1-2. Yisinke ya hamena mo kukara mukuronambunga?

 NSENE ove omu kwafimbunga ntani nare wa tameka twa si huguvara asi ngesi kuna kukondjera o kare mukuronambunga. Ono hara kuruganena vanavazinyetu pokukara mukuronambunga?​—1 Tim. 3:1.

² Yisinke ya hamena mo kukara mukuronambunga? Kutura po sihonena sosiwa mokuzuvhisa, vantu va ku mone mokuzuvhisa yipo va kwame sihonena soge nokudingura vanavazinyetu yipo o va korangede nokuronga ntani nkareso zoge nombuuyungiso zoge yi tunge mbungakriste. Eyi yiyo Bibeli azi tumbwire vakurombunga ava ava rugana unene asi “vagara ngomauhwi.”​—Efe. 4:8.

3. Yisinke nayi vatera munazinyetu a wapere kukara mukuronambunga? (1 Timoteusa 3:1-7; Titusa 1:5-9)

³ Yisinke no rugana o wapere kukara mukuronambunga? Kuwapera sirugana soukuronambunga kapi ya lifana nokugwana yirugana. Vahona kutara tupu nsene muntu ga kara noudivi ou vana hepa makura tava mu kutu. Mokukara mukuronambunga udivi wokuronga nokuzuvhisa kapisi yiyo yelike ya hamena po. Wa hepa kusikikisa mo yihepwa yomomatjangwa eyi va tambura mwa-1 Timoteusa 3:1-7 ntani Titusa 1:5-9. (Resa) Sirongwa esi ta si ka demenena koyitwa yomulyo unene eyi va hepa kusikisa mo vakuronambunga: kudivikwa asi awo kwa kara nonkareso zongwa ponze ntani monda zombungakriste  nokukara nturagumbo gosihonena sosiwa ntani kukara nomutjima gokuruganena mbungakriste.

KUDIVIKWA ASI WA KARA NONKARESO ZONGWA

4. Yisinke asi tanta sihepwa esi asi “a pire epuko”?

⁴ Mokuwapera kukara mukuronambunga wa hepa kusikisa mo si hepwa esi asi “a pire epuko” eyi kutanta asi ove wa divikwa asi muntu gonkareso, zongwa, vantu womombungakriste va ku huguvara ntani va diva nawa-nawa asi kapi o rugana yoyidona ntani wa ‘divikwa kovantu ava va dira kupura asi ove muntu gomuwa.’ Vantu ava va dira kupura kuvhura va uyunge momudona epuliro lyoge nye va diva asi ove muntu gonkareso zongwa. (Ndan. 6:4, 5) Lipura asi vantu womombungakriste ntani woponze kutara nge asi ame muntu gousili ntani gonkareso zongwa ndi?

5. Ngapi omu no yi likida asi wa “hara yoyiwa”?

⁵ Nsene ove wa “hara yoyiwa” ngo demenena koyininke yoyiwa eyi ava rugana vakweni ntani ngo va pandura konkareso zawo zongwa. Ove hena ngo hara kurugana vantu wouwa, pamwe kupitakana eyi vana kupura. (1 Tes. 2:8) Morwasinke sa karera nomulyo sikara esi komukuronambunga? Morwa awo kuruganesa siruwo sosinzi mokupakera mbili vanavazinyetu noyirugana yimwe mombungakriste. (1 Pet. 5:1-3) Nampili ngoso mukuronambunga kugwana ruhafo rorunene pokuruganena vanavazinyetu.​—Yirug. 20:35.

