Komeho ni mu tantere eyi ya kweme ko, pomuhowo tanko ni mu tantere omu na tamekere sirugana sosiruwo nasinye.

Ame kwa hampuruka nge mo-1942 posirudi soufuuli saCuraçao. Otate kwa va hampurukira moSuriname, nye konyima yipo va dirukilire kosirudi va ka papare yirugana. Nomvhura dongandi komeho va hampuruke nge, otate kwa kere Mbangi zaJehova zokuhova kugwana ekuho moCuraçao. a Awo ngava li rongo nose Bibeli nkenye sivike nampili ngomu twa dilire kuhara kulironga. Apa na kere nonomvhura 14, ose kwa dirukilire koSuriname notate yipo va ka pakere mbili omama wovakadi.

Apa na kere moSuriname, ame kwa tulisire po ukaume novadinkantu womombungakriste ava ngava karere Jehova noupampi. Awo kwa kere vakondi nakauke kwange ntani kwa kere vazuvhisi wokukarerera. Ame kwa dimbwilire asi awo vantu woruhafo apa ngava zogere eyi ngava limonene mokuzuvhisa. Konyima zankenye epongo, name novakwetu ngatu zogere kuhamena yirongwa yomoBibeli, ano poyiruwo yimwe ngatu yi rugana ngoso apa ngatu tara nombungururu. Vakaume ava kwa vaterere nge ni dimburure eyi na here kurugana meparu, ame kwa here kuruganena Jehova. Ame kwa gwene ekuho apa na kere nonomvhura 16. Ano konyima, apa na kere nonomvhura 18, yipo na tamekere uzuvhisi wokukarerera.

Ame kwa lirongere yirongwa yoyinzi apa na kere muzuvhisi gokukarerera, ano eyi kwa vatera nge mosirugana sange sosiruwo nasinye. Pasihonena, sirongwa simwe esi na lirongere kuna kara mulyo gokudeura wopeke. Apa na tamekere uzuvhisi wokukarerera, munazinyetu gomutumwa Willem van Seijl nga vatere nge unene. b Age kwa rongere  nge yoyinzi kuhamena omu nani sikisa mo yitumbukira yomombungakriste. Posiruwo sina, ame kapi nayi dimbwilire asi na hepere edeuro. Mvhura ezi za kweme ko yipo va tulire nge ni kare muzuvhisi gosiruwo nasinye, ano kutunda opo ngani pitisire nombungagona dovanavazinyetu edi da kere ure mowiza waSuriname. Nina kara norupandu kedeuro eli na gwene kovanavazinyetu wovagara. Kutunda pena, ame kwa tokomenene kukwama sihonena sawo pokulitulira po siruwo sokudeura wopeke.

Sirongwa sauvali na lirongere kuna kara asi ayo ya wapa kurerupika eparu lyange nokuwapaika nawa yininke. Ketamekero lyankenye kwedi, name namunazinyetu ogu ngani zuvhisa nage ngatu tura po mawapaiko kuhamena yininke eyi ngatu randa, eyi nayi vhura kutugusa yivike yongandi. Makura gumwe gwetu nga gendi sinano sosire a ze kositata yipo a ka rande yihepwa eyi twa hepere. Ose ngatu ruganesa nawa kansonso aka ngatu gwana nkenye kwedi ntani ngatu ruganesa yihepwa yetu kumwe yipo yi tu guse kwedi nakunye. Vantu vamwe ngava tu vatere nsene yuma yongandi yina tu pwire sikatji apa ngatu kara mowiza. Ame na yi pura asi kulironga kurerupika eparu no unona-nona nokuwapaika nawa yininke, kwa vatera nge ni demenene kukarera Jehova eparu lyange mudima.

Sirongwa sautatu esi na lirongere kuna kara mulyo gokuronga vantu meraka lyawo. Kutunda unona ame ngani uyunga eraka lyoRudutch, Ruingilisa Rupapiamento, ntani Rusranantongo, (oru rwa divikwa hena asi Rusranan), eraka eli ava uyunga moSuriname. Nye ame ngani mono asi vantu womowiza ngava purakene nawa kombudi zongwa apa ngatu va zuvhisire meraka lyavene. Ayo ngayi karere nge udigu kuuyunga maraka gamwe ngwendi, Rusaramaccan, omu mwa kara nonkango dononde nedi dononsupi. Nye nampili ngoso, elituromo lyange kwa retere yitundwamo yoyiwa. Mwaza nomvhura, ayo kwa tompokere nge kuronga vantu wovanzi usili meraka lyawo morwa ame ngani li uyunga.

