1-2. Ngapi natu kwama mapukururo ga kara moVafilipi 3:13? Gava sihonena.

GAZADARA KO koyihonena eyi yitatu. Sokuhova, munazinyetu gomukadi gomukurupe kuna kuteda ko eyi nga hafere nare. Nampili ngomu eparu lyendi lina digopa, age kuna kutwikira kuruganena Jehova paapa ga hulira kuliza noukaro wendi. (1 Kol. 15:58) Nkenye ezuva age kulimona mwene mouzuni woupe novahali vendi. Sauvali, munazinyetu gumwe gomukadi kwa kudiworoka omu ga mu koresere mupuli mukwawo nare, nye ta tokora kunyokera po nkoko. (Koros. 3:13) Sautatu, munazinyetu kudiworoka mapuko aga ga tulire po nare nye ngesi ana tokomene kulimburukwa Jehova.—Epis. 51:10.

² Ngapi maukaro aga govanavazinyetu ga lifana? Navenye kudiworoka eyi ya va horokera nare, nye kapi ava yi gazara nkenye apa. Nye awo kunwika kweyi yokomeho.—Resa Vafilipi 3:13.

3. Morwasinke natu nwikira kweyi yokomeho?

³ Morwasinke ya karera nomulyo tu nwike kweyi yokomeho? Muntu ogu a tara-tara konyima kapi a gendi kuvyukilira, nose kapi tatu vhuru kukarera Jehova nawa-nawa nsene tu demenena kweyi yanare.—Ruk. 9:62.

4. Yisinke natu ka zogera mosirongwa esi?

⁴ Mosirongwa esi tatu ka zogera yininke yitatu eyi nayi vhura kutuninkisa tu demenene kweyi ya tu horokera nare. Ayo kuna kara: (1) kugazara asi eparu lyetu li fane ngwendi lyanare, (2) nkoko ntani (3) kulizuvha unzoni wounene. Mwankenye maruha ogo, tatu ka zogera omu nompango domoBibeli nadi tu vatera, yipo tu dire kudemenena koyininke “yanare”  nye tu demenene kweyi “yokomeho.”—Fil. 3:13.

5. Kuliza naMuudisi 7:10 NW, yisinke natu nyokera po kugazara?

⁵ Resa Muudisi 7:10. NW. * Velise ozo kapi za uyunga asi ayo epuko kulipura asi: “Morwasinke mazuva ganare ga waperere?” Kugazara yininke yoyiwa yanare, awo uhwi wokutunda kwaJehova. Nye velise kutanta asi walye o uyunga asi: “Morwasinke mazuva ganare ga waperere unene kupitakana gantaantani?” Twa hepa kutakamesa asi kapisi tu hetakanese eparu lyetu lyanare neli lyantaantani ntani nokunyokera po kugazara asi yininke yina yipa kupitakana pwanare.

6. Morwasinke ya karera ugova kugazara asi eparu lyetu kwa wepe nare? Gava sihonena.

⁶ Morwasinke ya karera ugova kugazara nkenye apa asi eparu lyetu kwa wepe nare? Nsene tu gazara asi eparu lyetu ngano li fane ngwendi lyanare, ose ngatu diworoka tupu yininke yoyiwa nokudivara yoyidona. Gazadara ko kuhamena Vaisraeli. Konyima zapa va tundire moEgipite, awo kwa divarere omu lya digopere eparu lyawo. Nye awo kwa diworokere nondya donongwa edi ngava hafere. Awo kwa uyungire asi: “MoEgipite ngatu lyaalya tupu nomfi mawoko-woko. Ndi o gazare nye rwene rupotera nakatjama nehidi ndi dene nonyanga nonohaki nye!” (Num. 11:5) Nye ngoso awo ngava li nondya ‘domawoko-woko’ ndi? Hawe. Vaisraeli ngava va hepeke unene posiruwo sina, awo kwa kere vapika moEgipite. (Ex. 1:13, 14; 3:6-9) Nye awo kwa divarere omu ngava hepa. Awo kwa demenene po tupu eyi ngava hafere mevango lyokudemenena koyininke yoyiwa eyi gava ruganene Jehova. Nkareso zawo kapi za hafesere Jehova.—Num. 11:10.

