1. Yisinke natu lirongera ko kovakurona?

 NATUVENYE twa hepa mavyukiso yipo tu ture po matokoro gomawa. Ose kuvhura tu gwane mavyukiso ogo kovakuronambunga ntani koVakriste ava va kara nelikwatakano lyewa naJehova. Nsene vakurona kuna kutupa mavyukiso, kapisi tu ga ncenune nokugazara asi kapi gana kara nomulyo ngesi. Jehova ana hara tu lirongere ko kwawo, morwa awo va kara nediwo lyenzi nonondunge ntani nounongo.​—Joba 12:12.

2. Yisinke natu ka lironga mosirongwa esi?

² Nare, Jehova nga ruganesa vagara wovalimburukwi va korangede vantu vendi nokupa mavyukiso. Koneka sihonena saMosesa naNdafita ntani nomupositoli Johanesa. Awo kwa parukire poyiruwo yokulisiga ntani maukaro gawo ga lisigire unene. Apa va kere pepi nokufa, awo kwa geve mavyukiso gomawa kovadinkantu. Vagara owo kwa uyungire kuhamena eyi ya karera nomulyo kulimburukwa Karunga. Jehova kwa ninkire eyi va uyungire va yi tjange moBibeli yipo tu lirongere ko nose. Yi kare asi tuvanona ndi tuvakondi, natuvenye kuvhura tu gwanene mo uwa nsene tu konakona mapukururo gawo. (Rom. 15:4; 2 Tim. 3:16) Mosirongwa esi, tatu ka lironga nonkango dokuhulilira dovagara ava vatatu ntani neyi natu lirongera ko.

‘NGOMU PARUKA SIRUWO SOSIRE’

3. Yitumbukira musinke ga kere nayo Mosesa?

³ Mosesa kwa ruganenene Jehova eparu lyendi nalinye. Age kwa kere muporofete, mupanguli, mupitisili ntani mutjangi gehistoli. Mosesa yinzi ga lirongerere ko kweyi ya mu horokere meparu. Age kwa pitisilire Vaisraeli va tunde moEgipite omu va kere vapika ntani ga mwene yitetu yoyinzi eyi ga rugene Jehova.  Jehova kwa mu ruganesere a tjange nobuke ntano dokuhova domoBibeli nEpisarome 90, ntani nampo yige ga tjenge Episarome 91 nobuke zaJoba.

4. Wolye ga korangedere Mosesa, ntani morwasinke?

⁴ Mosesa kwa fire nonomvhura 120. Komeho a fe, age kwa zigidire Vaisraeli navenye yipo a va diworokese yininke nayinye eyi ga va ruganena Jehova. Vaisraeli vamwe apa va kere vadinkantu, va mwene yitetu yoyinzi eyi ga rugene Jehova nomu ga tengekere Vaegipite. (Ex. 7:3, 4) Awo kwa gendere pokatji kEfuta lyEgeha eli ga gawinine Jehova ntani va mwene omu ga zonagwire po vakwayita vaFarawo. (Ex. 14:29-31) Apa Vaisraeli va kere momburundu, awo va mwene omu Jehova ga va poperere nomu ga va pakerere mbili. (Deut. 8:3, 4) Apa va kere pepi nokuhwilira moSirongo sEtumbwidiro, Mosesa kwa ruganesere mpito ozo a korangede vantu komeho a fe. a

5. Ngapi nonkango dokuhulilira daMosesa edi dakara mwaDeuteronomium 30:19, 20 da pere Vaisraeli ehuguvaro?

⁵ Yisinke ga uyungire Mosesa? (Resa Deuteronomium 30:19, 20.) Age kwa diworokesere Vaisraeli asi yininke yoyiwa yina kuvandindira. Jehova ngano ga va tungikire nokuvaninka va kare siruwo sosire mosirongo esi ga va tumbwidilire. Sirongo oso kwa kere sirongo sosiwa ntani ngava zangura mo nondya dononzi. Mosesa kwa uyungire kuhamena sirongo oso asi: “Sirongo soyitata yoyinene yoyiwa eyi mwa dira kudika, sirongo sononzugo edi da zura yininke yoyiwa eyi mwa dira kuruganena nomatope aga mwa dira kusima noyikunino yomandjembere ntani noyitji yomauzwe eyi mwa dira kutapeka.”​—Deut. 6:10, 11.

6. Morwasinke Karunga ga pulisilire nomuhoko dapeke di funde Vaisraeli?

⁶ Mosesa kwa rondwere hena Vaisraeli. Mokuninka asi va twikire kukara mosirongo sina sosiwa, va hepere kulimburukwa nompango daJehova. Mosesa kwa va korangedere va horowore ‘mwenyo’ pokupurakena kwaJehova ‘nokukara pepi nage.’ Nye Vaisraeli kapi va limburukwire Jehova. Eyi yiyo Karunga kwa pulisilire Vasiliya ano konyima Vababironi va funde Vaisraeli noku va twara kounkwate.​—2 Vah. 17:6-8, 13, 14; 2 Hist. 36:15-17, 20.

