1-2. (a) Kuliza noVaefeso 6:16, morwa sinke twa hepera “silikandwiso sepuro” sosinene? (b) Mapuro musinke natu kazogera?

NOVE wa kara ‘nosilikandwiso sosinene sepuro’ ndi? (Resa Vaefeso 6:16.) Nampo wa kara naso. Ngwendi moomu silikandwiso sosinene asi popere rutu, epuro lyoge nalyo kukupopera koyininke yoyidona yomouzuni ou ngwendi ruhonda, nyanya, nayimwe hena eyi ayi lirwanesa nonompango daKarunga.

² Nye ose kuna kuparuka “pomazuva gopouhura,” ntani epuro lyetu ngava twikira kuliheteka. (2 Tim. 3:1) Yisinke natu rugana yipo tu divilise asi silikandwiso sepuro lyetu sina koro? Ntani yisinke natu rugana yipo epuro lyetu lipame? Natu ka zogera malimbururo komapuro ogo.

3. Ngapi vakwayita ngava pakere mbili yilikandwiso yawo, ntani morwasinke?

³ Mosiruwo sanare, yilikandwiso yovakwayita ngava yi tura yipapa. Vakwayita ngava kwite magadi koyilikandwiso yawo yipo sipapa si kare siruwo ntani sivera si dire kukara nkerewe. Nsene mukwayita a dimburura asi silikandwiso sendi kapi sina wapa, age nga si wapeke yipo a liwapaikire yita yokukwama ko. Yisinke natu lirongera ko?

4. Morwasinke natu konakonena silikandwiso setu sepuro, ntani ngapi natu yi rugana?

⁴ Ngwendi vakwayita womosiruwo sanare, nose twa hepa kukonakona silikandwiso setu sepuro yipo tu liwapaikire yita. NgoVakriste, ose kurwa yita yopampepo kumwe nonompepo donondona. (Efe. 6:10-12) Kwato ogu na vhura  kutuwapekera po silikandwiso setu sepuro. Yisinke natu rugana yipo epuro lyetu li pame komeho tu ligwanekere nomaheteko? Pomuhowo, twa hepa kukanderera yipo a tu vatere Karunga. Ntani twa hepa kuruganesa Nonkango daKarunga yipo di tu vatere tu likonakone nyamwetu nokukwata egano omu Karunga a tu tara. (Heb. 4:12) Bibeli kutanta asi: “Huguvara HOMPA nomutjima goge nagunye. Wa ha hama konondunge danyamoge.” (Yis. 3:5, 6 ) Gazara kuhamena ukaro ou wa ligwanekerere nawo ntani neyi wa rugene ko. Pasihonena, nampo ove kwa kere noudigu woyimaliwa. Wa gazadarere ko ketumbwidiro lyaJehova lyomoVahebeli 13:5, apa wa hetekerere ko kukohonona po udigu woge ndi? Etumbwidiro olyo lya ku vaterere o kare nehuguvaro asi Jehova nga ku vatera ndi? Nsene yimo wa yi rugene, eyi kulikida asi ove kuna kupakera mbili silikandwiso soge sepuro.

5. Yisinke ngo dimburura nsene o konakona nawa epuro lyoge?

⁵ Kuvhura ngayi ku tetukise eyi ngo gwana nsene o konakona nawa epuro lyoge. Kuvhura ngo ya dimburure maupirankondo goge aga wa dilire kudiva. Pasihonena, nampo ngo ya dimburura asi kukara nosinka unene, yimpempa ntani madompeso kuna kukuninkisa o zumbanese epuro lyoge. Nsene eyi yiyo yakuhorokera, ngapi omu no popera epuro lyoge koyininke yoyidona?

6. Yihonena musinke yina kulikida asi yinka yimwe yiwa?

⁶ Yinka yimwe yiwa. Pasihonena, ayo ya wapa kwetu tu kare nosinka sokuhafesa Jehova naJesus. (1 Kol. 7:32) Nsene tuna tura nzo zonene, ose kukara nosinka sokutengwidira po ukaume wetu naKarunga. (Epis. 38:18) Ntani twa kara hena nosinka sokuhafesa mulikwali gwetu nokupakera mbili vemepata lyetu ntani novapuli vakwetu.—1 Kol. 7:33; 2 Kol. 11:28.

7. Kuliza noYisewe 29:25, morwasinke natu dilira kutjira vantu?

⁷ Nye nampili ngoso, nsene tu kara nosinka unene, ngayi tu ninkisa tu zumbanese epuro lyetu. Pasihonena, kuvhura tu kare nkenye apa nosinka asi kapi tuna kara nonondya dokugwanena po noyidwara. (Mat. 6:31, 32) Mokuninka asi tu guse po yinka oyo, nampo kuvhura tu liture mo unene mokupapara emona. Ayo kuvhura kutuninkisa hena tu dowokere yimaliwa. Nsene tu yi pulisira oyo, epuro lyetu ngali sesupa ntani ukaume wetu naJehova ngau kara mosiponga. (Mar. 4:19; 1 Tim. 6:10) Ndi kuvhura tu kare nosinka sosinene kuhamena omu ava tu gazarere vantu. Ntani kuvhura hena tu tjire unene vantu asi ngava tu swaura nokutuhepeka kupitakana kutjira kuguvisa Jehova. Twa hepa kukanderera kwaJehova a tu pe ko uradi nepuro lyokupama yipo tu dire kutjira vantu.—Resa Yisewe 29:25; Ruk. 17:5.

