1. Ngapi omu tuna yi diva asi Jehova ana hara a tu hedere pepi?

 JEHOVA ana hara tu mu hedere pepi. (Jak. 4:8) Age ana hara kukara Karunga gwetu, Guhyetu ntani kaume ketu. Age kulimburura makanderero getu ntani kutuvatera apa atu ligwanekere nomaudigu. Ntani age kuruganesa mbunga zendi yipo zi tu ronge nokutuvatera. Nye yisinke natu rugana yipo tu hedere Jehova pepi?

2. Yisinke natu rugana yipo tu hedere Jehova pepi?

² Ose kuvhura kuhedera Jehova pepi, pokukanderera kwendi, pokuresa Nonkango dendi ntani nokuteda ko. Apa atu yi rugana eyi, ayo kutuninkisa tu mu hare ntani tu kare norupandu kwendi. Ayo kututumangeda tu mu limburukwe ntani nokumupa efumadeko eli lyamufira. (Ehor. 4:11) Moomu tuna kudiva Jehova, yimo hena ngatu mu huguvara nombunga zendi ezi azi tu vatere.

3. Ngapi omu muzonaguli a hetekere ko kutuninkisa tu hageke kukarera Jehova, nye yisinke nayi tu vatera tu dire kusiga Karunga nombunga zendi? (Episarome 31:13, 14)

³ Muzonaguli kuhetekera ko kutuninkisa tu hageke kukarera Jehova, unene po apa atu ligwanekere nomaudigu. Ngapi omu a yi rugana eyi? Age kutuninkisa kanunu-kanunu yipo tu hageke kuhuguvara Jehova nombunga zendi. Nye kuvhura yi tu tompoke kunyokera po yiraha yendi. Nsene tu kara nepuro lyokupama ntani nokuhuguvara mwaJehova, ose kapi ngatu siga Karunga gwetu ntani nombunga zendi.—Resa Episarome 31:13, 14.

4. Yisinke natu ka zogera mosirongwa esi?

⁴ Mosirongwa esi tatu ka zogera yininke yitatu eyi atu ligwanekere nayo mouzuni ou. Nkenye sininke kuvhura kutuninkisa  tu dire kuhuguvara mwaJehova ntani mombunga zendi. Ngapi omu yininke eyi nayi vhura kutuninkisa tu hageke kukarera Jehova? Ntani yisinke natu rugana yipo tu nyokere po nonkedi edi a ruganesa Satana?

5. Ngapi omu maudigu naga tu ninkisa tu dire kuhuguvara mwaJehova nomombunga zendi?

⁵ Poyiruwo yimwe ose kuligwanekera nomaudigu, ngwendi marwaneso gokutundilira kovanekoro ndi kuzumbanesa yirugana yetu. Ngapi omu maudigu ogo naga tu ninkisa tu dire kuhuguvara mwaJehova nombunga zendi ntani nokuhageka kumukarera? Apa atu lididimikire maudigu siruwo sosire, ayo kuvhura kutuguvisa nokutuninkisa tu dire kukara nehuguvaro. Satana kuruganesa yiruwo yangoso yipo a tu ninkise tu gazare asi Jehova kapi ga tu hara. Muzonaguli kuna hara tu gazare asi Jehova ntani mbunga zendi yiwo vana kuretesa po maudigu getu. Eyi ya li fana noVaisraeli vamwe ava va tungire moEgipite. Pomuhowo awo va yi pulire asi Jehova yige ga horowere Mosesa naArona yipo a ka va zowore mo moupika ou va kere. (Ex. 4:29-31) Nye konyima apa Farawo ga digopekere eparu lyawo, awo kwa pere Mosesa naArona usima komaudigu aga va li gwanekerere nago nokuvatantera asi: “Muna ninkisa Farawo novakareli vendi va tu nyenge ntani muna tura rufuro mokuwoko kwawo yipo va tu dipage.” (Ex. 5:19-21) Awo kwa pere usima, vakareli owo vaKarunga wovalimburukwi. Eyi va rugene kwa kere sili sininke sosidona. Nsene asi ove kwa lididimikira maudigu siruwo sosire, yisinke no rugana yipo o twikire kuhuguvara mwaJehova nomombunga zendi?

