SYLVIANA muzuvhisi gokukarerera gonomvhura 27 kwa tanta asi: “Apa na zuvhire yihorokwa yovakaume vange ava va ka zuvhisilire oku vana hepa vazuvhisi, name kwa here ni limonene ruhafo oro.” Nye age kwa tanta hena asi: “Nye ame kwa lizuvhire asi kapi tani yi vhuru.”

Nove yimo o lizuvhu ngoso ndi? Nove ono hara kukazuvhisira momukunda omu vana hepa vazuvhisi nye kulizuvha asi kapi ngoyi sikisa mo ndi? Nsene yimo o lizuvhu ngoso, ya ha kudompesa. Nevatero lyaJehova, vanavazinyetu wovanzi ya va tompoka kufunda po maudigu aga gava konderere mokutamununa sirugana sawo. Mokudiva omu Jehova ga vatera vamwe, tatu ka tara sirudi saMadagascar saune po mounene uzuni mudima.

Monomvhura murongo da ka pita, vazuvhisi womupampi wokupitakana po-70 novazuvhisi wokukarerera wokutunda koyirongo * 11 kwa ya zuvhisira posirudi esi va kara vantu ava va fumadeka Bibeli. Vazuvhisi woposirudi oso, nawo kwa lihameka mo mokuhanesa mbudi zoUhompa posirudi oso. Ngesi tatu ka zuvha ko yihonena yovazuvhisi vamwe.

Louis naPerrine valikwali wonomvhura dokupitakana po-30 kwa tundire koFransa va ze koMadagascar. Nomvhura dononzi, awo kwa gazadarere ko kukazuvhisira kosirongo nasopeke, nye Perrine kapi ga here kuza. Age kwa tente asi: “Ame kwa kere nowoma kuza kevango oku na dira kudiva. Na kere nosinka hena kusiga epata lyetu nombungakriste zetu nembo lyetu ntani yininke nayinye eyi twa yikire kurugana. Yinka yange yiyo na kondjere nayo unene mokuyifunda po.” Mo-2012, Perrine yipo ga tokwere kudiruka, ano momvhura ozo yipo va dirukire namugara gwendi. Ngapi omu a lizuvhu kuhamena etokoro lyendi? Age kwa tanta asi: “Pokumona omu Jehova ga tu vatera meparu lyetu, ayo ya nkondopeka epuro lyetu.” Louis nage kwa uyunga ko asi: “Sikando setu sokuhova poMurarero gwaHompa moMadagascar, varongwa vetu woBibeli murongo nawo yipo va kere.”

 Yisinke ya va vaterere va twikire nosirugana sawo apa va ligwanekerere nomaudigu? Awo kwa kanderere kwaJehova a va pe nonkondo va lididimike. (Fil. 4:13) Louis kwa tanta asi: “Jehova ga limbwilire makanderero getu ntani ga tu pere ‘mbili zendi.’ Ose twa vhulire kudemenena kosirugana setu. Ntani hena vakaume vetu ngava tu tumine nombudi dokutukorangeda yipo asi tu twikire.”—Fil. 4:6, 7; 2 Kol. 4:7.

Jehova kwa tungika Louis naPerrine morwa elididimiko lyawo. Louis kwa tanta asi: “MwaSikukutu 2014, ose kwa zire koSikora zoBibeli zovalikwali * moFransa. Sikora ozo kuna kara uhwi wokutunda kwaJehova ou ngatu dira kudivara.” Apa va mene sikora zawo, awo kwa hefe pokuvatuma hena koMadagascar.

Didier naNadine valikwali womoFransa kwa dirukilire koMadagascar mo-2010 apa va kere nonomvhura dokupitakana po-50. Didier kwa tanta asi: “Ose ngatu rugana uzuvhisi wokarerera apa twa kere vadinkantu, komeho tu ya kare novana vatatu. Apa vana vetu va ya kulire, tatu gazadara ko kukazuvhisira kosirongo nasopeke.” Nadine kwa tanta asi: “Ame kwa kere nowoma wokulikara ure novana vange, nye awo kwatu tanterere asi: ‘Nsene ngomu dirukira kosirongo esi vana hepa vazuvhisi, ngatu yi hafera.’ Nonkango odo kwa tu tumangedere tu diruke. Nampili ngomu twa likara ure novana vetu, ayo kutuhafesa kweyi atu uyunga nawo nkenye apa.”

