1. Yisinke ayi tanta ‘kukara nonondunge’? (2 Timoteusa 4:5)

 APA ATU ligwanekere nomaudigu, ayo kutukarera udigu kulimburukwa Jehova ntani nombunga zendi. Ngapi natu lididimikira maudigu ogo? Twa hepa kutwikira kukara nonondunge, nokuvangarara ntani ‘nokukora mepuro.’ (Resa 2 Timoteusa 4:5.) Ose kukara nonondunge pokukara tuna litura, kugazara nawa ntani kutara yininke ngwendi moomu ayi tara Jehova. Apa atu rugana oyo, malizuvho getu kapi aga tupangere.

2. Yisinke natu ka zogera mosirongwa esi?

² Mosirongwa sina ka pita ka tu zogerere mo yininke yitatu eyi atu ligwanekere nayo mouzuni ou. Mosirongwa esi tatu ka zogera maudigu gatatu aga atu ligwanekere nago mombungakriste, aga aga tu ninkisa yi tu karere udigu kulimburukwa Jehova. Maudigu ogo kuna kara (1) nsene munazinyetu kuna tu tekura momudona, (2) nsene kuna tu pisura ntani (3) nsene kuna kutukarera udigu kutambura malitjindjo gomombunga zaJehova. Ngapi natu twikira kukara nonondunge ntani nokutwikira kulimburukwa Jehova nombunga zendi nsene kuna kuligwanekera nomaudigu aga?

3. Ngapi omu nampo atu lizuvhu nsene Mukriste mukwetu kwa tu tekura momudona?

³ Ga ku tekura rumwe momudona munazinyetu, pasihonena mukuronambunga ndi? Yosili munazinyetu ogo kapi ga kere nositambo sokukukoresa. (Rom. 3:23; Jak. 3:2) Nye nampili ngoso, eyi ga rugene nampo kwa ku koresere. Ove nampo kapi ngo rara apa ngo gazara udigu owo. Ove nampo wa lipulire asi: ‘Nsene munazinyetu kuna kutekura nge monkedi zokukara ngesi, ezi  sili kuna kara mbunga zaJehova ndi?’ Yosili Satana kuna hara tu gazare monkedi zangoso. (2 Kol. 2:11) Nsene tu gazara monkedi zangoso, kuvhura kutuninkisa tu hageke kukarera Jehova nokusiga mbunga zendi. Nsene asi munazinyetu gomugara ndi gomukadi kwa tu tekura momudona, ngapi omu natu kara nonondunge ntani nokunyokera po magazaro gomadona?

4. Ngapi omu Josefa ga twikilire kukara nonondunge apa va mu tekwire momudona ntani sirongwa musinke natu lirongera ko kosihonena sendi? (Genesis 50:19-21)

⁴ Wa ha kara nonkoko. Apa Josefa ga kere mudinkantu, vakuru vendi kwa mu tekwire monkedi zondona. Awo kwa mu nyengere ntani vamwe kwa here kumudipaga. (Gen. 37:4, 18-22) Ano konyima awo kwa mu randesere yipo aka kare mupika. Ngoyitundwamo, Josefa kwa ligwanekerere nomaudigu aga ga gusire nomvhura 13. Eyi ngano ya ninkisire Josefa a gazare asi Jehova kapi ga mu hara. Ntani age ngano ga li pulire nsene Jehova ga mu sigilire mosiruwo esi ga hepere evatero. Nye Josefa kapi ga kere nonkoko. Mevango lyokukara nonkoko, age kwa twikilire kukara nonondunge pokukara ana litura. Apa ga kere nompito zokutengwidira kuwoko vakuru vendi, age kapi ga yi rugene ngoso, nye age kwa va likidire eharo nokuvagusira po. (Gen. 45:4, 5) Josefa kwa kere nonkareso zongwa morwa nga gazara nawa. Mevango lyokudemenena komaudigu gendi, age kwa demenene kositambo saJehova. (Resa Genesis 50:19-21.) Sirongwa musinke natu lirongera ko? Nsene kuna kukutekura momudona, wa ha kara nonkoko naJehova ndi o gazare asi ana ku sigilire. Nye mevango lyoyo, teda ko omu ana kukuvatera o lididimikire maudigu goge. Ntani hena, nsene wopeke kuna kukutekura momudona, va likida eharo mevango lyokudemenena komapuko gawo.—1 Pet. 4:8.