8. Yisinke natu rugana nsene gumwe kuna kuuyunga yimpempa?

⁸ Satana ‘guhya yimpempa’ kuruganesa ava va kara mepangero lyendi yipo va hanese yimpempa kuhamena Jehova novapuli vakwetu. (Joh. 8:44) Pasihonena, varwanesi usili kuhanesa yimpempa kuhamena mbunga zaJehova kupitira kointaneta nokotivi ntani komaruha gamwe. Yimpempa oyo kuna kara “yikutji yomundiro” yaSatana. (Efe. 6:16) Yisinke natu rugana nsene gumwe kuna  kuuyunga yimpempa yangoso? Twa hepa kuyinyokera po. Morwasinke? Morwa ose kwa kara nepuro mwaJehova ntani twa huguvara vanavazinyetu. Ntani twa hepa kunyokera po kupurakena kovarwanesi usili. Yi kare asi yisinke vana kutuuyunga kapisi tu va limburure.

9. Ngapi madompeso naga vhura kutukundama?

⁹ Madompeso kuvhura kusesupika epuro lyetu. Poyiruwo yimwe, ose kudompa mutjima morwa kuligwanekera nomaudigu. Yimo, maudigu yipo ga kara, nye kapisi tu demenene kwago. Nsene tu yi rugana, ose ngatu divara yininke nayinye yoyiwa eyi ga tu tumbwidira Jehova. (Ehor. 21:3, 4) Madompeso kuvhura kutugusa nonkondo ntani nokutuninka tu hageke kukarera Jehova. (Yis. 24:10) Nye kapi tuna hara yi tu horokere oyo.

10. Yisinke ono lirongere ko kombilive ezi ga tjenge munazinyetu gumwe gomukadi?

¹⁰ Tu konakoneni sihonena samunazinyetu gomukadi gomoUnited States omu ana kupameka epuro lyendi nampili ngomu a pakere mbili mugara gwendi ogu a vere unene. Age kwa tjangerere mbilive zendi komberewa zonene zoNombangi daJehova asi: “Poyiruwo yimwe, ukaro wetu kutudompesa nokutupa sinka, nye twa kara nehuguvaro lyokupama. Ame kupandura unene kwanayinye eyi a tu pe Jehova mokutukorangeda nokunkondopeka epuro lyetu. Makorangedo gangesi tuna ga hepa. Ago kutuvatera tu twikire kukarera Jehova nokulididimikira marwaneso gaSatana.” Nonkango damunazinyetu dina tu rongo asi nose kuvhura tu nyokere po madompeso. Monkedi musinke? Diworoka asi maudigu goge kuna kara eheteko lyokutunda kwaSatana. Kara nehuguvaro asi Jehova nga ku vatera. Ntani kara norupandu konondya dopampepo edi a tu pe.

11. Mapuro musinke natu lipura yipo tu dive nsene epuro lyetu lina pama?

¹¹ Koyili ono dimburura eyi wa hepa kurugana yipo epuro lyoge li nkondopare ndi? Wa hetekera ko kunyokera po kukara nosinka unene momakwedi aga gana ka pita ndi? Wa nyokere kupurakena konombudi  doyimpempa dovarwanesi usili ndi? Ya ku tompokere kulididimikira madompeso ndi? Nsene yiyo wa rugana, kulikida asi epuro lyoge lya pama. Nye twa hepa kuvangarara morwa Satana ga kara noyirwiso yimwe eyi a ruganesa mokuturwanesa. Tu zeni tu zogere ko simwe.

12. Yisinke ngayi tu horokera nsene tu hara unene emona?

¹² Nsene tu hara unene emona, epuro lyetu ngali sesupa ntani kapi ngatu ruganena Jehova momunene. Mupositoli Paurusa kwa tente asi: “Mukwayita moyirugana yendi kwa hara a hafese mupitisili gwendi, kapisi a liture hena mweyi yokuparura rutu.” (2 Tim. 2:4) Vakwayita woVaroma kapi vava pulisilire va rugane yirugana yapeke. Yisinke ngano ya horokere nsene mukwayita a rugana hena yirugana yapeke?

