1. Ngapi ga lizuvhire Paurusa kuhamena vakwafimbunga?

 VAKWAFIMBUNGA kurugana sirugana somulyo unene mombungakriste. Paurusa nage kwa pandwire unene vakwafimbunga. Age kwa kundisilire po vakwafimbunga kumwe novakurombunga apa ga tjangerere Vakriste womoFilipi.​—Fil. 1:1.

2. Ngapi omu ga lizuvhire munazinyetu Luis kuhamena sirugana soukwafimbunga?

² Vanavazinyetu kuhafera unene sirugana sokukara mukwafimbunga yikare asi vanona ndi vakondi. Pasihonena, Devan kwa kere mukwafimbunga apa ga kere nonomvhura 18. Munazinyetu Luis kwa kere mukwafimbunga apa ga kere nonomvhura 50, age kwa tente asi: “Ame nina hafa sili unene kurugana sirugana soukwafimbunga, unene po pokumona eharo eli ava likida nge womombungakriste.”

3. Mapuro musinke natu ka zogera?

³ Kuvhura o litulire po sitambo sokukara mukwafimbunga nsene simpe kapi ono kara mukwafimbunga ndi? Yisinke nayi ku tumangeda? Yihepwa musinke yomoMatjangwa wa hepa kusikisa mo? Mapuro ogo tava ka ga limburura mosirongwa esi. Ngesi tu zogereni sirugana sovakwafimbunga.

 EYI AVA RUGANA VAKWAFIMBUNGA

4. Yisinke ava rugana vakwafimbunga mombungakriste? (Tara hena efano.)

⁴ Vakwafimbunga kuna kara vanavazinyetu ava va gwana ekuho ava azi horowora mpepo zokupongoka yipo va vatere vakurombunga noyirugana yokulisiga-siga mombungakriste. Vakwafimbunga kudivilisa asi pana kara nomukunda dokuzuvhisira ntani noyimbapiratjangwa. Vamwe kuwapeka Sinyanga nokusizeresa. Vakwafimbunga kukara vakareli ntani kurugana hena komambako nokulikida novidiyo posiruwo somapongo. Vakwafimbunga kurugana yirugana eyi ayi ninkisa epongo ligende po nawa. Somulyo po, vakwafimbunga vagara ava va kara nepuro lyokupama ntani awo kwa hara unene Jehova nokulimburukwa nompango dendi. Awo kwa hara unene vanavazinyetu. (Mat. 22:37-39) Yisinke nava rugana vanavazinyetu wovagara ava va gwana ekuho yipo va kare vakwafimbunga?

5. Yisinke na rugana munazinyetu gomugara yipo a wapere kukara mukwafimbunga?

⁵ Bibeli kwa tumbura eyi va hepa kusikisa mo owo vana hara kukara vakwafimbunga. (1 Tim. 3:8-10, 12, 13) Nsene ono hara kukara mukwafimbunga lironga yihepwa oyo nokukondja unene yipo o yi sikise mo. Pomuhowo wa hepa kudiva asi morwasinke ono harere kukara mukwafimbunga.

YISINKE NAYI KU TUMANGEDA?

6. Yisinke nayi kutumangeda o rugane yirugana nkenye eyi nayi vatera vanavazinyetu? (Mateusa 20:28; tara hena efano lyopontunda.)

⁶ Eharo yilyo lya tumangedere Jesus a rugane nayinye eyi ga rugene, age kuna kara sihonena sosiwa unene kwetu. Eharo yilyo hena lyamuninkisire a rugane unene ntani a rugane yirugana eyi ngava tara asi kwato mulyo. (Resa Mateusa 20:28; Joh. 13:5, 14, 15) Jehova nga ku tungika ntani nokukuvatera o wapere kukara mukwafimbunga nsene likutumangeda eharo.​—1 Kol. 16:14; 1 Pet. 5:5.

