1. Yisinke a tu korangeda Jehova tu rugane?

EHARO lyanarunye mulyo unene kwaJehova. (Hos. 6:6) Age kukorangeda hena vakareli vendi va tare sikara oso asi mulyo unene. Kupitira momuporofete Mika, Jehova kwa tu tantera asi “tu kare neharo lyanarunye.” (Mika 6:8) Mokuninka asi tu kare nosikara oso, pomuhowo twa hepa kudiva eyi ali tanta eharo lyanarunye.

2. Yisinke eharo lyanarunye?

² Yisinke eharo lyanarunye? Nkango ezi “eharo lyanarunye” kwa moneka yikando 230 moBibeli zoNew World Translation of the Holy Scriptures. Nobibeli dimwe kwa toroka nkango eharo lyanarunye asi “nkenda” ndi “eharo.” Yipo nye, apa Matjangwa gomosirongwa esi nesi sokukwama ko ga ruganesa nkenda ntani neharo, kwa tamba keharo lyanarunye. Nye yisinke eharo lyanarunye? Nsene gumwe ga kara neharo lyanarunye, age kwa hara unene mukwawo ntani nga twikira kuhama kwendi. Rorunzi eharo lyanarunye kwa tamba keharo eli ga kara nalyo Karunga kovantu, nye hena kwa tamba keharo eli ava lilikida vantu. Jehova yige a likida po unene eharo lyanarunye. Mosirongwa esi, natu ka zogera omu Jehova a likida eharo lyanarunye kovantu. Ano mosirongwa sokukwama ko, ngatu ka lironga omu vakareli vaJehova nava likida eharo lyanarunye kwava wopeke.

3. Yisinke Jehova ga tanterere Mosesa kuhamena edina lyendi ntani noyikara yendi?

³ Konyima zapa Vaisraeli va tundire moEgipite, Jehova kwa tanterere Mosesa kuhamena edina lyendi ntani noyikara yendi.  Age kwa tente asi: “HOMPA, HOMPA, Karunga goMufenkenda, age Karunga gombili noMudidimiki. Uwa wendi unzi, age Mulimburukwi. Age kufira nkenda dogoro koruvharo romayovi, a dongonone po udona nomayipiko nononzo.” (Ex. 34:6, 7) Nonkango edi Jehova ga tanterere Mosesa, kwa likidire eharo lyendi lyanarunye. Yisinke ya hamena mo?

4-5. (a) Ngapi ga lisingonona mwene Jehova? (b) Mapuro musinke natu ka zogera?

⁴ Jehova kapi tupu ga lisingonona mwene asi ga kara neharo lyanarunye, nye hena age ga kara ‘neharo lyenene.’ Ano nonkango odo kwa di tumbura yikando ntazimwe moBibeli. (Num. 14:18; Neh. 9:17; Epis. 86:15; 103:8; Jow. 2:13; Jona 4:2) Poyikando nayinye eyi va zi ruganesa, azo kwa tamba kwaJehova nye kapisi kovantu. Mokumona asi Jehova kwa lisingonona mwene monkedi zangoso, eyi kulikida asi eharo lyanarunye mulyo unene kwendi. * Eyi yiyo ya ninkisire hompa Ndafita a uyunge asi: “HOMPA eharo lyoge lyanarunye kwa ka sika dogoro meguru, . . . Karunga, ee, uwa musi weharo lyoge lyenene! Vantu kugwana ugami momudwire gomavava goge.” (Epis. 36:5, 7) Ngwendi Ndafita, nose kutara eharo lyaKarunga lyanarunye asi mulyo unene kwetu ndi?

⁵ Mokuninka asi tu kwate nawa egano eyi ali tanta eharo lyaKarunga lyanarunye, tu zeni tu ka konakone mapuro gavali: Wolye ava Jehova a likida eharo lyanarunye? Ntani ngapi ali tu vatere eharo lyaJehova lyanarunye?

