1-2. Morwasinke Vakriste nava konakonena buke zaLevitikus?

MUPOSITOLI Paurusa kwa tanterere kaume kendi gomudinkantu Timoteusa asi: “Nkenye etjangwa, eli za retesa po Mpepo zaKarunga, kwa kara nomulyo.” (2 Tim. 3:16) Matjangwa ogo kwa kwatera mo buke zaLevitikus. Ngapi omu o tara Buke ozo? Vamwe kuzitara asi azo buke zonoveta dononzi edi da dira kukara nomulyo naina, nye Vakriste wousili kapisi yimo ava zi tara ngoso.

² Buke zaLevitikus kwa zi tjenge nomvhura 3 500 da ka pita, nye Jehova kwa zi tu pa yipo nose tu ‘lirongere ko.’ (Rom. 15:4) Buke zaLevitikus kutuvatera tu kwate egano omu a lizuvhu Jehova nomu a gazara. Yipo nye, twa hepa kulitura mo mokuzikonakona. Yirongwa yinzi natu vhura kulirongera mo mobuke ezi. Tu zeni tu ka zogere ko yine.

3. Morwasinke Vaisraeli ngava gavere nonzambo nkenye mvhura mEzuva lyEfironkenda?

³ Sirongwa sokuhova: Jehova nga tambura nonzambo detu nsene tu mu hafesa. MEzuva lyEfironkenda eli ngali kara nkenye mvhura, Vaisraeli ngava pongo kumwe ntani mupristeli gomunene nga gava nonzambo doyimuna. Nonzambo odo kwa diworokesere Vaisraeli asi va hepere kuvagusira po nonzo dawo. Nye poyili ga hepere kurugana mupristeli gomunene pomuhowo, eyi ya kere nomulyo kupitakana honde zononzambo doyimuna ezi nga twara monzugo zokupongokerera ezuva olyo.

4. Kuliza naLevitikus 16:12, 13, yisinke nga rugana mupristeli gomunene posikando sokuhova esi nga hwilire moNzungo zoKupongokerera mEzuva lyEfironkenda? (Tara efano lyopontunda.)

 ⁴ Resa Levitikus 16:12, 13. Gazara eyi ya horokere mEzuva lyEfironkenda: Mupristeli gomunene ta hwilire monkongoronzugo. Nye esi kuna kara sikando sokuhova moyikando yitatu eyi na vhura kuhwilira moNzugo zoKupongokerera mezuva olyo lyEfironkenda. Kewoko limwe, age kuna simbi manganganga gokututumikidisa, ano kekwawo age kuna simbire ko sipana somundiro sina zura makara gana kutwera. Komeho a hwilire monzugo zokupongokerera, age ta sikama komeho zekehe eli lya teta pokatji koNzugo zoKupongoka nezi zoKupongokerera. Age kuna kuhwilira nefumadeko monzugo zokupongokerera nokusikama komeho zosikesa segwanekero. Pasifanekeso, age ngwendi kuna sikama komeho zaJehova Karunga. Makura ta tura manganganga gokututumikidisa pomakara gana kutwera, ano eyi ta yi ninkisa monzugo ozo mu kare edumba lyewa. * Konyima ta ya hwilire hena monzugo ozo zokupongokerera nohonde zoyimuna yononzambo dononzo. Koneka asi Mupristeli gomunene nga swakerere manganganga getutumikidiso komeho a tware honde zononzambo dononzo.

5. Yisinke natu lirongera ko konzambo zedumba lyewa ezi ngava gava mEzuva lyEfironkenda?

⁵ Yisinke natu lirongera ko komanganganga gokututumikidisa aga ngava ruganesa mEzuva lyEfironkenda? Bibeli kulikida asi makanderero govakareli vaJehova wovalimburukwi kwa fana ngwendi nzambo zedumba lyewa. (Epis. 141:2; Ehor. 5:8) Diworoka asi mupristeli gomunene nga twara nzambo ozo komeho zaJehova nefumadeko. Mokulifana, twa hepa kukanderera kwaJehova nefumadeko lyenene. Yosili, ayo kutuhafesa unene kweyi ga tu pulisira Musiti gwetu tu kanderere kwendi ntani tu mu hedere pepi ngwendi moomu tupu munona ga kara nelikwatakano lyenene noguhwe. (Jak. 4:8) Jehova kututambura yipo tu kare vakaume vendi. (Epis. 25:14) Eyi mulyo unene kwetu ntani kutuninkisa tu dire kurugana eyi ayi mu guvisa.

