1. Yisinke ga tu pulisira Jehova?

JEHOVA kutupulisira tu horowore eyi tuna hara kurugana meparu. Age kuturonga omu natu tura po matokoro gomawa ntani kutuvatera apa atu tura po matokoro aga aga mu hafesa. (Epis. 119:173) Yipo nye, nsene tu sikisa mo eyi tuna kulironga moBibeli, ose ngatu tura po matokoro gomawa.—Heb. 5:14.

2. Udigu musinke atu ligwanekere nawo poyiruwo yimwe konyima zokutura po etokoro?

² Nampili tu ture po matokoro gomawa, poyiruwo yimwe ayo kutudigopera kusikisa mo eyi twa tokora kurugana. Koneka yihonena yimwe: Munazinyetu gomugara gomudinkantu ta tokora kuresa Bibeli nazinye. Age ta yi mu tompoka kuziresa yivike yongandi, nye konyima ta hageke morwa konda zongandi. Munazinyetu gomukadi ta tokora kukara muzuvhisi gokukarerera, nye age nkenye apa kurundurura ezuva eli nga tameka. Vakuronambunga tava tura po etokoro lyokulitura mo unene mokudingura nokukorangeda vanavazinyetu, nye konyima zomakwedi gongandi, awo simpe kapi va tameka kudingura. Maukaro aga ga lisiga, nye navenye kuna kuligwanekera noudigu wokulifana. Awo kapi vana kusikisa mo eyi va tokora kurugana. Vakriste womosiruwo sovapositoli moKolinte, nawo kwa ligwanekerere noudigu wokulifana. Ngesi tatu ka zogera eyi natu lirongera ko kwawo.

3. Etokoro musinke va tulire po Vakolinte, nye yisinke ya horokere?

³ Koyiha yomvhura 55, Vakolinte kwa tulire po etokoro lyomulyo. Awo kwa zuvhire asi vapuli vakwawo womoJerusarema nomoJudeya kwa kere moruhepo ntani nombungakriste dimwe kwa pongaikire yimaliwa yipo va vatere Vakriste vakwawo ava va kere moruhepo. Vakolinte kwa  kere nonkenda ntani nougavi, yipo nawo va tokwere kuvatera vapuli vakwawo ava va kere moruhepo. Awo kwa pulire Paurusa omu nava vhura kuvatera, makura Paurusa yipo ga tumine mapukururo kombungakriste ozo nokuhundira Titusa a vatere mokupongaika yigava oyo. (1 Kol. 16:1; 2 Kol. 8:6) Nye konyima zomakwedi gongandi, Paurusa kwa ya dimbwilire asi Vakolinte kapi va sikisire mo etokoro lyawo. Eyi nampo ya ninkisire yigava yawo va dire kuyituma nosiruwo koJerusarema kumwe neyi yokonombungakrise dapeke.—2 Kol. 9:4, 5.

4. Kuliza no-2 Vakolinte 8:7, 10, 11, yisinke ga korangedere Paurusa Vakolinte va rugane?

⁴ Vakolinte kwa tulire po etokoro lyewa ntani Paurusa kwa va pandadekere kepuro lyawo neyi va here kuvatera vapuli vakwawo. Nye age hena kwa va korangedere va sikise mo eyi va tamekere. (Resa 2 Vakolinte 8:7, 10, 11.) Sihorokwa sawo kulikida asi Vakriste wovalimburukwi nawo poyiruwo yimwe kuvadigopera kusikisa mo eyi va tameka.

5. Mapuro musinke natu ka limburura?

⁵ Nose kuvhura yi tu digopere kusikisa mo eyi twa tokora kurugana ngwendi Vakolinte. Morwasinke? Morwa kapi twa sikilira mo, kuvhura tu hare kurundurura etokoro lyetu. Ndi nampo kuvhura yi horoke yininke eyi tuna dili kundindira, eyi nayi tu ninkisa tu dire kusikisa mo eyi twa tameka. (Muud. 9:11; Rom. 7:18) Yisinke natu rugana nsene kuna kukonakona etokoro eli twa tulire po nare yipo tu dive nsene kuvhura tu li rundurure? Ntani yisinke nayi tu vatera tu sikise mo eyi twa tokora kurugana?

6. Yisinke nayi tu ninkisa tu rundurure etokoro lyetu?

⁶ Matokoro gamwe gomulyo, kapi ngatu ga rundurura. Pasihonena, ose ngatu twikira kukarera Jehova noulimburukwi ntani ngatu twikira kuhara mulikwali gwetu. (Mat. 16:24; 19:6) Nye matokoro gamwe, kuvhura kugarundurura. Morwasinke? Morwa maukaro kulitjindja. Yisinke nayi tu vatera tu tulise po matokoro gomawa?

