1. Maudigu musinke natu vhura kulididimikira, nye yisinke ayi hafesa Jehova? (Tara efano.)

NGOMU twa yi diva, mouzuni ou kuna zura mo maudigu. Sinzi sovanavazinyetu kuna kulididimikira mauvera gomanene. Vamwe kupakera mbili vakurona vawo. Nye vamwe simpe kuvadigopera kugava nampili yihepwa yopanyama kovanekoro vawo. Ntani twa yi diva asi sinzi sovantu kuna kuligwanekera nomaudigu nagenye ogo posikando simwe. Pwa hepa siruwo nononkondo mokuyirugana oyo. Nampili ngoso, nsene o kara nehuguvaro momatumbwidiro gaKarunga, epuro lyoge ngali pama. Ayo ngayi hafesa Jehova.

2. Ekorangedo musinke atu gwana mwaJesaya 40:29, nye epuko musinke lyenene natu vhura kutura?

² Nove kulizuvha poyiruwo yimwe asi maudigu kukunkisa o tengure monyima ndi? Nsene yimo, diva asi kapisi nyovelike o lizuvhu ngoso. Bibeli kulikida asi vakareli vaJehova vanare wovalimburukwi nawo ngava lizuvhu poyiruwo yimwe asi kapi tava vhuru kutwikira kumukarera. (1 Vah. 19:4; Joba 7:7) Nye nampili  ngoso, mevango lyokutengura monyima, awo kwa hundilire Jehova ava pe nonkondo. Awo kapi ya va guvisire, morwa Karunga gwetu “kunkondopeka varupirankondo.” (Jes. 40:29) Nye ehudi, vakareli vaKarunga vamwe naina kwa tokora asi nkedi zimwe tupu mokulididimikira maudigu ntudi va hepa kusiga usili, morwa awo kugazara asi yirugana yetu yoSikriste kwa kara mudigo. Yipo nye awo kuhageka kulironga Bibeli, nokuhageka kuza komapongo nomoyirugana yokuzuvhisa, ngomu tupu ga yi harera Satana.

3. (a) Yirugana musinke nayi vhura kuhandukisa Satana? (b) Yisinke natu ka zogera mosirongwa esi?

³ Muzonaguli ga yi diva asi nsene tu litura mo unene moyirugana yetu yoSikriste, ta yi tu nkondopeke, ntani kapi ana tu harere tu nkondopare. Nsene kuna kulizuvha eroroko parutu nopamalizuvho, wa ha hageka kukarera Jehova. Mu hedera pepi morwa age ‘ta ku nkondopeke nokukupameka.’ (1 Pet. 5:10; Jak. 4:8) Mosirongwa esi tatu ka zogera maukaro gavali aga naga tu ninkisa tu dire kulitura mo mokukarera Jehova ntani natu ka tara omu kutura nompango domoBibeli pasirugana nayi tu vatera tu lididimike. Ngesi, tu zogereni omu Jehova a tu nkondopeke ngomu va yi likida mwaJesaya 40:26-31.

4. Yisinke natu lirongera ko ketjangwa lyaJesaya 40:26?

⁴ Resa Jesaya 40:26. Kwato muntu ogu ga vhura kuvarura nombungururu nadinye. Vadiviunsitwe kwa yi pura asi momuraravili gumwe kwa kara mo nombungururu mabiliyona. Nye, Jehova ga diva edina lyankenye mbungururu. Yisinke natu lirongera ko? Nsene asi Jehova kupakera sinka yisitwa yendi eyi ayi dili kuhesera, ngapi kuhamena owo ava mu karere morwa eharo. (Epis. 19:1, 3, 14) Guhyetu geharo ga ku diva nawa-nawa nampili ‘nohuki nadinye dokonomutwe goge da pwa kuvara.’ (Mat. 10:30) Ntani mutjangi gepisarome gumwe kwa tente asi: “Jehova ga diva eyi vakareli vendi wovalimburukwi ava piti.” (Epis. 37:18, NW) Yosili, age kutara maudigu aga o piti, ntani nga ku pa nonkondo mokugalididimikira.