6. Yisinke natu lirongera ko kweyi mupristeli gomunene nga swakerere manganganga gokututumikidisa komeho zokugava nonzambo?

⁶ Diworoka asi mupristeli gomunene nga swakerere manganganga gokututumikidisa komeho zokugava nonzambo. Age kwa yi rugene oyo yipo Jehova a mu hafere. Yisinke natu lirongera ko? Komeho Jesus a gave nzambo zendi, age kwa rugene sininke somulyo unene kupitakana kuzowora vantu kononzo. Sininke musinke oso? Age kwa limburukwire kwaJehova eparu lyendi nalinye yipo Jehova a tambure nzambo zendi. Monkedi zangoso, Jesus kwa yi likidire asi kurugana eyi ga hara Jehova yiso sininke sosiwa po meparu. Ntani age kwa yi likidire asi oGuhwe kupangera monkedi zongwa zouhunga.

7. Monkedi musinke Jesus ga hafesere oGuhwe apa ga ya kere pevhu?

⁷ Siruwo nasinye esi Jesus ga ya kere pevhu, age nga limburukwa Jehova. Nampili ngomu ga ligwanekerere nomaheteko nomaudigu ntani nampili ngomu ga divire asi tava ka mu dipaga monkedi zondona, age kwa tokomenene kulikida asi oGuhwe yiwo velike va wapera kupangera  vantu. (Fil. 2:8) Apa ga ligwanekerere nomaheteko, age kwa kanderere “nonkugo zonene nomahodi.” (Heb. 5:7) Makanderero gendi kwa likidire asi age kwa kere mulimburukwi ntani kwa mu vaterere a tokomene kulimburukwa Jehova. Jehova kwa tere makanderero gaJesus ngwendi nzambo zedumba lyewa. Jesus kwa hafesere unene oGuhwe eparu lyendi mudima ntani kwa likidire asi yiwo velike va wapera kupangera.

8. Ngapi omu natu honena Jesus?

⁸ Nose kuvhura tu honene Jesus pokulimburukwa Jehova. Nsene kuna kuligwanekera nomaheteko, twa hepa kukanderera kwaJehova morwa twa hara kumuhafesa. Monkedi zangoso, ose ngatu likida asi kuna kukwatesa ko upangeli wendi. Nsene tu rugana yininke eyi ga nyenga Jehova, age kapi nga tambura makanderero getu. Nye nsene tu paruka kuliza nonompango dendi, age nga tara makanderero getu ngwendi nzambo zedumba lyewa. Ose kuvhura tu kare nehuguvaro asi ulimburukwi wetu ngau hafesa Guhyetu gemeguru.—Yis. 27:11.

9. Morwasinke Vaisraeli ngava gavere nonzambo dombili?

⁹ Sirongwa sauvali: Ose kukarera Jehova morwa twa kara norupandu. Mokunkondopeka sitwa esi, tu konakoneni nzambo zombili ezi ngava gava Vaisraeli. * Buke zaLevitikus kulikida asi Muisraeli nga gava nzambo zombili, “morwakupandura Karunga.” (Lev. 7:11-13,  16-18) Muntu nga gava nzambo ezi keharo lyamwene nye kapisi komusininiko. Ezi kwa kere nzambo ezi nga gava muntu morwa ga hara Jehova. Nsene muntu ana gava nzambo ozo, nyama ngava zi li vemepata ntani novapristeli. Nye maruha gamwe gosimuna esi ngava zamba, kwa kere tupu gaJehova. Maruha musinke ogo?

