1-2. Mononkedi musinke nava vhura kututekura momudona?

 JESUS kwa uyungire kuhamena sifanekeso somufisayendi ogu nga pura nkenye apa mupanguli a mu pangure pauhunga. Varongwa vaJesus va kwete egano omu ga lizuvhire mufisayendi gwina, morwa sinzi sovantu momazuva gena ngava va tekura momudona. (Ruk. 18:1-5) Nose kuvhura tu kwate egano mukadi gwina morwa poyiruwo yimwe nose kututekura momudona.

² Apa ava tu tekura momudona, ayo kapi ayi tu tetukisa morwa neina mouzuni vantu kuvatekura momudona ntani kuvahepeka. (Muud. 5:8) Nye nsene munazinyetu yige ana kututekura momudona, ayo kuvhura kutudompesa unene. Yimo, vanavazinyetu kapi ava rwanesa usili ntani kapi va sikilira mo. Ose kuvhura kulirongera ko yoyinzi kwaJesus kweyi ga rugene apa va mu tekwire momudona vantu ava va mu nyengere. Nsene asi ose kulididimikira vantu ava ava tu tekura momudona, kuvhura tu lididimikire vanavazinyetu apa ava tu tekura momudona. Ngapi a lizuvhu Jehova apa vantu wopeke ndi vanavazinyetu ava tu tekura momudona? Ga kara nosinka kweyi ayi tu horokere ndi?

3. Ngapi twa yi diva asi Jehova ga kara nosinka kweyi ava tu tekura momudona?

³ Jehova ga kara nosinka kuhamena omu ava tu tekura. Bibeli kutanta asi: “HOMPA kwa hara eyi ya hungama.” (Epis. 37:28) Jesus kwa tumbwidira asi apa ngasi sika mo siruwo souhunga, Jehova “nga ninka va va pangure pauhunga usimbu-simbu.” (Ruk. 18:7, 8) Ntaantani Jehova nga ka guse po ruhepo ntani  kapi nga pulisira vantu va tu tekure momudona.​—Epis. 72:1, 2.

4. Ngapi omu Jehova a tu vatere neina?

⁴ Ngomu tuna kundindira Jehova nga ka guse po maudigu nagenye, age nga tu vatera tu lididimikire nsene tava tu tekura momudona. (2 Pet. 3:13) Age kuturonga tu nyokere po kurugana yininke yoyidona nsene vana tu tekura momudona. Kupitira mwaMunendi, Jehova kwa tu pa sihonena omu natu lididimikira nsene kuna kututekura momudona. Age hena kutupa mavyukiso aga naga tu vatera nsene kuna kututekura momudona.

TWA HEPA KUTAKAMESA EYI ATU RUGANA APA AVA TU TEKURA MOMUDONA

5. Yisinke twa hepa kutakamesa nsene kuna kututekura momudona?

⁵ Apa ava tu tekura momudona, ayo kutuguvisa ntani kutukoresa unene. (Muud. 7:7) Vakareli vaJehova wovalimburukwi ngwendi Joba naHabakuku, nawo yimo va lizuvhire ngoso. (Joba 6:2, 3; Hab. 1:1-3) Kapi ya kara epuko kulizuvha ngoso, nye twa hepa kutakamesa asi kapisi tu rugane yininke yepuko nsene kuna kututekura momudona.

6. Yisinke sina kuturonga sihonena saAbisaromo? (Tara hena efano.)

⁶ Apa ava tu tekura momudona, pamwe kuvhura tu hare kutengwida kuwoko ndi tu tengeke muntu ogo. Nsene tu rugana yininke oyo, udigu kuvhura ngau ligwederere. Tara sihonena saAbisaromo munaHompa Ndafita. Abisaromo kwa handukire unene apa ga zuvhire asi mukurwendi Amunoni kwa kwatera kononkondo mpanzawo Tamara. Kuliza noVeta zaMosesa, Amunoni ngano va hepere kumudipaga morwa yininke eyi ga rugene. (Lev. 20:17) Nampili ngomu ya dilire kukara epuko kweyi ga handukire Abisaromo, nye ayo kwa kere epuko lyenene kweyi ga dipagere Amunoni.​—2 Sam. 13:20-23, 28, 29.

7. Ngapi ga lizuvhire pomuhowo mutjangi gepisarome kuhamena yininke yoyidona eyi ga mwene?

⁷ Nsene vantu ava vana kututekura momudona kapi vana kuvatengeka, kuvhura tu gazare asi kurugana yininke youhunga kwato eyi no gwanena mo. Mutjangi gepisarome ga yi dimbwilire asi vadinikarunga kuhafera eparu nampili ngomu ava hepekere mo vantu wovahungami, makura yipo ga tente asi: “Vadinikarunga kwa yigara.” (Epis. 73:12) Eyi kwa mu guvisire ntani kwa mu ninkisire a gazare asi kukarera Jehova kapisi hepero, apa ga tente  asi: “Yipo nye na kondjere unene ni sike po, napa pweyi yoyidigu paapa.” (Epis. 73:14, 16) Age hena kwa tente asi: “Nye ame nkare ni gwe; nompadi dange nkare di senutuke.” (Epis. 73:2) Munazinyetu Alberto a nage kwa mu horokerere yininke yokulifana.

