1. Morwasinke mazuva aga tuna kuparuka ga likarera?

MAZUVA aga yininke yinzi yina kuhoroka. Ngomu za yi pumba Bibeli, Jehova kuna kupongaika “emukurumbunga . . . momarudi nagenye nomomakoro nagenye nomonomuhoko nadinye nomomaraka nagenye.” Ava ana kupongaika kwa “nkondopa ngwendi muhoko.” Awo kwa pitakana pomamiliyona ntantatu ntani kukarera Karunga “mutenya nomasiku.” (Ehor. 7:9, 15; Jes. 60:22) Ngesi pana kara vakareli vaJehova wovanzi ava va mu hara ntani ava va hara vakwawo.

2. Eharo musinke va kara nalyo vantu ava ava dili kukarera Karunga? (Tara efano.)

² Bibeli za pumba hena asi pomazuva aga, vantu ava ava dili kukarera Karunga ngava lihara tupu vene. Mupositoli Paurusa kwa tjenge asi: ‘Pomazuva gopouhura . . . . vantu ngava lihara tupu vene, ngava dowokera yimaliva, ngava hara mahafo goparutu kupitakanesa omu va hara Karunga.’ (2 Tim. 3:1-4) Eharo lyangoso kwa lisiga neharo lyoSikriste ntani alyo kapi ali retere vantu ruhafo oru ava ndindire. Nye alyo kuretesa po  nkareso ezi azi ninkisa mazuva aga tuna kuparuka ga kare “yiruwo yoyidigu.”

3. Yisinke natu ka konakona mosirongwa esi ntani morwasinke?

³ Paurusa ga yi dimbwilire asi nkareso zokulihara tupu nyamoge ngazi kundama nampili Vakriste. Yiyo nye ga va rondwere asi va “likare ure” novantu vangoso. (2 Tim. 3:5) Yimo, kapi tatu vhuru kuhenduka vantu navenye. Nye yisinke natu rugana yipo tu lipopere konkareso ozo ntani hena tu kondjere kuhafesa Jehova, Karunga geharo? Tu zeni tu ka konakone eharo lyoSikriste neharo eli va singonona mwa-2 Timoteusa 3:2-4. Mokurugana oyo, nayi ka tu vatera tu ka dive asi eharo musinke ali reta ruhafo rosili.

4. Morwasinke ya dilira epuko kukara nehetakano mokulihara nyamwetu?

⁴ Mupositoli Paurusa kwa tjenge asi “vantu ngava lihara tupu vene.” Ayo epuko kulihara nyamwetu ndi? Hawe, morwa Jehova yimo ga tu sita. Jesus kwa tente asi: ‘O hare mukweni moomu wa lihara nyamoge.’ (Mar. 12:31) Nsene kapi twa lihara nyamwetu, ose kapi ngatu vhura kuhara vakwetu. Bibeli kwa tanta hena asi: ‘Vagara nawo ava hare vakadi vawo moomu va hara marutu gavene. Ogu ga hara mukadendi, mwene ga lihara. Nagumwe si ogu ga nyenga rutu rwamwene, nye age kurutekura oku ta ru pakere mbili.’ (Efe. 5:28, 29) Eyi kulikida asi kapisi epuko kukara neharo lyekuhetakana kwa kwanyamwetu.

5. Ngapi omu va kara vantu ava va pitakanesa mokulihara vene?

⁵ Eharo eli va tumbura mwa-2 Timoteusa 3:2 kapisi eharo lyoSikriste. Vantu ava va lihara tupu vene, awo kupitakanesa mokuligazara nyaamwawo. (Resa Varoma 12:3.) Awo kulimona nyamwawo asi mulyo unene ntani kapi ava pakere mbili wopeke. Nsene yininke kapi yina kuvagenda po nawa meparu, awo kupa wopeke usima. Vantu wonkareso zangoso kapi va kara noruhafo rosili.

