1. Yisinke ngayi tu hengagwida nsene ngatu lizuvha asi nyoselike tuna kara ndi kapi tuna kuvhura kulididimika? (Episarome 118:5-7)

WA LIZUVHA rumwe asi nyovelike ono kara ntani kwato ogu a kukuvatera o lididimikire maudigu goge ndi? Sinzi sovantu yimo ava lizuvhu ngoso, kukwatera mo vakareli vaJehova wovalimburukwi. (1 Vah. 19:14) Nsene ngo lizuvha hena ngoso, diworoka eyi ga tu tumbwidira Jehova asi: “Ame kapi ngani ku zumba ndi ni ku sige.” Ose kuvhura tu uyunge nehuguvaro asi: “Hompa yige mukwafi gwange, yinke nani tjilira.” (Heb.13:5, 6) Mupositoli Paurusa kwa tjangerere nonkango odo vapuli vakwawo womoJudeya koyiha yomvhura 61. Nonkango dendi kutudiworokesa nonkango da kara mEpisarome 118: 5-7.—Resa.

2. Yisinke natu ka zogera mosirongwa esi ntani morwasinke?

² Ngwendi mutjangi gepisarome, Paurusa ga yi divire asi Jehova mukwafi morwa ga mu vaterere yikando yoyinzi. Pasihonena, nomvhura mbali komeho a tjangere mbilive koVahebeli, Paurusa kwa ligwanekerere nekundungu lyenene mefuta apa ga kere morugendo. (Yirug. 27:4, 15, 20) Morugendo oro ntani komeho zorugendo oro, Jehova kwa vaterere Paurusa mononkedi dokulisiga-siga. Tatu ka zogera nonkedi ntatu omu Jehova ga yi likidire. Jehova kwa geve evatero kupitira mwaJesus, movaengeli, movapangeli ntani kupitira movapuli vakwawo ava va vaterere Paurusa. Nsene tu gazadara ko kweyi ya horokerere Paurusa meparu, nga yi tu vatera tu huguvare unene mwaJehova asi nga limburura makanderero getu.

3. Yisinke nampo ga lipulire Paurusa ntani morwasinke?

³ Paurusa ga hepere evatero. Momvhura 56, mbunga zovantu kwa mu kokerere ponze zontembeli moJerusarema ntani kwa here va mu dipage. Ezuva lyokukwama ko, apa Paurusa va mu twere mosigongi somasimbi, nonkore dendi hambara di mu lipapagwire. (Yirug. 21:30-32; 22:30; 23:6-10) Apa ga kere moukaro owo, Paurusa nampo ga lipulire asi ‘siruwo sokuhura kupi nani lididimikira ukaro ou?’

4. Ngapi omu Jehova ga ruganesere Jesus a vatere Paurusa?

⁴ Ngapi omu Jesus ga vaterere Paurusa? Konyima zomasiku apa va mu kwete Paurusa, Jesus kwa mu monekerere nokumutantera asi: “Kwata mutjima, Paurusa! Moomu wa gavera nge umbangi moJerusarema nomoRoma, yimo ngorooro ngo ka u gava.” (Yirug. 23:11) Yosili alyo kwa kere ekorangedo posiruwo sokuwapera! Jesus kwa pandadekere Paurusa koumbangi ou ga geve moJerusarema. Ntani age kwa mu huguvaresere asi ta ka sika moRoma, omu na ka gavera umbangi hena. Konyima zokugwana ekorangedo olyo, Paurusa nampo ga lizuvhire egameno ngamoomu tupu munona a lizuvhu epopero mokuwoko koguhwe.

5. Ngapi omu Jehova ga ruganesere muengeli a vatere Paurusa? (Tara efano lyopontunda.)

⁵ Maudigu musinke hena gamwe ga ligwanekerere nago Paurusa? Konyima zonomvhura mbali kutunda apa va mu homokerere Paurusa moJerusarema, age kwa zire koItalia nosikepa. Awo kwa ligwanekerere nemukundungu lyenene, ano musingi gosikepa ntani novarondi mo kwa gazarere asi tava fu. Nye Paurusa kapi ga kere nowoma. Morwasinke? Age kwa tanterere ava va kere mosikepa asi: “Yeeyi masiku aga ganaina muengeli gwaKarunga ogu na hama ani ruganene, ka monekerere nge. Age kuna tanta asi: ‘Neisi no tjira, Paurusa. Kosipara sahompa gwaRoma yiko tupu ngo ka sikama. Ano navenye ava muna kugenda nawo, Karunga nyone ana va pe.’” Jehova kwa ruganesere muengeli a ruguruke kutantera Paurusa nonkango dehuguvaro. Nonkango odo da lifana nedi Jehova ga tanterere Paurusa pomuhowo kupitira mwaJesus. Yosili, Paurusa ga ka sikire koRoma.—Yirug. 27:20-25; 28:16.