7. Yisinke ya vaterere munazinyetu gomukadi a nyokere po kugazara asi eparu lyendi lyanare kwa wepe?

⁷ Morwasinke natu nyokerera po kugazara asi eparu lyetu li fane ngwendi lyanare? Tu tareni sihonena samunazinyetu gomukadi ogu ga tamekere kurugana moBeteli  zaBrooklyn mo-1945. Konyima zonomvhura dongandi, ta kwara Mubeteli mukwawo, awo kwa rugene moBeteli nomvhura dononzi. Nye mo-1976, mugara gwendi kwa tamekere kuvera. Age kwa tanta asi apa mugara gwendi ga mwene asi ntaantani a fe, yipo ga mu pere ko makorangedo ga mu vatere a lididimikire. Mugara gwendi kwa uyungire asi: “Nonkwara detu kwa kara doruhafo, ntani sinzi sovantu kapi ava gwana ruhafo rwangoso.” Age kwa mu tanterere hena asi: “Kapi ngo divara omu twa hafera kumwe eparu, nye kapisi ngo yi gazare unene. Ngomu nga si pita siruwo, ove ngo lizuvha ko hansa. Kapisi ngo guve unene. Ngo diworoke yiruwo yoyiwa eyi twa hafera kumwe mokukarera Jehova. Kugazara kuna kara uhwi wokutunda kwaJehova.” Aga kwa kere magano gomawa sili.

8. Ngapi omu munazinyetukadi ga mu vaterere magano gamugara gwendi?

⁸ Munazinyetu ogo gomukadi kapi ga divarere eyi ga mu tanterere mugara gwendi. Age kwa twikilire kukarera Jehova dogoro apa ga ya dogorokere nonomvhura 92. Nomvhura dongandi komeho a ka fe, age kwa uyungire asi: “Apa ani gazara nomvhura nadinye 63 edi na karera Jehova mosirugana sosiruwo nasinye, ame kudimburura asi ame kwa hafera eparu.” Morwasinke? Age kwa faturura asi: “Ose kuvhura tu hafe meparu morwa ose kwa hamena kepata lyovapuli vakwetu, twa kara nehuguvaro lyokuparuka moparadisa novanavazinyetu ntani morwa ngatu ka karera Musiti gwetu Jehova narunye.” * Kuvhura tu lirongere ko kwamunazinyetu ogu ga nwikire kweyi yokomeho.

9. Ngomu va yi tambura mwaLevitikus 19:18, Siruwoke ayi tu karere udigu kusiga nkoko?

⁹ Resa Levitikus 19:18. Ayo kutukarera udigu kusiga nkoko unene po nsene asi ogu ga tu zonena munazinyetu, ndi kaume gwetu gomunene ndi gekoro lyetu. Pasihonena,  munazinyetukadi gumwe kwa mu rundilire mupuli mukwawo asi ana vaka yimaliwa yendi. Konyima, munazinyetu ogu ga mu rundilire ta pura egusiro po, nye munazinyetu gomukadi ogu va rundilire kwa handukire ntani kwa twikilire kugazara eyi ya horokere. Nove wa ligwanekera rumwe noukaro ou ndi? Yi kare asi kapi twa ligwanekera noukaro ou, nye natuvenye nampo twa kere nonkoko ntani nampo twa lizuvhire asi kapi ngatu gusira po ogu ga tu zonena.

10. Yisinke nayi tu vatera nsene twa kara nonkoko?

¹⁰ Yisinke nayi tu vatera nsene twa kara nonkoko? Twa hepa kudiworoka asi Jehova kumona nayinye. Age ga diva eyi tuna kupita, kukwatera mo nsene kwa kututekura momudona. (Heb. 4:13) Nage kulizuvha kukora apa atu hepa. (Jes. 63:9) Ntani ga tumbwidira asi nga ka gusa po maudona nagenye.—Ehor. 21:3, 4.

