Paul: Ose kwa hefe sili unene! Mokwedi kwaMangundu 1985, ose kwa zire koLiberia, koUtokero waAfrica oku twa ka tamekere sirugana soutumwa. Ndira zetu kwa ya temberere moSenegal. Anne kwa uyungire asi: “Vili zimwe tupu zina hupu ko tu sike moLiberia!” Makura yipo twa zuvhire madiviso asi: “Ava vana kuza koLiberia va humburuke. Vantu kuna kurwanesa epangero lyomoLiberia, yipo nye kapi tatu vhuru kukasika mo.” Ure womazuva murongo, ose kwa kere kumwe novatumwa moSenegal. Ose kwa zuvhire kombudi asi sinzi sovantu kuna kuvadipaga ntani epangero kapi lina kupulisira vantu va pwage momambo gawo kongurova, nsene nava pwaga tava va dipaga.

Anne: Ose kwa vangarara. Kutunda unona, ame kwa diva nge asi muntu gowoma. Ame woma nampili kutaguruka sitaura. Nye ose simpe kwa here kuza koLiberia nampili ngomu ya kere siponga.

Paul: Name naAnne kwa kulira momukunda gumwe tupu, koUtokero waEngland. Vakondi vange ntani noyina vaAnne ngava tu korangeda tu rugane uzuvhisi wokukarerera, yipo nye ose kwa tamekere kurugana uzuvhisi wokukarerera apa tupu twa mene sure. Awo kwa hefe kweyi twa tokwere kukara mosirugana sosiruwo nasinye. Ano apa na kere nonomvhura 19, yipo na zire koBeteli, ano Anne kwa wizire konyima zapa twa likwere mo-1982.

Anne: Ose kwa hara kurugana koBeteli nye ose kwa here kuza oku va hepere vazuvhisi. Pokurugana kumwe novanavazinyetu ava va kere nare vatumwa kwa nkondopekere eharo lyetu lyokukara vatumwa. Ose ngatu kanderere kuhamena sitambo oso nkenye ngurova ure wonomvhura ntatu. Ypo nye, ose kwa hefe apa va tu zigidire mo-1985 tu ze kosikora zau-79 zaGiliyata. Ose kwa tu tumine koLiberia, koUtokero waAfrica.

Paul: Ose kwa rondere mondira ezi za hovere kuza koLiberia. Vantu simpe kwa kere nowoma ntani kapi vava pulisilire va pwage momambo kongurova. Vantu kwa kere sili nowoma, nampili etuwa lyakuhagara,  nare kwa ka duka oku tava litakumine. Mokuninka tu liture, ose ngatu resa kumwe Mapisarome nkenye ngurova. Nye ose kwa here unene sirugana setu. Anne ngazi a ka zuvhise nkenye apa, ano ame ngani rugana koBeteli. Ame ngani rugana kumwe naJohn Charuk. a Yinzi na lirongerere ko kwendi morwa age kwa ka tungire moLiberia ntani ga divire maudigu aga ngava ligwanekere nago vanavazinyetu.

Anne: Yisinke ya tu ninkisire tu hare Liberia? Morwa vanavazinyetu. Awo kwa tu likidire eharo ntani kwa kere valimburukwi. Ose kwa ya likwatakanene ntani awo kwa ya kere epata lyetu. Awo ngava tu korangeda, ano oyo ya tu vaterere pampepo. Ose ngatu hafere kuzuvhisa. Vantu ava ngatu gwana mokuzuvhisa kapi va here mu va sige usimbu. Vantu ngava zogere kuhamena Bibeli mositarata. Ayo ya tu karerere ureru kuzogera nawo. Ose kwa kere novarongwa woBibeli wovanzi ntani ya tu karerere udigu kuvarugana navenye. Ose ngatu hafere sili!

Paul: Mo-1989 konyima zokukara mombili nomvhura ne, yita yipo ya varekere. Mo-2 Pembankuru 1990, ava va rwanesere epangero kwa kwete evango eli lyakundurukidire Beteli. Kapi twa vhulire kupwaga ndi kuuyunga novantu kukwatera mo mapata getu ntani nomberewa zonene ure womakwedi gatatu. Nyanya kwa lihene, kapi twa kere nonondya dokugwanena po ntani vakadi kwava kwaterere kononkondo. Udigu ou kwa kere mosirongo nasinye ure wonomvhura 14.