6. Yisinke ga tu tumbwidira Jesus eyi nayi tu nkondopeka ntani morwasinke?

⁶ Ngapi omu Jesus a tu vatere? Jesus nga tu vatera ngwendi moomu tupu ga vaterere Paurusa. Pasihonena, Jesus kwa tumbwidira navenye ava ava mu kwama asi: “Ame neni ngani kara dogoro nokouhura  wouzuni.” (Mat. 28:20) Nonkango odo daJesus kutunkondopeka sili. Morwasinke? Morwa pamwe ose kutukarera udigu kulididimikira. Pasihonena, apa atu fisa muntu ogu twa hara, ose kulididimikira kukora nomvhura dononzi. Ano vamwe kulididimikira ukurupe. Ntani vamwe kukara nosinka sosinene. Nampili ngoso, ose kutwikira kulididimikira morwa twa yi diva asi Jesus nga kara kumwe nose nkenye apa nampili momaudigu aga ngatu ligwanekera nago meparu.—Mat. 11:28-30.

7. Kuliza nEhororo 14:6, ngapi omu Jehova a tu vatere naina?

⁷ Nonkango daKarunga kututantera asi Jehova kutuvatera pokuruganesa vaengeli. (Heb.1:7, 14) Pasihonena, vaengeli kutugamena nokutupopera ngomu atu zuvhisa ‘mbudi zongwa zoUhompa kovantu wokoyirongo nayinye nomaraka nagenye ntani komarudi nagenye.’—Mat. 24:13, 14; resa Ehororo 14:6.

8. Ngapi omu Jehova ga ruganesere mupitisili govakwayita a vatere Paurusa?

⁸ Evatero musinke ga gwene Paurusa? Momvhura 56, Jesus kwa tanterere Paurusa nonkango dehengagwido asi ta ka sika moRoma. Nye Vajuda vamwe moJerusarema kwa liyongere asi ngapi omu nava homokere Paurusa nokumudigapa. Apa ga yi zuvhire Keraudiusi Lisiyasa, mupitisili govakwayita woVaroma,, ta popere Paurusa. Makura Keraudiusi ta tantere vakwayita vendi va popere Paurusa nokumutwara usimbu-simbu koKesareya ezi za kere ure wonokilometa 105 kutunda koJerusarema. Apa va ka sikire koKesareya, mupangeli Felikisi kwa penge asi Paurusa “va mu takamesere mosinyanga saHerodesa.” Vajuda ava va here kudipaga Paurusa kapi va mu gwene.—Yirug. 23:12-35.

9. Ngapi omu mupangeli Fesitusa ga vaterere Paurusa?

⁹ Konyima zonomvhura mbali, Paurusa kwa kere simpe modorongo moKasereya. Ano Fesitusa yige ga kere mupangeli posiruwo esi. Vajuda kwa likwambererere Fesitusa a pulisire Paurusa a ze koJerusarema va ka mu pangure, nye Fesitusa ta nyoka. Nampo Fesitusa ga yi divire asi Vajuda kwa here ‘kuvandera Paurusa yipo ngava mu dipagere monzira.’—Yirug. 24:27–25:5.

10. Yisinke ga rugene mupangeli Fesitusa apa Paurusa ga pulire nsene kuvhura a ze koRoma?

¹⁰ Konyima, mpanguro zaPaurusa kwa ka karerere moKesareya. Fesitusa kwa here “kulimonekesa uwa koVajuda,” makura ta pura Paurusa asi: “Kapi ono hara o ze moJerusarema ni ka ku purakenene ko yininke eyi?” Paurusa ga yi divire asi tava ka mu dipaga moJerusarema ntani ga divire eyi na rugana a popere eparu lyendi nokukasika koRoma a ka twikire nosirugana sendi. Age ta limburura asi: “Ame kwahompa gwaRoma nina tara!” Apa Fesitusa ga mene kulikunda nosigongi, ta uyunga asi: “Moomu ono tara kwahompa gwaRoma, kwahompa gwaRoma ngo za!” Etokoro lyaFesitusa lyokutuma Paurusa koRoma lya poperere Paurusa kononkore dendi. Paurusa kwa ka kere moRoma ure noVajuda ava va here kumudipaga.—Yirug. 25:6-12.