6. Wolye ava Jehova a likida eharo lyanarunye?

⁶ Wolye ava Jehova a likida eharo lyanarunye? Bibeli kwa uyunga asi ose kuvhura kuhara yininke yoyinzi. Pasihonena, unandima, “vhinyu nomagadi,” “epukururo,” “ediwo” ntani “unongo.” (2 Hist. 26:10; Yis. 12:1; 21:17; 29:3) Eharo lyanarunye kapi ava li likida koyininke, nye kulilikida tupu kovantu. Nye Jehova kapi a likida eharo lyanarunye kwankenye ogu. Age kulilikida tupu kovantu ava va kara nelikwatakano kumwe nendi. Karunga gwetu kwa hara vakaume vendi. Age ga kara nositambo sosiwa kwawo ntani nga twikira kuvahara.

7. Ngapi omu Jehova ga likida eharo kovantu navenye?

⁷ Jehova kwa likida eharo kovantu navenye. Jesus kwa tanterere Nikodemusa asi: “Karunga kwa here uzuni [vantu] unene-nene  yiyo ga u pere Munendi gelike a huru yipo asi nkenye ogu a mu pura ngava dire kukamuzonagura po nye nga ka gwane mwenyo gwanarunye.”—Joh. 3:1, 16; Mat. 5:44, 45.

8-9. (a) Morwasinke Jehova a likidire eharo lyanarunye kovakareli vendi? (b) Yisinke natu ka zogera ngesi?

⁸ Ngomu ka tu yi tumbura, Jehova kulikida tupu eharo lyanarunye kovantu ava va kara nelikwatakano lyewa nendi, kutanta asi vakareli vendi. Ose eyi kuyimona mononkango edi ga uyungire hompa Ndafita ntani nomuporofete Ndaniyera. Pasihonena, Ndafita kwa uyungire asi: “Hara ngorooro ava va ku diva.” “Eharo lyaHOMPA kwava ava mu fumadeke lyanarunye.” Ndaniyera kwa tente asi: “HOMPA Karunga gomunene, ove [kulikida] eharo lyoge lyanarunye ava va ku hara, ava va sikisa mo mpangera zoge.” (Epis. 36:10; 103:17; Ndan. 9:4) Nonkango odo kulikida asi Jehova kulikida eharo lyanarunye kovakareli vendi, morwa va mu diva, va mu fumadeka, va mu hara ntani kusikisa mo nompangera dendi. Jehova kulikida eharo lyanarunye kovakareli vendi wousili.

⁹ Komeho tu ya tameke kukarera Jehova, age kwa tu likida eharo eli a likida vantu navenye. (Epis. 104:14) Nye nampili ngoso, ngovakareli vendi, age simpe kutulikida eharo lyanarunye. Jehova kwa tumbwidira vakareli vendi asi: “Eharo lyange lyokukuhara kapi ngali haga.” (Jes. 54:10) Ndafita ga yi limonenene asi Jehova kutekura vakareli vendi monkedi zokulikarera. (Epis. 4:3) Mokumona asi Jehova kututekura monkedi zokulikarera, yisinke ngatu rugana? Muepisarome kwa tente asi: “Gonondunge a yi gazare eyi, a kwate egano eharo lyaHOMPA lyenene.” (Epis. 107:43) Tu zeni tu ka zogere nonkedi ntatu omu Jehova a likida eharo lyanarunye ntani nomu natu gwanena mo uwa.

10. Ngapi ali tu vatere eharo lyaJehova lyanarunye? (Episarome 31:7)

¹⁰ Eharo lyaJehova lyanarunye nga li karerera. Nkango ezi eharo lyanarunye, kwa zi tumbura yikando 26 mEpisarome 136. Velise zokuhova zemegaununo olyo kuuyunga asi: “Pandureni HOMPA, yeeyi age muwa, ano  nkenda zendi zanarunye.” (Epis. 136:1) Kutundilira movelise 2 dogoro 26, kwa uyunga mo asi “yeeyi nkenda zendi zanarunye.” Yikando yoyinzi apa atu resa episarome eli, ayo kututetura omu Jehova a likida nkenda zendi zanarunye ga hana kuhageka. Nkango ezi va ruguruka megaununo eli “nkenda zanarunye” kutuhuguvaresa asi Jehova kutwikira kulikida eharo kovantu vendi. Eyi kutuhengagwida pokudiva asi Jehova kapi a hageke kulikida usimbu eharo kovakareli vendi. Age kapi a sigilire vakareli vendi ntani age kuhama kwawo, unene po poyiruwo yoyidigu. Omu ayi tu vatere: Pokudiva asi Jehova kukara kumwe nose, ayo kuturetera ruhafo ntani kutupa nonkondo yipo tu lididimikire maudigu ntani nokutwikira kumukarera.—Resa Episarome 31:7.

