SIRONGWA SELIRONGO 45
Omu Jehova a tu vatere yipo tu sikise mo sirugana setu sokuzuvhisa
“Ngava diva tupu asi muporofete ga kere mokatji kawo.”—HES. 2:5.
RUSUMO 67 ‘Zuvhisa Nonkango’
ETWAROMO a
1. Yisinke twa hepa kundindira eyi nayi vhura kutuhorokera ntani ehuguvaro musinke twa hepa kukara nalyo?
OSE KUVHURA kuyindindira asi ose ngatu ligwanekera nomarwaneso ngomu tuna kulihameka mo mosirugana setu sokuzuvhisa. Ano marwaneso ogo kuvhura ngaga ligwederere unene komeho. (Ndan. 11:44; 2 Tim. 3:12; Ehor. 16:21) Nye nampili ngoso, ose kuvhura kukara nehuguvaro asi Jehova ngatu pa evatero eli twa hepa, yipo tu sikise mo sirugana setu. Morwasinke tuna kuuyungira ngoso? Jehova ga yi likida omu ga vatera vakareli vendi nkenye apa yipo va sikise mo yitumbukira yawo nampili yikare asi yitumbukira oyo ga va pura va rugane udigu kuyisikisa mo. Mokuyifanekesa eyi, tu zeni tu ka zogere yihorokwa yimwe eyi ya horokere meparu lyomuporofete Hesekiyeli, ogu ga zuvhisilire Vajuda ava va kere mounkwate waBabironi.
2. Ngapi omu Jehova ga fatwilire vantu ava ga hepere kuzuvhisira Hesekiyeli ntani yisinke natu ka zogera mosirongwa esi? (Hesekiyeli 2:3-6)
2 Vantu musinke ga hepere kuzuvhisira Hesekiyeli? Jehova kwa va fatwilire asi awo kwa kere vantu ava va ‘rundire nomutwe,’ kapi va peke ‘efumadeko’ ntani awo kwa kere “vahavhuliki.” Awo kwa kere siponga ngwendi mega ntani ngwendi nonge. Eyi yiyo Jehova ga tanterere Hesekiyeli yikando yongandi asi: ‘Wa ha tjira.’ (Resa Hesekiyeli 2:3-6.) Hesekiyeli ya mu tompokere kusikisa mo sirugana sendi sokuzuvhisa (1) morwa Jehova yige ga mu tumine, (2) mpepo zaKarunga kwa mu pere nonkondo edi ga hepere ntani (3) Nonkango daKarunga kwa nkondopekere epuro lyendi. Ngapi omu yininke eyi yitatu ya vaterere Hesekiyeli? Ntani ngapi omu ayi tu vatere nose neina?
JEHOVA YIGE GA TUMINE HESEKIYELI
3. Nonkango musinke da nkondopekere Hesekiyeli ntani yisinke ga mu tumbwidilire Jehova kuhamena omu ngamu vatera?
3 Jehova kwa tanterere Hesekiyeli asi: “Ame tani ku tumu.” (Hes. 2:3, 4) Nonkango odo kwa korangedere Hesekiyeli. Morwasinke? Morwa Hesekiyeli kwa diworokere asi Jehova kwa tanterere Mosesa naJesaya nonkango dokulifana apa ga va horowere yipo va kare vaporofete vendi. (Ex. 3:10; Jes. 6:8) Hesekiyeli ga divire hena omu Jehova ga vaterere vaporofete owo vavali yipo va sikise mo yirugana youdigu eyi ga va pere Jehova. Yipo nye apa Jehova ga tanterere Hesekiyeli yikando yivali asi ‘ame tani ku tumu,’ muporofete ogu ngano ga kere nonokonda donongwa deyi ga heperere kuhuguvara mevatero lyaJehova. Ntani hena, Hesekiyeli kwa tjenge yikando yongandi nonkango edi asi: “Hompa ta uyungisa nge.” (Hes. 3:16; 6:1) Yosili, Hesekiyeli ga yi pulire nawa-nawa asi Jehova yige ga mu tumine. Mokugwederera ko, oguhwe vaHesekiyeli kwa kere mupristeli. Yipo nye, awo nampo va rongere Hesekiyeli omu Jehova nga huguvaresa vaporofete vendi nkenye apa pokuvatantera asi ngava vatera. Pasihonena, Jehova kwa tanterere Isaka naJakopo ntani Jeremiya asi: “Ame nove na kara.”—Gen. 26:24; 28:15; Jer. 1:8.