Anne: Marudi gamwe ngaga lirwanesa ntani nokulidipaga. Moyitarata kwa kere mo vakwayita ava va kere noyikwata ntani awo ngava zi momambo nokugusa nkenye eyi vana hara. Kwavamwe kudipaga muntu kwa kere tupu ngwendi kuna “kudipaga yinhunhwa.” Yimpu yovantu kwa kere ponomururani, yimwe pepi nomberewa zonene. Vanavazinyetu wovalimburukwi kwa va dipagere, kukwatera mo vatumwa vavali.

Vanavazinyetu vamwe kwa tulire eparu lyawo mosiponga pokuhoreka vanavazinyetu worudi oru va dipagere. Vatumwa novabeteli nawo kwa rugene yokulifana. KoBeteli, vamwe ava va tjwayukire kwa rere pevhukononzugo depevhu ano vamwe kwa kere nose kononzugo dekeguru. Ose kwa kere monzugo zimwe nepata eli lyakere novantu ntambali.

Paul: Nkenye ezuva, vakwayita ngava wiza koBeteli va tare nsene tuna horeke vantu. Twa kere novanavazinyetu vane ava ngava tarere: vavali ngava tarere pekendeva tare eyi yina kuhoroka, ano vavali ngava pwaga ponze koheka. Nsene ava va kere  ponze va twikira kutura mawoko gawo komeho, ngayi tanta asi nayinye yiwawa tupu vakwayita kapi nava hwilira. Nye nsene nava tura mawoko gawo konyima ayo ngayi tanta asi vakwayita owo vana wiza vana kara nonyanya, makura owo ngava tarere pekende ngava horeke usimbu vanavazinyetu.

Anne: Ezuva limwe, vanavazinyetu kapi va vhulie kukondera mbunga zovantu ava ngava rwanesa mokuhwilira. Name namunazinyetu gumwe gomukadi kwa li paterere monzugo zokulikuhwira, omu mwa kere sikopa. Munazinyetu kwa lisininikire kuvanda mosikopa oso. Varwanesi kwa sikwire nge kononzugo dekeguru ntani awo kwa kere nomauta. Awo kwa bukwire evero lyetu. Paul kwa va likwamberere va dire kuhwilira, age kwa tente asi: “Mukada nge kuna kuruganesa kanzugo.” Apa na zedilire sikopa omu ga vende munazinyetu, ta si zogerere nakauke ntani na hepere kutengwidira mo yininke nayinye, ano oyo kwa gusire siruwo. Ame na yi divire asi varwanesi nava pura nge asi yisinke nina kurugana, makura ame kwa kankamene unene. Yipo nye, nsene ni pwaga tava mono nge asi kuna kukankama, ano oyo kuvhura yi va ninkise va hare kudiva asi yisinke nina kukankamena. Yipo na kanderere momutjima nokulikwambera Jehova a vatere nge. Yipo na patwilire evero nokuvamorora. Gumwe ta zundura nge, ta vyukilire kosikopa nokuzungurura yininke eyi ya kere mo nye kapi ga gwene mo yuma. Awo kwa paparere nakunye nampili keguru nye simpe kapi va gwene yuma.

Paul: Kapi twa kere nonondya makwedi gomanzi. Nye twa kere nonondya dopampepo. Ukareli wongurangura wokoBeteli yiwo wa kere mulihako gwetu gwelike ntani awo ngau tu nkondopeke.

Nsene ngano ngatu pwaga ponze noku za tu ka papare nondya nomema, ngano ava twa horekere ngano vava dipagere. Poyiruwo yimwe, Jehova ngatu pe eyi tuna hepa monkedi ezi tuna dili kundindira ntani posiruwo souhunga. Jehova ngatu pakere mbili ntani ga tu vaterere tu kare tuna litura.

Nampili ngomu udona wa twikilire kudonapa, usili awo kwa twikilire kutema. Yikando yoyinzi, vanavazinyetu kwa tjwayukire nye epuro lyawo kwa nkondoparere ntani va kere vana litura. Vamwe kwa tente asi ukaro ou kwava “wa payikilire udigu wounene.“ Vakuronambunga novanavazinyetu wovagara kwa likidire uradi pokurugana paapa va hulira mokuvatera vanavazinyawo. Vanavazinyetu ava va tjwayukilire komavango gapeke kwa li vaterere ntani awo kwa tamekere kuzuvhisa komavango ogo. Awo kwa ruganesere nkenye eyi va gwene mowiza mokudika sinyanga ntani nokukara nomapongo. Mapongo ntani kuzuvhisa kwa vaterere vanavazinyetu va lididimikire ntani nokukara nehuguvaro. Apa twa gaverere nondya ntani nayimwe, vanavazinyetu kwa tu hundilire tu va pe nondjato domokuzuvhisa mevango lyokuhundira tu va pe yikoverero. Oyo kwa tu korangedere sili! Vantu wovanzi ava va mwene yininke yoyidona kwa here kupurakena kombudi zongwa. Awo kwa tetukire apa va mwene omu nombangi dina kara noruhafo. Vanavazinyetu  kwa kere ngwendi kuna kutema momundema. (Mat. 5:14-16) Upampi ou va kere nawo vanavazinyetu wa ninkisire varwanesi vamwe va ya kare vanavazinyetu.