13. Morwasinke mukwayita na dilira kulihameka mongesefa?

¹³ Gazadara ko kosihonena esi. Tu tante asi vakwayita kuna kuliyomberesa noyirwiso yawo kongurangura, nye mukwayita gumwe kapi ana ya moneka. Age kuna zi modoropa yipo a ka randese nondya. Ano kongurova, vakwayita vakwawo kuna kukonakona yirwiso yawo nokurora marufuro gawo. Nye mukwayita ogu a randesa nondya modoropa, age kuna kuwapaika nondya edi ngaka randesa ezuva lyokukwama ko. Nye ezuva lyokukwama ko, nonkore tadi homokere vakwayita owo va hana kuyindindira. Pokatji kovakwayita owo, mukwayita musinke na vhura kukarwa nawa moyita ntani gupi po na hafesa mupitisili gwawo? Nsene asi nove kuna kurwa moyita oyo, mukwayita musinke no hara kulikundama nage, googu ga liyomberesa ndi ogu ga dira kuliyomberesa?

14. Ngovakwayita vaKristusa, sininke musinke somulyo po unene kwetu?

¹⁴ Ose kwa fana ngwendi vakwayita wovawa. Sininke somulyo po unene kwetu kuna kara kuhafesa Mupitisili gwetu Jehova naKristusa. Esi kuna kara sininke somulyo po unene kwetu kupitakana nkenye  eyi ya kara mouzuni waSatana. Twa hepa kudivilisa asi tuna kara nosiruwo nononkondo yipo tu karere Jehova ntani nokupakera mbili silikandwiso setu sepuro noyirwiso yimwe hena eyi twa hepa.

15. Erondoro musinke ga geve Paurusa, ntani morwasinke?

¹⁵ Twa hepa kuvangarara nkenye apa. Morwasinke? Mupositoli Paurusa kwa tente asi “ava va hara kugawopa” ngayi va “gusa mo mepuro.” (1 Tim. 6:9, 10) Nkango ‘kugusa mo mepuro’ kulikida asi kuvhura ngayi tu ninkise tu kondjere kulipongaikira yininke eyi twa dira kuhepa. Kuvhura ngayi tu ninkise hena tu kare ‘nomadowo gomanzi gougova.’ Nye twa hepa kudiworoka asi Satana kuruganesa madowo ogo yipo a sesupike epuro lyetu.

16. Kuliza nosihorokwa sa kara mwaMarukusa 10:17-22, mapuro musinke natu lipura?

¹⁶ Tu tante asi tuna kara noyimaliwa yoyinzi yokuranda nkenye eyi tuna hara. Ngoso ayo epuko kuranda yininke eyi tuna hara nampili kapi tuna yi hepa ndi? Hawe. Nye gazadara ko komapuro aga: Nsene asi ose kuvhura kuranda sininke songandi, twa kara nosiruwo nononkondo dokusipakera mbili ndi? Aso ngasi tu ninkisa tu hare unene emona ndi? Aso ngasi tu ninkisa tu kare nonkareso ezi ga  kere nazo mumati ogu ga nyokere kutambura ezigido lyaJesus yipo a ruganene Karunga unene ndi? (Resa Marukusa 10:17-22.) Ayo ya kara nomulyo tu rerupike eparu lyetu nokuruganesa siruwo setu nononkondo detu mokukarera Jehova.

17. Yisinke twa hepa kudiworoka?

¹⁷ Twa hepa kudiworoka asi ose kuna kurwa yita ntani twa hepa kuliwapaikira yita nkenye ezuva. (Ehor. 12:17) Vanavazinyetu kapi tava vhuru kutusimbira po silikandwiso setu sepuro. Twa hepa kunkondopeka epuro lyetu nyamwetu.

18. Morwasinke vakwayita womosiruwo sanare ngava poperere yilikandwiso yawo?

¹⁸ Mosiruwo sanare, mukwayita ogu nga tompora unene moyita ngava mu fumadeke. Nye nsene a tengura kembo ga hana silikandwiso sendi, nga lifu nomuga. Munahistoli goVaroma gedina Tacitus kwa tjanga asi: “Apa mukwayita a ka zumba silikandwiso sendi moyita, alyo kwa kere eswau lyenene.” Eyi yiyo vakwayita ngava poperere yilikandwiso yawo.

19. Ngapi natu popera silikandwiso setu sepuro?

¹⁹ Ose kupopera silikandwiso setu sepuro pokuwiza nkenye apa komapongo ntani nokutantera ko wopeke kuhamena edina lyaKarunga noUhompa wendi. (Heb. 10:23-25) Ntani hena ose kuyirugana pokuresa Nonkango daKarunga nkenye ezuva nokusikisa mo eyi tuna kuresa. (2 Tim. 3:16, 17) Nsene tu yi rugana, kwato sirwiso esi a ruganesa Satana ngasi tu rwadeka. (Jes. 54:17) ‘Silikandwiso setu sepuro’ ngasi tu popera. Ose ngatu ruganena kumwe novanavazinyetu. Ayo ngayi tu tompoka kunkondopeka epuro lyetu. Ntani somulyo po, ngayi tu hafesa mokuhama kwaJesus apa nga ka funda po Satana novantu vendi.—Ehor. 17:14; 20:10.