6. Yisinke natu lirongera ko komuporofete Habakuku kuhamena omu natu lididimikira maudigu? (Habakuku 3:17-19)

⁶ Kanderera kwaJehova ntani gwana evatero lyokutunda kwendi. Muporofete Habakuku kwa li gwanekerere nomaudigu gomanzi. Ayo kumoneka asi sikando simwe age ga kere nomasinganyeko nsene asi Jehova ga mu pakerere mbili. Age kwa tente asi: “HOMPA, dogoro ezuvake na hepa ame kukuga ekwafo, nye ove nokupurakena nge si.” (Hab. 1:2, 3) Jehova ga limbwilire ekanderero lyomukareli gwendi gomulimburukwi. (Hab. 2:2, 3) Konyima zapa Habakuku ga gazadarere ko momunene kuhamena omu Jehova ga poperere vantu vendi, age ga kere hena noruhafo. Age ga ya yi pulire nawa-nawa asi Jehova kwa mu pakerere mbili ntani nga mu vatera a lididimikire nkenye udigu. (Resa Habakuku 3:17-19.) Yisinke tuna kulirongera ko? Nsene kuna kuligwanekera nomaudigu, kanderera kwaJehova nokumutantera omu ono kulizuvha. Ntani gwana evatero lyokutunda kwendi. Nsene o yi rugana, ove ngo kara nehuguvaro asi Jehova ngaku pa nonkondo edi wa hepa yipo o li didimikire. Ano apa ngo mona omu Jehova ana kukuvatera, epuro lyoge ngali nkondopara unene.

7. Yininke musinke vemekoro lyaShirley ngava mu tantere yipo va mu ninkise a kare nomasinganyeko ntani yisinke ga rugene yipo a twikire kukara nepuro mwaJehova?

⁷ Twikira kurugana yininke eyi nayi kuvatera o kare pepi naJehova. Tu tareni omu kurugana yininke oyo ya vaterere munazinyetu gomukadi Shirley ogu ga tunga moPapua New Guinea apa ga li gwanekerere nomaudigu. b Epata lyawo kwa kere vantu woruhepo ntani poyiruwo yimwe ngayi va digopere kugwana nondya dokugwanena po. Gumwe gekoro kwa hetekerere ko kumuninkisa a dire kuhuguvara mwaJehova. Age kwa uyungire asi: “Ove kutanta asi mpepo zokupongoka kuna kukuvatera, nye ngapi zina kukuvatera? Epata lyetu simpe kuna kuhepa. Ove kuna kuhepekera tupu siruwo soge mokuzuvhisa.” Shirley kwa uyunga asi: “Makura yipo na lipulire asi: ‘Ngoso  Karunga kutupakera sinka ndi pira?’ Makura yipo na kanderere usimbu kwaJehova nokumutantera nayinye eyi na gazarere. Ame kwa twikilire kuresa Bibeli noyimbapiratjangwa yetu ntani kwa twikilire kuzuvhisa nokuza komapongo.” Mwaza siruwo yipo ga ya dimbwilire asi Jehova nani nga pakere mbili epata lyawo. Epata lyawo kapi ngali rara nonzara ntani awo kwa kere noruhafo. Shirley kwa tanta asi: “Ame kwa lizuvhire asi Jehova kwa limbwilire makanderero gange.” (1 Tim. 6:6-8) Nsene o twikira kurugana yininke yopampepo, nove kapi ngo pulisira maudigu ndi masinganyeko ga ku ninkise o hageke kukarera Jehova.