7. Morwasinke natu nyokerera po kukondjera ukwafimbunga nositambo soku tu kangangere po?

⁷ Mouzuni vantu kwa hara unene ava ava moneka asi mulyo unene. Mombunga zaJehova kapi atu kwama magano gokufana ngoso.  Munazinyetu ogu ali tumangeda eharo kapi a kondjere asi a gwane unankondo ndi asi a pangere vakwawo ndi va mu mone asi yige gomulyo po. Muntu ogo nsene a gwana situmbukira mombungakriste, ngasi mu ninkisa a nyoke kurugana yirugana yomombungakriste eyi ayi moneka asi kwato mulyo. Kuvhura a lizuvhe asi yirugana oyo kapi ya mu wapera. (Joh. 10:12) Tu diworokeni asi Jehova kapi nga tungika muntu ogu a rugana yininke nositambo sokulinenepeka ndi a gwanene po mfumwa.​—1 Kol. 10:24, 33; 13:4, 5.

8. Epukururo musinke ga geve Jesus kovapositoli vendi?

⁸ Vakaume vaJesus nawo poyiruwo yimwe kwa here yitumbukira nositambo sepuko. Pasihonena, Jakopo naJohanesa kwa hundilire Jesus asi ngava pe sirugana somulyo unene moUhompa. Jesus kapi ga tambwire ehundiro lyawo. Age kwa tanterere vapositoli vendi 12 asi: “Ogu ga hara kukara munene pokatji keni, a kare mukereli gweni.” (Mar. 10:35-37, 43, 44) Mbungakriste ngazi gwanena mo uwa nsene vanazinyetu va kondjera yitumbukira nositambo sokuruganena wopeke.​—1 Tes. 2:8.

EYI NAYI KUVATERA O KONDJERE YITUMBUKIRA

9. Yisinke nayi kuvatera o kondjere yitumbukira?

⁹ Ove kwa hara sili unene Jehova ntani ono hara kuruganena vanavazinyetu. Nye nampo kapi wa kara neharo lyokukara mukwafimbunga. Yisinke nayi ku vatera? Gazara ko ruhafo oru ngo gwana pokuruganena vanavazinyetu. Jesus kwa tente asi: “Kugava kureta ruhafo kupitakana kutambura.” (Yirug. 20:35) Jesus nage kwa kweme nonkango odo. Age kwa gwene ruhafo rosili pokuruganena wopeke, nove kuvhura o gwane ruhafo oro.

10. Ngapi omu ga yi likidire Jesus asi age kwa here kuruganena wopeke? (Marukusa 6:31-34)

¹⁰ Tu tareni ko sihonena saJesus omu ga likidire asi age nga hafere kuruganena wopeke. (Resa Marukusa 6:31-34.) Ezuva limwe Jesus novarongwa vendi kwa rorokere. Awo kwa zire kevango limwe ngano va ka pwizumuke po. Mbunga zonene kwa ka lihovere kukasika kevango olyo morwa awo kwa here Jesus ava ronge. Jesus ngano ga nyokere kuyirugana morwa nage novarongwa vendi “kapi va kere nampili nosiruwo sokulya seesi.” Ndi age ngano ga tokwere kuvaronga tupu yoyisesu. Nye age ‘kwa rongere mbunga yininke yoyinzi’ morwa eharo lyamutumangedere. Age kwa va rongere dogoro “apa lya gombokere.” (Mar 6:35) Jesus kapi ga yi rugene komusininiko nye kwa yi rugene morwa ‘kwa va fililire nkenda.’ Jesus kwa va rongere morwa ga va here. Kuruganena wopeke kwa hafesere unene Jesus.

11. Ngapi omu Jesus ga ruganene vantu uwa? (Tara hena efano.)

¹¹ Jesus nga ruganene hena wopeke mononkedi dimwe kugusa ko kuvaronga. Age kwa va pere nondya pasitetu ntani nokutantera varongwa vendi va di gavere. (Mar. 6:41) Pokuyirugana ngoso age kwa likidire varongwa vendi omu va hepa kuruganena wopeke ntani asi ayo mulyo unene. Eyi kwa lifana neyi ava rugana vakwafimbunga, yosili yirugana yawo mulyo unene. Varongwa kwa hefe unene pokulihameka mo nawo mokugavera nondya kovantu ava ‘navenye va lire tava kuta.’ (Mar. 6:42) Esi kapisi yiso sikando selike Jesus ga tulire yihepwa yovakwawo muhowo, age nkenye apa nga ruganene vantu. (Mat. 4:23; 8:16) Jesus nga pakere mbili vantu  ntani ngava rongo, eyi kwa mu reterere ruhafo. Nsene o kondjera kukara mukwafimbunga nositambo sosiwa nove ngo hafa.