11. Kuliza nEpisarome 86:5, yisinke ayi tumangeda Jehova a gusire po vantu?

¹¹ Eharo lyaKarunga lyanarunye kumutumangeda a tu gusire po. Apa Jehova a mono munanzo ogu ana litezurura nokusiga yirugana yendi yoyidona, eharo lyendi lyanarunye kumutumangeda a mu gusire po. Mutjangi gepisarome Ndafita kwa uyungire kuhamena Jehova asi: “Kapi a tu futisa moomu twa yi liruganena, ndi a tu rugwide kuwoko morwanonzo detu nomausima getu.” (Epis. 103:8-11) Ndafita ga yi limonenene omu atu lizuvhu apa atu kara nezwi lyedona lyokomutjima. Nye age ga ya dimbwilire hena asi Jehova ‘kutudongwenena po.’ Yisinke ayi tumangeda Jehova yipo a gusire po vantu? Elimbururo kuligwana mEpisarome 86:5. (Resa.) Ngwendi moomu tupu ga yi tumbwire Ndafita mekanderero lyendi, Jehova kutugusira po morwa eharo lyendi lyanarunye enene kwava ava mu zigida.

12-13. Yisinke nayi tu vatera nsene kuna kulizuvha unzoni kononzo detu danare?

¹² Nsene tuna zono, ayo kapisi epuko kulizuvha unzoni konzo ezi twa rugana. Eyi kuvhura yi tu vatere yipo tu litezurure ntani nokutura po malitjindjo. Nye vakareli vaJehova vamwe kulizuvha unzoni komapuko aga va rugana. Awo kugazara asi Jehova kapi ngava gusira po nampili ngomu va pura egusiropo kwendi nokuhageka kurugana yininke yoyidona. Nsene nove yimo o lizuvhu ngoso,  pokudiva asi Jehova ga kara neharo lyanarunye lyokugusira po vakareli vendi, nga yi kuvatera o hageke kulizuvha ngoso.

¹³ Omu atu gwanene mo uwa: Nampili ngomu twa dira kusikilira mo, ose kuvhura kukarera Jehova noruhafo nezwi lyewa lyokomutjima. Eyi kutompoka morwa “honde zaMunendi Jesus kutukuhura kononzo detu nadinye.” (1 Joh. 1:7) Nsene ono guwu morwa nzo zongandi, diworoka asi Jehova ga liwapaikira kugusira po wokulitezurura. Konekeni eyi ga uyungire Ndafita omu eharo lyanarunye lya likwatakana negusiropo. Age kwa tjenge asi: “Moomu lya kara eguru ure nevhu, neharo lyendi yimo lya nenepa kwava ava mu tjira. Moomu wa kara Upumezuva ure noUtokero, nononzo detu yimo nga di paka ure nose.” (Epis. 103:11, 12) Jehova kapi “a likata-kata kudongwenena po.”—Jes. 55:7.

14. Ngapi Ndafita ga fatwilire omu eharo lyaJehova lyanarunye ali tu popere?

¹⁴ Eharo lyaKarunga lyanarunye kutupopera pampepo. Apa Ndafita ga kanderere kwaJehova, age kwa uyungire asi: “Ove nyove evega lyouvando wange, ove ngo popera nge koudigu. Ame tani ziguruka kudimba yeparu lyoge, yeeyi ove kugamena nge. . . . Ava va huguvara mwaHOMPA, kwa kara mougami weharo lyendi lyenene.” (Epis. 32:7, 10) Ngwendi moomu tupu makuma gomoyitata yomosiruwo sanare ngaga popere vantu kosiponga, eharo lyaJehova lyanarunye, nalyo kutupopera koyininke eyi nayi tura elikwatakano lyetu mosiponga. Ntani hena, eharo lyaJehova lyanarunye kumutumangeda yipo a tu kokere kwendi.—Jer. 31:3.