6. Mononkedi musinke muntu na likida asi age “kutambura vagenda”? (Vahebeli 13:2, 16; tara hena efano.)

⁶ Ove ‘kutambura vagenda’ nsene o ruganena wopeke nampili ava va kara asi kapisi vakaume woge. (1 Pet. 4:9) Mauzera gamwe kwa faturura muntu ogu a tambura vagenda asi: “ Evero lyembo lyendi ntani mutjima gwendi gwa hepa kuzegurukira vageni.” Lipura asi; ame kwa divikwa asi muntu ogu a tambura vagenda ndi? (Resa Vahebeli 13:2, 16.) Muntu ogu a tambura vagenda kupa ko vakwawo, age kugava kovantu woruhepo ntani vanavazinyetu ava ava rugana unene, ngwendi vatareli wonombunga ntani ava ava wiza va ya gave yiuyungwa mombunga zeni.​—Gen. 18:2-8; Yis. 3:27; Ruk. 14:13, 14; Yirug. 16:15; Rom. 12:13.

7. Ngapi omu mukuronambunga na yi likida asi ‘kapi ga dowokera yimaliwa’?

 ⁷ “Kapisi gokudowokera yimaliwa.” Eyi kutanta asi kapi wa tokomena unene kemona. Ove kwa tura muhowo Uhompa, yikare asi ove ruhepo ndi ngawo. (Mat. 6:33) Ove kuruganesa siruwo nononkondo ntani noyiweka yoge yipo o karere Jehova nokupakera mbili epata lyoge ntani nokuruganena vanavazinyetu mombungakriste. (Mat. 6:24; 1 Joh. 2:15-17) Lipura asi ngapi omu tara yimaliwa? Ya gwanena nge po ndi? Ndi ame kwa tokomena kugwana yimaliwa nokukara noyiweka yoyinzi unene?​—1 Tim. 6:6, 17-19.

8. Ngapi omu no yi likida asi ove muntu “gokulipangera”?

⁸ Nsene ove muntu “gokulipangera” ngo kara nehetakano mwayinye eyi o rugana meparu, kukwatera mo kulya nokunwa nondwareso nomaliwapaiko ntani yilihafeso. Ntani kapi ngo kara mpitameho mokuhonena yininke yomouzuni. (Ruk. 21:34; Jak. 4:4) Ove kwa songomena ntani kukara ono litura nampili kuna kukuhadagura. Ove “kapisi nkorwe” ntani kapi wa divikwa asi muntu ogu a nu unene marovhu. Lipura asi ame muntu gokulipangera ndi?

9. Yisinke ya hamena mo ‘kukara nonondunge’ ntani ‘nkareso zongwa’?

⁹ Nsene ove kwa ‘kara nonondunge’ ngo ruganesa nompango doBibeli momaukaro gokulisiga-siga. Ove wa gazaradara ko unene konompango doBibeli ntani odo ku kuvatera o kwate nawa egano yininke nokutura po matokoro gomawa. Kapi o gazarere asi yininke yimo yina kara nsene kapi ono kara nomauzera nagenye, nye ove kudivilisa asi ono kara nomauzera nagenye. (Yis. 18:13) Ove kutulisa po matokoro nonondunge pokukwama nompango daKarunga. Nsene wa kara ‘nonkareso zongwa’ ove kuwapaika nawa yininke ntani kulivinduka. Ove muntu gokuhuguvara ntani kukwama mavyukiso. Yikara eyi tuna zogere nga yi kuvatera o divikwe asi ove muntu gonkareso zongwa. Ngesi tatu ka demenena kweyi nayi ku vatera o sikise mo yihepwa eyi nokukara kara nturagumbo gosihonena sosiwa.

NTURAGUMBO GOSIHONENA SOSIWA

10. Ngapi omu mugara na ‘pitisira nawa epata lyendi’?

¹⁰ Nsene ove nturagumbo ntani ono hara kukara mukuronambunga, epata lyoge lya hepa kukara sihonena sosiwa. Eyi yiyo ya karera nomulyo o ‘pitisire nawa epata lyoge.’ Kara nturagumbo geharo ogu a tekura nawa epata lyendi ntani kutura po matokoro gomawa. Vatera vantu vemepata lyoge va ze nkenye apa komapongo nokuza mokuzuvhisa ntani rugana ukareli wepata nkenye pa. Morwasinke ya karera hepere asi oyi sikise mo eyi? Paurusa kwa uyungire asi: “Nsene asi mugara kapi ga diva kupitisira epata lyendi, ngapi nye omu na pakera mbili mbungakriste zaKarunga?”​—1 Tim. 3:5.