4. Nonkango musinke dokuhengagwida edi da nkondopekere Hesekiyeli?
4 Ngapi omu sinzi soVaisraeli va tere sirugana saHesekiyeli sokuzuvhisa? Jehova kwa uyungire asi: “Mbunga zaIsraeli kapi ngazi hara kukupurakena, name si kapi ngava purakena nge.” (Hes. 3:7) Apa vantu va nyokere kupurakena kwaHesekiyeli, awo hena kwa nyokere kupurakena kwaJehova. Nonkango odo kwa huguvaresere Hesekiyeli asi nampili ngomu vantu va nyokere kumupurakena, ayo kapi ya likidire asi age kapi ga sikisire mo nawa sirugana sendi ngomuporofete. Jehova kwa huguvaresere hena Hesekiyeli asi apa siruwo sompanguro sa sikire mo, vantu yipo va ya ‘divire asi muporofete ga kere mokatji kawo.’ (Hes. 2:5; 33:33) Yosili nonkango odo kwa pere Hesekiyeli nonkondo edi ga hepere yipo a sikise mo sirugana sendi sokuzuvhisa.
JEHOVA KUTUTUMA NOSE NEINA
Ngwendi Hesekiyeli, vantu vamwe kuvhura ngava dire kutambura mbudi ezi atu va zuvhisire ntani kuvhura ngatu ligwanekere nomarwaneso. Nye ose twa yi diva asi Jehova nose ga kara (Tara paragarafu 5-6)
5. Kuliza naJesaya 44:8, kupi ko oku ngatu vhura kugwana nonkondo?
5 Nose kugwana nonkondo pokudiva asi Jehova yige ga tu tuma yipo tu zuvhise. Age kutulikida efumadeko pokututumbura asi “nondipo” dendi. (Jes. 43:10) Azo kuna kara mfumwa zonene kwetu! Ngwendi moomu Jehova ga tanterere Hesekiyeli asi: ‘Wa ha tjira,’ Jehova nose kututantera asi ‘twa ha tjira.’ Konda musinke zeyi natu dilira kutjira vantu ava ava tu rwanesa? Morwa ngwendi Hesekiyeli, Jehova yige ga tu tuma ntani age nga tu vatera.—Resa Jesaya 44:8.
6. (a) Ngapi omu Jehova ga tu tumbwidira asi nga tu vatera? (b) Yisinke ayi tu vatere tu gwane ehengagwido nononkondo mosirugana setu sokuzuvhisa?
6 Jehova kwa tu tumbwidira asi nga tu vatera. Pasihonena, komeho tupu Jehova a uyunge nonkango edi asi “one nyone nondipo dange,” age kwa uyungire asi: “Nsene ngo genda petondo, ame ngani kara kumwe noge; maudigu goge kapi ngaga ku diinina po. Nsene ngo genda momundiro, kapi ngo pya; maheteko gomadigu aga ngaga wiza, kapi ngaga ku remeka.” (Jes. 43:2) Apa atu zuvhisa, poyiruwo yimwe ose kuligwanekera nomaudigu aga natu vhura kuhetakanesa ketondo ntani maudigu gomanene aga natu vhura kuhetakanesa komundiro. Nye Nampili ngoso, nevatero lyaJehova, ose kutwikira kuzuvhisa. (Jes. 41:13) Ngwendi moomu ya kere momazuva gaHesekiyeli, sinzi sovantu neina kunyoka kutambura mbudi ezi atu va zuvhisire. Apa ayi horoka oyo, ose kudiworoka asi ayo kapi ayi tanta asi ose kapi twa sikisa mo sirugana setu sokuzuvhisa ngonondipo daKarunga. Ose kugwana ehengagwido nononkondo pokudiva asi Jehova kuhafa kweyi atu twikire kuzuvhisa mbudi zendi noulimburukwi. Mupositoli Paurusa kwa uyungire asi: “Nkenye ogu nga ka gwana mfeto zendi kuliza noyirugana yendi.” (1 Kol. 3:8; 4:1, 2) Munazinyetu gumwe gomukadi ogu ga rugana uzuvhisi wokukarerera nomvhura dononzi kwa uyunga asi: “Ayo kuhafesa nge pokudiva asi Jehova kutufuta kweyi atu mu ruganene nelituromo.”