15. Ngapi eharo lyaJehova lyanarunye lya fana ngwendi utjiliro ntani evango lyepopero?

¹⁵ Ndafita kwa ruganesere hena nonkango dimwe mokufaturura omu Jehova a popere vantu vendi. Age kwa tjenge asi: “Ove mupopeli gwange; utjiliro wange ame, Karunga, Karunga ogu ga hara nge.” Age hena kwa uyungire kuhamena Jehova asi: “Age yige mupopeli nomugameni gwange, rugumbo nomuparuli gwange, age yige silikandwiso esi na huguvara.” (Epis. 59:17; 144:2) Morwasinke ga hetakanesere Ndafita eharo lyaJehova lyanarunye komupopeli nomugameni? Yi kare asi kupi ko twa tunga, nsene asi ose tuvakareli vaJehova, age nga tu pa epopero eli ngatu hepa ntani nga popera elikwatakano lyetu nendi. Ehuguvaro lyokulifana kuligwana mEpisarome 91. Mutjangi gepisarome olyo kwa uyungire asi: “Ove mugameni gwange nomupopeli gwange!” (Epis. 91:1-3, 9, 14) Mosesa nage kwa uyungire egano lyokulifana. (Epis. 90:1) Komeho a ka fe, Mosesa kwa uyungire hena nonkango donongwa dokuhengagwida. Age kwa tjenge asi: “Karunga yige ga kara nkenye apa mupopeli goge, ano mawoko gendi ganarunye yiwo ukorero woge.” (Deut. 33:27) Yisinke tuna kulirongera ko kuhamena Jehova kononkango edi asi “mawoko gendi ganarunye yiwo ukorero woge”?

16. Mononkedi musinke mbali edi a tu vatere Jehova? (Episarome 136:23)

¹⁶ Ayo kutuhengagwida pokudiva asi Jehova kutupopera. Nye poyiruwo yimwe kuvhura tu lizuvhe asi tuna dompo. Yisinke a rugana ko Jehova poyiruwo yangoso? (Resa Episarome 136:23.) Age nga tu koreka nokutuvatera tu dire kudompa mutjima. (Epis. 28:9; 94:18) Omu atu gwanene mo uwa: Ose twa yi diva asi ose kuvhura kuhuguvara mwaJehova nkenye apa, ano eyi kuvhura kutuvatera mononkedi mbali. Zokuhova, yi kare asi kupi twa tunga, Jehova ngatu popera. Zauvali, Guhyetu gemeguru kutupakera mbili.

17. Mokumona asi Jehova kutulikida eharo lyanarunye, ehuguvaro musinke twa kara nalyo? (Episarome 33:18-22)

¹⁷ Ngomu tupu tuna yi zogere, apa atu ligwanekere nomaudigu, ose kuvhura kuyipura nawa-nawa asi Jehova ngatu pa evatero eli ngatu hepa yipo tu twikire kumulimburukwa. (2 Kol. 4:7-9) Muporofete Jeremiya kwa uyungire asi: “Eharo nonkenda zaHOMPA kapi ayi haga po.” (Malira. 3:22) Ose kuvhura tu kare nehuguvaro asi Jehova nga twikira kutulikida eharo lyendi lyanarunye, morwa Bibeli kuuyunga asi: “HOMPA kutara eho ava ava mu tjira, ava ava huguvara eharo lyendi lyanarunye.”—Resa Episarome 33:18-22.

18-19. (a) Yisinke twa hepa kudiworoka? (b) Yisinke ngatu ka zogera mosirongwa sokukwama ko?

¹⁸ Yisinke twa hepa kudiworoka? Komeho tu ya tameke kukarera Jehova, age kwa tu likidire eharo eli a likida vantu navenye. Ngovakareli vendi, ose kugwanena mo uwa meharo lyendi lyanarunye. Eharo kutumangeda Jehova yipo a tu popere. Age nga twikira kutukokera kwendi ntani nga sikisa mo sitambo sendi. Ntani age ana tu harere tu kare vakaume vendi dogoro narunye. (Epis. 46:1, 2, 7) Yipo nye, yi kare asi maudigu musinke tuna kuligwanekera nago, Jehova nga twikira kutunkondopeka yipo tu twikire kumulimburukwa.

¹⁹ Sirongwa esi sina tu vatere tu dimburure omu Jehova a likida eharo lyanarunye kovakareli vendi. Ano age kuna tu harere tu likide eharo lyanarunye kovantu wopeke. Ngapi natu yi rugana? Sirongwa sokukwama ko, nga si ka limburura epuro olyo lyomulyo.