5. Ngapi omu Miqueas ga twikilire kukara nonondunge apa ga lizuvhire asi vana mutekura momudona?

⁵ Tu tareni sihonena somukuronambunga gedina Miqueas ogu ga tunga moSouth America. b Sikando simwe age kwa diworokere apa ga lizuvhire asi vanavazinyetu womombunga zaJehova ava va kara noyitumbukira kwa mu tekwire momudona. Age kwa tente asi: “ Ame kapi na ligwanekera rumwe nosinka sosinene ngwendi esi na kere naso posiruwo oso. Ame kwa kere nowoma. Ame kapi ngani rara masiku ntani ngani lili morwa kwa lizuvhire asi kwato eyi nani vhura kurugana ko.” Nye nampili ngoso, Miqueas kwa twikilire kukara nonondunge ntani noku rugana unene a pangere malizuvho gendi. Age nga kanderere nkenye apa a pure Jehova a mupe mpepo zendi zokupongoka ntani nokumupa nonkondo yipo a lididimikire. Age hena nga rugana epaparo moyimbapiratjangwa yetu eyi ya vhulire kumuvatera. Yisinke natu lirongera ko? Nsene munazinyetu kwa ku tekura momudona, kara ono litura ntani hetekera ko kunyokera po magazaro gomadona. Kuvhura o dire kudiva eyi ya ninkisire munazinyetu ogo a uyunge ndi a rugane yininke monkedi zangoso. Kanderera kwaJehova ntani mupura a ku vatere yipo o tare yininke ngwendi moomu a yi tara age. Nsene o yi rugana ngoso, ayo kuvhura ngayi kuvatere o dimburure asi munazinyetu ogo kapi gayi rugene nositambo sokukukoresa ntani ngayi kuvatera yipo o mu gusire po. (Yis. 19:11) Diworoka asi Jehova ga diva ukaro woge ntani nga ku pa nonkondo edi wa hepa yipo o lididimikire.—2 Hist. 16:9; Muud. 5:8.

6. Morwasinke ya karera nomulyo tu tare episuro lyaJehova asi azo kuna kara nkedi ezi a tu likida eharo? (Vahebeli 12:5, 6, 11)

⁶ Episuro kuvhura kutukoresa. Nye nsene tu demenena kokukora oku tuna kuzuvha, kuvhura tu gazare asi episuro olyo kapi vana lirugana monkedi zongwa. Ngoyitundwamo, eyi  kuvhura kutuninkisa tu dire kukwata egano sininke somulyo asi Jehova kutupisura morwa ga tu hara. (Resa Vahebeli 12:5, 6, 11.) Nsene tu demenena tupu monkedi omu tuna kulizuvha, ose ngoso kuna kupa Satana mpito yipo a tu heteke. Age ana hara tu nyoke kutambura episuro, nye unene po ana hara tu hageke kukarera Jehova nokusiga mbungakriste. Ngapi omu no twikira kukara nonondunge nsene asi ove kwa ku pisura?

7. (a) Ngomu vana kuyilikida pefano, ngapi omu Jehova ga ruganesere Peturusa konyima zokutambura epukururo? (b) Yisinke ono lirongere ko kosihonena saPeturusa?

⁷ Tambura episuro nokutura po malitjindjo. Jesus kwa pukurwire Peturusa komeho zovapositoli vakwawo yikando yokupitakana pwasimwe. (Mar. 8:33; Ruk. 22:31-34) Eyi nampo kwa ninkisire Peturusa a lizuvhe nomuga. Nye nampili ngoso, Peturusa kwa twikilire kulimburukwa Jesus. Age kwa tambwire episuro olyo ntani ga lirongerere ko komapuko gendi. Ngoyitundwamo, Jehova kwa tungikire ulimburukwi waPeturusa ntani kwa mu pere yitumbukira yoyinzi mombungakriste. (Joh. 21:15-17; Yirug. 10:24-33; 1 Pet. 1:1) Yisinke natu lirongera ko kosihonena saPeturusa? Ose kugwanena mo uwa mepisuro kukwatera mo nava wopeke, apa atu tambura episuro olyo nokutura po malitjindjo. Apa atu yi rugana oyo, Jehova kuturuganesa momunene ntani ngatu vatera vanavazinyetu.