7. Yisinke natu lirongera ko kononkango daMosesa? (Tara hena efano.)

⁷ Yisinke natu lirongera ko? Nsene tu limburukwa Jehova, ngatu ka paruka narunye. Ngwendi Vaisraeli ava va kere pepi nokuhwilira mosirongo sEtumbwidiro, nose ntaantani tu hwilire mouzuni woupe ou ga tumbwidira Karunga. Ntaantani uzuni ngau ka kare paradisa. (Jes. 35:1; Ruk. 23:43) Satana nonompepo donondona kapi ngadi kara ko. (Ehor. 20:2, 3) Kapi ngaku ka kara maukarelikarunga aga aga rongo yimpempa kuhamena Jehova. (Ehor. 17:16) Mapangero govantu aga aga hepeka vantu ava aga pangere kapi ngaga ka kara ko hena. (Ehor. 19:19, 20) MoParadisa kapi ngamu kara varwanesi. (Epis. 37:10, 11) Vantu navenye ngava ka limburukwa noveta daJehova edi adi korangeda uumwe nombili. Yipo nye, vantu navenye ngava lihara nokulihuguvara. (Jes. 11:9) Ose kuna kundindira nononkondo siruwo oso! Nsene tu twikira kulimburukwa Jehova, ngatu ka paruka moparadisa, kapisi nomvhura mafere tupu nye narunye nanarunye.​—Epis. 37:29; Joh. 3:16.

8. Ngapi omu etumbwidiro lyomwenyo gwanarunye lya vaterere mutumwa gumwe? (Juda 20, 21)

⁸ Nsene tu twikira kugazadara kuhamena  mwenyo gwanarunye, ngayi tu vatera tu limburukwe yi kare asi maudigu musinke ngatu ligwanekera nago. (Resa Juda 20, 21.) Etumbwidiro olyo kuvhura hena li tu vatere tu funde po maupirankondo getu. Munazinyetu gomugara ogu ga kere mutumwa moAfrika nomvhura dononzi, nga ligwanekere nomaheteko gokurugana yininke yoyidona. Age kwa tanta asi: “Apa na yi dimbwilire asi kapi ngani ka paruka narunye moparadisa nsene ni dira kulimburukwa Jehova, ya ninkisire nge ni tokomene kuyinyokera po ntani nokukanderera unene kwaJehova. Nevatero lyendi, ayo ya tompokere nge kunyokera po nkareso zina.”

‘NGO RAGOPA MWANAYINYE’

9. Maudigu musinke ga ligwanekerere nago Ndafita meparu?

⁹ Ndafita kwa kere hompa gomuwa. Age kwa kere musiki, mukwayita, muporofete ntani nga tjanga nomutango. Age kwa ligwanekerere nomaudigu gomanzi. Ano ure wonomvhura dongandi, age kwa parukire ngomunayirongo morwa kwa tjwayukire hompa Sauru ogu ga here kumudipaga. Konyima zapa ga ya kere hompa, Ndafita ga hepere kutjwayuka munendi Saromo ogu ga here kugusa uhompa wendi. Nampili ngomu Ndafita ga ligwanekerere nomaudigu nokutura mapuko gomanene, age kwa twikilire kulimburukwa Karunga dogoro konomfa dendi. Jehova kwa mu singwenene asi ogu ga “hara.” Twa hepa kupurakena komapukururo gaNdafita!​—Yirug. 13:22; 1 Vah. 15:5.

10. Morwasinke Ndafita ga pererere munendi Saromo mapukururo komeho a kare hompa?

¹⁰ Pasihonena, tu tareni mapukururo aga ga pere Ndafita munendi Saromo, ogu ga mu kweme mouhompa. Jehova kwa horowere Saromo yipo a twikire kupameka ukareli wousili ntani a tunge ntembeli oku ngava karera Jehova. (1 Hist. 22:5) Yirugana yinzi ya hamenene mo ntani ga hepere evatero lyaJehova yipo a pitisire muhoko. Yisinke ga mu tanterere Ndafita? Tu zeni tu ka yi zogere.

11. Kuliza no​—1 Vahompa 2:2, 3, ekorangedo musinke Ndafita ga pere Saromo, ntani yisinke ya horokere apa Saromo ga kweme epukururo olyo? (Tara hena efano.)