Ame kwa li gwanekerere hena nomaukaro gokufisa nomuga. Pasihonena, sikando simwe ame kwa here kupura murongwa goBibeli gomuSaramaccan kuhamena omu ga lizuvhire, morwa age kwa korere mezimo. Nye eyi na mu pulire kwa tembe nsene asi nezimo lyendi. Yosili epuro olyo kwa mu fisire nomuga. Nampili ngomu ngani lipuka apa ngani uyunga, ame kwa twikilire kuuyunga eraka lyomomukunda ogu ngani zuvhisire.

Mo-1970 kwa tulire nge ni kare mutareli gonombungakriste. Momvhura ozo, ame kwa likidire elikwamo “lyedinguro lyovakareli po wokomberewa zonene zoNombangi daJehova” konombungagona dononzi edi da kere mowiza. Mokuninka asi tu ka sike komavango ogo, name novanavazinyetu vamwe ngatu gendi nowato momukuro. Mowato wetu kwa rongerere mo generator, tenga zomaholi, noramba domaholi ntani ehina lyokulikidisa mafano. Apa ngatu siki kevango olyo, ose ngatu tutu yininke nayinye oyo tu yi tware kevango lyomowiza oku ngatu likidire elikwamo. Sininke simwe esi ani diworoka unene momarugendo ogo kuna kara omu vantu womowiza va here  unene elikwamo olyo. Ayo kwa hafesere nge kweyi na vaterere wopeke va dive Jehova nombunga zendi. Apa na mwene vantu kuna kuhedera pepi naJehova, ayo kwa hafesere nge kweyi na rugene unene mokuvavatera.

Nampili ngomu na yi dimbwilire omu kukara mudike ya rerupilire nge ni sikise mo sirugana sange, nye simpe na here kukwara. Yipo na tamekere kukanderera ni gwane mukadi ogu ngani rugana nage noruhafo mosirugana sange somowiza sosidigu sosiruwo nasinye. Konyima zomvhura zimwe, yipo na tamekere kulivandekera naEthel, muzuvhisi gosiruwo nasinye ogu ga kere nonkareso zokulizambera. Kutunda unona, Ethel kwa here unene sihonena somupositoli Paurusa sokuzuvhisa ntani ga here kumuhonena. Ose kwa li kwere mwaSitarara mo-1971 ntani kwa tamekere kurugana kumwe sirugana sokudingura nombungakriste.

Apa ga kulire Ethel, epata lyawo kapi lya kere noyiweka yoyinzi yopanyama, yipo nye kapi ya mu digoperere kuza name mowiza. Pasihonena, apa ngatu liwapaikire tu ka dingure nombungakriste domowiza, kapi ngatu simbi yininke yoyinzi. Ose ngatu kuhu yidwara yetu nomawoko ntani ngatu zogana monomukuro. Ose hena ngatu li nkenye eyi ngava tu zumbura yikare asi nondya ava tumbura asi iguanas, piranhas ndi nkenye eyi tupu ngava sana mowiza ndi eyi ngava kwata monomukuro. Apa ngaga dili kukara ko marupasa, ngatu lire poyihako yomabanana. Apa ngaga dili kukara ko marutugo, ngatu li nononyara. Name naEthel kulizuvha asi malizambero aga twa tura po kumwe ngomu twa karera Jehova, kwa vatera nonkwara detu di kare ngwendi rugodi oru va poha nonongodi ntatu. (Muud. 4:12) Yihorokwa eyi twa pita kwatu vatera sili unene.

Ezuva limwe apa twa ka tengwire mowiza oku twa ka dingwire vanavazinyetu, ose kwa ligwanekerere nosihorokwa esi kani simwitire ketameko lyesimwititi eli. Ngomu wato wa zire porupupo, awo kwa deme konhi zomema, makura tau fuga-fuga  hena usimbu kontunda zomema. Ano eyi ya tu vaterere tu dire kugwa mo mowato kuna kara yikoverero eyi twa dwere yokuvatera o dire kudama. Nye wato wetu kwa zulire mema. Nondya edi da kere moyifoyo kwa di tjisilire momukuro yipo tu ruganese yifoyo moku rupurura mema mowato.

Mokumona asi ose kwa zumbanesere nondya detu, makura yipo twa tamekere kurovera ngomu twa gendere momukuro. Nye kapi twa kwete yuma. Yipo twa kanderere kwaJehova nokumupura a tu pe nondya dezuva olyo. Konyima tupu zokukanderera, munazinyetu gumwe gomugara ta zugumine erowo momema makura ta kwata mfi zonene ezi twa lire masiku natuvenye tuvatano, ntani ose kwa kutire.

Konyima zokukara nomvhura ntano mosirugana sokudingura nombungakriste, name naEthel kwa gwene etungiko eli twa dilire kundindira, ose kwa ya kere nomuna. Ame kwa hefe, nye kapi na divire omu ngayi kundama eparu lyetu. Name naEthel kwa here unene kukara mosirugana sosiruwo nasinye. Mo-1976, mbeli zetu gomumati yipo va mu hampurukire. Munetu gwauvali gomumati kwa ya mu hampurukire konyima zonomvhura mbali noharufa.