12. Morwasinke natu nyokerera po kulizuvha asi ose kapi twa kara nevhuliko lyongandi?

¹² Ya ha kugusa mukumo nsene o lizuvha asi kapi wa kara nevhuliko lyongandi. Nkareso zoge zongwa mulyo unene kombungakriste. Ove ngo gwanena mo uwa nsene o resa nonkango daPaurusa mo-1 Vakolinte 12:12-30. Nonkango odo kulikida asi nkenye gumwe mombungakriste ga kara nosirugana. Wa ha zugumina mo handuke nsene pwangesi kapi ono wapere kukara mukwafimbunga. Fira po, yipo yi kutompoke nove a ku ruganese unene Jehova ntani o ruganene vapuli vakweni. Vakurombunga ngava divilisa yirugana eyi nava vhura kukupa kuliza nevhuliko lyoge.​—Rom. 12:4-8

13. Konda musinke zimwe zeyi natu kondjerera yitumbukira?

¹³ Konda zimwe zeyi no kondjerera kukara mukwafimbunga kuna kara asi yihepwa eyi ya kara kwa tamba koVakriste navenye. Vakriste navenye va hepa kuhedera Jehova pepi awo hena va hepa kugava yipo va limonene ruhafo aru tundu mokugava ntani nokutura po sihonena sosiwa. Eyi na rugana munazinyetu mokuwapera kukara mukwafimbunga.

EYI NO RUGANA O KARE MUKWAFIMBUNGA

14. Yisinke ayi tanga kukara “nononkedi dongwa”? (1 Timoteusa 3:8-10, 12)

¹⁴ Tu tareni yihepwa eyi ya kara po va tumbura mwa-1 Timoteusa 3:8-10, 12. (Resa) Mukwafimbunga ga hepa kukara “nononkedi donongwa.” Eyi kutanta hena asi muntu ogu ga fira efumadeko, nye kapi ayi tanta asi kapi to zoragana ndi o liteure novantu. (Muud. 3:1, 4) Yomulyo po wa hepa kusikisa mo yirugana yoge mombungakriste. Nsene ove kusikisa mo eyi ava ku pe ntani kuvhura kukuhuguvara, vanavazinyetu ngava kufumadeka.

15. Yisinke ayi tanta ‘kupira kagoma mbetakuvali’ ntani ‘kupira kudowokera yimaliwa nokukondjera uwa wanyamwendi’?

¹⁵ “Kapisi gokagoma mbetakuvali” eyi kutanta asi ove muntu gokuhungika ntani gokuhuguvara. Ove kusikisa mo eyi o tanta ntani nkareso zoge komeho zovantu zi likide  sili asi yimo wa kara, nye kapisi o likisaukire. (Yis. 3:32) “Kapisi. . .gokudowokera yimaliwa nokukondjera uwa wanyamwendi” kutanta asi ove kuhungika mongesefa ntani nomu o ruganesa yimaliwa. Kapisi o gende vanavazinyetu konhi morwa nkareso zawo zongwa ndi ukaume ou mwa kara nawo, yipo o gwanene po yimaliwa.

16. (a) Yisinke ayi tanta ‘kupira kunwa unene vhinyu’ (b) Yisinke ayi tanta kukara “ nezwi lyewa lyokomutjima”?

¹⁶ “Kapisi. . . gokunwa unene vhinyu” kutanta kapi o nu unene marovhu ntani kapi wa divikwa asi ove muntu gokunwa unene. Ga kara nezwi “lyewa lyokomutjima” eyi kutanta asi ove kulimburukwa nompango daKarunga. Ove wa kara nombili ezi azi tundu mokukara nelikwatakano lyewa naJehova.

17. Ngapi omu munazinyetu nayi likida asi kuvhura kumuhuguvara siruwo esi vana ‘kumukonakona va dive nsene ana wapere sirugana’? (1 Timoteusa 3:10; tara hena efano.)