8-9. Ngapi omu ga lizuvhire Bernardo pomuhowo apa va mu piswire, nye yisinke ya mu vaterere yipo a ture po elitjindjo?

⁸ Tu zeni tu ka tare eyi ya horokerere munazinyetu gomugara Bernardo, ogu ga tunga moMozambique. Age kwa mu gusire situmbukira soukuronambunga. Ngapi omu ga lizuvhire Bernardo pomuhowo? Age kwa tanta asi: “Ame kwa kere nonkoko morwa kapi na haferere episuro eli na gwene.” Age kwa kere nosinka asi womombungakriste nava gazara yininke yoyidona kumuhamena. Age kwa uyunga hena asi: “Ayo kwa mu gusire makwedi gongandi yipo a tare episuro olyo monkedi zongwa ntani nokuhuguvara hena mwaJehova nombunga zendi.” Yisinke ya vaterere Bernardo yipo a tjindje nkareso zendi?

⁹ Bernardo ga wapukurwire nkareso zendi. Age kwa tanta asi: “Apa na kere mukuronambunga, ame ngani ruganesa etjangwa lyoVahebeli 12:7 yipo ni vatere wopeke va tare episuro lyokutunda kwaJehova monkedi zongwa. Makura yipo na lipulire asi: ‘Yilye ga hepa kutura pasirugana etjangwa eli?’ Vakareli vaJehova navenye kukwatera mo nanyamwange.” Makura  Bernardo yipo ga tulire po malitjindjo gamwe pokuhuguvara mwaJehova ntani nomombunga zendi. Age kwa tamekere kuresa Bibeli momunene ntani nokulitulira po siruwo sokuteda ko eyi ana resa. Nampili ngomu ga kere simpe nosinka kuhamena omu va mu tere vanavazinyetu, age nga rugana nawo mokuzuvhisa ntani nga gava malimbururo momapongo. Ano mwaza siruwo, munazinyetu Bernardo kwa ya kere hena mukuronambunga. Nsene nove kwa ku pisura ngwendi Bernardo, nyokera po kudemenena unene kepisuro olyo nokutambura mapukururo ntani nokutura po malitjindjo. c (Yis. 8:33; 22:4) Nsene oyi rugana oyo, Jehova nga ku tungika kweyi o mu limburukwa kumwe nombunga zendi.

10. Malitjindjo musinke gomombunga zaJehova ga ninkisire Vaisraeli vamwe va dire kulimburukwa Jehova?

¹⁰ Malitjindjo gomombunga zaJehova, kuvhura kutuninkisa yi tu karere udigu kulimburukwa Jehova nombunga zendi. Nsene kapi tuna kutakamesa, kuvhura yi tu ninkise tu hageke kukarera Jehova. Pasihonena, gazadara ko kuhamena omu malitjindjo aga ga horokere mombunga zaJehova ga kundamene Vaisraeli vamwe. Komeho Jehova a va pe Veta, vanturagumbo yiwo ngava rugana yirugana youpristeli. Awo ngava dike yizambero ntani ngava gava nonzambo kwaJehova. (Gen. 8:20, 21; 12:7; 26:25; 35:1, 6, 7; Joba 1:5) Nye Jehova apa ga tulisire po Veta, vanturagumbo kapi vava pulisilire hena va rugane yirugana oyo. Jehova kwa horowere vapristeli womoruvharo rwaArona yipo va gave nonzambo. Ano konyima zoyo, nkenye nturagumbo ogu nga rugana sirugana soupristeli, ogu ga kere asi kapisi gomoruvharo rwaArona, kuvhura va mu dipage. d (Lev. 17:3-6, 8, 9) Ngoso ezi kuna kara konda zeyi Kora, Datani, Abiramu ntani masimbi gokusika po-250 va rwaneserere Mosesa naArona ndi? (Num. 16:1-3) Kapi tatu diva. Yi kare asi konda musinke za kere, Kora novantu ava va mu kwatesere ko kwa hagekere kulimburukwa Jehova. Yisinke no rugana nsene malitjindjo gomombunga zaJehova kuna kukuninkisa yi ku karere udigu kulimburukwa Jehova nombunga zendi?