5. Ngapi natu yi diva asi Jehova kuvhura kutunkondopeka?

⁵ Resa Jesaya 40:28. Jehova yige ga kara nononkondo dononene po. Pasihonena, tarurura asi nonkondo dokuhura kupi edi a gava kezuva. Mudiviunswite gedina David Bodanis kwa tanta asi: “Nonkondo edi ali gava ezuva mosekonde kuvhura kudihetakanesa konoboma mabiliyona.” Ano mudiviunsitwe gumwe kwa tanta asi: “Ezuva kuvhura kugava nonkondo dononzi mosekonde, yipo va di ruganese vantu, moure wonomvhura 200 000.” Ngoso kuvhura tu kare nomasinganyeko asi ogu a gava nonkondo kezuva kapi ta vhuru kutupa nose nonkondo tu lididimikire maudigu getu ndi?

6. Ngapi omu ndjoko zaJesus za kara nderu, ntani ngapi kudiva oyo na yi tu kundama?

⁶ Resa Jesaya 40:29. Kukarera Jehova kureta ruhafo. Jesus kwa tanterere varongwa vendi asi: “Likambekeni ndjoko zange.” Ntani ga tente hena asi: “Ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mat. 11:28-30) Nonkango odo usili. Poyiruwo yimwe kuvhura tu lizuvhe eroroko pokuza komapongo ndi mokuzuvhisa. Nye ngapi atu lizuvhu apa atu ka tengura? Ose kulizuvha epwizumuko ntani kulizuvha asi tuna li wapaikire mokulididimikira maudigu aga natu pita. Yosili, ndjoko zaJesus nderu.

7. Simwitira sihorokwa esi asi likida usili wononkango domwaMateusa 11:28-30.

 ⁷ Munazinyetu gomukadi gedina Kayla kulididimikira mauvera ngwendi wokuguvaguva nomutwe gokukorakora. Age poyiruwo yimwe kumudigopera kuza komapongo. Nye ezuva limwe apa ga zire kepongo lyanavenye, age kwa tente asi: “Siuyungwa kwa hamenene kokudompa mutjima. Aso kwa si geve monkedi zeharo, eyi ya ninkisire nge ni lire. Mosiuyungwa oso, kwa diworokesere nge asi na hepa kukara momapongo.” Ayo kwa mu hafesere mokukara mepongo lina.

8, 9. Yisinke ga tembe mupositoli Paurusa apa ga tjenge asi: “Yeeyi apa na kupira nonkondo, makura tani nkondopara”?

⁸ Resa Jesaya 40:30. Nampili tu kare noudivi wounzi, yininke yimwe kapi tatu vhuru kuyisikisa mo mononkondo danyamwetu. Oso kuna kara sirongwa twa hepa kudiworoka natuvenye. Nampili ngomu Paurusa ga kere noudivi, age ga kere nomaupirankondo aga ga mu konderere mokurugana nkenye eyi ga here. Apa ga pwagesere yinka yendi, Jehova ta mu tantere asi: “Yeeyi nonkondo dange kunenepa moupirankondo woge.” Age ga yi kwete egano morwa ga ya uyungire asi: “Yeeyi apa na kupira nonkondo, makura tani nkondopara.” (2 Kol. 12:7-10) Yisinke ga tembe?

⁹ Paurusa ga yi dimbwilire asi ga hepere evatero kwaKarunga. Mpepo zokupongoka za mu pere nonkondo. Ntani hena azo za nkondopekere Paurusa a rugane sirugana esi ngano ga dilire kusikisa mo mononkondo dendi. Ayo ya lifana hena nose. Apa Jehova a tu pe mpepo zokupongoka, ose kunkondopara.

10. Ngapi omu Jehova ga vaterere Ndafita a lididimikire maudigu aga ga pitire?

¹⁰ Ndafita ga limonenene omu mpepo zokupongoka za mu vaterere. Age kwa dimbire asi: “Kumwe noge ame kuvhura kuharaganesa mbunga zovakwayita, kumwe naKarunga gwange ame kuvatuka ekuma.” (Epis. 18:29) Pwa kara maudigu gamwe aga natu vhura kulididimikira kupitira tupu mevatero lyaJehova.

11. Singonona eyi azi vhuru kurugana mpepo zokupongoka.

¹¹ Resa Jesaya 40:31. Ekuvi kapi a li tuka sinano sosire mononkondo dalyene. Mpepo yizo azi pe ekuvi nonkondo yipo li vhure kutuka. Yipo nye, nsene ngo ligwanekera nomaudigu, diworoka kuhamena ekuvi. Likwambera kwaJehova a ku pe ‘mukwafi, mpepo zokupongoka.’ (Joh. 14:26) Ose kuvhura kuzi hundira nkenye apa tuna zi hepere. Ntani kuvhura tu hundire mpepo zokupongoka unene po nsene kapi tuna kulizuvha novanavazinyetu mombungakriste. Nye morwasinke apa karere madiro kulizuvha gangoso?