MPEPO ZAKARUNGA KWA PERE HESEKIYELI NONKONDO EDI GA HEPERE
Hesekiyeli kwa mwene emoneko eli lya likidire etemba lyaJehova eli lya mu vaterere a yi pure nawa-nawa asi Jehova nga mu vatera a sikise mo sirugana sendi sokuzuvhisa (Tara sirongwa 45, paragarafu 7)
7. Ngapi ga lizuvhire Hesekiyeli apa ga gazadarere ko kemoneko eli ga mwene? (Tara efano lyopontunda.)
7 Hesekiyeli ga mwene omu mpepo zaKarunga za kara nononkondo. Eyi ga mwene Hesekiyeli memoneko kwa mu vaterere a dimburure asi mpepo zokupongoka kwa vaterere vaengeli wononkondo ntani kwa gendesere etemba lyenene eli lya kere nomakoso. (Hes. 1:20, 21) Yisinke ga rugene ko Hesekiyeli apa ga yi mwene oyo? Age kwa tjenge eyi ya horokere. Age kwa uyungire asi: “Ano apa na yi mwene eyi, makura tani liganda ni twe sipara pevhu.” Hesekiyeli kwa tetukire unene, ano eyi kwa mu ninkisire a li gandere pevhu. (Hes. 2:1) Ano konyima, apa Hesekiyeli nga gazadara ko nkenye apa kemoneko olyo lyokutetukisa, ayo kwa nkondopekere ehuguvaro lyendi asi nevatero lyompepo zokupongoka, age kuvhura nga sikise mo sirugana sendi sokuzuvhisa.
8-9. (a) Yisinke ya horokerere Hesekiyeli, apa Jehova ga mu pangerere a katuke? (b) Ngapi omu Jehova ga nkondopekere Hesekiyeli nampili ngomu ga zuvhisilire momukunda omu mwa kere vantu wovadona?
8 Jehova kwa pangerere Hesekiyeli asi: “Munwamuntu, katuka. Ame kuna hara ni ku uyungise.” Mpangera ozo ntani mpepo zokupongoka kwa pere Hesekiyeli nonkondo edi ga hepere yipo a katuke po pevhu. Hesekiyeli kwa tjenge asi: “Mpepo zaKarunga makura tazi hwilire mwange tazi katura nge.” (Hes. 2:1, 2) Mpepo zokupongoka kwa pitisilire Hesekiyeli mosirugana sendi nasinye sokuzuvhisa. (Hes. 3:22; 8:1; 33:22; 37:1; 40:1) Mpepo zaKarunga kwa nkondopekere Hesekiyeli yipo a sikise mo sirugana esi ga gwene sokuzuvhisira vantu ‘wokurunda nomutwe’ ntani nava ‘wonomutjima da hana kulipura.’ (Hes. 3:7) Jehova kwa tanterere Hesekiyeli asi: “Ame tani ku rundike nove mutwe, ni ku rulike sipara ngwendi yiwo. Mutwe goge tani gu kukutike ngwendi kawe, kupitakana emanya moukukutu, nokuvatjira si vahavhuliki owo.” (Hes. 3:8, 9) Ayo kwa monekere ngwendi asi Jehova kuna kutantera Hesekiyeli asi: ‘Kapisi o pulisire nkareso zondona zovantu zi ku dompese. Ame ngani kunkondopeka.’