Paul: Pamwe twa hepere kutjwayuka, yikando yitatu ose kwa tjwayukire pokaruwogona, ano yikando yivali kwa tjwayukire siruwo sosire. Munazinyetu gomukadi ogu ga kere mutumwa kwa fatwilire omu twa lizuvhire apa twa ligaunukire, age kwa tente asi: “Mosikora zaGiliyata, kwa tu rongere tu hare vanavazinyetu nomutjima nagunye, ano oyo yiyo twa rugene. Yipo nye, kusiga vanavazinyetu moukaro wokufana ngesi, kuna kara ngwendi kuna gusa mo nomutjima detu!” Nye yokuhafesa yeeyi asi ose twa vhulire simpe kuvatera vanavazinyetu ava va kere poyirongo yopopepi.

Anne: MwaKudumonkuru 1996, ose kwa rondere metuwa lyoBeteli eli lya simbire yipepa eyi ya kere nomauzera kuhamena sirugana setu somoLiberia, tuvane twa kere. Ose kwa singire tu ze kodoropa omu mwa dilire kukara siponga unene, doropa ozo kwa kere ure wonokilometa 16. Posiruwo sina, kevango oku twa kere kwa homokerere ko. Varwanesi kwa royere meguru, tava tu sikameke nokugusa mo ose tuvatatu, makura tava ka singa age Paul mweli. Ose kwa tukukire unene. Hararasi, Paul ta wiza age kuna kugenda ano honde kuna kutjororoka kosipara sendi. Ose kwa gazarere asi kuna mu roya, nye konyima ta tu dimburura asi ngano kwa mu roya ngano kapi ana kugenda. Murwanesi gumwe yige ga mu toonene apa ga mu zundwire mo metuwa. Nye yokuhafesa yeeyi asi, kapi ga remanene unene.

Pwa kere etuwa lyovakwayita omu va rondere vantu. Morwa etuwa kwa zulire, ose kwa rondere ponze zetuwa. Musingi kwa singire unene, hambara tu gwe mo. Yipo twa mu likwamberere a sikameke, nye age kwa tjilire kusikameka. Nye nampili ngoso, kapi twa gwire, twa ka sikire oku twa zire nampili ngomu twa ka sikire tuna roroka ntani kuna kukankama.

Paul: Ose kwa li tere ngomu twa dwere yikoverero yokupapauka ntani yokunyata nokulipura asi ngapi omu simpe tuna kara tuvazuni. Ose kwa rere ponze pepi netjeketjeke eli lyatu twere koSierra Leone ezuva lyokukwama ko. Ose kwa hefe kweyi twa kere simpe vazuni nye ose simpe kwa kere nosinka kuhamena vanavazinyetu.

Anne: Apa twa ka sikire koBeteli moFreetown, Sierra Leone, vanavazinyetu kwa tu pakerere mbili. Nye konyima yipo na tamekere kudiworoka eyi na mwene moLiberia. Nkenye ezuva ame kwa kere nowoma asi nampo koyili yoyidona nayi horoka ntani kapi ngani gazara nawa. Nayinye eyi ya kere pepi name kwa kere tupu ngwendi kapisi yininke yousili. Masiku ngani hasumuka nokugazara asi nampo koyili yoyidona nayi horoka. Kapi ngani hesere nawa. Paul nga lidingire nge nokukanderera name. Ngatu dimbi nonsumo douhompa dogoro tani hageke kukankama. Ame kwa lizuvhire ngwendi kun kuzaruka ntani kapi nani vhura kutwikira kukara mutumwa.