11-12. Ngapi omu epata ali kundama yitumbukira yanturagumbo? (Tara hena efano)

¹¹ Nsene vana woge wokonhi zonomvhura 18 kwa kara membo lyoge ntani nyove o va pakere mbili va hepa kukara “wovalimburukwi ntani wonkareso zongwa.” Wa hepa kuvaronga nokuvadeura nombili. Moomu ya kara kara asi vanona kuzoragana nokudanauka nye nsene wa va deura nawa awo ngava limburukwa nokufumadeka ntani kukara nonkareso zongwa. Wa hepa hena kuvatera vana woge va kare nelikwatakano lyewa naJehova nokukwama nompango domoBibeli ntani nokugwana ekuho.

¹² “A kare novana wovapuli ava va dira kukara nonkareso zondona ndi zourwanesi.”  Ngapi ngayi kundama nturagumbo nsene munendi ogu a karere Jehova a tura nzo zonene? Nsene nturagumbo ogo kwa tarerera munendi ntani kapi nga mu rongo, ngava mu gusa situmbukira sokukara mukwafimbunga ndi mukuronambunga.​—Tara Ruhungu romo-15 Sikukutu 1996 epe. 21 para. 6-7 moRuingilisa.

KUPAKERA MBILI MBUNGAKRISTE

13. Ngapi omu no yilikida asi ove ‘kutambara magano govakweni’ ntani kapi wa kara ‘nondino’?

¹³ Vanavazinyetu ava va kara noyikara yoSikriste kuvatera unene mbungakriste. Munazinyetu “ogu a tambura magano” kuretesa po mbili. Nsene ono hara kusikisa mo nawa sihepwa esi asi kutambura magano, divilisa nkenye apa asi ove kupurakena komagano govakweni ntani tambura omu ava tara yininke. Pasihonena mepongo lyovakuronambunga nsene sinzi sawo vana kwatesa ko egano lyongandi nove kukwatesa ko egano olyo nsene kapi lina lilimbi noBibeli ndi? “Ga ha kara ndino” kutanta asi ove kapi wa kara asi nsene ono yipanga makura yimo nayi horoka ngororo kwato ogu nayi tjindja. Wa hepa kudiva asi ayo mulyo kupurakena nokutambura magano govakweni. (Gen. 13:8, 9; Yis. 15:22) Kapisi ‘gokutanguna’ ndi “gokuhanduka usimbu.” Eyi kutanta asi ove kufumadeka vakweni ntani kapi o litangwisa nawo, nye kuvatekura nombili. Ove kwa hara “kutulisa po mbili” nampili momaukaro gokufa nokutara. (Jak. 3:17, 18) Nonkango doge donongwa ngadi ninkisa vantu va liture kukwatera mo ava ava tu rwanesa.​—Vap. 8:1-3; Yis. 20:3; 25:15; Mat. 5:23, 24.

14. Yisinke asi tanta si hepwa esi asi “kapisi a kare mupuli gomupe” ntani “mulimburukwi”?

¹⁴ Munazinyetu gokuvhura kuwapera kukara mukuronambunga “kapisi a kare mupuli gomupe.” Nampili ngomu sa pira kutamba sihepwa esi konomvhura dononzi unene, nye wa hepa siruwo yipo o kare Mukriste ogu ga  pya, ga diva kuruganesa nompango doBibeli nokutura po matokoro gomawa. Komeho va ku ture mukuronambunga wa hepa kuyilikida asi ove kuhonena Jesus pokulinunupika ntani kapi o rwanganene asi va ku pe situmbira nye kundindira siruwo esi Jehova nga ku pa situmbukira songandi. (Mat. 20:23; Fil. 2:5-8) Ove kuvhura kuyilikida asi o “mulimburukwi” pokukwama nompango domoBibeli ntani mavyukiso gokutunda kombunga zaJehova.​—1 Tim. 4:15.

