuna tu kundurukida. (Efe. 2:2) Mpepo ezi kuvhura zi tu pukise tu ligazare tupu nyamwetu. Yosili, ayo udigu kukara nomagazaro gaJehova, nye ureru kukara nomagazaro govantu ava ava dili kukarera Karunga.

4. (a) Yisinke ngayi horoka nsene tu pulisira uzuni ou u pangere magazaro getu? (b) Yisinke natu ka zogera mosirongwa esi?

⁴ Nsene tu pulisira uzuni ou u pangere magazaro getu, ngatu tameka kuligazara tupu nyamwetu nokutokora asi yipi yoyiwa neyi yoyidona. (Mar. 7:21, 22) Yiyo nye ya karera nomulyo tu kare ‘nomagazaro gaKarunga,’ nye kapisi “gosintu.” Sirongwa esi tasi ka tu vatera tu yi rugane oyo. Tatu ka zogera omu kukara nomagazaro ngwendi gaJehova ayi tu retere mauwa. Tatu ka zogera hena omu natu nyokera po kupulisira uzuni ou u pangere magazaro getu. Ano mosirongwa sokukwama ko ngatu ka zogera omu natu kara nomutaro gwaJehova koyininke ntani omu natu kara nomagazaro ngwendi gendi.

5. Morwasinke vamwe va dilira kuhara wopeke va va gazarere po?

⁵ Vantu vamwe kapi va hara wopeke va va gazarere po. Awo kutanta asi: “Tani gazara nyamwange.” Monkango zimwe awo kwa hara kutokora vene ntani awo kulizuvha asi va kara nononkondo dokuyirugana. Awo kapi va hara asi wopeke va va pangere ndi va va sininike mokurugana yuma. *

6. (a) Umanguruki musinke ga tu pa Jehova? (b) Ngoso umanguruki owo kapi mwa hamena kukwama noveta ndi?

⁶ Ayo kutuhafesa mokudiva asi kukara nomagazaro ngwendi gaJehova kapi ayi tanta asi kapi twa kara nemanguruko. Mo-2 Vakolinte 3:17 kutanta asi: “Apa pa kara Mpepo zaHompa, yipo pwa kara emanguruko.” Ose kuvhura simpe tu tokore eyi tuna hepa kurugana neyi twa hara. Jehova kwa tu sita monkendi zangoso. Nampili ngoso, umanguruki wetu kwa hamena mo kukwama noveta. (Resa 1 Peturusa 2:16.) Jehova ana hara tu ruganese Nonkango dendi mokutuvatera tu tokore nawa asi yipi yoyiwa po neyi yoyidona. Oyo ngoso kutuninkisa tu dire kukara noumanguruki, ndi ayo kuturetera mauwa?

7, 8. Kukara nomagazaro ngwendi gaJehova kutuninkisa tu dire kukara noumanguruki ndi? Yi fanekesa.

⁷ Tu konakoneni sifanekeso simwe. Vakurona kuhetekera ko kuronga vana vawo nonkedi donongwa. Pasihonena, kuvhura va va ronge kuhamena kuuyunga usili nokurugana  unene ntani nokuvatera wopeke. Oyo kapi ayi va ninkisa va dire kukara noumanguruki. Nye vakurona kuvatera vana vawo yipo ngayi ka va tompoke meparu apa ngava kura. Apa ngava kara nomapata gawo, awo ngava manguruka mokutura po matokoro gavene. Nsene va kwama eyi va va ronga vakurona vawo, ngayi va tompoka kutura po matokoro gomawa aga ngava dira kukalivera. Ngoyitundwamo, awo kapi ngava kara nomaudigu gomanzi.

⁸ Ngwendi mukurona gomuwa, Jehova kwa harera vana vendi yi va tompoke meparu. (Jes. 48:17, 18) Eyi yiyo nye ga tu tulira po nompango edi nadi tu vatera tu dive omu natu tekura wopeke nomu twa hepa kukara. Age kuna tu harere tu kare nomagazaro ngwendi gendi nokuparuka kuliza nonompango dendi. Ayo kapi ayi tu ninkisa tu dire kukara noumanguruki, nye ayo kutuvatera tu kare nonondunge. (Epis. 92:5; Yis. 2:1-5; Jes. 55:9) Ayo kutuvatera hena tu ture po matokoro aga naga tu retera ruhafo nokutupa emanguruko lyokurugana eyi twa hara. (Epis. 1:2, 3) Yosili, kukara nomagazaro gaJehova kureta mauwa.

9, 10. Yisinke ayi likida asi magazaro gaJehova kwa pitakana govantu womouzuni ou?