7. Yisinke natu hundira kwaJehova, ntani morwasinke?

⁷ Kanderera yipo o gwane nondunge. Jehova kwa gendesere Jakopo a tjange asi: “Ntene pweli ogu ga pira nondunge, a di hundire kwaKarunga ogu a pe navenye neharo lyewa.” (Jak. 1:5) Poyiruwo yimwe, natuvenye kupira “nondunge.” Yipo nye, ya wapa kukanderera kwaJehova a ku vatere nsene kuna kutura po etokoro ntani komeho zokurundurura etokoro eli wa tulire po. Nsene o yi rugana, Jehova nga ku vatera o ture po etokoro lyewa.

8. Epaparo musinke natu rugana komeho zokutura po etokoro?

⁸ Rugana epaparo lyenene. Resa Nonkango daKarunga noyimbapiratjangwa eyi atu gwana kombunga zaJehova ntani zogera novantu ava nava kupa magano gomawa. (Yis. 20:18) Ayo mulyo kurugana epaparo lyangoso komeho zokutokora kutjindja yirugana, ndi kudiruka ntani komeho zokuhorowora erongo eli no gusa yipo ngali ka ku vatere o ka lirere nokukarera Jehova.

9. Uwa musinke ngatu gwanena mo nsene tu hungika?

⁹ Konakona nokonda deyi ono kutulira po etokoro. Nokonda edi a di tu ninkisa tu ture po matokoro, mulyo unene kwaJehova. (Yis. 16:2) Age ana hara tu hungike mwanayinye. Yipo nye, pokutura po matokoro, twa hepa kudiva nokonda deyi twa ku yi ruganena ntani nokutantera vakwetu usili. Nsene kapi tuna kuhungika nawa-nawa, ayo ngayi tu digopera kusikisa mo  etokoro lyetu. Pasihonena, tu tante asi munazinyetu gomugara gomudinkantu ta tokora kukara muzuvhisi gokukarerera. Nye konyima zosiruwo, kapi ana kuvhura kusikisa mo novili edi va tura po ntani kapi ana kuhafera sirugana sokuzuvhisa. Nampo age kwa gazarere asi ana hara kukara muzuvhisi gokukarerera mokuhafesa Jehova. Nye nampo sitambo sendi sene-sene kwa kere sokuhafesa vakondi vendi ndi vantu wopeke.

10. Yisinke nayi tu vatera tu ture po malitjindjo?

¹⁰ Gazara kuhamena murongwa goBibeli ogu ana tokora kuhageka kukoka makanya. Pomuhowo, age ta hageke kukoka ure wosivike ndi yivali nampili yi kare udigu kwendi, nye konyima ta tameke hena kukoka. Nye mwaza siruwo ta ya hageke nkareso ozo morwa ga hara Jehova ntani ga hara kumuhafesa.—Koros. 1:10; 3:23.

11. Morwasinke no divira eyi ono hara kurugana?

¹¹ Diva eyi ono hara kurugana. Nsene o diva eyi ono hara kurugana, ayo ngayi ku vatera o sikise mo eyi wa tameka. Pasihonena, nampo ove kwa tokora kuresa Bibeli nkenye ezuva. Nye nsene kapi wa kara nelikwamo eli nali ku vatera o dive eyi no rugana, kapi ngayi ku tompoka kusikisa mo sitambo soge. * Ndi nampo vakuronambunga vana tokora kudingura vanavazinyetu nkenye apa nokuvakorangeda, nye konyima zosiruwo kapi vana kuyisikisa mo. Nsene vana hara yi va tompoke, mapuro aga gana kukwama ko kuvhura ga va vatere: “Twa kara nelikwamo lyovanavazinyetu ava vana hepa ekorangedo ndi? Twa tura po ezuva eli ngatu kava dingura ndi?”

12. Yisinke twa hepa kurugana ntani morwasinke?

¹² Kara nehetakano. Natuvenye kapi twa kara nosiruwo sokugwanena po ndi nonkondo yipo tu rugane nkenye eyi twa hara kurugana. Yipo nye, kara nehetakano. Kuvhura o rundurure etokoro lyoge nsene kapi yina kukutompoka kulisikisa mo. (Muud. 3:6) Tu tante asi ono konakona etokoro lyoge nokuliwapukurura ntani kwa kulizuvha asi ono hara kulisikisa mo. Tu tare yininke yitano eyi nayi ku vatera o sikise mo eyi wa tameka.