Mokumona asi moSuriname mwa hepere evatero lyenene posiruwo sina, Beteli yipo za pulisilire nge ni twikire nosirugana sokudingura nombungakriste posiruwo oso ose kuna kurera vana vetu. Apa vana vetu va kere vanona, kwa tanterere nge ni dingure monomukunda omu mwa kere nombungakriste dononsesu. Ayo ngayi pulisire nge ni rugane yivike yongandi nkenye kwedi ngomutareli gonomukunda ntani nokuruganesa siruwo nasinye sokuhupa ko mokwedi, ngomuzuvhisi gokukarera mombungakriste ezi va tulire nge. Ethel novana vetu wovamati ngava zi kumwe name apa ngani dingura nombungakriste dopopepi nembo lyetu. Nye ame ngani zi nyamelike apa ngani ka dingura nombungakriste noyigongi eyi ya kere mowiza.

Na hepere kuwapaika nawa yininke yange yipo ni sikise mo yitumbukira yange nayinye. Ame ngani divilisa asi tu rugane ukareli wepata nkenye sivike. Apa ngani dingura nombungakriste mowiza, Ethel nga pitisire ukareli wepata novana vetu wovamati. Nye apa ngayi tu tompoka, ose ngatu rugana ukareli wepata nkenye apa. Name naEthel ngatu lihameke nkenye apa moyilihafeso, pasihonena ngatu dana maudano novana vetu ntani ngatu dingura mavango gomawa gopopepi  nembo lyetu. Yikando yoyinzi ngani liwapaikire yitumbukira yange yomombunga masiku. Ano mokumona asi Ethel age mukadi gonondunge ogu va tumbura moYisewe 31:15, age nga pinduka komeho lise ezuva a divilise asi ose kuna kuresa etjangwa lyankenye ezuva ngepata ntani nokulihaka kumwe komeho vana vetu va ze kosure. Ame nina hafa kweyi na kara namukadange ogu ga hara kulizambera, ogu ga vatera nge ni sikise mo yitumbukira yange.

Ngovakurona, ose ngatu rugana unene tu vatere vana vetu wovamati va hare Jehova ntani sirugana sokuzuvhisa. Ose kwa here vana vetu ngava kare mosirugana sosiruwo nasinye, nye va yi rugane keharo lyawo nye kapisi morwa nyose. Ose nkenye apa ngatu va tantere omu sirugana sosiruwo nasinye ngasi va hafesa. Nampili ngomu ngatu ligwanekere nomaudigu, ose nkenye apa ngatu uyunga kuhamena omu Jehova ga tu vatera nokutungika epata lyetu. Ose hena ngatu divilisa asi vana vetu va tulise po ukaume noNombangi edi adi tura Jehova muhowo.

Jehova kwa tu pere yihepwa yetu nayinye ngomu ngatu rere epata lyetu. Nye nampili ngoso, ame nkenye apa ngani rugana ko yuma yipo ni pakere mbili epata lyange. Eyi na limonenene apa na kere muzuvhisi gosiruwo nasinye mowiza kwa ronga nge ni pungure yimaliwa yokuranda yininke eyi twa hepere. Nye nampili ngomu ngatu rugana paapa twa hulira, poyiruwo yimwe kapi ngatu kara nanayinye eyi twa hepere. Poyiruwo yangoso, ame nina kara nehuguvaro asi Jehova nga tu vatere. Pasihonena, koyiha yomvhura 1989 ntani koyiha yo-1991, moSuriname kwa kere mo marwaneso. Monomvhura odo, ayo ngayi kara pamwe udigu kugwana yihepwa yopanyama. Nye nampili ngoso, Jehova kwa tu vaterere.—Mat. 6:32.

Meparu lyange nalinye, Jehova kwa tu pakera mbili ntani ga tu vatera tu hafe nokukara yina tu gwanene po. Vana vetu kwa tu hafesa ntani tuna hafa kweyi twa va vatera va karere Jehova. Tuna hafa asi nawo va tura po etokoro lyokukara mosirugana sosiruwo nasinye. Ethniël naGiovanni navenye kwa za konosure domombunga zaJehova ntani awo ngesi kurugana koBeteli zomoSuriname kumwe novakadi vawo.

Name naEthel ngesi tuna kurupa, nye ose simpe vazuvhisi wosiruwo nasinye. Ose kurugana unene, ano eyi kuninkisa nge ni dire kugwana siruwo sokulironga kuzoga. Nye kapi nina kulivera. Apa ani tara eparu lyange lyokonyima, ame kulizuvha asi etokoro eli na tulire po pounona lyokulihameka mosirugana sosiruwo nasinye kwa kere etokoro lyewa po.