Mosiruwo sanare, erenga ngali pakere mbili embo ndi yiweka yahekurwalyo. MoRuhebeli nomoRugereka, nkango erenga kuziruganesa mokutamba komupitisili ndi mugendesi gembo.

Apa Josefa munwaJakopo ga kere mupika moEgipite, age kwa kere erenga ndi mugendesi gembo lyahekurwendi. Bibeli kutanta asi “nayinye eyi ga wekere makura ta yi sigire Josefa.” (Gen. 39:2-6) Konyima zapa va mu tumbire Josefa a kare mupangeli moEgipite, nage kwa horowere erenga li gendese embo lyendi.—Gen. 44:4.

Apa Jesus ga kere pevhu, sinzi sovantu ava va kere nonofarama kwa tungire moyitata eyi ya likere ure nonofarama dawo. Yipo nye, awo ngava horowora erenga eli nali vhura kugendesa yirugana yomofarama.

Muntu musinke ngava tura a kare erenga? Mosiruwo sovapositoli, mutjangi gedina Columella goMuroma, kwa tente asi muntu ogu ngava tura a kare mupitisili ndi erenga kwa kere muntu ogu “ga divire kurugana nawa yirugana.” Age kwa kere muntu ogu nga “divilisa asi varugani kuna kurugana nawa ntani age kapi nga va tekura nonyanya.” Age kwa tente hena asi: “Ayo kwa kere nomulyo kwendi a dire kugazara asi ga diva nayinye ntani ga hepa kukara neharo lyokulironga yininke yoyipe.”

Nonkango daKarunga kwa ruganesa hena nkango erenga mokufanekesa yirugana yimwe eyi ayi horoka mombungakriste. Pasihonena, mupositoli Peturusa kwa korangedere Vakriste va ruganese mauhwi aga va kara nago “mokulikwafa-kwafa ngovagendesi wovawa wonkenda zaKarunga zonzi-zonzi.”—1 Pet. 4:10.

Jesus nage kwa ruganesere sihonena serenga mosifanekeso esi sa kara mwaRukasa 16:1-8. Ntani mouporofete wokuhamena sidiviso esi ngasi likida asi Jesus ngesi Hompa, age kwa tanterere vasikuli vendi asi age nga horowora “mukareli gokulimburukwa gonondunge,” ndi “erenga lyokulimburukwa.” Situmbukira sosinene serenga sokugava nondya dopampepo posiruwo sado kovarongwa vaKristusa pomazuva aga gopouhura. (Mat. 24:45-47; Ruk. 12:42) Tuna hafa kweyi atu gwana yimbapiratjangwa eyi a wapaike mukareli gokulimburukwa nokuyigavera mouzuni mudima.