⁹ Ngovakareli vaJehova, ose kwa hara hena kukara nomagazaro ngwendi gendi morwa ago kwa pitakana govantu womouzuni ou. Wovanzi kugava magano kuhamena omu nava paruka vantu nomu nayi va tompoka momapata nomu nava hafera yirugana yawo ntani nayimwe ngoso. Nye sinzi somagano aga kapi ga liza nomagazaro gaJehova. Pasihonena, mouzuni kukorangeda mo nkareso zokulihara tupu nyamwetu. Vantu kuuyunga hena asi kapi ya kara epuko kuhondera. Mouzuni ou pamwe kuyitara asi valikwali nsene kapi vana hafa va hepa tupu kuligaunuka ndi kulizumba pwa hana konda zomulyo. Magano gangoso kapi ga liza noMatjangwa. Ngoso magano ogo mulyo unene kupitakana gomoBibeli ndi?

¹⁰ Jesus kwa tente asi: ‘Ukonentu kuumonenena moyirugana asi awo kwa hungama.’ (Mat. 11:19) Nampili ngomu yikwakonentu yina vhuka, ayo kapi ayi tu retere ruhafo rokukarerera ndi yi hagekese po yita nelitondororo ntani ukorokotji. Ngapi omu vantu ava tara ruhonda mouzuni ou? Wovanzi va yi dimburura asi ruhonda kuzonagura po mapata nokuretesa po mauvera ntani maudigu gapeke. Nye Vakriste ava ava ya kara nomagazaro ngwendi gaKarunga kwa kara nomapata goruhafo noukanguki wouwa ntani awo kwa kara nombili novanavazinyetu uzuni mudima. (Jes. 2:4; Yirug. 10:34, 35; 1 Kol. 6:9-11) Eyi kulikida nawa-nawa asi magazaro gaJehova kwa pitakana govantu.

11. Yilye ogu ga pangerere magazaro gaMosesa ntani yitundwamo musinke ya kere?

¹¹ Vakareli vaJehova womosiruwo sanare va yi dimbwilire asi magazaro gaJehova kwa zeruka. Pasihonena, nampili ngomu Mosesa va mu rongere “unongo naunye woVaegipite,” simpe nga hundire “nondunge” kwaKarunga. (Yirug. 7:22; Epis. 90:12) Age hena kwa kanderere kwaJehova asi: ‘Tantera nge, eyi wa panga.’ (Ex. 33:13) Mokumona asi Mosesa kwa pulisilire magazaro gaJehova ga mu pangere, eyi yiyo nye Jehova ga mu ruganeserere mokusikisa mo sitambo sendi ntani nokumutumbura moMatjangwa asi mugara gepuro.—Heb. 11:24-27.

12. Yisinke nga ruganesa Paurusa pokutura po matokoro?

 ¹² Mupositoli Paurusa kwa kere mugara gokulironga unene ntani ga divire kuuyunga maraka gavali. (Yirug. 5:34; 21:37, 39; 22:2, 3) Nampili ngoso, age nga ruganesa Matjangwa mokutokora asi yipi yoyiwa neyi yoyidona. (Resa Yirugana 17:2; 1 Vakolinte 2:6, 7, 13.) Ngoyitundwamo, Paurusa ya mu tompokere mosirugana sokuzuvhisa ntani age kwa ndindilire mfeto ezi ngazi karerera.—2 Tim. 4:8.

13. Yilye ga kara nositumbukira sokuninka magazaro getu ga lize naga gaJehova?

¹³ Yosili, magazaro gaKarunga kwa pitakana govantu womouzuni ou. Nsene tu kara nomagazaro ngwendi gendi ngayi tu tompoka ntani ngatu hafa. Nye Jehova kapi a tu sininike tu kare nomagazaro ngwendi gendi. Mukareli gokulimburukwa gonondunge ntani vakuronambunga nawo kapi tava vhuru kutusininika. (Mat. 24:45; 2 Kol. 1:24) Nkenye Mukriste ga kara nositumbukira sokuninka magazaro gendi ga lize naga gaJehova. Ngapi natu yi rugana oyo?

14, 15. (a) Kosinke twa hepa kuteda nsene tuna hara kukara nomagazaro ngwendi gaJehova? (b) Kuliza noVaroma 12:2, morwasinke natu nyokera po magazaro gomouzuni ou? Yi fanekesa.

¹⁴ Varoma 12:2 kutupukurura asi: “Mwa ha lifana nouzuni ou. Nye sigeni Karunga a rundurure magazaro geni, mu situnuke nawa-nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.” Nonkango odo kulikida asi kuvhura yi tu tompoke mokukara nomagazaro ngwendi gaJehova nokusiga nayinye eyi ngayi pangere magazaro getu komeho tu ya lironge usili. Nampili ngomu twa ligwanekera noyihorokwa yimwe meparu eyi ya kundama magazaro getu, simpe kuvhura tu ture po marunduruko. Nye marunduruko ogo kwa korera kweyi atu gazara. Nsene tu teda ko omu Jehova a tara yininke ngatu ya dimburura asi magazaro gendi mawa. Makura ngayi tu vatera tu tare yininke ngamoomu a yi tara age.