Kapi ngani divara eyi ya horokere sikando sokukwama ko. Sivike sooso yipo twa gwene yimbapiratjangwa yivali. Simwe kwa kere Awake! zomo-8 Pembagona 1996. Amo kwa kere mo sirongwa sosiparatjangwa asi “Omu no lididimikira sinka.” Ngesi nayi kwata egano eyi ya horokerere nge. Ano simbapiratjangwa simwe kwa kere Ruhungu romo15 Kudumonkuru 1996, omu mwa kere sirongwa sosiparatjagwa asi “Kupi ava gwana nonkondo?” MoRuhungu mwa kere efano lyembimbidi lina remana. Ruhungu kwa fatwilire asi ngwendi moomu tupu embimbidi ali twikire kuparuka, nokutuka nampili kuna remana kevava, nevatero lyompepo zaJehova nose kuvhura tu twikire kuvatera wopeke nampili kuna kara noudigu wopomagazaro. Ado kwa kere nondya donongwa dokutunda kwaJehova posiruwo souhunga. (Mat 24:45) Ame kwa rugene epaparo ntani nokupungura yirongwa ngwendi yeeyi, ano ayo kwa vaterere nge. Mwa za siruwo, ame kapi na lizuvhire hena woma ngwendi nare.

Paul: Ose ngatu hafa nkenye apa ngatu tengura koLiberia. Konyima zo2004, ose kwa kere mosirugana setu ure monomvhura 20. Yita kwa hege. Pwa kere mawapaiko gokutunga mberewa, nye twa hana kuyindindira, tava tu pe sirugana sapeke.

 Ayo kwa kere udigu unene. Ose kwa here unene vanavazinyetu, awo kwa kere ngwendi ekoro lyetu, kapi twa here kuvasiga. Apa twa sigire ekoro lyetu noku za koGiliyata, ose twa limonenene omu kutura Jehova muhowo meparu ya retere matungiko, makura yipo twa tambwire situmbukira oso. Ose kwa tu tumine koGhana.

Anne: Ose kwa lilire apa twa tundire moLiberia. Ose kwa tetukire apa Frank munazinyetu gomukurupe ntani gonondunge ga tu tanterere asi: “Tu divareni!” Makura ta faturura asi: “Twa yi diva asi kapi ngomu tu divara nye demeneneni kosirugana seni sosipe. Aso kuna kara sirugana sokutunda kwaJehova, yipo nye demeneneni kovanavazinyetu ava nomu ka gwana.” Eyi kwa tu nkondopekere mokutameka nosirugana setu sosipe ntani nokutulisa po vakaume wovape mosirongo omu va kere asi wovasesu tupu va tu divire ntani nayinye kwa kere yoyipe kwetu.

Paul: Kapi ya tu gusire siruwo mokutameka kuhara sirugana setu ntani novanavazinyetu womoGhana. Nombangi nonzi da kere mo! Ose kwa lirongere kuhamena epuro noulimburukwi wawo. Konyima zokukara moGhana nomvhura 13, ose kwa gwene hena sininke simwe sokutetukisa. Kwa tu zigidire tu ka kare momberwa zokoUpumezuva waAfrica, moKenya. Nampili ngomu twa rongwere vakaume vetu ava twa kere nawo, ose kwa ya tulisire po vakaume wovape moKenya. Ntani yinzi twa hepa kurugana moKenya.

Anne: Monomvhura dononzi, ame kwa ligwanekera nomaudigu gomanzi. Maukaro gosiponga kuvhura kutukundama panandunge ntani noparutu. Kapi tava tu popere pasitetu. Nampili ngesi nsene ni zuvha tupu muhagaro gouta, ame kuvhura ni tameke kuvera. Ame kuvhura ni kore mezimo ntani kwato kuzuvha asi nomawoko na kara nago. Nye ame kudemenena kugwana evatero eli a gava Jehova, kukwatera mo evatero eli ali tundu kovanavazinyetu. Ntani ame nayi dimburura asi nsene ni twikira kukara nelikwamo lyange lyopampepo, Jehova nga vatera nge ni twikire nosirugana sange.

Paul: Vamwe kuvhura va pure asi: “Ove wa hara sirugana soge ndi?” Yirongo kuvhura yi kare yoyiwa, nye kuvhura yikare siponga. Nye yisinke twa hara unene kupitakana sirongo? Vanavazinyetu, awo ekoro lyetu. Nampili ngomu nontundiliro da lisiga, nye natuvenye kwa kara nositambo simwe. Ose kwa gazarere asi kwa tu tumine tu ka va korangede nye usili wou asi yiwo va ka tu nkondopekere.

Vanavazinyetu kuna kara uhwi wokutunda kwaJehova. Ose kwa kara nepata nakunye. Nsene ose kwa hamena kombungakriste, ose twa kara nekoro ntani nembo. Twa yi diva asi nsene tu twikira kuhuguvara mwaJehova, age ngatu nkondopara yikare asi yisinke nayi horoka.​—Fil 4:13.