9 Konyima zoyo, mpepo zaJehova kwa pitisilire Hesekiyeli mosirugana sendi sokuzuvhisa. Hesekiyeli kwa tjenge asi: “Nonkondo daHOMPA tadi wiza pwange.” Ayo kwa gusire Hesekiyeli sivike, yipo a lironge nawa nokukwata egano mbudi ezi ga hepere kukazuvhisa yipo a ka zi zuvhise noupampi. (Hes. 3:14, 15) Makura Jehova yipo ga mu tanterere a ze komuramba oku za ka mu hwililire “mpepo zaKarunga.” (Hes. 3:23, 24) Hesekiyeli ga liwapaikilire kutameka sirugana sokuzuvhisa.
NEINA MPEPO ZAKARUNGA KUTUPA NONKONDO EDI TWA HEPA
Yisinke ya vaterere Hesekiyeli ntani yisinke nayi tu vatera nose neina yipo tu sikise mo sirugana setu sokuzuvhisa? (Tara paragarafu 10)
10. Evatero musinke twa hepa yipo tu sikise mo sirugana setu sokuzuvhisa ntani morwasinke?
10 Evatero musinke twa hepa yipo tu sikise mo sirugana setu sokuzuvhisa? Mokugwana elimbururo, gazadara ko kuhamena eyi ya horokerere Hesekiyeli. Komeho a tameke sirugana sendi sokuzuvhisa, mpepo zaKarunga kwa mu pere nonkondo edi ga hepere. Ngwendi Hesekiyeli, neina nose kututompoka kuzuvhisa morwa evatero lyompepo zokupongoka zaKarunga. Morwasinke? Morwa Satana kuturwanesa, yipo asi tu hageke sirugana setu sokuzuvhisa. (Ehor. 12:17) Sinzi sovantu kugazara asi Satana nonkondo unene ntani asi ose kapi tatu vhuru kumurwanesa. Nye kupitira mosirugana setu sokuzuvhisa, ayo kututompoka kumurwanesa. (Ehor. 12:9-11) Monkedi musinke ayi tu tompoka kurwanesa Satana? Apa atu li hameke mokuzuvhisa, ose kuyilikida asi ose kapi atu tjira yiraha yaSatana. Ose kufunda Satana nkenye apa atu lihameke mokuzuvhisa. Yinke nye yina kulikida eyi mokumona asi ose kuvhura kutwikira nosirugana setu sokuzuvhisa, nampili apa nonkore detu adi tu rwanesa? Eyi kulikida nawa-nawa asi Jehova kutupa nonkondo kupitira mompepo zendi zokupongoka ntani asi Jehova kutuhafera.—Mat. 5:10-12; 1 Pet. 4:14.
11. Yisinke ngazi tu ruganena mpepo zokupongoka ntani ngapi omu natu twikira kuzigwana?
11 Yisinke hena natu lirongera ko monkedi omu Jehova ga pere Hesekiyeli nonkondo edi ga hepere yipo a zuvhise? Mpepo zokupongoka zaKarunga kuvhura kutupa nonkondo edi twa hepa yipo tu lididimikire nkenye maudigu aga ngatu ligwanekera nago mosirugana sokuzuvhisa. (2 Kol. 4:7-9) Yisinke twa hepa kurugana yipo tu twikire kugwana mpepo zaKarunga? Twa hepa kutwikira kuzihundira kupitira mekanderero ntani nokukara nehuguvaro asi Jehova nga purakena makanderero getu. Jesus kwa rongere varongwa vendi asi: ‘Omu twikire kuhundira, omu twikire kupapara, omu twikire kungongora.’ Ano ngoyitundwamo, Jehova nga gava ‘mpepo zendi zokupongoka kwava ava zi mu hundire.’—Ruk. 11:9, 13; Yirug. 1:14; 2:4.