8. Ngapi omu ya kundamene munazinyetu gumwe apa va mu tekwire momudona?

⁸ Alberto kwa mu rundililire asi ana vaka yimaliwa yombungakriste. Makura yipo ga zumbanesere yitumbukira yendi ntani vamwe womombungakriste ava va zuvhire eyi ya horokere, kapi ngava mu fumadeke hena. Age kwa tente asi: “Ame kwa handukire unene ntani ayo kwa guvisire nge.” Kukora oku ga zuvhire kwa kundamene elikwatakano lyendi naJehova ntani age kwa hagekere kuza komapongo ure wonomvhura ntano. Sihorokwa esi kulikida eyi nayi vhura kuhoroka nsene tu twikira kuhanduka apa ava tu tekura momudona.

HONENA OMU GA LIDIDIMIKIRE JESUS APA VA MU TEKWIRE MOMUDONA

9. Mononkedi musinke va mu tekwire Jesus momudona? (Tara hena efano.)

⁹ Jesus kwa tura po sihonena sosiwa kuhamena eyi natu rugana nsene kuna kututekura momudona. Jesus kwa mu tekwire momudona  vekoro lyendi ntani novantu wopeke. Vekoro lyendi kwa mu rundililire asi ana zaruka ntani vapitisili womaukarelikarunga kwa mu rundililire asi nonkondo dendi kudigwana konompepo donondona, ano vakwayita woVaroma kwa mu swawire noku mu toona, makura konyima tava mu dipaga. (Mar. 3:21, 22; 14:55; 15:16-20, 35-37) Nye nampili ngoso, Jesus kwa lididimikilire nayinye oyo ntanti kapi ga tengwidire kuwoko. Yisinke natu lirongera ko kosihonena sendi?

10. Ngapi ga lididimikilire Jesus apa ngava mu tekura momudona vantu? (1 Peturusa 2:21-23)

¹⁰ Resa 1 Peturusa 2:21-23. b Jesus kwa tu sigira sihonena esi natu kwama nsene kuna kututekura momudona. Age ga divire asi siruwoke na uyunga ntani esi na mwena. (Mat. 26:62-64) Poyiruwo yimwe apa ngava mu rundire, Jesus kapi nga va limburura. (Mat. 11:19) Ano apa nga uyunga ko yuma, age kapi nga swaura vantu ava ngava mu hepeke ndi ava tjilise. Jesus kwa kere nosikara selipangero morwa age “kwa ligeve mwene kogu a pangura mouhunga.” Ga yi divire asi Jehova ga mwene omu va mu tekwire momudona ntani ga kere nehuguvaro asi Jehova nga rugana ko yuma posiruwo souhunga.

11. (a) Mononkedi musinke natu lipangera nsene kuna kuuyunga? (Tara hena mafano.)

¹¹ Nsene tu lipangera mweyi atu uyunga neyi atu rugana apa ava tu tekura momudona, ose ngoso kuna kuhonena Jesus. Pamwe eyi ava tu rugana kuvhura yi kare yoyinunu ntani kuvhura tu tokore kudira kuyipakera mbili ndi poyiruwo yimwe kuvhura tu mwene morwa nsene tu uyunga kuvhura tu ninke udigu u ligwederere. (Muud. 3:7; Jak. 1:19, 20) Ano poyiruwo  yimwe twa hepa kuuyunga nsene kuna kututekura momudona ndi nsene pana kara hepero zokupopera usili. (Yirug. 6:1, 2) Nsene kuna kuuyunga, twa hepa kuhetekera ko kulitura ntani twa hepa kuuyunga nefumadeko.​—1 Pet. 3:15. c

12. Ngapi omu natu ligava nyamwetu “kogu a pangura mouhunga”?

¹² Ose kuvhura tu honene Jesus pokuligava nyamwetu “kogu a pangura mouhunga.” Nsene vantu va tu pangura ndi va tu tekura momudona, ose twa hepa huguvara asi Jehova ga mona eyi ya horoka. Nsene tu huguvara Jehova, ose ngatu lididimika nampili ngava tu tekure momudona morwa twa yi diva asi mwaza siruwo, Jehova nga rugana ko yuma. Ntani hena ngatu nyokera po ehandu ndi nkoko. Malizuvho gangoso kuvhura kutunkisa tu handuke usimbu nokuzumbanesa ruhafo rwetu ntani kuvhura kuzonagura po elikwatakano lyetu naJehova.​—Epis. 37:8.

13. Yisinke nayi tu vatera tu lididimike nsene vana tu tekura momudona?

¹³ Ose kapi ngatu vhura kukwama sihonena saJesus nawa-nawa. Poyiruwo yimwe, ose kuvhura kuuyunga ndi kurugana yininke eyi atu livere konyima. (Jak. 3:2) Ano monkedi omu ava tu tekura vamwe, kuvhura ngayi tu korese pamalizuvho ndi parutu eparu lyetu nalinye. Nsene asi nove ya kuhorokera yininke oyo, kara nehuguvaro asi Jehova ga diva eyi ono kupita, ntani Jesus nage ga diva omu o lizuvhu morwa nage kwa mu tekwire monkedi zondona. (Heb. 4:15, 16) Kugusa ko sihonena saJesus, Jehova ga tu pa hena mavyukiso aga naga tu vatera nsene kuna tu tekura momudona. Tu zeni tu ka konakone novelise mbali domobuke zoVaroma edi nadi tu vatera.

