Kukukarera udigu kulironga Bibeli nkenye ezuva ndi? Kapi o hafere kuresa Bibeli ndi? Yimo a tu lizuvhu pamwe natuvenye. Nye gazadara ko koyininke eyi atu rugana nkenye ezuva ngwendi kuzogana. Ose kuruganesa siruwo nononkondo detu apa atu zogana nye ose kulizuvha epwizumuko konyima zokuzogana! Kulironga Bibeli nako kuvhura kukare ngwendi kuna kutuzeresa “nomema.” (Efe 5:26) Tara magano gamwe aga naga kuvatera:

• Kara nelikwamo. Elirongo lyoBibeli lyanyamoge kuna kara sininke simwe ‘somulyo po unene’ esi na dira kuncenuna Mukriste. (Fil 1:10) Mokukuvatera o dire kudivara kurugana elirongo lyoge lyoBibeli, ngapi nsene notjanga elikwamo nokulitura oku nolimona usimbu ngwendi komuvero koesikasi? Ndi kuvhura o didilike moserefoni zoge yipo zi kudiworokese komeho zosiruwo.

• Lironga kuliza noukaro woge. Ove kukukarera ureru kulironga siruwo sosire ndi siruwo sosisupi? Wa diva nyamoge ukaro woge. Yipo nye, tura momagano yininke eyi ngomu ono kugazadara ko vili ezi nolironga. Nsene kapi o hafere kulironga posiruwo esi wa tulisa po, ngapi nsene o heteka kulironga siruwo sosisupi? Hansa kulironga nampili karuwogona kupitakana kudira kulironga. Nsene o tameka kulironga ngayi kuvatera o twikire kulironga.​—Fil 2:13.

• Horowora eyi nolironga. Nsene ove kuhingira tupu nokugazara asi yisinke nolironga, ngoso ove kapi ono ‘kuruganesa nawa siruwo soge.’ (Efe 5:16) Tjanga yirongwa eyi ono hara kulironga. Nsene o lipura epuro lyongandi, litjanga. Ano apa nomana kulironga, kuvhura o gwede ko magano gamwe eyi ono hara kulironga.

• Tura po marunduruko nsene kuvhura. Tura po marunduruko kelirongo lyoge ngwendi siruwo esi o gusa mokulironga ndi yirongwa eyi o lirongo. Yomulyo kapisi siruwo sokuhura kupi ono kulironga ndi yisinke ono kulironga nye yomulyo po kuna kara nsene kuna kulironga nkenye apa.

Nsene tu lironga nkenye apa, elikwatakano lyetu naJehova ngali nkondopara, ngatu tura po matokoro gomawa ntani ngatu nkondopara.​—Jos 1:8.