12, 13. (a) Morwasinke apa horokere madiro kulizuvha pokatji koVakriste? (b) Yisinke asi tu rongo sihorokwa saJosefa kuhamena Jehova?

¹² Madiro kulizuvha kuhoroka morwa natuvenye kapi twa sikilira mo. Poyiruwo yimwe, eyi ava uyunga ndi ava rugana vanavazinyetu kuvhura yi tu handukise ntani nonkango ndi yirugana yetu nayo kuvhura yi va handukise. Eli kuvhura kukara eheteko lyenene kwetu. Ngwendi maheteko gamwe hena, Jehova kutupulisira tu likide ulimburukwi wetu, apa atu hetekere ko kuruganena kumwe novanavazinyetu nampili ngomu va dira kusikilira mo.

¹³ Sihorokwa saJosefa kulikida asi Jehova kapi a kondere vakareli vendi va va heteke. Josefa kwa mu randesere koupika vakuru vendi ava va mu fililire mfudu nokumutwara koEgipite. (Gen. 37:28) Jehova ga mwene eyi ya horokere ntani ya mu guvisire pokumona omu kaume kendi Josefa va mu tekwire. Nye  simpe kwato eyi ga rugene ko. Konyima, apa Josefa va mu rundilire asi kwa kwaterere mukadaPotifara kononkondo ntani nokumutura modorongo, Jehova simpe kwato eyi ga rugene ko. Ngoso Karunga kwa sigilire Josefa ndi? Hawe, Bibeli kutanta asi: ‘Nkenye eyi nga rugana Josefa, HOMPA nga yi wapeke.’—Gen. 39:21-23.

14. Mauwa musinke natu gwanena mo nsene tu ‘nyokera po’ ehandu?

¹⁴ Tu tareni hena sihonena simwe. Sinzi sovantu kapi va va tekura momudona ngwendi Ndafita. Nampili ngomu ga pitire moukaro owo age simpe kapi ya mu handukisire. Age ga ya tjenge asi: “Nyoka ehandu, o sige ugara! Walye o handuka! Nayimwe si ngayi kwafa.” (Epis. 37:8) Konda zomulyo zeyi natu ‘nyokera’ po ehandu, kuna kara mokuhonena Jehova, ogu a dili ‘kutufutisa moomu twa yi liruganena.’ (Epis. 103:10) Nye, pwa kara hena mauwa gamwe nsene tu ‘nyokera’ po ehandu. Ehandu kuvhura kuretesa po erondo lyohonde ntani uvera womutjima. Alyo hena kukundama ehuli norurambaramba ntani kureta udigu mezimo. Apa atu handuka kapi atu gazara nawa. Poyiruwo yimwe, nsene tu handauka, ngatu kara wokuguva-guva. Bibeli kutanta asi: “Mbili zomagazaro, kukangukisa rutu.” (Yis. 14:30) Ngapi natu nyokera po ehandu, yipo tu kare mouumwe novanavazinyetu? Ose kuvhura tu yi rugane oyo pokutura pasirugana nompango domoBibeli.

15, 16. Yisinke natu rugana mokutulisa po mbili nsene gumwe ana tu handukisa?

¹⁵ Resa Vaefeso 4:26. Ayo kapi ayi tu handukisa unene apa vantu vapeke ava tu tekura momudona. Nye, ayo kutuhandukisa unene apa munazinyetu ndi gekoro a uyunga ndi a rugana eyi nayi tu koresa komutjima. Tu tante asi ayo kutudigopera kudivara eyi ya horokere. Kuvhura tu twikire ngorooro kukara nonkoko? Ndi ngatu kwama nompango domoBibeli yipo tu kohonone po udigu owo usimbu? Nsene kapi tuna kukohonona po udigu owo usimbu ngayi tu digopera kutulisa po mbili novanavazinyetu.