“SIGIRENI KARUNGA A LIKIDE EHANDU LYENDI”

14. Yisinke ayi tanta ‘kusigira Karunga a likide ehandu lyendi’? (Varoma 12:19)

¹⁴ Resa Varoma 12:19. Mupositoli Paurusa kwa korangedere Vakriste va ‘sigire Karunga a likide ehandu lyendi.’ Ose kusigira Karunga a likide ehandu lyendi apa atu mu pulisire a kohonone po udigu kuliza nosiruwo sendi ntani monkedi zokuwapera. Konyima zapa munazinyetu John va mu tekwire momudona, age kwa tente asi: “Ayo kwa digoperere nge kulipangera yipo ni dire kutengwida kuwoko. Varoma 12:19 kwa vaterere nge ni huguvare Jehova.”

15. Morwasinke ya karera nomulyo kundindira Jehova a kohonone po udigu?

¹⁵ Ose kugwanena mo uwa apa atu ndindire mwaJehova a kohonone po udigu. Nsene tu yi rugana, ose kapi ngatu guva ndi tu kare nosinka morwa kuhara kukohonona po udigu nyamwetu. Jehova ga liwapaikira kutuvatera. Age ga tu tantera tu ndindire mwendi ntani ga tumbwidira asi nga rugana ko yuma kuhamena udigu ou tuna kuligwanekera nawo. Nsene tu pura eyi ga uyunga Jehova asi “ngani va futisa,” ose kapi ngatu kara nonkoko, morwa twa yi diva asi Jehova nga rugana ko yuma. Eyi yiyo ya horokerere Johanesa ogu tuna tumbura nare. Age kwa tente asi: “Nsene ni ndindira mwaJehova, age nga kohonona po udigu monkedi zongwa kupitakana omu nani u kohonona po nyaamwange.”

“FUNDISENI UDONA KOUWA”

16-17. Ngapi kukanderera aku tu vatere tu ‘fundise udona kouwa’? (Varoma 12:21)

¹⁶ Resa Varoma 12:21. Paurusa kwa korangedere hena Vakriste va ‘fundise udona kouwa.’ PEudiso lyendi lyopoNdundu, Jesus kwa tente asi: “Hareni nonkore deni oku  tomu kanderere po ava ava mu hepeke.” (Mat. 5:44) Jesus nage yiyo ga rugene oyo. Ose nampo twa gazadara ko kukora oku ga lididimikilire Jesus apa vakwayita woVaroma va mu pamparere kositji. Jesus kwa mu tekwire monkedi zonyanya ntani kwa lididimikilire kukora kokunene.

¹⁷ Nampili ngomu va mu hepekere unene, Jesus kapi ga zumbanesere eharo lyendi ntani ga twikilire kulimburukwa Jehova. Mevango lyokufinga vakwayita ava va mu tekwire momudona, age kwa kanderere asi: “Tate, va gusira po, yeeyi kapi vana diva eyi vana kurugana.” (Ruk. 23:34) Apa atu kanderere po ava ava tu tekura momudona, ayo kutuvatera tu kare tuna litura ntani kapi tatu handuka usimbu. Ayo kuvhura henakutuvatera tu va tare monkedi zongwa.

18. Ngapi kukanderera kwa vaterere Alberto naJohn va lididimikire apa va va tekwire momudona?

¹⁸ Kukanderera kwa vaterere vanavazinyetu wovagara ava tuna tumbura mosirongwa esi va lididimikire apa va va tekwire momudona. Alberto kwa tanta asi: “Ame kwa kandererere po vanavazinyetu ava va tekwire nge momudona. Ame kwa pulire Jehova yikando yoyinzi a vatere nge ni hageke kuhanduka kweyi va tekwire nge momudona. Ngesi Alberto kuna kukarera hena Jehova noulimburukwi. Ano John kwa tanta asi: “Yikando yoyinzi, ame ngani kanderere po munazinyetu ogu ga koresere nge. Kukanderera kwa vaterere nge ni dire kupangura munazinyetu ogo ntani ni kare nombili.”

19. Yisinke twa hepa kurugana siruwo esi tuna kuparuka mouzuni ou? (1 Peturusa 3:8, 9)

¹⁹ Ngomu tuna kuparuka mouzuni ou, kuvhura ngava tu tekure momudona. Yi kare asi yisinke tuna kulididimikira, kapisi tu hageke kupura Jehova a tu vatere. Twa hepa hena kuhonena eyi ga rugene Jesus apa va mu tekwire momudona nokutwikira kutura pasirugana nompango domoBibeli. Nsene tu yi rugana oyo, Jehova nga tu tungika.​—Resa 1 Peturusa 3:8, 9.