8. Yisinke nayi vhura kuhorokera vanavazinyetu ava ava pitisire mombunga zaJehova?

⁸ Nonkore detu kuuyunga yimpempa ndi nombudi depuko kupitira kointaneta ndi koyikwakonentu kuhamena vanavazinyetu ava ava pitisire mombunga zaJehova. (Epis. 31:13) Vanavazinyetu vamwe wovagara kwa va kwata ntani nokuvarundira asi awo vakorokotji. Mosiruwo sovapositoli, Vakriste nawo kwa li gwanekerere noudigu wokulifana apa mupositoli Paurusa va mu rundilire nokumukwata. Yisinke va rugene ko?

9. Yisinke va rugene Vakriste vamwe apa mupositoli Paurusa va mu tulire modorongo?

⁹ Vakriste vamwe womosiruwo sovapositoli kwa hagekere kukwatesa ko mupositoli Paurusa apa va mu tulire moRoma. (2 Tim. 1:8, 15) Morwasinke? Awo ngoso kwa lifire nomuga morwa vantu ngava tara Paurusa asi mukorokotji ndi? (2 Tim. 2:8, 9) Ndi awo kwa kere nowoma asi nawo kuvhura va va hepeke? Yikare asi konda musinke va kere nazo, gazadareni ko tupu kuhamena omu mupositoli Paurusa ga lizuvhire. Age kwa lididimikire maudigu gomanzi ntani kwa tulire eparu lyendi mosiponga yipo ava popere. (Yirug. 20:18-21; 2 Kol. 1:8) Tu nyokereni po kukara ngwendi vantu ava va sigire Paurusa posiruwo esi ga hepere evatero. Yisinke twa hepa kudiworoka nsene vanavazinyetu ava ava pitisire kuna kuva hepeka?

10. Yisinke twa hepa kudiworoka nsene vanavazinyetu ava ava pitisire kuna kuvahepeka ntani morwasinke?

¹⁰ Diworoka konda zeyi ava tu hepekere ntani  nogu a retesa po mahepeko ogo. 2 Timoteusa 3:12 kutanta asi: “Navenye ava va tokora kukarera Karunga nokukara mouumwe naJesus Kristusa, nawo ngava va hepeka.” Yipo nye, kapisi yi tu tetukise kweyi Satana a homokere po unene vanavazinyetu ava ava pitisire. Age kuna hara asi mahomokero aga ga ninkise vanavazinyetu va kare noutjirwe ntani va hageke kulimburukwa Jehova.—1 Pet. 5:8.

11. Yisinke tuna kulirongera ko kosihonena saOnesiforusi? (2 Timoteusa 1:16-18)

¹¹ Twikira kukwatesa ko vanavazinyetu ava ava pitisire. (Resa 2 Timoteusa 1:16-18.) Mukriste gomosiruwo sovapositoli Onesiforusi kwa rugene yininke eyi ya lisigire neyi va rugene Vakriste vakwawo apa Paurusa va mu tulire modorongo. ‘Age kapi ga lifire nomuga kweyi Paurusa ga kere monomango.’ Nye Onesiforusi kwa paparere Paurusa, ano apa ga ka mu gwene, age kwa mu vaterere mononkedi dokulisiga-siga. Mokuyirugana ngoso, Onesiforusi kwa tulire eparu lyendi mosiponga. Yisinke tuna kulirongera ko? Kapisi tu pulisire utjirwe wokutjira vantu u tu tjilise ndi u tu kondere tu dire kukwatesa ko vanavazinyetu ava vana kuhepeka. Nye twa hepa kuvapopera ntani nokurugana nkenye eyi twa ku vhura yipo tu va vatere. (Yis. 17:17) Twa hepa kuvalikida eharo ntani nokuvavatera.