6. Yitundwamo musinke ayi kara apa atu hara Karunga?

⁶ Valirongi woBibeli kwa tanta asi Paurusa kwa tumbwire pomuhowo nkareso zokulihara tupu vene morwa yizo azi retesa po nonkareso edi ga ya kwamesere ko kutumbura. Vantu ava va hara Karunga kwa kara nonkareso zongwa. Bibeli kwa kwatakanesa eharo lyoSikriste kumwe noruhafo nombili nedidimiko nouwa nepuro nougomoki ntani elipangero. (Gar. 5:22, 23) Mutjangi gEpisarome kwa tente asi: “Gerago muhoko ogu gwa kara naKarunga HOMPA!” (Epis. 144:15) Jehova, Karunga goruhafo eyi yiyo vakareli vendi va karera nawo noruhafo. Mokulisiga novantu ava va lihara vene ntani awo kwa hara tupu kuvapa yininke, vakareli vaJehova va kara noruhafo morwa awo kugava.—Yirug. 20:35.

7. Mapuro musinke naga tu vatera tu likonakone nyamwetu?

⁷ Ngapi natu yi diva asi ose kuna kutameka kulihara tupu nyamwetu kupitakana omu twa hara Karunga? Kuvhura tu gazadare ko kepukururo eli asi: “Walye omu rugana yuma mokulitara pwaamweni ndi mokupapara efumano lyomawoko-woko. Nye omu linunupike, tomu tara vakweneni asi va mu pita mekuto. Walye omu lipakere mbili nyamweni nyonelike, nye omu pakere hena novakweneni mbili.” (Fil. 2:3, 4) Kuvhura tu lipure asi: ‘Ame kusikisa mo epukururo olyo ndi? Ame kuna kukondja mokusikisa mo mpango zaKarunga ndi? Ame kuvatera womombungakriste ntani kuza mokuzuvhisa ndi?’ Kuvatera wopeke kapisi ureru, ayo ya hepa elizambero ntani  elituromo. Nye ayo kutuhafesa unene mokudiva asi eyi tuna kurugana kuna kuhafesa Mupangeli gwanayinye.

8. Yisinke va rugana vamwe morwa va hara Karunga?

⁸ Eharo lyokuhara Karunga kwa tumangeda vamwe va hageke yirugana yawo yokufuta unene yipo va vhure kukarera Jehova momunene. Ericka gomoAmerika kurugana undokotora. Mevango lyokudemenena kosirugana sendi, age kwa tameka kurugana uzuvhisi wokukarerera. Nage namugara gwendi kwa zuvhisira moyirongo yoyinzi. Age kwa tanta asi: “Nayinye eyi twa limonena mokuvatera moyirongo nayopeke ntani novakaume ava twa tulisa po, kwa tu retera ruhafo rorunene. Ame simpe kurugana undokotora, nye pokuruganesa siruwo nononkondo dange mokuronga vantu Bibeli ntani nokupakera mbili yihepwa yomombungakriste kuretera nge ruhafo nombili zomomutjima.”

9. Morwasinke kuhara yimaliwa ayi dili kureta ruhafo?

⁹ Paurusa kwa tjenge asi vantu ngava hara ndi ngava “dowokera yimaliva.” Nomvhura dongandi da kapita, muzuvhisi gokukarerera gomoIliranda kwa zuvhisilire mugara gumwe kuhamena Karunga. Mugara ogo ta gusa yimaliwa mondjato ta yi zerura nokutanta asi: “Ogu yige karunga gwange.” Nampili ngomu vantu wovanzi ava dili kupwagesa nonkango odo, nye awo simpe yimo ava lizuvhu ngoso, awo kwa hara yimaliwa nemona. Bibeli kuturondora asi: “Nsene yimaliva wa hara, kapi ngo yi kuta; nsene kwa hara asi o kare ngawo, kapi ngo gwana nayinye eyi wa hara.” (Muud. 5:10) Vantu vangoso nkenye apa kukondja mokugwana yimaliwa yoyinzi nye yitundwamo, awo ‘kulizweka momaruhodi gomanzi.’—1 Tim. 6:9, 10.