NONKANGO DAKARUNGA KWA NKONDOPEKERE EPURO LYAHESEKIYELI
12. Kuliza naHesekiyeli 2:9–3:3, kupi za tundilire bukegango ntani yisinke ya hamenene mo?
12 Mpepo zaKarunga kapisi yizo zelike tupu za nkondopekere Hesekiyeli yipo a twikire kuzuvhisa, nye Nonkango daKarunga kwa nkondopekere hena epuro lyaHesekiyeli. Hesekiyeli kwa mwene memoneko ewoko eli lina kwaterere bukegango. (Resa Hesekiyeli 2:9–3:3.) Kupi ko za tundire bukegango? Yisinke ya hamenene mo? Ngapi omu za nkondopekere Hesekiyeli? Tu zeni tu ka gwane malimbururo komapuro ogo. Bukegango kwa tundire kosipundi soUhompa saKarunga. Ayo kumoneka asi Jehova kwa ruganesere gumwe govaengeli vane ava ga mwene Hesekiyeli, yipo va mu tambeke bukegango. (Hes. 1:8; 10:7, 20) Mobukegango kwa tjenge mo Nonkango daKarunga omu mwa hamenene mbudi zompanguro ezi ga hepere kukazuvhisa Hesekiyeli kovantu wovadona ava va kere mounkwate. (Hes. 2:7) Mbudi ozo kwa zi tjenge kontunda nokonyima zobukegango.
13. Yisinke Jehova ga tanterere Hesekiyeli a rugane kobukegango ntani morwasinke za tovarerere?
13 Jehova kwa tanterere muporofete gwendi a lye bukegango dogoro ‘zi zwide ezimo lyendi.’ Hesekiyeli ga limburukwire, makura yipo ga lire bukegango nazinye. Yisinke lya tente emoneko eli? Hesekiyeli ga hepere kukwata nawa egano mbudi ezi ga hepere kukazuvhisa. Age ga hepere kupura mombudi ozo yipo zi mu tumangede a ka zi zuvhise. Makura yiyo pwa ya horokere sininke sokutetukisa. Hesekiyeli kwaya dimbwilire asi bukegango ozo ‘kwa tovarere mokana ngwendi usi wononyiki.’ (Hes. 3:3) Morwasinke? Hesekiyeli kwa mwene asi aso kwa kere sininke sosiwa mokugwana mpito yipo a karere po Jehova. (Epis. 19:8-11) Age kwa hefe kweyi Jehova ga mu ninkire a kare muporofete gwendi.
14. Yisinke ya vaterere Hesekiyeli yipo a tameke sirugana sendi sokuzuvhisa?
14 Konyima, Jehova kwa tanterere Hesekiyeli asi: “Paka komutjima goge oku to diworoka nayinye eyi nina kukutantera.” (Hes. 3:10) Kuliza nomavyukiso ogo, Jehova kwa tanterere Hesekiyeli a hetekere ko kudiworoka eyi va tjenge mobukegango ntani nokugazadara ko nawa. Apa gayi rugene oyo Hesekiyeli, epuro lyendi kwa peme. Ayo hena kwa mu pere mbudi zononkondo ezi ga hepere kukazuvhisira kovantu. (Hes. 3:11) Apa Hesekiyeli ga kwete nawa egano nokupura nonkango daKarunga, age ga liwapaikilire kukatameka sirugana sendi sokuzuvhisa ntani nokutwikira kuzuvhisa dogoro ngasi pwe.—Hetakanesa Episarome 19:14.
NONKANGO DAKARUNGA KUNKONDOPEKA EPURO LYETU NEINA
15. Mokuninka asi tu lididimikire, yisinke twa hepa ‘kupaka komutjima’ gwetu?
15 Mokuninka asi tu lididimikire nkenye maudigu aga ngatu ligwanekera nago mosirugana sokuzuvhisa, nose twa hepa kupulisira Nonkango daKarunga di nkondopeke epuro lyetu. Twa hepa ‘kupaka komutjima’ nayinye eyi a uyunga Jehova. Neina Jehova kutuuyungisa kupitira moNonkango dendi Bibeli. Yisinke twa hepa kurugana yipo Nonkango daKarunga di twikire kuguma magazaro getu, malizuvho getu ntani neyi atu tokomene kurugana?
