1. Mapuro musinke nampo natu vhura kulipura?

OVE PAMWE kukara nosinka apa o gazadara ko koyihorokwa eyi ngayi ka horoka komeho, pasihonena, ezonaguro lyomaukarelikarunga goyimpempa, ehomono lyaGogo zaMagogo ntani yita yaHarumagedoni? Ove nampo kulipura asi ‘apa ngayi horoka yihorokwa oyo, ngani twikira kulimburukwa ndi?’ Nsene asi wa lipura mapuro ogo, nonkango edi ga uyungire Jesus demetjangwa omu sina demenene siparatjangwa esi, nadi ka ku vatera. Jesus kwa tanterere varongwa vendi asi: “Mwa ha tukuka. Pureni mwaKarunga.” (Joh. 14:1) Nsene tu kara nepuro lyokupama, nga yi tu vatera tu lididimikire eyi yina kara komeho.

2. Ngapi natu nkondopeka epuro lyetu ntani yisinke eyi natu ka zogera mosirongwa esi?

² Ose kuvhura kunkondopeka epuro lyetu yipo ngatu ka lididimikire maudigu gokomeho, nsene tu gazadara ko eyi atu rugana apa atu ligwanekere nomaudigu aga aga heteke epuro lyetu. Nsene tu yi rugana ngoso, ose ngatu diva apa ngatu wapukurura yipo tu nkondopeke epuro lyetu. Epuro lyetu kunkondopara nkenye apa atu lididimikire maudigu. Eyi nga yi tu vatera yipo tu ka lididimikire maudigu aga gana tu kara komeho. Mosirongwa esi natu ka zogera maukaro gane aga va ligwanekerere nago varongwa vaJesus, aga ga likidire asi va hepere epuro lyokupama. Ano konyima natu ka zogera omu nose natu lididimikira maudigu gokulifana neina ntani nomu natu liwapaikira yininke eyi nga yi ka horoka komeho.

3. Ngapi omu etjangwa lyaMateusa 6:30, 33, nali tu vatera tu dimburure apa twa hepa kuwapukurura yipo tu nkondopeke epuro lyetu?

³ Vanturagumbo kwa hara kupakera mbili yihepwa yovakadi vawo novana vawo, pasihonena nondya, yidwara ntani mararo.  Nye yininke eyi kapisi ureru kuyirugana moyiruwo eyi yoyidigu. Vanavazinyetu vamwe kwa zumbanesa yirugana yawo, nye nampili ngomu ava hetekere ko kupapara ko yapeke, awo kapi ava yi gwana. Vamwe kwa hageka yirugana yawo morwa kapi ya wapera Vakriste. Nsene yininke yangoso yi horoka, twa hepa kukara nepuro asi Jehova nga tu pa nayinye eyi ngatu hepa yipo tu pakere mbili epata lyetu. Jesus kwa tanterere varongwa vendi sitwa oso, pEudiso lyendi lyopoNdundu. (Resa Mateusa 6:30, 33.) Nsene tu yi pura nawa-nawa asi Jehova kapi ngatu sigilira, ayo nga yi tu vatera tu twikire kukarera Jehova. Ano ngomu tuna kumona omu Jehova ana kutupa yihepwa yetu yopanyama, ose ngatu mu hedera unene pepi ntani epuro lyetu ngali pama.

4-5. Yisinke eyi ya vaterere epata limwe apa va kere nosinka kuhamena yihepwa yawo yopanyama?

⁴ Tu zeni tu ka tare kuhamena omu epata lyomoVenezuela lya limonenene evatero lyaJehova apa va kere nosinka soyihepwa yawo yopanyama. Nare ngava gwana yimaliwa yokulireresa apa ngava rugana mofarama zawo ezi va kere nazo. Ano konyima, vagara vamwe kwa wizire nomauta nokuvagusa evango lyawo kumwe nokuvatjida po. Nturagumbo Miguel kwa tanta asi: “Ose ngesi kulima mepya lyenunu eli twa hundira kwagumwe. Nkenye ezuva ame kukanderera kwaJehova nokumuhundira yipo a tu pe yihepwa yetu yezuva olyo.” Eparu kuna kudigopera epata eli, nye morwa kuhuguvara asi Jehova ngava pa yihepwa yawo yankenye ezuva, epata lyaCastro kuza nkenye apa komapongo ntani kulihameka mokuzuvhisa. Awo kutura Uhompa muhowo ntani Jehova kuva pa yihepwa yawo eyi vana hepa.