¹¹ Yisinke ga uyungire Ndafita? (Resa 1 Vahompa 2:2, 3.) Ndafita kwa tanterere munendi asi nsene a limburukwa ngayi mu tompoka meparu. Nomvhura dononzi, Saromo kwa mu tompokere. (1 Hist. 29:23-25) Age kwa dikire ntembeli, kwa tjenge nobuke dimwe domoBibeli ntani nonkango dendi dimwe kudigwana magaununo gamwe gomoBibeli. Age kwa divikwire morwa kwa kere nounongo ntani noungawo. (1 Vah. 4:34) Ngwendi moomu ga yi fatwilire Ndafita, Saromo ngano ngayi mu tompoka tupu nsene a limburukwa Jehova Karunga. Nye Konyima, Saromo kwa ya karerere yikarunga yoyimpempa. Jehova kapi ga yi haferere  yipo ga hagekere kupa Saromo nondunge dokupangera vantu monkedi zouhunga.​—1 Vah. 11:9, 10; 12:4.

12. Yisinke natu lirongera ko kononkango daNdafita?

¹² Yisinke natu lirongera ko? Nsene tu mu limburukwa Jehova, age ngatu tungika. (Epis. 1:1-3) Nampili ngoso, Jehova Karunga kapi ga tu tumbwidira asi nga tu pa ungawo nefumano eli ga pere Saromo. Nye nsene tu mu limburukwa, nga tu pa unongo ou ngau tu vatera tu ture po matokoro gomawa. (Yis. 2:6, 7; Jak. 1:5) Nompango dendi kuvhura di tu vatere nsene kuna kutura po matokoro kuhamena yirugana, elirongo, yilihafeso ntani yimaliwa. Nsene tu kwama unongo wokutunda kwaKarunga, ngau popera elikwatakano lyetu nage ntani ngatu ka gwana mwenyo gwanarunye (Yis. 2:10, 11) Ngatu kara novakaume wovawa ntani ngatu gwana ruhafo mepata.

13. Yisinke ya vaterere Carmen a rundurure eparu lyendi?

¹³ Carmen ogu ga tunga moMozambique, kwa gazarere asi nga paruka nawa nsene a za kelirongo lyokuzeruka. Yipo ga zire kounivesiti noku ka lirongera yirugana yokufaneka omu ngali kara etungo. Age kwa tjenge asi: “Ame kwa haferere eyi na lirongere, nye ayo kwa mene siruwo nononkondo dange. Ame ngani kara kosure kutundilira 7:30 zongurangura dogoro 6:00 zongurova. Ayo ngayi karere nge udigu kuza komapongo ntani kapi na kere nelikwatakano lyewa naJehova. Ame na ya dimbwilire asi ngani karere vahekuru vavali.” (Mat. 6:24) Age kwa kanderere kuhamena ukaro wendi ntani nokurugana epaparo moyimbapiratjangwa yetu. Age kwa gweda ko asi: “Apa na gwene mapukururo gokutunda kovakuronambunga ntani koyina, yipo na tokwere kuhageka univesiti ni karere Jehova mosirugana sosiruwo nasinye. Eyi ya vaterere nge ni ture po matokoro gomawa meparu ntani kapi ani livere.”

14. Ekorangedo musinke ga geve Mosesa ntani Ndafita?

¹⁴ Mosesa ntani Ndafita kwa here unene Jehova ntani va dimbwilire asi kulimburukwa Jehova mulyo unene. Nonkango dawo dokuhulilira edi va uyungire, awo kwa korangedere vapurakeni vawo va kwame sihonena sawo pokutwikira kulimburukwa Jehova Karunga. Navenye kwa geve erondoro asi ava ngava hageka kukarera Jehova, kapi nga va kara vakaume vendi  ntani kapi ngava gwana matungiko aga ga tumbwidira. Mapukururo gawo mulyo unene kwetu. Konyima zapa da pitire po nomvhura dononzi, mukareli gumwe gwaJehova kwa likidire mulyo gokukarera Karunga noulimburukwi.

“AME KUHAFA UNENE”

15. Yisinke ga mwene mupositoli Johanesa?

¹⁵ Johanesa kwa kere kaume gomunene gwaJesus Kristusa. (Mat. 10:2; Joh. 19:26) Johanesa ngazi naJesus mokuzuvhisa, ga mwene yitetu eyi nga rugana ntani ga twikilire kulimburukwa Jesus nampili momaudigu. Age ga mwene omu vana kudipaga Jesus ntani ga mu mwene konyima zapa va mu vhumbwire. Age hena ga mwene omu mbungakriste zina kukura posiruwo sina, ntani ga mwene omu mbudi zongwa vana ‘kuzizuvhisira mouzuni mudima kovantu navenye.’​—Koros. 1:23.