16. Yisinke twa hepa kurugana kuhamena Nonkango daKarunga ntani ngapi natu di kwata nawa egano?
16 Ngwendi moomu tupu atu nkondopara apa atu li nondya, ose kunkondopara pampepo ntani epuro lyetu kupama apa atu lirongo Nonkango daKarunga ntani nokuteda ko. Oyo ya li fana neyi natu vhura kulirongera ko koNonkango daKarunga. Jehova kuna tu harere tu ‘zwide ezimo lyetu’ nononkango dendi. Eyi kutanta asi twa hepa kukwata nawa egano nonkango dendi. Ose kuvhura kuyirugana oyo kupitira mekanderero, pokuresa ntani nokuteda ko. Pomuhowo, ose kukanderera yipo tu wapaike nomutjima detu yipo tu gwane magazaro gaKarunga. Makura konyima zoyo, ose kuresa sihorokwa somoBibeli. Ntani ose kuhageka nakauke kuresa yipo tu tede ko nokugazadara ko unene kuhamena eyi tuna resa. Yitundwamo musinke ngayi kara? Moomu tuna kuteda ko unene, yimo hena ngatu kwata nawa egano Nonkango daKarunga ntani ado ngadi nkondopeka epuro lyetu.
17. Morwasinke ya karera nomulyo tu tede ko kweyi atu resa moBibeli?
17 Morwasinke ya karera nomulyo kuresa Bibeli ntani nokuteda ko kweyi tuna kuresa? Nsene tu yi rugana oyo, ayo ngayi tupa nonkondo edi twa hepa yipo tu zuvhise mbudi zoUhompa ngesi ntani nokuzuvhisa mbudi zompanguro ezi nampo ngatu hepa kuzuvhisa komeho. Ntani hena, apa atu teda ko koyikara yoyiwa yaJehova, elikwatakano lyetu nendi ngali nkondopara unene. Ano ngoyitundwamo, ose ngatu hafera yininke yoyitovara po unene, kutanta asi ose ngatu hafera mbili ntani ngayi tu gwanena po eyi twa kara nayo.—Epis. 119:103.
KUTUNKONDOPEKA TULIDIDIMIKIRE
18. Yisinke ngava hepa kudimburura vantu ava atu zuvhisire ntani morwasinke?
18 Hesekiyeli kwa kere muporofete, nye ose kapisi vaporofete. Nye nampili ngoso, ose tuna tokomene kutwikira kuudisa mbudi zaJehova ezi ga tjanga moNonkango dendi Bibeli, dogoro apa nga hagekesa po mwene sirugana sokuzuvhisa. Apa ngasi sika mo siruwo sompanguro, vantu ava atu zuvhisire kapi ngava kara nokonda zokuuyunga asi kapi va gwene erondoro ndi asi Karunga kapi ga kere nosinka kwawo. (Hes. 3:19; 18:23) Nye mevango lyoyo, awo ngava hepa kudimburura asi mbudi ezi twa zuvhisire kwa tundire kwaKarunga.
19. Yisinke ngayi vhura kutupa nonkondo yipo tu twikire nosirugana setu sokuzuvhisa?
19 Yisinke nayi vhura kutupa nonkondo yipo tu sikise mo sirugana setu sokuzuvhisa? Ayo kuna kara yitwa yitatu yokulifana eyi ya nkondopekere Hesekiyeli. Ose kutwikira kuzuvhisa morwa twa yi diva asi Jehova yige ga tu tuma tu zuvhise, mpepo zaKarunga zokupongoka kutunkondopeka ntani Nonkango daKarunga kunkondopeka epuro lyetu. Nevatero lyaJehova, ose kutwikira nosirugana setu sokuzuvhisa ntani noku lididimikira “dogoro kouhura.”—Mat. 24:13.
RUSUMO 65 Twikira!
a Mosirongwa esi, tatu ka zogera yininke yitatu eyi ya vaterere muporofete Hesekiyeli yipo a sikise mo sirugana sendi sokuzuvhisa. Ngomu natu ka zogera kuhamena omu Jehova ga vaterere muporofete gwendi Hesekiyeli, nayi katu vatera tu yi pure nawa-nawa asi Jehova ngatu vatera yipo tu sikise mo sirugana setu sokuzuvhisa.