⁵ Mosiruwo nasinye esi somaudigu, Miguel namukadendi, Yurai, kugazadara ko omu Jehova ga va pakera mbili. Poyiruwo yimwe, Jehova kwa ruganesa vapuli vakwawo yipo va va vatere noyihepwa yawo yopanyama ntani nokuvatera Miguel yipo a gwane yirugana. Ano poyiruwo yimwe, Jehova kwa ruganesa Beteli yipo zi va pe yihepwa yawo yimwe yopanyama. Jehova kapi ga va sigililire. Ngoyitundwamo, epuro lyawo kwa nkondopara unene. Konyima zokutumbura nkedi zimwe omu Jehova ga va vatera, munawo gomukondi po gomukadi, Yoselin kwa tanta asi: “Ayo kukorangeda sili mokumona omu Jehova ga tu vatera. Ame kutara Jehova ngakaume ogu a vatere nge.” Age kwa tente hena asi: “Maudigu aga lya pita epata lyetu, kwa tu vatera yipo tu liwapaikire mokukapita momaudigu gokomeho.”

6. Ngapi no nkondopeka epuro lyoge nsene yikwaeparu kuna kukudigopera?

⁶ Yikwaeparu kuna kukudigopera ndi? Nsene yimo, esi kuna kara siruwo soudigu koge. Nye nampili ngoso, ove simpe kuvhura kunkondopeka epuro lyoge. Kanderera kwaJehova nokuresa nonkango edi da kara mwaMateusa 6:25-34 ntani teda ko. Gazadara ko yihonena yovanavazinyetu womosiruwo setu, eyi ayi likida asi Jehova kupakera mbili ava ava twikire kumukarera. (1 Kol. 15:58) Nsene oyi rugana  ngoso, ove ngo kara nehuguvaro asi Jehova nga twikira kukuvatera ngwendi moomu tupu ga vatera ava va ligwanekera noudigu wokulifana ngwendi woge. Age ga diva eyi wa hepa ntani ga diva omu nayi ku pa. Nsene o dimburura omu Jehova ana kukuvatera meparu lyoge, epuro lyoge ngali pama yipo ngo ka pite momaudigu gokomeho.—Hab. 3:17, 18.

7. Kuliza naMateusa 8:23-26, ngapi omu “ekundungu lyenene” lya hetekere epuro lyavarongwa?

⁷ Apa Jesus novarongwa vendi lya va gwene ekundungu mefuta, age kwa ruganesere sihorokwa oso yipo a va vatere va kwate egano mulyo gokukara nepuro lyokupama. (Resa Mateusa 8:23-26.) Ekundungu kwa kere lyenene, ano mankumpi kwa ninkisire mema ga ze mowato, posiruwo oso age Jesus kuna rara. Apa varongwa va pindwire Jesus nokumupura a va vatere, age kwa va pulire asi: “Morwasinke muna karere nowoma ngoso one vepurogona?” Varongwa owo woutjirwe va yi dimbwilire asi Jehova kuvhura a popere Jesus nava va kere kumwe nendi. Sirongwa musinke natu lirongera ko? Nsene tu kara nepuro lyokupama, nga yi tu vatera tu lididimikire makundungu ndi maudigu gomanene aga ga fana ngwendi ekundungu.

8-9. Ngapi omu epuro lyaAnel va li hetekere ntani yisinke ya mu vaterere?