¹⁶ Tu tante nye asi ove kuna kara nonkoko morwa munazinyetu gumwe kwa ku handukisa. Yisinke no rugana mokutulisa po mbili? Pomuhowo, kanderera kwaJehova. Mu pura a ku vatere yipo o vhure kukazogera nawa namunazinyetu ogo. Diworoka asi, munazinyetu ogo nage kaume kaJehova. (Epis. 25:14) Karunga ga mu hara. Jehova kutekura vakaume vendi nonkenda, ntani age kuna hara  nose tu rugane yokulifana. (Yis. 15:23; Mat. 7:12; Koros. 4:6) Sauvali, gazadara ko eyi nokauyunga. Wa ha gazara asi munazinyetu ogu ana kuhandukisa kuna yi ruganene mowina, nye purakena tupu kweyi na ku tantera. Ntani yi tambura asi nampo nove ono gwederere ko koudigu. Ove nampo kuvhura o tameke nzogera pokuuyunga asi: “Nampo kapi kani gazadarere ko nawa komeho ni uyunge, nye apa ko uyungisire nge nkera, kani lizuvhire . . . ” Nye nsene kapi yina kutompoka, papara nkedi zapeke yipo mu lipe mbili. Posiruwo oso, hundira Jehova a vatere munazinyetu ogo, yipo mu ligusire po. Pura Jehova a ku vatere o demenene koyikara yoyiwa yamunazinyetu ogo. Yikare asi yitundwamo musinke, kara nehuguvaro asi Jehova ngayi mu hafesa nsene o litura mo mokugusira po munazinyetu ogo.

17. Nkedi musinke a ruganesa Jehova mokutuvatera tu litezurure, ntani morwasinke natu dilira kuliranga kuyirugana?

¹⁷ Vamwe kulizuvha asi awo kwato mulyo kukarera Jehova, morwa awo kwa tulire nonzo dononene. Unzoni kuvhura kukara sininke soudigu unene kukohonona po. Hompa Ndafita ogu nga kondjo nomalizuvho gounzoni kwa tente asi: “Apa na dilire kutongonona nonzo dange, ame kwa rorokere kokuworoma kwange ezuva mudima. Mutenya nomasiku ove kunyikida nge.” Nye, Ndafita ya mu tompokere mokukohonona po udigu wina, morwa ga kere nelikwatakano lyenene naJehova. Age kwa tjenge asi: “Makura yipo na tunda nye ni tongonone nonzo dange koge, ove yipo nye wa dongonona po mausima gange nagenye.” (Epis. 32:3-5) Nsene ove kwa tura nzo zonene, Jehova ana hara kukuvatera o litezurure. Nye wa hepa kutambura evatero eli a gava kupitira mombungakriste. (Yis. 24:16; Jak. 5:13-15) Wa ha liranga, morwa mokukagwana mwenyo gwanarunye wa hepa kuyirugana. Nye, ngapi nsene ove simpe kulizuvha unzoni nampili ngomu va ku gusira po?

18. Ngapi sihonena saPaurusa nasi vatera ava ava lizuvhu unzoni kononzo dawo danare?

¹⁸ Poyiruwo yimwe, mupositoli Paurusa nga lizuvhu unzoni kononzo dendi danare. Age kwa tente asi: “Ame nyame gekuto lyenunu po kovapositoli navenye, ame kapi na fira kutumbura nge asi mupositoli, yeeyi ame ngani hepeke mbungakriste zaKarunga.” Nampili ngoso Paurusa ga tente hena asi: “Nye morwaufenkenda waKarunga nyame tupu ogu, moomu na kara.” (1 Kol. 15:9, 10) Jehova kwa tambwire Paurusa moomu ga kere, ntani kwa mu harerere a yi dimburure oyo. Nsene wa litezurura sili kononzo doge nokudisanseka nawa-nawa, kara nehuguvaro asi Jehova nga ku fira nkenda. Yipo nye, kara nepuro mwaJehova ntani yi pura asi ana ku gusire po sili.—Jes. 55:6, 7.

19. Etjangwa musinke lyomvhura 2018, ntani morwasinke lyakarera nomulyo?

¹⁹ Ngomu uhura una kuhedera pepi, ngatu ligwanekera nomaudigu gomanzi. Nye kara nehuguvaro asi, ogu a ‘nkondopeke varupirankondo ava va roroka’ nga ku vatera o twikire kumukarera. (Jes. 40:29; Epis. 55:22; 68:19) Momvhura 2018, ngava tu diworokesa usili wononkango odo nkenye apa ngatu wiza kepongo moSinyanga soUhompa. Usili wononkango odo kwa kara metjangwa lyetu lyomvhura asi: “Ava ava huguvara ekwafo lyaHOMPA ngava gwana nonkondo donompe.”—Jes. 40:31.