11. Mauwa musinke ngatu gwanena mo nsene tu nyokera po nkoko?

¹¹ Twa hepa kudiworoka hena asi apa atu nyokere po nkoko, ose kugwanena mo mauwa. Eyi yiyo ga dimbwilire munazinyetu gomukadi ogu va rundilire. Konyima kapi ga ya kere hena nonkoko. Age ga ya dimbwilire asi apa atu gusire po wopeke, Jehova nage kutugusira po. (Mat. 6:14) Ga yi divire asi eyi ga mu rugene mupuli mukwawo kwa kere epuko, nye kapi ya mu ninkisire a kare nonkoko. Ngoyitundwamo, munazinyetu kwa hefe ntani kwa twikilire kukarera Jehova ga hana kukara nonkoko.

12. Yisinke natu lirongera ko ketjangwa lya-1 Johanesa 3:19, 20?

¹² Resa 1 Johanesa 3:19, 20. Natuvenye kulizuvha unzoni poyiruwo yimwe. Pasihonena, vamwe kulizuvha unzoni kweyi va rugene komeho va lironge usili. Vamwe kulizuvha unzoni komapuko aga va tulire konyima zokugwana ekuho. (Rom. 3:23) Ose kwa hara kurugana yoyiwa, nye “natuvenye kupuka popanzi.” (Jak. 3:2; Rom. 7:21-23) Nampili ngomu atu dili kuyihafera apa atu lizuvhu unzoni, nye kulizuvha unzoni kuvhura kutuvatera. Monkedi musinke? Apa atu lizuvhu unzoni, ayo kutuvatera tu tjindje eparu lyetu ntani tu tokomene kudira kurugana mapuko gokulifana.—Heb. 12:12, 13.

13. Morwasinke natu nyokera po kulizuvha unzoni kononzo detu danare?

¹³ Ayo siponga unene kulizuvha unzoni wounene kononzo edi twa litezurura ntani edi ga tu gusira po Jehova. (Epis. 31:10; 38:3, 4) Morwasinke ya karera siponga? Tu tareni sihonena samunazinyetu gomukadi ogu nga lizuvhu unzoni morwa nonzo edi ga tulire po nare. Age kwa tjenge asi: “Ame kwa lizuvhire asi ame kwato mulyo mosirugana saJehova, morwa kuvhura ngani dire kukaparuka.” Sinzi setu nampo yimo atu lizuvhu poyiruwo yimwe. Twa hepa kutakamesa asi kapisi tu lizuvhe unzoni wounene nkenye apa kononzo detu danare. Morwasinke? Morwa Satana nga hafa nsene tu hageka kukarera Jehova nampili ngomu ga tu gusira po.—Hetakanesa 2 Vakolinte 2:5-7, 11.

14. Ngapi omu natu yi diva asi Jehova ga liwapaikira kutugusira po?

¹⁴ Nye simpe kuvhura tu lipure asi, ngapi omu nani yi diva asi Jehova ga liwapaikira kugusira nge po? Nsene ove kulipura epuro olyo, ayo kulikida asi Jehova nga kugusira po. Nomvhura dononzi da ka pita, Ruhungu rumwe kwa uyungire asi: “Kuvhura tu rugane mapuko gokulifana nkenye apa. Eyi kuvhura yi horoke morwa nampo kapi twa siga nkareso zetu zanare komeho tu tameke kukarera Karunga. . . . Ya ha ku dompesa. Wa ha gazara asi ove kwa tura nzo ezi nga dira kukugusira po Jehova. Satana kuna  hara o lizuvhe ngoso. Nsene ayo kukuguvisa apa o tura mapuko, ayo kulikida asi ove kapisi muntu gomudona ntani Jehova nga ku gusira po. Linunupika ntani kanderera nkenye apa kwaJehova a ku gusire po nokukuvatera o kare nezwi lyewa lyokomutjima ntani nokukuvatera o dire kutura nzo. Hedera Jehova ngamoomu munona a zi koguhwe nkenye apa nsene moudigu ana kara. Nampili yi kare asi ove kuligwanekera noupirankondo wokulifana, Jehova nga ku vatera morwa age ga kara nonkenda.” *

15-16. Ngapi omu vamwe va lizuvhire apa va ya dimbwilire asi Jehova kapi ga va sigilira?