⁸ Tu zeni tu ka tare sihonena samunazinyetu gomukadi gomudike gedina Anel, ogu ga tunga moPuerto Rico, ogu ga kere nepuro lyokupama apa ga pitire moudigu. Udigu ou ga pitire kuna kara ekundungu. Udigu owo kwa tamekere mo-2017 apa ekundungu eli ava tumbura asi Maria, lya zonagwire embo lyaAnel. Ngoyitundwamo, ekundungu olyo kwa mu ninkisire hena a zumbanese yirugana yendi. Anel kwa uyunga asi: “Ame kwa kere nowoma posiruwo esi soudigu, nye ame kwa huguvarere mwaJehova nokukanderera kwendi ntani kapi na pulisilire sinka si kondere nge ni dire kurugana eyi na hepere kurugana.”

⁹ Anel kwa uyunga asi ulimburukwi kwa kere sininke simwe esi sa mu vaterere yipo a lididimikire udigu wendi. Age kwa tanta asi: “Kulimburukwa mapukururo gokutunda kombunga zaJehova kwa vaterere nge ni kare nina litura. Jehova kwa ruganesere vanavazinyetu yipo va korangede nge ntani kwa pere nge yininke eyi na hepere meparu.” Age kwa tanta hena asi: “Jehova kwa pere nge yoyinzi kupitakana pweyi na mu hundilire, ano epuro lyange kwa nkondoparere unene.”

10. Yisinke no rugana nsene kuna kuligwanekera nomaudigu gomanene?

¹⁰ Ove kuna kuligwanekera nomaudigu gomanene ndi? Ove nampo kuna kuhepa morwa simpagwa. Ndi ove nampo wa kara nouvera wounene ou au kudompesa ntani nokukuninkisa o dire kudiva eyi no rugana. Poyiruwo yimwe kuvhura o kare nosinka, nye wa ha pulisira sinka soge si kukondere mokudira kuhuguvara mwaJehova. Mu hedera pepi kupitira  mekanderero. Nkondopeka epuro lyoge pokuteda ko omu ga ku vatera. (Epis. 77:11, 12) Kuvhura o kare nehuguvaro asi age kapi nga ku sigilira ngesi ndi komeho.

11. Morwasinke natu limburukwira ava ava tu pitisire?

¹¹ Yisinke hena nayi kuvatera yipo o lididimikire maudigu? Ngwendi moomu ga yi tumbwire Anel, ulimburukwi kuvhura kukuvatera. Huguvara ava va pa situmbukira sokupitisira, ava Jehova naJesus va huguvara. Poyiruwo yimwe, ava ava tu pitisire kuvhura va tu pe mapukururo aga aga moneka ngwendi kwato mulyo. Nye diworoka asi Jehova kutungika valimburukwi. Nonkango dendi Bibeli ntani yihorokwa yovakareli vendi wovalimburukwi kulikida asi ulimburukwi kuparura. (Ex. 14:1-4; 2 Hist. 20:17) Teda ko koyihonena oyo. Nsene oyi rugana ngoso, ayo nga yi kuvatera o kwatese ko mawapaiko aga aga tundu kombunga zaJehova ngesi ntani komeho. (Heb. 13:17) Ntani hena, ove kapi ngo tjira udigu wounene ou una kara pepi.​—Yis. 3:25.

12. Kuliza naRukasa 18:1-8, elikwatakano musinke lya kara pokatji kokukara nepuro ntani nokulididimikira uhahungami?

¹² Jesus ga yi divire asi uhahungami ndi muteku gomudona, nga yi heteka epuro lyovarongwa vendi. Mokuvavatera va lididimikire, age kwa va simwitilire sifanekeso esi sa kara mobuke zaRukasa. Jesus kwa uyungire kuhamena mufisayendi ogu ga likwamberere komupangeli gomudona asi a va pangure pauhunga. Age ga yi divire asi nga gwana evatero nsene tupu a twikira kuza komupanguli ogo. Ano konyima, age ga ya gwene evatero komupanguli ogo. Sirongwa musinke natu lirongera ko? Jehova kapisi muhahungami. Jesus kwa uyungire asi: “Karunga nga dire nye kuvatera vahoroworwa vendi ava ava mu likwambere masiku nomutenya nampili ngomu a va lididimikire ndi?” (Resa Rukasa 18:1-8.) Jesus kwa uyungire hena asi: “Nye apa nga wiza MunwaMuntu nga ya gwana mo sili epuro lyangesi mouzuni ndi?” Apa atu ligwanekere nouhahungami, twa hepa kukara nepuro lyokupama ngwendi mufisayendi gwina. Nsene tu kara nehuguvaro lyokupama, ose ngatu kara nehuguvaro asi Jehova nga tu vatera. Twa hepa hena kuyipura asi ekanderero kwa kara nononkondo. Poyiruwo yimwe, makanderero getu kuvhura kugalimburura monkedi ezi atu dili kundindira.