10. Ngapi nonzambo dombili edi va faturura mwaLevitikus 3:6, 12, 14-16 da lifana neyi ga rugene Jesus?

¹⁰ Sirongwa sautatu: Ose kugava kwaJehova yoyiwa po morwa twa mu hara. Jehova nga tara magadi gosikorama asi sininke sosiwa po. Ntani age kwa tente hena asi maruha gamwe gosikorama ngwendi nongera kwa kere nomulyo kwendi. (Resa Levitikus 3:6, 12, 14-16.) Jehova ngayi mu hafesa apa Muisraeli nga gava maruha ogo gomulyo kukwatera mo magadi gosikorama. Muisraeli ogu nga gava nzambo ozo kwa likidire asi age kwa here kupa Jehova yoyiwa po. Mokulifana, Jesus kwa pere Jehova yoyiwa po pokumukarera nomutjima nagunye morwa ga mu here. (Joh. 14:31) Kurugana mpango zaJehova kwa reterere Jesus ruhafo ntani age kwa here unene nompango daJehova. (Epis. 40:8) Yosili, Jehova kwa hefe apa ga mwene Jesus kuna kumukarera nomutjima nagunye.

11. Ngapi eyi atu ruganene Jehova ya lifana nononzambo dombili, ntani ngapi ayi tu hengagwida?

¹¹ Ngwendi nonzambo odo dombili, apa atu karere Jehova kutundilira komutjima ayo kulikida omu atu lizuvhu kumuhamena. Ose kupa Jehova yoyiwa morwa twa mu hara nomutjima nagunye. Ayo kuhafesa Jehova apa a mono mamiliyona govantu vendi kuna kumukarera morwa va mu hara nonompango dendi. Ayo kutuhengagwida pokudiva asi Jehova kapi tupu a tara nokuhafera eyi atu mu ruganene, nye age hena kutara konda zeyi atu yi ruganene. Pasihonena, nsene asi ove mukurupe ntani kapi o vhuru kurugana eyi wa hara, kara nehuguvaro asi Jehova kukwata egano ukaro woge. Kuvhura o lizuvhe asi kapi to vhuru kuruganena Jehova unene, nye Jehova kumona eharo lyenene eli wa kara nalyo eli ali kutumangeda o rugane eyi ono kuvhura. Age kuyihafera apa o mu ruganene paapa wa hulira.

12. Ngapi nga lizuvhu Jehova kuhamena nonzambo dombili, ntani ngapi ayi tu korangeda?

¹² Yisinke natu lirongera ko kononzambo dombili? Apa mundiro ngagu swakerere maruha gosimuna gomawa po, musi ngagu zi meguru ano eyi ngayi hafesa Jehova. Yipo nye, Jehova age kuyihafera apa atu mu karere nomutjima nagunye. (Koros. 3:23) Gazara tupu omu ayi hafesa Jehova apa a mono nayinye eyi omu ruganene. Yi kare asi yoyinunu ndi yoyinene, age kuyitara asi mulyo ntani ngayi diworoka narunye.—Mat. 6:20; Heb. 6:10.

13. Kuliza naLevitikus 9:23, 24, ngapi ga yi likidire Jehova asi ana panda vapristeli wovape?

¹³ Sirongwa saune: Jehova kuna kutungika mbunga zendi zepevhu. Koneka eyi ya horokere apa nkongoronzugo va zi dikire pepi noNdundu zaSinayi momvhura 1512 komeho Jesus a wize pevhu. (Ex. 40:17) Mosesa kwa pitisilire silika sokutura Arona novana vendi va kare vapristeli. Muhoko goVaisraeli kwa pongere yipo va tarere omu vapristeli vana kugava nonzambo dawo doyimuna sikando sokuhova. (Lev. 9:1-5) Yisinke ga rugene Jehova mokulikida asi ana panda vapristeli owo wovape? Apa Arona naMosesa va tungikire vantu, Jehova kwa  tumine mundiro gu tunde meguru nokuveveka nzambo ezi za kere posizambero.—Resa Levitikus 9:23, 24.