16. Yilye a gwanene mo mauwa monombilive daJohanesa?

¹⁶ Apa ga kere pepi nokufa, nage ga kere nositumbukira sokutjanga Nonkango daKarunga. Age kwa tjenge ‘emoneko’ eli ga mu likidire Jesus Kristusa. (Ehor. 1:1) Age kwa tjenge Evangeli eli ava tumbura asi Johanesa. Age kwa tjenge hena nombilive ntatu, edi ava tumbura asi mbilive zokuhova, zauvali ntani zautatu zaJohanesa. Ano mbilive zautatu kwa zi tjangerere Mukriste gomulimburukwi gedina Gaiyusi ogu ga here unene ngwendi munendi. (3 Joh. 1) Nye vanzi ga here ngwendi vana vendi. Eyi ga tjenge mugara ogu gomulimburukwi kwa korangeda varongwa vaJesus vanare nava womosiruwo setu.

17. Kuliza naJohanesa gwautatu velise 4, yisinke ayi reta ruhafo rorunene?

¹⁷ Yisinke ga tjenge Johanesa? (Resa 3 Johanesa 4.) Johanesa kwa tjenge kuhamena ruhafo oru aru tundu mokulimburukwa Karunga. Posiruwo esi Johanesa ga tjenge mbilive zautatu, vamwe ngava rongo marongo goyimpempa aga ngaga retesa po madirokulizuvha mombungakriste. Nye vamwe kwa twikilire “kukwama usili.” Awo ngava limburukwa Jehova ntani ngava “limburukwa koyipango yendi.” (2 Joh. 4, 6) Vakriste ava wovalimburukwi kwa hafesere Johanesa ntani naJehova.​—Yis. 27:11.

18. Yisinke natu lirongera ko kononkango daJohanesa?

¹⁸ Yisinke natu lirongera ko? Nsene tu limburukwa Jehova, ngatu kara noruhafo. (1 Joh. 5:3) Pasihonena, ose kuhafa pokudiva asi kuna kuhafesa Jehova. Age kuhafa apa atu nyokere po kurugana yininke yoyidona ntani apa atu limburukwa nompango dendi. (Yis. 23:15) Vaengeli  nawo kuhafa. (Ruk. 15:10) Nose kuhafa apa atu mono wopeke kuna kutwikira kulimburukwa Jehova nampili ngomu vana kupita momaudigu ndi momaheteko. (2 Tes. 1:4) Apa uzuni ou woudona waSatana ngava u zonagura po, ose ngatu hafa pokudiva asi twa twikira kulimburukwa Jehova.

19. Yisinke ga uyunga munazinyetu Rachel kuhamena kuronga wopeke usili? (Tara hena efano.)

¹⁹ Ose kuhafa apa atu rongo wopeke usili. Rachel ogu ga tunga moDominican Republic kulizuvha asi aso kuna kara situmbukira sosinene kuronga vantu kuhamena Karunga ogu atu karere. Age kwa vatera vantu yipo va karere Jehova. Age kwa tanta asi: “Ayo kuhafesa nge apa ani mono ava ani rongo kuna kuhara unene Jehova nokumuhuguvara ntani nokutjindja eparu lyawo yipo va mu hafese. Kapi to vhuru kuhetakanesa ruhafo oro kwankenye elizambero eli na tura po mokuvaronga.”

GWANENA MO UWA MONONKANGO DOKUHULILIRA EDI VA UYUNGIRE VAGARA WOVALIMBURUKWI

20. Mononkedi musinke twa lifana naMosesa Ndafita ntani Johanesa?

²⁰ Mosesa naNdafita ntani Johanesa kwa parukire posiruwo ntani moukaro wokulisiga nou wetu. Nye ose twa lifana nawo moyininke yimwe. Awo kwa karerere Karunga gousili ntani nose kukarera Karunga gousili. Ose hena kukanderera kwaJehova, nokumuhuguvara ntani nokupura mavyukiso kwendi. Ngwendi vagara vena, nose twa kara nehuguvaro asi Jehova nga tungika ava ava mu limburukwa.

21. Mauwa musinke ngatu gwana nsene tu kwama mavyukiso gaMosesa naNdafita ntani Johanesa?

²¹ Yipo nye, tu purakeneni kononkango edi va uyungire vagara vena wovakurupe pokulimburukwa nompangera daJehova. Nsene tu limburukwa, ngayi tu tompoka mwanayinye eyi ngatu rugana. Ose ngatu paruka “siruwo sosire” narunye. (Deut. 30:20) Ose ngatu hafa morwa kulimburukwa Guhyetu gemeguru ogu nga sikisa mo matumbwidiro gendi nagenye kupitakana omu natu yigazarera.​—Efe. 3:20.