¹⁷ “Mu konakoneni mu dive nsene asi ana wapere sirugana” eyi kutanta asi wa yi likida nare asi kuvhura kukuhuguvara nsene va ku pa situmbukira. Nsene vakuronambunga tava ku pe sirugana kwama nawa mavyukiso aga vana kukutantera ntani aga za gava mbunga zaJehova. Divilisa eyi yina hamene mosirugana oso ntani ezuva eli vana harere ngo si mane. Vantu womombungakriste ngava yi dimburura omu o sikisa mo nawa sirugana soge ntani ngava kupandura. Vakuronambunga litureni mo unene mokudeura vanavazinyetu wovagara ava va gwana ekuho. (Resa 1 Timoteusa 3:10.) Mombungakriste zeni mwa kara vanavazinyetu wovagara ava va gwana ekuho wonomvhura 10 yitware 14 ndi wokonhi zonomvhura odo ndi? Awo va tulisa po elirongo lyavene yipo va konakone nawa Bibeli nokuliwapaikira nawa komapongo ndi? Awo kugava malimbururo nokuza nkenye apa mokuzuvhisa ndi? Nsene yimo va peni yirugana mombungakriste eyi ya liza nonomvhura dawo ntani nomaukaro gawo. Eyi ngayi mu vatera mu ‘konakone nsene asi vana wapere sirugana.’ Nsene vana gwanesa nomvhura 17 yitware 19 awo kuvhura kuwapera kukara vakwafimbunga.

18. Yisinke ayi tanta ‘kupira usima’?

¹⁸ “Kapi ana kara nousima” Eyi kutanta asi kwato gumwe na vhura kukuuyunga  asi wa rugana yirugana yoyidona. Yimo pamwe Vakriste kuvarundira. Jesus nage ngava mu rundire pamwe ntani aga kwa pumbire asi varongwa vendi nawo ngava va rundira. (Joh. 15:20) Nye nsene o nyokera po kurugana yoyidona ngwendi moomu ga yi rugene Jesus ove ngo divikwa asi muntu gomuwa mombungakriste.​—Mat. 11:19.

19. Yisinke ayi tanta ‘kukara nomukadi gumwe tupu’?

¹⁹ “Ogu ga kara nomukadi gumwe tupu.” Nsene wa kwara wa hepa kukwama mpangera zopomuho zaJehova kuhamena nonkwara, mugara ga hepa kukwara mukadi gumwe tupu. (Mat. 19:3-9) Mugara goMukriste ga hepa kunyokera po kuhondera. (Heb. 13:4) Yinzi ga hepa hena kurugana, age kapi ta vhuru kulihoresa kovakadi nawopeke nye ga hepa kukwaterera kwamukadendi makura.​—Joba 31:1.

20. Ngapi omu mugara na ‘pitisira nawa epata lyendi’?

²⁰ “A dive kupitisira epata lyendi nokupakera mbili vana vendi” Nsene asi ove mugara gepata wa hepa kusikisa mo nawa situmbukira soge. Rugana ukareli wepata nkenye sivike. Litura mo mokuzuvhisa kumwe nepata lyoge nkenye apa. Vatera vana woge va kare nelikwatakano lyavene naJehova. (Efe. 6:4) Nsene mugara kupakera mbili nawa epata lyendi eyi kulikida asi kuvhura hena a pakere nawa mbungakriste.​—Hetakanesa 1 Timoteusa 3:5.

21. Yisinke no rugana yipo o wapere kukara mukwafimbunga?

²¹ Kuna kukorangeda vanavazinyetu wovagara ava vana pili simpe kukara vakwafimbunga va liture po siruwo sokukokona nawa sirongwa esi nokusikisa mo eyi yina kara mo, yipo nawo va wapere kukara vakwafimbunga. Kareni neharo lyokuruganena unene Jehova novanavazinyetu. (1 Pet. 4:8, 10) Nsene mu yirugana ngomu gwana ruhafo oru aru tundu mokuruganena vanavazinyetu. Ngano Jehova amu kwatese ko kumwe nelituromo lyeni yipo mu wapere kukara vakwafimbunga!​—Fil. 2:13.