Didier naNadine kwa va digoperere kulironga eraka lyoRumalagasy. Nadine kwa tanta asi: “Ose ngesi kapisi vadinkantu hena.” Ngapi omu ya va tompoka? Pomuhowo, awo kwa dirukilire kombungakriste zemeraka lyoRufransa. Ano konyima apa va here kulironga eraka lyomomukunda, yipo va dirukilire mombungakriste zemeraka lyoRumalagasy. Nadine kwa tanta asi: “Sinzi sovantu atu zuvhisire kwa hara kulironga Bibeli. Narunye awo kutupandura kweyi atu va zuvhisire. Pomuhowo, kapi na yi pulire eyi ngani limonene. Ame kuhafera kurugana uzuvhisi wokukarera momukunda ogu. Nkenye ngurangura ame kuyihafera kuza mokuzuvhisa.”

Didier kumuhafesa apa a diworoka omu ga lirongere Rumalagasy. Age kwa tanta asi: “Ame kwa pitisilire epongo nye kapi na kwete egano malimbururo aga va geve vanavazinyetu. Eyi na vhulire kuuyunga ko tupu asi: ‘Mpandu.’ Konyima apa na pandwire munazinyetu gomukadi kelimbururo lyendi, ava va hingilire konyima zendi tava pyata nge nomawoko asi kapi ana gava elimbururo lyouhunga. Yipo na likire munazinyetu gomugara gumwe ogu ga geve elimbururo lyouhunga, nasi huguvara asi age ga geve lyouhunga.”

Posigongi esi sa kere mo-2005, Thierry namukadendi Nadia kwa tarerere sidanauka “Kondjera yitambo eyi ayi reta efumadeko kwaKarunga.” Sidanauka oso saTimoteusa kwa va korangedere unene ntani sa va ninkisire va kare neharo lyenene lyokukazuvhisira oku va hepere vazuvhisi. Thierry kwa tanta  asi: “Apa sa pwire sidanauka ngomu twa sakerere, tani pura mukadange asi, ‘Kupi ngatu za?’ Mukadange kwa uyungire asi nage kwa lipulire epuro lyokulifana.” Konyima zosiruwo, awo va ya tulire po marunduruko mokusikisa mo sitambo sawo. Nadia kwa tanta asi: “Twa ya sesupikire yiweka yetu dogoro ta yi tu hupire po yoyisesu eyi ya gwanekere monokofa tupu ne.”

Awo kwa ka sikire moMadagascar mo-2006 ntani awo kwa haferere sirugana sokuzuvhisa. Nadia kwa tanta asi: “Vantu ava atu zuvhisire kuturetera ruhafo.”

Konyima zonomvhura ntazimwe, valikwali owo kwa ligwanekerere noudigu. Marie-Madeleine ozina vaNadia ava tungire moFransa kwa ligende nokuteka kuwoko ntani kwa remanene momutwe. Konyima apa valikwali va gwene mauzera kwandokotora, tava pura ozina vaNadia nsene kuvhura va ya tunge kumwe nawo moMadagascar. Awo va tambwire ezigido olyo nampili ngomu va kere nonomvhura 80. Ngapi omu ava lizuvhu kukatunga kosirongo nasopeke? Awo kwa tanta asi: “Poyiruwo yimwe kudigopera nge kuyika nye nampili ngomu ani dili kurugana yoyinzi, ame kulizuvha asi name mulyo mombungakriste. Eyi ayi hafesa nge unene kuna kara asi ewapaiko eli kupulisira munwange kumwe natamweyi zange va twikire nosirugana sawo.”

Riana, kuna kara munazinyetu gomugara gonomvhura 22. Age kwa kulira moAlaotra Mangoro, mukunda ogu ava zangura nombuto dononzi. Kosure age nga lirongo unene ntani ga here kuza kelirongo lyokuzeruka. Nampili ngoso apa ga lirongere Bibeli ga rundwilire sitambo sendi. Age kwa tanta asi: “Ame kwa kondjere ni mane sure ntani kwa tumbwidilire Jehova asi, ‘Nsene ngani pita ekonakono lyange lyokuhulilira kosure ngani tameka uzuvhisi wokukarerera.’” Apa Riana ga mene sure, ga sikisire mo etumbwidiro lyendi. Age kwa ka tungire namunazinyetu gomugara ogu ga kere muzuvhisi gokukarerera nokugwana yirugana yonovili dononsesu ntani ta tameke uzuvhisi wokukarerera. Age kwa tanta asi: “Alyo kwa kere etokoro lyomulyo na tulire po.”