13. Ngapi omu ekanderero lya vaterere epata limwe eli va tekwire momudona?

¹³ Tu zeni tu ka tare sihonena samunazinyetu gomukadi gedina Vero ogu ga tunga moKongo. Vero namugara gwendi gomuhapuli ntani namunawo gomukadona gonomvhura 15, va hepere kutunda momukunda gwawo nokudukira komukunda gwapeke apa vakwayita va va homokerere. Apa va ka sikire pomururani, awo kwa ka ligwene novakwayita ava va va tjilisire nokuvatantera asi tava va dipaga. Apa munazinyetu Vero  ga lilire, munawo gomukadona kwa hetekerere ko kuvakumbwida nokukanderera kumwe nawo pokuziguruka nokuruganesa edina Jehova mekanderero lyendi. Apa ga mene kukanderera, mukurona govakwayita ta mu pura asi: “Mukadona yilye ga ku ronga kukanderera?” Age ta limburura asi: “Oyina yiwo va ronga nge kukanderera pokuruganesa ekanderero lyosihonena eli lya kara mwaMateusa 6:9-13.” Makura mukurona govakwayita yipo ga uyungire asi: “Mukadona zende nombili novakondi woge, ngano Karunga goge Jehova a mu popere.”

14. Yisinke nampo nayi vhura kuheteka epuro lyetu, ntani yisinke nayi tu vatera tu lididimike?

¹⁴ Yihorokwa oyo kuturonga asi makanderero kwa kara nomulyo unene. Nye nsene makanderero goge kapi vana kugalimburura usimbu ntani monkedi zokutetukisa, kuvhura yi heteke epuro lyoge. Nsene yi kuhorokera ngoso, yisinke nayi kuvatera yipo o lididimikire? Ngwendi mufisayendi gomosifanekeso saJesus, twikira kukanderera ntani nokukara nehuguvaro asi Jehova kapi nga ku sigilira ntani mwaza siruwo nga limburura makanderero goge. Twikira kuhundira Jehova a ku pe mpepo zendi zokupongoka. (Fil. 4:13) Diworoka asi Jehova ntaantani a ka kutungike momunene ntani noku ka divara maudigu aga wa pita. Ngomu ono kulididimikira maudigu nevatero lyaJehova, ove ngo nkondopara ntani nga yi ka kuvatera yipo o ka lididimikire maudigu aga gana kara komeho.​—1 Pet. 1:6, 7.

15. Kuliza naMateusa 17:19, 20, udigu musinke va kere nawo varongwa vaJesus?

¹⁵ Jesus kwa tanterere varongwa vendi asi epuro ngali va vatera va lididimikire maudigu. (Resa Mateusa 17:19, 20.) Sikando simwe awo kapi va vhulire kutjida mo nompepo donondona ngwendi moomu ngava yi rugana poyiruwo yimwe. Udigu musinke wa kere po? Jesus kwa va tanterere asi va hepere kukara nepuro lyenene. Age kwa va tanterere asi nsene va kara nepuro lyokupama, ayo nga yi va vatera va lididimikire maudigu gomanene. Neina, nose kuvhura tu ligwanekere nomaudigu gomanene.