10. Yisinke ga tjenge Agura kuhamena kukara ngawo ntani kukara noruhepo?

¹⁰ Yimo, natuvenye twa hepa yimaliwa morwa ayo kutupopera. (Muud. 7:12) Nye muntu kuvhura a kare noruhafo nsene a kara noyimaliwa yokugwanena po ndi? Nhi. (Resa Muudisi 5:12.) Agura muna gomugara gwaJake kwa tjenge asi: “Wa ha ninka nge ngawo ndi hepere. Pe nge tupu nondya edi dina gwana.” Kuvhura tu kwate egano konda zeyi ga dilire kuhara kukara hepere. Age kapi ga here kuvaka morwa ayo kuswaukisa Karunga. Nye morwasinke ga kandererere asi kapi ana hara kukara ngawo? Age kwa tjenge asi: ‘Nsene ni kara neyi yoyinzi, ame kuvhura ni uyunge asi, kapi nina hepa Karunga.’ (Yis. 30:8, 9) Nampo wa diva ko vantu ava va huguvara emona lyawo mevango lyokuhugavara Karunga.

11. Epukururo musinke ga geve Jesus kuhamena yimaliwa?

¹¹ Ava va hara unene yimaliwa kapi tava vhuru kuhafesa Karunga. Jesus kwa tente asi: “Muntu simpe a vhuru kukerera ohekuru vavali, morwa na nyenga po gumwe, ta hara po mukwawo, ndi na korera kwagumwe, ta nusa po mukwawo. None nokuvhura si kukerera Karunga nomamona.” Komeho a uyunge nonkango odo, age kwa tente asi: “Walye omu lipongaikire emona pevhu, eli ali likana koyimbumburu nokonkerewe nokovawidi wokububagura monzugo va li vake. Nye omu lipongaikire emona meguru, omu mwa pira yimbumburu nonkerewe zokulizonagura, nomu mwa pira vawidi wokububagura, va li vake.”—Mat. 6:19, 20, 24.

12. Ngapi omu kurerupika eparu ayi tu vatere tu ruganene Karunga? Gava sihonena.

¹² Vantu wovanzi va yi dimburura asi kurerupika  eparu kuvaretera ruhafo ntani kuvapa siruwo sosinzi mokukarera Jehova. Jack ogu ga tunga moAmerika kwa randesere embo lyendi lyenene nongesefa zendi morwa ga yi divire asi ngayi mu vatera a rugane uzuvhisi wokukarerera kumwe namukadendi. Age kwa tanta asi: “Ayo kwa kere udigu kusiga embo lyetu noyiweka yetu. Apa ngani rugana, nkenye apa ngani wiza kembo nina handuka morwa maudigu. Nye mukadange ogu ga kere muzuvhisi gokukarerera, kwa kere muntu goruhafo. Age nga tantere nge asi: ‘Age kuruganena muhona gomunene po.’ Ngesi ame muzuvhisi gokukarerera, natuvenye mouvali wetu kuna kuruganena Jehova.”

13. Ngapi natu konakona mutaro gwetu kuhamena yimaliwa?

¹³ Mokulikonakona nyamwetu kuhamena mutaro gwetu koyimaliwa, twa hepa kulipura asi: ‘Monkedi omu ani paruka kulikida asi nayi pura eyi za uyunga Bibeli kuhamena yimaliwa ndi? Kugwana yimaliwa yiso sininke somuhowo na tura meparu lyange ndi? Ame kutara yiweka yange asi mulyo unene kupitakana elikwatakano lyange naJehova ntani novakwetu ndi? Ame na huguvara mwaJehova asi nga vatera nge noyihepwa yange ndi?’ Ose kuvhura tu yi pure asi Jehova kapi nga sigilira ava va mu huguvara.—Mat. 6:33.

14. Ngapi omu natu tara yilihafeso?

¹⁴ Bibeli kwa pumba hena asi pomazuva gopouhura vantu ngava “hara mahafo goparutu.” Ngwendi moomu ya dira kukara epuko kulihara nyamwetu nokukara noyimaliwa, kapi ya kara hena epuko kukara nehetakano koyilihafeso. Jehova kapi ana hara tu dire kuhafera yilihafeso. Bibeli kutukorangeda asi: “Twikira nye – lya nondya doge o hafe; nwa vhinyu zoge o pembure.”—Muud. 9:7.