Nampili ngoso, ekoro lyaRiana kapi lya kwete egano konda zeyi ga dilire kulirongera yirugana yokufuta nawa. Age kwa tanta asi: “Otate nahekurwange ntani omama kwa korangedere nge ni kondjere erongo lyokuzeruka. Nye ame kapi na here kuhageka uzuvhisi wokukarerera.” Konyima Riana ga ya gazadarere ko kukazuvhisira oku va hepere vazuvhisi. Yisinke ya mu tumangedere? Age kwa tanta asi: “Vawidi kwa ya tezere nzugo ezi twa kere nokuvaka yipako yange. Sihorokwa oso sa ninkisire nge ni gazadare ko kononkango daJesus kuhamena kulipongaikira ‘emona meguru.’ Yipo na tokwere kurugana unene mokulipongaikira emona lyemeguru.” (Mat. 6:19, 20) Age kwa dirukilire korwambindakano zosirongo oso oku aku dili kuroka mvhura nawa. Mukunda ogo kwa likara ure nokugatungire pomuhowo, ure wonokilometa 1 300. Amo kwa tunga mo vantu ava tumbura asi Vaantandroy. Morwasinke ga dirukilire komukunda ogo?

Komeho va ya vake membo lyawo, Riana kwa tamekere kuronga Bibeli vagara vavali woVaantandroy. Age ga ya lirongere nonkango dimwe demeraka olyo ntani ga here kuvatera vantu ava ava uyunga eraka olyo ava va dira kuzuvha rumwe mbudi zoUhompa. Age kwa tanta asi: “Ame kwa kanderere kwaJehova a vatere nge ni dirukire komukunda oku ava uyunga Rutandroy.”

Konyima Riana ga dirukire ntani ga ligwanekerere hena noudigu umwe. Age kapi ga gwene yirugana. Mugara gumwe ta mu tantere asi: “Yisinke nye wa wizira ko oku? Mokugwana yirugana, vantu kukayigwanena kooku wa tunda.” Konyima zoyivike yivali, Riana apa ga zire kosigongi kwa kere tupu noyimaliwa yoyisesu ntani ga kere nosinka asi yisinke nga rugana. Pezuva lyokuhulilira lyosigongi, munazinyetu gomugara kwa tulire yuma melimba lyondjakete zaRiana. Ayo kwa kere yimaliwa eyi ya mu vaterere a tengure komukunda goVaantandroy nokuka tameka ngesefa zokurandesa noyogurt. Riana kwa tanta asi: “Na limonenene evatero lyaJehova posiruwo souhunga. Na gwene mpito zokutwikira kuvatera ava va dira kudiva Jehova.” Mombungakriste namo kwa kere mo yirugana yoyinzi. Riana kwa tanta hena asi: “Ame ngani gava  yiuyungwa konyara nkenye sivike. Jehova kwa dewire nge kupitira mombunga zendi.” Naina, Riana simpe kuna kutwikira kuzuvhisa mbudi zoUhompa kovantu ava uyunga Rutandroy ava vana hara kudiva Jehova.

Jehova kwa tu tumbwidira asi “nkenye ogu gomosirongo nga hundira etungiko, nga hundire, nga mu tungike Karunga.” (Jes. 65:16) Apa atu rugana unene mokufunda po maudigu yipo tu tamunune sirugana setu, Jehova kututungika. Koneka Sylviana ogu tuna tumbura ketameko lyosirongwa esi. Diworoka asi age kwa kere nowoma asi kapi nga vhura kukazuvhisira kosirongo nasopeke. Morwasinke ga lizuvhilire ngoso? Age kwa faturura asi: “Eguru lyange lyokorumoho esupi. Ame kuhunyangera ntani kuroroka usimbu.”

Nampili ngoso, mo-2014 Sylviana naSylvie Ann munazinyetu gomukadi a rugana uzuvhisi wokukarerera kwa dirukilire komukunda ogu gwa kara ure wonokilometa 85 nokuvatundilire. Nampili ngomu Sylviana ga kara nourema, eyi ga here ya sikire mo. Alyo etungiko sili lyenene ga gwene. Age kwa tanta asi: “Konyima zomvhura zimwe, Doratine, zinya gumwe ogu ngani rongo Bibeli kwa ya gwene ekuho posigongi sezuva limwe.”

Ngomu vana yi likida vanavazinyetu ava va ka zuvhisilire komavango nagopeke, apa atu kondjo mokufunda po nkenye udigu nokutamununa sirugana setu, ose kulimonena usili wononkango edi Jehova ga tumbwidilire vakareli vendi asi: “Ngani ku nkondopeka tani ku kwafa.” (Jes. 41:10) Ngoyitundwamo, elikwatakano lyetu naJehova kunkondopara. Nsene tu ligava nyamwetu mokukaruganena oku vana hepa vazuvhisi, ngayi tu vatera mokukasikisa mo yitumbukira mouzuni woupe. Ngamoomu ga yi uyungire Didier ogu tuna tambura nare asi: “Kukazuvhisira oku vana hepa vazuvhisi kuna kara edeuro lyewa kwetu mokutuwapaikira eyi ngatu ka rugana komeho.” Ngano wovanzi nawo va tameke kulihameka medeuro olyo.