12. Yisinke tuna kulirongera ko kovanavazinyetu womoRussia?

¹² Konekeni omu vanavazinyetu womoRussia ava vatere vapuli vakwawo ava ava tura modorongo. Apa vamwe ava va twara konompanguro, vanavazinyetu wovanzi kuza va ka va kwatese ko. Yisinke tuna kulirongera ko? Nsene vanavazinyetu ava ava pitisire kuna kuvarundira nokuvakwata ndi kuna kuvahepeka, wa ha kara noutjirwe. Vakanderera po, pakera mbili vemepata lyawo ntani papara nonkedi dimwe omu no vhura kuvavatera.—Yirug. 12:5; 2 Kol. 1:10, 11.

13. Ngapi omu maswauro naga tu ninkisa tu dire kuhuguvara mwaJehova ntani mombunga zendi?

¹³ Vanekoro vetu wovahapuli novarugani vakwetu ndi vanasure vakwetu kuvhura vatu swaure morwa yeeyi atu zuvhisa ndi morwa yeeyi atu kwama nompango daJehova. (1 Pet. 4:4) Awo kuvhura va uyunge asi: “Ame nakuhara nye ukareli weni kukwama nompango dononzi ntani one kukwama yininke yanare.” Vamwe kuvhura va tu uyunge momudona morwa monkedi omu atu tekura vantu ava va gusa mombunga pokuuyunga asi: “Ngapi omu nomuvhura kulitumbura asi one vantu veharo?” Magano gokufana ngesi kuvhura kutuninkisa tu kare nomasinganyeko. Kuvhura tu tameke kuyalipura asi: ‘Ngoso Jehova kuna kundindira ko yoyinzi kwange ndi?’ Mbunga zendi kwa kara nonoveta dononzi ndi? Nsene asi ove kuna kuligwanekera noukaro wangoso, ngapi omu no kara pepi naJehova ntani nombunga zendi?

14. Yisinke ngatu rugana apa vantu wopeke ngava tu swaura kweyi atu paruka kuliza nonompango daJehova? (Episarome 119:50-52)

¹⁴ Tokomena kukwama nompango daJehova. Joba kwa kere mugara ogu nga kwama nompango daJehova nampili ngomu ngava mu swaura kweyi nga kwama nompango daJehova. Mugara gumwe ogu ga lininkisire asi age kaume kaJoba, kwa hetekerere ko kuninkisa Joba a yi pure asi Karunga kapi ga kere nosinka nsene asi Joba nga kwama nompango dendi ndi hawe. (Joba 4:17, 18; 22:3) Nye Joba ga nyokere kupura yimpempa oyo. Age ga yi divire asi nompango daJehova mouhunga da kara ntani ga tokomenene mokudikwama. Age kapi ga pulisilire wopeke va mu ninkise a dire kulimburukwa. (Joba 27:5, 6) Yisinke tuna kulirongera ko? Wa ha pulisira marwaneso ga ku ninkise o kare nomasinganyeko kuhamena nompango daJehova. Gazara kweyi yaku horokera meparu lyoge. Ove nampo wa li monena yikando yoyinzi asi  eparu lyoge lina wapa apa o kwama nompango daJehova. Tokomena kukwama mbunga zaJehova ezi azi kwatesa ko nompango odo. Yikare asi maswauro gokuhura kupi ngatu ligwanekera nago, ayo kapi ngayi tu ninkisa tu hageke kukarera Jehova.—Resa Episarome 119:50-52.