13. Kupi no gwana nonkondo dokusikisa mo etokoro lyoge?

¹³ Kanderera yipo o gwane nonkondo. Karunga kuvhura a ku pe ‘nonkondo dokusikisa mo’ matokoro goge. (Fil. 2:13) Yipo nye, kanderera kwaJehova a ku pe mpepo zokupongoka yipo o gwane nonkondo. Twikira kukanderera nampili yi moneke ngwendi makanderero goge kapi vana kugalimburura. Jesus kwa tente asi: “Omu hundire [mpepo zokupongoka] ngava mu pe.”—Ruk. 11:9, 13.

14. Ngapi etjangwa lyomoYisewe 21:5, nali ku vatera o sikise mo etokoro lyoge?

¹⁴ Tura po mafaneko. (Resa Yisewe 21:5.) Mokusikisa mo nkenye sirugana, wa hepa kukara nefaneko. Ntani konyima, wa hepa kurugana kuliza nefaneko lyoge. Mokulifana, nsene kuna kutura po etokoro, tjanga yininke nayinye eyi wa hepa kurugana yipo o sikise mo eyi ono hara kurugana. Nsene kuna kurugana sirugana sosinene, si gaununa momaruha. Konyima zokurugana ko yimwe, ove ngo dimburura eyi wa tompora. Paurusa kwa korangedere Vakolinte va pungure yigava “nkenye Sondaha” mevango lyokumundindira dogoro nga ya sike. (1 Kol. 16:2) Nsene tu gaununa sirugana sosinene momaruha, ayo ngayi tu vatera tu dire kulizuvha asi kapi ngatu si sikisa mo.

15. Yisinke no rugana konyima zokutura po etokoro?

 ¹⁵ Nsene o tjanga eyi ono hara kurugana, ayo ngayi kurerupira kuyisikisa mo. (1 Kol. 14:40) Pasihonena, vakuronambunga kuvakorangeda va horowore mukuronambunga gumwe ogu na tjanga nkenye eyi vana tokora kurugana, nogu na yi rugana ntani nezuva eli na yi rugana. Vakuronambunga ava ava kwama ewapaiko eli, nkenye apa awo kuvatompoka kusikisa mo eyi vana tokora. (1 Kol. 9:26) Nove kuvhura o rugane yokulifana meparu lyoge. Pasihonena, tjanga elikwamo lyoyininke eyi no rugana nkenye ezuva nomu ono hara kuyikwamesa. Eyi ngayi ku vatera o sikise mo eyi ono hara ntani ngo yi rugana mosiruwo sosisupi.

16. Yisinke natu rugana konyima zokutura po etokoro, ntani ngapi Varoma 12:11 azi kwatesa ko egano olyo?

¹⁶ Litura mo unene. Wa hepa kulitura mo unene yipo o kwame elikwamo lyoge ntani nokusikisa mo eyi wa tameka. (Resa Varoma 12:11.) Paurusa kwa tanterere Timoteusa a “kovekede” mokukara murongi gomuwa. Nose twa hepa kuruganesa epukururo olyo mwankenye eyi tuna hara kuruganena Jehova.—1 Tim. 4:13, 16.

17. Ngapi etjangwa lyoVaefeso 5:15, 16, nali tu vatera tu sikise mo eyi twa tameka?

¹⁷ Ruganesa nawa siruwo soge. (Resa Vaefeso 5:15, 16.) Horowora siruwo yipo o sikise mo eyi wa tokora ntani wa ha si rundurura. Kapisi o ndindire asi ngo rugana eyi wa tokora apa ukaro woge ngau wapa. Nampo ukaro woge kapi ngau litjindja. (Muud. 11:4) Wa ha pulisira yininke yokupira mulyo yi mane siruwo soge ntani nononkondo doge dokurugana yininke yomulyo. (Fil. 1:10) Nsene kuvhura, rugana eyi ono hara kurugana posiruwo sokudira madonganeso. Tantera wopeke va dire kukudonganesa. Dimisa selefoni zoge nokunyokera po kutara nombudi posiruwo oso. *

18-19. Yisinke nayi ku vatera yipo o sikise mo eyi wa tameka nampili kuna kuligwanekera nomaudigu?

¹⁸ Gazadara komauwa aga ngo gwana. Yitundwamo yomatokoro goge kwa fana ngwendi evango oku ono hara kuza. Nsene asi ono hara kukasika kevango olyo, ove ngo twikira dogoro o ka sike. Ntani nampili nzira va zi pate, ove ngo hetekera ko kupapara zapeke. Mokulifana, nsene tu gazadara ko komauwa aga ngatu gwana pokusikisa mo eyi twa tameka, ose kapi ngatu hageka nampili tu ligwanekere noyilimbikiso.—Gar. 6:9.

¹⁹ Ayo kapisi ureru kutura po matokoro gomawa nokugasikisa mo. Nye Jehova kuvhura a tu vatere pokutupa nondunge nononkondo dokusikisa mo eyi twa tameka.