11. Yisinke natu lirongera ko koVakehati vamwe woVarevhi?

¹¹ Kwatesa ko malitjindjo aga azi tulisa po mbunga zaJehova. Ngomu va gendere morugendo rwawo romomburundu, Vakehati kwa kere nositumbukira sokulikarera. Nkenye apa Vaisraeli ngava diruka, Vakehati vamwe ngava simbi sikesa segwanekero moyitarameho yovantu. (Num. 3:29, 31; 10:33; Jos. 3:2-4) Ee situmbukira musi kouwa! Nye nampili ngoso, yininke kwa litjindjire apa Vaisraeli va ka sikire moSirongo sEtumbwidiro. Sikesa segwanekero kapi sa hepere hena kusidirura nkenye apa. Yipo nye, apa Saromo ga kere hompa, Vakehati vamwe kwa kere vadimbi, ano vamwe kwa kere vanomeni ntani vamwe kwa pakerere mbili emona lyontembeli. (1 Hist. 6:31-33; 26:1, 24) Apo kapi pwa kara maumbangi aga aga likida asi Vakehati kwa tangwinine morwa yeyi va kere nositumbukira sokulikarera. Sirongwa musinke natu lirongera ko? Kwatesa ko nomutjima nagunye malitjindjo aga azi tulisa po mbunga zaJehova, kukwatera mo nankenye matokoro aga naga kundama sirugana soge. Kara noruhafo mwankenye situmbukira esi vana ku pe. Diworoka asi situmbukira soge kapisi yiso asi kuninkisa o kare nomulyo kwaJehova. Jehova kutara ulimburukwi woge asi  mulyo unene kupitakana nkenye situmbukira.—1 Sam. 15:22.

12. Ngapi omu ga lizuvhire Zaina apa va mu gusire mo moBeteli?

¹² Tu tareni sihonena samunazinyetu gomukadi Zaina, ogu va gusire situmbukira sendi esi ga here unene nokumupa ko situmbukira sapeke. Konyima zokukara moBeteli nomvhura dokupitakana po-23, age kwa mu tumine mosirugana sokuzuvhisa. Age kwa uyunga asi: “Ayo kwa tukukisire nge apa va tuminenge ni ka rugane sirugana sapeke. Ame kwa lizuvhire asi kwato mulyo ntani ngani lipura nyamwange asi: ‘Yisinke yepuko na rugana?’” Yokuguvisa yeyi asi vanavazinyetu vamwe womombungakriste kwa gwederere kokukora kwendi pokumutantera asi: “Ngano kwato yoyidona wa rugana, ngano simpe moBeteli ono kara.” Poyiruwo yimwe Zaina nga guwu unene, ano eyi ngayi mu ninkisa a lire nkenye masiku. Nye age kwa uyunga asi: “Ame kapi na here kukara nomasinganyeko kuhamena mbunga zaJehova ndi eharo lyaJehova.” Ngapi omu Zaina ga twikilire kukara nonondunge?

13. Yisinke ga rugene Zaina yipo a nyokere po kukara nomalizuvho gomadona?

¹³ Zaina ya mu tompokere kunyokera po malizuvho gomadona. Ngapi ya mu tompokere oyo? Age kwa resere yirongwa yomoyimbapiratjangwa yetu eyi ya zogera kuhamena udigu wendi. Sirongwa sosiparatjangwa “Ove kuvhura kulididimikira madompeso” esi sa kara moRuhungu romo-1 Murongankuru 2001, kwa mu vaterere unene. Sirongwa oso kwa faturura omu mutjangi goBibeli Marukusa ga lididimikilire nampo malizuvho gokulifana apa ga gwene situmbukira sapeke. Zaina kwa tanta asi: “Sihonena saMarukusa kuna kara mutji ogu na hepere yipo ni hageke kukara nomalizuvho gokudompa.” Zaina nga kara hena nkenye apa novakaume vendi. Age kapi nga kara-kara gelike ndi a lifire nkenda mwene. Age gaya dimbwilire asi mpepo zokupongoka ngazi pitisire nkenye matokoro aga ngazi tura po mbunga zaJehova ntani vanavazinyetu ava ngava pitisire ngava mu pakere mbili unene. Nye age ga dimbwilire hena asi mbunga zaJehova zina hara sirugana saJehova si pwe nosiruwo.