14. Wolye va fanekesa vapristeli womosiruwo soVaisraeli naina?

¹⁴ Yisinke gwa likidire mundiro ogu gwa tundire meguru? Ago kwa likidire asi Jehova kwa tambwire Arona novana vendi va kare vapristeli. Apa Vaisraeli va dimbwilire asi Jehova ana panda vapristeli owo, ayo kwava tumangedere vava kwatese ko. Yisinke tuna kulirongera ko kosihorokwa esi? Vapristeli owo kwa fanekesere vapristeli womulyo po unene. Kristusa, Mupristeli gomunene kwa kara novapristeli 144 000 ava ngava ka rugana kumwe nage meguru.—Heb. 4:14; 8:3-5; 10:1.

15-16. Ngapi ga yi likida Jehova asi age kuna kukwatesa ko “mukareli gokulimburukwa gonondunge”?

¹⁵ Momvhura 1919, Jesus kwa tumbire kambungagona koVakriste wovagwavekwa va kare “mukareli gokulimburukwa gonondunge.” Mukareli ogo kugendesa sirugana sokuzuvhisa ntani kugava “nondya posiruwo sado” kovarongwa vaKristusa. (Mat. 24:45) Nose twa yi pura nawa-nawa asi Jehova kuna kuvakwatesa ko ndi?

¹⁶ Satana ntani novantu vendi kuna kukondja mokuhagekesa po sirugana somukareli gokulimburukwa. Ngano Jehova kapi a vatere mukareli gokulimburukwa, ngano sirugana sawo kapi a si va tompoka. Mukareli gokulimburukwa kwa twikira kugava nondya dopampepo kovasikuli vaKristusa vepevhu nampili ngomu mouzuni mudima mwa kere yita yoyinene nesesupo lyoyimaliwa ntani nehepeko lyovakareli vaJehova. Gazara tupu sivaro soyimbapiratjangwa yomawoko-woko  eyi tuna kara nayo ngesi momaraka gokupitakana 900! Eyi kulikida nawa-nawa asi Jehova kuna kukwatesa ko mukareli gokulimburukwa. Sirugana sokuzuvhisa, kuna kara hena umbangi umwe. Mbudi zongwa ngesi kuna kuzizuvhisa “mwa za uzuni mudima.” (Mat. 24:14) Yosili, Jehova kuna kupitisira mbunga zendi naina nokuzitungika.

17. Ngapi natu yi likida asi ose kuna kukwatesa ko mbunga zaJehova?

¹⁷ Twa hepa kulipura asi: ‘Ame kulizuvha mfumwa kweyi na hama koruha rwepevhu rombunga zaJehova ndi?’ Mosiruwo saMosesa, Jehova kwa tumine mundiro gu tunde meguru mokulikida asi ana panda vapristeli wovape. Mokulifana, Jehova kwa tu pa maumbangi aga gana kulikida asi age kuna kugendesa mbunga zendi naina. Yosili yininke yinzi eyi ga tu ruganena Jehova, eyi natu vhura kumupandwira. (1 Tes. 5:18, 19) Ngapi omu natu kwatesa ko mbunga zaJehova? Pokulimburukwa mavyukiso aga atu gwana moyimbapiratjangwa, komapongo ntani koyigongi. Ntani pokulitura mo unene paapa twa hulira mosirugana sokuzuvhisa nesi sokuronga.—1 Kol. 15:58.

18. Yisinke ono tokomene kurugana?

¹⁸ Tu tokomeneni kusikisa mo yirongwa eyi tuna lirongere mo mobuke zaLevitikus. Tu ruganeni ko yuma yipo Jehova a tambure nokuhafera nonzambo detu. Tu karereni Jehova morwa twa kara norupandu kweyi ga tu ruganena. Tu gaveni kwaJehova yoyiwa po morwa twa mu hara nonomutjima detu nadinye. Ntani tu kwateseni ko mbunga zaJehova ezi ana kutungika momazuva getu. Nsene tu yi rugana oyo, ngatu likida Jehova asi ose kulizuvha mfumwa kweyi twa kara Nombangi dendi.