15. Morwasinke Brizit ga ligwanekerere nomaswauro?

¹⁵ Konekeni eyi ya horokerere munazinyetu gomukadi Brizit ogu ga tunga moIndia. Age kwa mu swawire vekoro lyendi morwa epuliro lyendi. Konyima zapa ga gwene ekuho mo-1997, mugara gwendi gomuhapuli kwa zumbanesere yirugana yendi. Makura yipo ga tokwere asi nage naBrizit novana vawo wovakadona va hepa kudiruka va ka kare novakondi vendi ava va tungire mositata sapeke. Nye Brizit kwa ka li gwanekerere hena nomaudigu gomanzi. Mokumona asi mugara gwendi kapi ga kere noyirugana, age ga hepere kurugana mazuva nagenye yipo a pakere mbili epata lyendi. Mokugwederera ko, mbungakriste ezi ezi za va kere pepi kwa likere nembo lyawo ure wonokilometa 350. Ntani hena ekoro lyamugara gwendi kwa mu rwanesere morwa epuliro lyendi. Ukaro owo kwa didire unene, makura epata lyoBrizit yipo lya dirukire hena. Ano hararasi tupu mugara gwendi yipo ga dogorokere. Ano konyima munendi gumwe gomukadona gonomvhura 12 nage kwa dogorokere kokankera. Yokuguvisa po unene yeeyi asi vekoro lyaBrizit kwamupere usima koyihorokwa nayinye oyo. Awo kwa uyungire asi maudigu nagenye aga ngano kapi ga horokere nsene ngano kapi ga kere gumwe goNombangi daJehova. Nye nampili ngoso, age kwa twikilire kuhuguvara mwaJehova ntani nokukara pepi nombunga zendi.

16. Mauwa musinke ga gwanena mo Brizit morwa kukara pepi naJehova ntani nombunga zendi?

¹⁶ Mokumona asi Brizit kwa tungire ure nombungakriste, mutareli gumwe gonombunga kwa mu korangedere a zuvhisire momukunda oku ga tungire ntani nokuruganena mapongo membo lyendi. Pomuhowo age kwa lizuvhire asi kapi nayi sikisa mo, nye age kwa kweme evyukiso eli va mu pere. Age nga tantere ko vakwawo mbudi zongwa, nga ruganene mapongo membo lyendi ntani nga litulire po nkenye apa siruwo sokurugana ukereli wepata kumwe novana vendi wovakadona. Yitundwamo musinke  ga gwanena mo? Brizit ga tamekere kuronga varongwa wovanzi ntani sinzi sawo va gwana ekuho. Mo-2005 yipo ga tamekere kurugana uzuvhisi wokukarerera. Age ga gwanena mo mauwa kweyi ga huguvara mwaJehova nokulimburukwa kombunga zendi. Vana vendi wovakadona kuna kutwikira kukarera Jehova noulimburukwi ntani momukunda gwawo ngesi kuna kara mo nombungakriste mbali. Brizit ga yi pura nawa-nawa asi Jehova kwa mu pere nonkondo yipo a lididimikire maudigu gendi ntani nokulididimikira maswauro gokutunda kovanekoro.

17. Yisinke natu tokomena kurugana?

¹⁷ Satana ana hara tu yi pure asi Jehova kapi a tu vatere apa atu ligwanekere nomaudigu ntani asi kukwatesa ko mbunga zaJehova ngayi ninkisa tupu eparu lyetu lidigope. Satana ana hara tu kare nowoma apa vanavazinyetu ava ava pitisire ava va rundire nokuvahepeka ndi apa ava va tura modorongo. Ano apa atu ligwanekere nomaswauro, age ana hara tu dire kuhuguvara mwaJehova ntani mombunga zendi. Nye nampili ngoso, ose twa diva nawa yiraha yendi ntani kapi tuna hara kuyipulisira yi tu pukise. (2 Kol. 2:11) Tokomena kunyokera po yimpempa yaSatana ntani twikira kulimburukwa Jehova nombunga zendi. Diworoka asi Jehova kapi ngaku zumba. (Epis. 28:7) Yipo nye, wa ha pulisira nkenye eyi yi ku ninkise o hageke kukarera Jehova.—Rom. 8:35-39.

18. Yisinke ngatu ka zogera mosirongwa sokukwama ko?

¹⁸ Mosirongwa esi, ose kuna zogere mo yininke eyi atu ligwanekere nayo yokutunda kouzuni ou. Nye ehuguvaro lyetu mwaJehova kuvhura hena kuliheteka apa atu ligwanekere nomaudigu aga aga tundilire mombungakriste. Ngapi omu nayi tu tompoka kulididimikira maudigu gangoso? Ngatu ka yi zogera mosirongwa sokukwama ko.