11. Nonkango musinke nampo ga gazadarere ko Paurusa edi ga tjenge Jesaya?

¹¹ Ngomu Paurusa ga ndindilire rugendo rwendi rokoItalia, nampo ga gazadarere ko kerondoro eli ga geve muporofete Jesaya kwava ava rwanesa Jehova asi: “Pangeni nompangera! Nye kapi ngadi mu tompoka. Uyungeni moomu muna harere! Nye kutupu sikwafa, yeeyi Karunga nose ga kara.” (Jes. 8:10) Paurusa ga yi divire asi Karunga na mu vatera ntani ayo ya mu nkondopekere  a lididimikire maudigu aga ga kere komeho.

12. Ngapi omu Juliusa ga tekwire Paurusa, ntani yinke nampo ga dimbwilire Paurusa?

¹² Momvhura 58, Paurusa yipo ga tamekere rugendo rwendi rokuza koItalia. Juliusa, mupitisili govakwayita woVaroma, yige nga takamesa Paurusa morwa Paurusa kwa kere munadorongo. Kutunda posiruwo oso, Juliusa ga kere nononkondo dokurugana nkenye eyi kwaPaurusa. Ngapi omu ga ruganesere unankondo wendi? Ezuva lyokukwama ko, apa va hegekere sikepa, “Juliusa kwa tekwire Paurusa nombili ntani ga mu pulisilire a ze kovakwawo.” Konyima, Juliusa ga ya parwire Paurusa. Ngapi ga yi rugene? Vakwayita kwa here kudipaga vanadorongo navenye ava va kere mosikepa, nye Juliusa kwa va keve. Morwasinke? Age “kwa tokomenene kukasikisa Paurusa moukanguki.” Paurusa nampo ga yi dimbwilire asi Jehova kwa ruganesere mupitisili gwina govakwayita a mu popere.—Yirug. 27:1-3, 42-44.

13. Ngapi omu Jehova na vhura kuruganesa vapangeli?

¹³ Evatero musinke atu gwana? Nsene Jehova ana hara kusikisa mo mpango zendi, age kuvhura kuruganesa mpepo zendi zokupongoka zi ninkise vapangeli va rugane eyi ana hara. Hompa Saromo kwa tjenge asi: “Yigazo yaHompa kwa kara mepangero lyaHOMPA moomu a pangere kupupa komema. Age kuyitwaredera nkenye oku ana hara.” (Yis. 21:1) Yisinke asi tanta sisewe esi? Vantu kuvhura va sime mukanko yipo mema ga ze oku vana ga harere. Mokulifana, Jehova kuvhura a ruganese mpepo zokupongoka zi tjindje yigazo yovapangeli yipo va rugane yininke eyi nayi sikisa mo sitambo sendi. Apa ayi horoka oyo, vantu vemepangero kutulisa po matokoro aga naga ninkisa vakareli vaJehova va gwanene mo mauwa.—Hetakanesa Esira 7:21, 25, 26.

14. Kuliza noYirugana 12:5, wolye natu kanderera po?

¹⁴ Yisinke natu rugana? Kuvhura tu kanderere po ‘vahompa nava va kara momapangero’ yipo va ture po matokoro gomawa aga ngaga kundama monaruwa mapongo getu nosirugana setu sokuzuvhisa. (1 Tim 2:1, 2; Neh. 1:11) Twa hepa kukanderera po vanavazinyetu ava vana kara monodorongo ngwendi moomu va yi rugene Vakriste womosiruwo sanare. (Resa Yirugana 12:5; Heb. 13:3) Ntani kuvhura tu kanderere po vakungi wodorongo ava vana kukunga vanavazinyetu. Kuvhura tu likwambere kwaJehova yipo a tjindje nondunge dawo va kare ngwendi mupitisili govakwayita  Juliusa ntani va tekure nonkenda vanavazinyetu ava vana kara modorongo.

15-16. Ngapi omu Jehova ga vaterere Paurusa pokuruganesa Aresitarekusi naRukasa?

¹⁵ Evatero musinke ga gwene Paurusa? Morugendo rwendi zokuza koRoma, Paurusa ga gwene evatero lyaJehova kupitira movapuli vakwawo. Tu tareni yihonena yimwe.