15. Yisinke ayi tanta ‘kuhara mahafo goparutu?’

¹⁵ Mwa-2 Timoteusa 3:4 kwa tumbura vantu ava va hara mahafo goparutu kupitakana Karunga. Koneka asi velise ozo kapi za tanta asi vantu owo va hara hena Karunga. Nye azo kwa tanta asi ‘ngava hara mahafo goparutu  kupitakanena.’ Mulirongi gumwe goBibeli kwa tjenge asi: “Velise ozo kapi za tanta asi vantu vangoso kwa hara Karunga. Azo kutanta asi kapi va hara Karunga nampili nakauke.” Eli kuna kara erondoro lyononkondo kovantu ava va hara mahafo goparutu. Ntanto ‘kuhara mahafo goparutu’ kwa tamba kovantu ava va kara ‘sinka sosinene kouzuni ou neyivayiwo lyemona.’—Ruk. 8:14.

16, 17. Sihonena musinke ga tulire po Jesus kombinga zoyilihafeso?

¹⁶ Jesus kwa likidire ehetakano koyilihafeso. Age kwa zire ‘kosipito sononkwara’ ntani ‘kosipito sosinene.’ (Joh. 2:1-10; Ruk. 5:29) Posipito sononkwara kapi pwa kere vhinyu zokugwanena po, makura Jesus yipo ga rugene sitetu nokuninka mema ga kare vhinyu. Sikando simwe apa vantu va mu swawire morwa kulya nokunwa, age kwa yi zeresere asi vantu vena kapi va kere nomutaro gehetakano.—Ruk. 7:33-36.

¹⁷ Nye, Jesus kapi ga tere mahafo goparutu ndi yilihafeso asi yiyo yomulyo po meparu lyendi. Age kwa tulire Jehova muhowo, ntani nokuvatera wopeke. Age ga lididimikilire nomfa dokukora kositji apa va mu dipagere, yipo a parure vantu. Jesus kwa tanterere owo va here kumukwama asi: “None vanerago, nsene vantu tava mu swaura oku tava mu hepeke, tava mu uyungire yoyidona nayinye moyimpempa-mpempa tupu morwarwange. Omu hafe oku tomu hamberere, yeeyi asi mfeto zeni nene unene meguru. Yimo ngorooro va hepekere sa novaporofete, ava va mu hoverere.”—Mat. 5:11, 12.

18. Mapuro musinke naga tu vatera tu dive nsene asi twa hara unene yilihafeso?

¹⁸ Ngapi omu natu diva asi twa hara unene yilihafeso? Twa hepa kulipura asi: ‘Ame kutura yilihafeso muhowo kupitakana kuza komapongo nomokuzuvhisa ndi? Ame na kara neharo lyokusiga yininke yimwe eyi na hara yipo ni karere Jehova ndi? Ame kugazara ko omu Jehova a tara yilihafeso eyi ani horowora ndi?’ Nsene twa hara sili Karunga, ngatu nyokera po kurugana yininke eyi twa diva ndi eyi atu gazara asi kapi ayi mu hafesa.—Resa Mateusa 22:37, 38.

19. Vantu musinke ava dili kugwana ruhafo rosili?

¹⁹ Nampili ngomu uzuni waSatana wa hepeka unene vantu nomvhura 6 000, awo ntaantani u hage po. Mouzuni ou kwa vhuka mo vantu ava va lihara tupu vene nokuhara yimaliwa ntani yilihafeso. Awo kugazara unene eyi nava gwana ntani awo kudemenena unene kweyi va hara meparu lyawo mudima. Vantu vangoso kapi ava gwana ruhafo rosili. Mokulisiga, Bibeli kuuyunga asi: “Gerago muntu ogu ga kara naKarunga gwaJakopo gokumukwafa, ogu ga huguvara HOMPA Karunga gwendi.”—Epis. 146:5.

20. Ngapi omu eharo lyoge lyokuhara Karunga lya kuretera ruhafo?

²⁰ Vakareli vaJehova kwa mu hara unene, ntani vantu wovanzi kuna kuwiza kombunga zendi. Eyi kulikida asi Uhompa kuna kupangera ntani ntaantani u ka rete matungiko. Apa atu rugana mpango zaJehova, ayo kutuhafesa ntani kumuhafesa. Ava va hara Jehova, ngava hafa narunye. Mosirongwa sokukwama ko ngatu ka konakona yikara eyi ayi tundu mokulihara tupu nyamwetu ntani nomu ya lisiga noyikara yoyiwa eyi va kara nayo vakareli vaJehova.