¹⁵ Koneka asi nsene tuna hara kukara nomagazaro ngwendi gaJehova, twa hepa kunyokera po ‘kulifana nouzuni ou.’ Eyi kutanta asi kunyokera po nkenye magano aga ga dira kuliza nomagazaro gaJehova. Mokutuvatera tu yi kwate egano, kuvhura kuyifanekesa konondya. Muntu ogu ana hara kukanguka kuvhura a tokore kulya nondya dokukangukisa rutu. Nye ngoso kuvhura yi mu tompoke nsene a lya hena nondya dokuwora ndi? Mokulifana, nampili tu lironge Nonkango daKarunga nkenye apa, ayo kapi ngayi kwafa nsene asi ose simpe kuna kupulisira magazaro gouzuni ou ga tu pangere.

16. Kosinke twa hepa kulipopera nyamwetu?

¹⁶ Kuvhura tu nyokere po magano nagenye gouzuni ou ndi? Hawe, morwa magano gamwe udigu kugahenduka. (1 Kol. 5:9, 10) Mokuzuvhisa ose kuligwana novantu ava ava pwagesa magano nomapuliro gepuko. Nampili ngoso, twa hepa kunyokera po kugatambura nokugagazadara. Twa hepa kuhonena Jesus mokunyokera po usimbu magano gaSatana. Ose kuvhura hena tu lipopere nyamwetu komagano gouzuni ou.—Resa Yisewe 4:23.

17. Mononkedi musinke dimwe natu lipopera komagazaro gouzuni ou?

¹⁷ Pasihonena, ayo mulyo unene tu horowore nawa vakaume. Bibeli kuturondora asi nsene tu likwatakana unene novantu  ava ava dili kukarera Jehova, ngatu tameka kugazara ngwendi yiwo. (Yis. 13:20; 1 Kol. 15:12, 32, 33) Twa hepa hena kuhorowora nawa yilihafeso yetu. Nsene tu nyokera po yilihafeso eyi ya likwatakana nelisinto nonyanya ntani ruhonda, ngayi tu vatera tu dire kunyateka magazaro getu nomagano aga ga lilimba ‘nediwo lyaKarunga.’—2 Kol. 10:5.

18, 19. (a) Morwasinke twa hepera kulitakamesa nyamwetu komagano aga aga moneka asi mawa? (b) Mapuro musinke natu lipura ntani morwasinke?

¹⁸ Magano gamwe gouzuni ou udigu kugadimburura asi epuko, nye ya wapa kuganyokera po. Pasihonena, nombudi dimwe kudigava monkedi zokukwatesa ko upolitika. Ntani yihorokwa yimwe eyi ava likida kombudi kuninkisa vantu va kondjere yininke yoyiwa meparu. Yirongwa eyi ya kara monomuvi nomonobuke dimwe kwa korangeda mo asi kuhara unene vanekoro nokulinenepeka kapi ya kara epuko. Nonkareso dangoso kwa lilimba neyi ga tanta Matjangwa asi twa hepa kuhara unene Jehova. (Mat. 22:36-39) Ntani hena, malikwamo gamwe govanona aga aga pitire monomuvi kuvhura ga moneke asi mawa, nye ago kuvhura ga va ninkise va gwire monkareso zondona.

¹⁹ Nye eyi kapi ayi tanta asi ayo epuko kuhafera yilihafeso yoyiwa. Nampili ngoso, mulyo unene tu lipure asi: ‘Ame kudimburura magano gouzuni ou aga aga moneka ngwendi mawa ndi? Ame kulipopera nyamwange novana vange komalikwamo gamwe gokotivi ndi? Ame kuvatera vana vange va kare nomutaro ngwendi gwaJehova yipo yi dire kuvapukisa eyi ava zuvhu neyi ava mono mouzuni ou ndi?’ Nsene tu dimburura elisigo eli lya kara pokatji komagazaro gaKarunga naga gouzuni ou, ngatu nyokera po ‘kulifana nouzuni ou.’

20. Nombudi musinke nadi vhura kutupangera?

²⁰ Diworoka asi pwa kara maruha gavali oku adi tundu nombudi, kwaJehova ntani kouzuni ou waSatana. Nombudi musinke adi tu p angere? Ado kuna kara deedi atu tambura. Nsene tu tambura magano gouzuni ou, ngaga pangera magazaro getu ntani ngatu gazara nokurugana ngwendi vantu ava ava dili kukarera Karunga. Eyi yiyo nye ya karera nomulyo asi tu takamese kuhamena eyi atu tara nokuresa nokupurankena ntani neyi atu gazara.

21. Yisinke ngatu ka zogera mosirongwa sokukwama ko?

²¹ Mosirongwa esi tuna lirongo asi mokukara nomagazaro ngwendi gaJehova, kapi ya gwanena po tupu kukunga magazaro getu. Twa hepa hena kuteda ko omu Jehova a gazara yipo nose tu rugane yokulifana. Mosirongwa sokukwama ko ngatu ka lironga omu natu yi rugana oyo.