16. Ngapi omu epuro lya vaterere Geydi a lididimikire ruguwo rorunene apa mugara gwendi va mu dipagere?

¹⁶ Tu zeni tu ka tare sihonena samunazinyetu Geydi, ogu ga tunga moGuatemala. Mugara gwendi Edi, kwa mu dipagere apa va tundire kumwe kepongo. Yisinke ya vaterere Geydi yipo a lididimikire udigu owo? Age kwa tanta asi: “Makanderero kuvatera nge ni twike Jehova maudigu gange ano eyi kuretera nge mbili. Jehova kuvatera nge kupitira mekoro lyange ntani novakaume vange womombungakriste. Kulitura mo unene mosirugana sokuzuvhisa kuvatera nge yipo ni dire kuguva unene ntani yipo ni dire kukara nosinka kuhamena yokomeho. Sihorokwa esi kwa ronga nge asi yi kare asi yisinke eyi ngani ligwanekera nayo komeho, ame ngani vhura kulididimikira mevatero lyaJehova naJesus nombunga zaJehova.”

17. Yisinke natu rugana nsene kuna kuligwanekera noudigu wounene?

 ¹⁷ Ove wa fisa muhali goge ndi? Litulira po siruwo sokunkondopeka epuro lyoge pokuresa yihorokwa yomoBibeli yovantu ava va vhumbwire. Ove ono guwu morwa gumwe gekoro lyeni kwa mu gusa mombunga ndi? Lironga yipo o dive asi episuro lyokutunda kwaKarunga ewa nkenye apa. Yi kare asi udigu musinke ono kuligwanekera nawo, yi tara asi azo kuna kara mpito zokunkondopeka epuro lyoge. Tantera Jehova kuvyukilira omu ono kulizuvha. Kara pepi novanavazinyetu. (Yis. 18:1) Rugana yininke eyi nayi kuvatera o lididimikire udigu woge, nampili ngomu pamwe nayi kulilisa. (Epis. 126:5, 6) Twikira kuwiza komapongo, lihameka mo mokuzuvhisa ntani resa Bibeli nkenye ezuva. Ntani twikira kugazara kuhamena matumbwidiro aga nga ka ku pa Jehova komeho. Apa o mono omu Jehova a ku vatere, epuro lyoge ngali nkondopara unene.

18. Yisinke no rugana nsene o dimburura asi epuro lyoge kapi lina pama?

¹⁸ Ya ha kudompesa nsene asi maudigu aga wa ligwanekera nago nare ndi aga ono kuligwanekera nago ga kuninkisa o dimburure asi epuro lyoge kapi lina pama. Tara maudigu ogo asi azo kuna kara mpito zongwa koge mokunkondopeka epuro lyoge. Ove kuvhura o uyunge ngwendi vapositoli vaJesus ava va uyungire asi: “Tu vatera tu kare nepuro lyokupama.” (Ruk. 17:5) Ntani gazadara ko koyihonena eyi tuna zogerere mosirongwa esi. Ngwendi Miguel naYurai, diworoka yiruwo nayinye eyi ga ku vaterere Jehova. Ngwendi munaVero gomukadona ntani Anel, kanderera unene kwaJehova unene po nsene kuna kuligwanekera noudigu wounene. Ntani hena ngwendi Geydi, Jehova kuvhura kukuvatera kupitira mwava vekoro lyoge ntani movakaume woge. Nsene o pulisira Jehova a ku vatere momaudigu aga ono kuligwanekera nago ngesi, ayo nga yi ka kuvatera o ka lididimikire maudigu aga gana kara komeho.

19. Ehuguvaro musinke ga kere nalyo Jesus ntani ehuguvaro musinke no kara nalyo?

¹⁹ Jesus kwa vaterere varongwa vendi va dimburure asi va hepere kunkondopeka epuro lyawo ntani age ga kere nehuguvaro asi nevatero lyaJehova, awo ngava pita momaudigu gomanene aga gava karerere komeho. (Joh. 14:1; 16:33) Age ga kere nehuguvaro asi epuro ngali vatera emukurumbunga yipo ngali ka pite moudigu wounene. (Ehor. 7:9, 14) Nove ngo kara gumwe ogu ngo ka pita moudigu wounene ndi? Nevatero lyaJehova, ove ngo ka pita mo moudigu owo wounene nsene tupu o rugana paapa wa hulira yipo o tunge po epuro nokulinkondopeka.​—Heb. 10:39.