¹⁵ Sinzi sovakareli vaJehova va gwana ehengagwido pokudiva asi Jehova kapi ga va sigilira. Pasihonena, monomvhura da ka pita, munazinyetu gumwe gomugara kwa mu gumine komutjima apa ga resere sirongwa simwe sa kara moruha “Bibeli kurundurura eparu lyovantu.” Mosirongwa oso, kwa simwitilire mo munazinyetu gomukadi ogu ga tente asi ayo kwa mu digoperere kuyipura asi Jehova ga mu hara morwa yininke yoyidona eyi ya mu horokerere meparu. Age kwa twikilire kulizuvha ngoso nampili konyima zekuho lyendi. Nye apa ga gazadarere ko unene kosizoweseso, age ga tamekere kudimburura asi Jehova ga mu hara. *

¹⁶ Ngapi sihonena oso somoRuhungu sa kundamene munazinyetu gomugara? Age kwa tjenge asi: “Apa na kere munona, ame ngani kondjo ni nyokerere po kutarera mafano goruhonda. Konyima na ya gwililire hena meheteko eli. Ame kwa pulire evatero kovakuronambunga ntani na tulire po marunduruko yipo ni funde po udigu wange. Vakuronambunga kwa vatera nge ni dimburure asi Karunga ga hara nge ntani ana hara kuvatera nge. Nye poyiruwo yimwe ame kulizuvha simpe asi kwato mulyo nokugazara asi Jehova kapi ta vhuru kuhara nge hena. Apa na resere sihorokwa samunazinyetu ogo gomukadi, aso sa vaterere nge. Ame nayi dimburura asi apa ani gazara asi Jehova kapi ta gusire nge po, ame ngwendi kuna kuuyunga asi nzambo zamunwendi  kapi za gwanena po mokudongonona po nonzo dange. Ame kwa pungura sirongwa oso yipo ni si rese nkenye apa ani lizuvhu asi ame kwato mulyo.”

17. Ngapi omu mupositoli Paurusa ga nyokerere po kulizuvha unzoni?

¹⁷ Yihonena yokufana ngesi kutudiworokesa mupositoli Paurusa. Komeho a kare Mukriste, age kwa tulire nonzo dononzi. Paurusa ga diworokere eyi ga rugene, nye kapi ga demenene kwayo. (1 Tim. 1:12-15) Age ga yi pulire asi kuvhura va mu gusire po morwa age kwa tere sizoweseso asi uhwi ou va mu pa. (Gar. 2:20) Yipo nye, Paurusa kwa nyokerere po kulizuvha unzoni wounene, ntani age kwa demenene po kuruganena Jehova unene.

18. Yisinke tuna lirongo mosirongwa esi?

¹⁸ Yisinke tuna lirongere ko koyininke yitatu eyi tuna zogere mosirongwa esi? (1) Aso sininke sosiwa sili kugazara yininke yanare, nye yi kare asi ngapi omu lya wepe eparu lyetu lyanare, eparu lyetu lyokomeho ngali ka wapa unene. (2) Vakwetu kuvhura ngava tu handukise, nye nsene tu va gusira po, ose ngatu demenena mokukarera Jehova. (3) Kulizuvha unzoni wounene nga yi tu ninkisa tu dire kukarera Jehova noruhafo. Ngwendi Paurusa, twa hepa kuyipura asi Jehova ga tu gusira po.

19. Ngapi omu twa yi diva asi mouzuni woupe kapi ngatu ka diworoka yininke yanare eyi ayi tu guvisa?

¹⁹ Ose twa kara nehuguvaro lyokukaparuka narunye. Ano mouzuni woupe, kapi ngatu ka diworoka yininke eyi ayi tu ninkisa tu guve. Bibeli kwa uyunga kuhamena siruwo oso asi: “Yihorokwa yanare ngava yi divara nuunu.” (Jes. 65:17) Gazadara ko tupu: Vamwe vetu tuna kurupa ngesi, nye mouzuni woupe ngatu ka kara vadinkantu hena. (Joba 33:25) Yipo nye, tu nyokereni po kugazara yanare. Nye tu nwikeni yokomeho mouzuni woupe nokurugana ko yuma paapa twa hulira yipo ngatu ka paruke.