¹⁶ Vakaume vavali vaPaurusa, Aresitarekusi naRukasa kwa tokwere kuza nage koItalia. * Bibeli kapi za tanta asi Jesus kwa tumbwidilire Aresitarekusi naRukasa asi ngava ka sika moRoma vandjewa-ndjewa. Yipo nye, awo kwa tulire eparu lyawo mosiponga apa va zire morugendo oro rosiponga naPaurusa morwa va here kumuvatera. Konyima apa va kere noudigu morugendo ntani nye va dimbwilire asi eparu lyawo mepopero lya kere. Apa Aresitarekusi naRukasa va rondere mosikepa moKesareya, Paurusa nampo kwa kanderere kwaJehova nokumupandura kevatero eli ga mu pere yipo a gende novapuli vakwawo owo vavali.—Yirug. 27:1, 2, 20-25.

17. Ngapi omu Jehova ga vaterere Paurusa pokuruganesa vapuli vakwawo?

¹⁷ Yiruwo yoyinzi Paurusa ngava mu vatere vapuli vakwawo morugendo rwendi. Pasihonena, pezenga lyositata saSidoni, Juliusa kwa pulisilire Paurusa a ze kovakwawo va ka mu pakere mbili. Ano konyima mositata saPuteoli, Paurusa novakaume vendi kwa ka gwene “vapuli vakwawo ntani kwava tanterere va kare kumwe nawo mazuva ntambali.” Ngomu Vakriste vakwawo ngava pakere mbili yihepwa yaPaurusa novakaume vendi, nampo Paurusa ga va simwitilire ko yihorokwa yoyiwa. (Hetakanesa Yirugana 15:2, 3) Konyima zedinguro olyo, Paurusa novakwawo kwa twikilire norugendo rwawo.—Yirug. 27:3; 28:13, 14.

18. Yisinke ya tumangedere Paurusa a pandure Jehova ntani nokukara nouradi?

¹⁸ Ngomu Paurusa ga kere morugendo  rokoRoma, nampo ga gazadarere ko eyi ga tjenge nomvhura ntatu da ka pita kombungakriste zomositata oso asi: “Nomvhura dononzi dorutjima rokuyamudingura ko.” (Rom 15:23) Nye nampili ngoso, kapi ga yi ndindilire asi ngava ka mu tura modorongo. Ayo ya mu korangedere pokumona vapuli vakwawo womoRoma kuna kumundindira yipo va mu tambure. Ano “Paurusa apa ga va mwene, ta pandura Karunga, mutjima gwendi tagu zi mo nye.” (Yirug. 28:15) Paurusa kwa pandwire Karunga kweyi ga mwene vapuli vakwawo. Morwasinke? Morwa Paurusa ga dimbwilire asi Jehova kwa ruganesere vapuli vakwawo va mu vatere.

19. Ngomu va yi tumbura mwa-1 Peturusa 4:10, ngapi omu Jehova natu ruganesa yipo tu vatere ava vana hepa ekwafo?

¹⁹ Yisinke natu rugana? Wa diva ko vanavazinyetu womombungakriste ava vana dompo mutjima morwa kuvera ndi morwa maudigu gamwe ndi? Ndi nampo kwa fisa gumwe. Nsene twa va diva, kuvhura tu pure Jehova a tu vatere tu dive eyi natu uyunga ndi eyi natu rugana yipo tu va likide eharo. Eyi natu uyunga ndi natu rugana kuvhura yi korangede vanavazinyetu. (Resa 1 Peturusa 4:10.) Nsene tu va vatera, awo kuvhura ngava huguvare nawa-nawa metumbwidiro lyaJehova eli asi: “Ame kapi ngani ku zumba ndi ni ku sige.” Ose ngatu hafa sili apa ngatu va vatera.

20. Morwasinke natu uyungira nehuguvaro asi: “Hompa yige mukwafi gwange”?

²⁰ Ngwendi moomu tupu ya horokerere Paurusa novakaume vendi, nose ngatu ligwanekera nomaudigu meparu. Nye kuvhura tu ga lididimikire morwa Jehova nose ga kara. Age kutuvatera kupitira mwaJesus ntani novaengeli. Ntani Jehova kuvhura kuruganesa vapangeli va tu vatere tu sikise mo sitambo sendi. Ntani sinzi setu twa yi limonena omu Jehova a ruganesa mpepo zendi zokupongoka yipo zi gendese vapuli vakwetu va tu vatere. Yipo nye, ngwendi Paurusa nose kuvhura tu uyunge nehuguvaro asi: “Hompa yige mukwafi gwange, yinke nani tjilira. Muntu a tompore nge yinke?”—Heb. 13:6.