15. Hepero mukuronambunga a kare muuyungi gomuwa unene? Faturura

¹⁵ Matjangwa kwa tanta hena asi vapitisili va hepa ‘kudiva kuronga.’ Eyi kutanta asi wa hepa kugava yiuyungwa yoyiwa unene yokutetura ndi? Hawe. Vakuronambunga wovanzi kapi ava gava yiuyungwa yoyiwa unene nye awo kuronga nawa mokuzuvhisa ntani apa ava korangeda vanavazinyetu. Enye wa hepa kutwikira kukondja kuwapukurura udivi woge wokuronga, ngapi omu no yi rugana?

16. Yisinke nayi kuvatera o kare murongi gomuwa? (Tara hena efano.)

¹⁶ “A korangede wopeke nerongo lyousili.” Demenena koNonkango daKarunga nsene kuna kugava siuyungwa ndi kompengi. Lironga nawa Bibeli ntani yimbapiratjangwa yetu. (Yis. 15:28; 16:23) Nomena nawa omu yimbapiratjangwa yetu ya faturura matjangwa. Nsene to rongo kondjera kuvatera vantu va hare unene Jehova nokusikisa mo eyi ava lirongo. Nsene o pura magano kovakuronambunga ava va diva kuronga ngayi kuvatera o dive nawa kuronga. (1 Tim. 5:17) Vakuronambunga va hepa ‘kukorangeda’ vanavazinyetu ano pamwe ‘kuvanyokera’ nye va hepa kuyirugana monkedi zongwa zombili. Nsene ove muntu geharo gokugomoka ntani kuruganesa Nonkango daKarunga ove ngoso kuna kuhonena Jesus murongi gomunene ntani erongo lyoge ngali vatera unene vantu.​—Mat. 11:28-30; 2 Tim. 2:24.

 TWIKIRA KUKONDJERA YITUMBUKIRA

17. (a) Yisinke nayi vatera vakwafimbunga va twikire kukondja yipo va kare vakwafimbunga? (b) Yisinke va hepa kudiworoka vakuronambunga nsene kuna kutarurura ogu nava tura a kare mukuronambunga? (Tara kakende “ Kara nehetakano nsene kuna kutarurura ava vana wapere situmbukira.”)

¹⁷ Vakwafimbunga vamwe kuvhura va lizuvhe asi kapi tava vhuru kusikisa mo yihepwa yokukara mukuronambunga. Diworokeni asi Jehova nombunga zendi kapi ava ndindira ko asi tu sikise mo yihepwa oyo monkedi zokusikilira mo. (1 Pet. 2:21) Mpepo zaJehova yizo nga zi kuvatera o tunge po yikara oyo. (Fil. 2:13) Kosili sikara ono hara kutunga po? Kanderera kwaJehova a ku vatere.Rugana ko epaparo ntani pura vakuronambunga va ku pe ko magano.

18. Yisinke vana korangeda vakwafimbunga navenye nava rugana?

¹⁸ Natuvenye tu twikireni kulikida yikara eyi kukwatera mo ava va kara nare vakuronambunga. (Fil. 3:16) Ove ngesi omu kwafimbunga ndi? Kuna ku kukorangeda o twikire kukondja yipo nove ngo wapere kukara mukuronambunga. Kanderera kwaJehova a ku deure nokukuhonga yipo a kuruganese unene mombungakriste ntani o vatere vantu vendi. (Jes. 64:8) Jehova ngano a kutungike ngomu ono kulitura mo unene yipo nove ngo wapere kukara mukuronambunga.