14. Elitjindjo musinke eli lya digoperere Vlado ntani yisinke ya mu vaterere?

¹⁴ Mukuronambunga gedina Vlado gonomvhura 73 ogu ga tunga moSlovenia, ngayi mu karere udigu apa mbungakriste zawo va zi pakerere nombungakriste zapeke yipo va ruganese Sinyanga simwe tupu ntani apa Sinyanga esi  nga pongere va si pete. Age kwa uyunga asi: “Kapi na kwete egano konda zeyi Sinyanga sosiwa ngosina nava si patera. Ayo kwa koresere nge morwa ntani tupu twa si tungwilire Sinyanga oso. Ame muhongi goyikungu ntani name gumwe ogu na wapaika yininke eyi va ruganesa. Mokumona asi ose kwa tu pakerere kumwe nombungakriste zapeke, apo pwa hepere malitjindjo gomanzi aga ga kere udigu kwetu ose vazuvhisi vanare.” Yisinke ya vaterere Vlado yipo a kwatese ko ewapaiko olyo? Age kwa fatwilire asi: “Kuyika malitjindjo aga azi tulisa po mbunga zaJehova, narunye kuretesa po matungiko. Malitjindjo aga, kutuvatera yipo tu kare tuna liwapaikire komalitjindjo gomanene aga ngaga horoka komeho.” Ayo kuna kukudigopera kweyi ga wiza po malitjindjo gokuruganesa Sinyanga simwe nonombungakriste dapeke ndi kweyi sa litjindja situmbukira soge ndi? Kara nehuguvaro asi Jehova kukwata egano malizuvho goge. Nsene o kwatesa ko matokoro ogo nokulimburukwa Jehova ntani nombunga zendi ezi ana kuruganesa, ove ngo gwana matungiko.—Epis. 18:25.

15. Ngapi omu natu twikira kukara nonondunge nsene kuna kuligwanekera nomaheteko mombungakriste?

¹⁵ Ngomu tuna ku hedera pepi nehagero lyouhura woyininke youzuni ou, twa hepa kuyindindira asi ngatu ligwanekera nomaudigu gokutundilira mombungakriste. Maudigu ogo kuvhura ngaga heteke ulimburukwi wetu kwaJehova. Yipo nye, twa hepa kukara nonondunge. Nsene ove kulizuvha asi Mukriste mukweni kwa ku tekura momudona, wa ha kara nonkoko. Nsene va na kupukurura, wa ha demenena komapuko goge, tambura epukururo ntani noku tura po malitjindjo. Ntani apa mbunga zaJehova azi tulisa po malitjindjo aga naga kukundama, ga tambura nomutjima nagunye ntani nokulimburukwa mavyukiso ogo.

16. Ngapi omu no twikira kuhuguvara Jehova ntani nombunga zendi?

¹⁶ Ove kuvhura kutwikira kuhuguvara mwaJehova nombunga zendi, apa ulimburukwi woge ava u heteke. Nye mokuninka asi tu yi rugane ngoso, ntudi twa hepa kukara nonondunge, eyi kutanta asi kukara tuna litura, kugazara nawa ntani kutara yininke ngwendi moomu ayi tara Jehova. Tokomena kulironga kuhamena yihonena yovantu ava va tumbura moBibeli ava ya tompokere kulididimikira maudigu gokulifana ntani teda ko koyihonena yawo. Kanderera kwaJehova yipo a ku vatere. Ntani wa ha ligusa ko kombungakriste. Makura yi kare asi yisinke ngayi horoka, Satana kapi ngayi mutompoka kukugusa ko kwaJehova ndi kombunga zendi.—Jak. 4:7.