1, 2. Udigu musinke vana kuligwanekera nawo vantu vaKarunga? (Tara efano.)

VANDOKOTORA novanesa kuhakura vantu kukwatera mo ava vana kuvera mauvera gomukagu. Awo kuyirugana oyo morwa kwa hara kuvatera vantu. Nye nawo va hepa kulikunga yipo va dire kukagura mauvera ogo. Mokulifana, sinzi setu kwa tunga ntani kurugana novantu ava va kara noyikara eyi ayi dili kuhafesa Karunga. Eyi kuvhura kukara udigu kwetu.

² Nkareso zovantu wopomazuva gopouhura zina donapa unene. Mombilive zauvali ezi ga tjenge mupositoli Paurusa kwaTimoteusa kwa singonona mo nkareso zovantu ava va dira kuhara Karunga. Age kwa tente asi nkareso zawo ngazi vhuka unene. (Resa 2 Timoteusa 3:1-5, 13.) Nampili ngomu azi tu tetukisa nkareso ozo, nye nose kuvhura tu honene nkareso ozo. (Yis. 13:20) Mosirongwa esi, tatu ka konakona omu yikara yovantu wopomazuva gopouhura ya lisiga noyikara yovantu vaKarunga. Tatu ka konakona hena eyi natu rugana yipo tu dire kuhonena yikara yoyidona yovantu owo ngomu tuna kuvavatera va dive Jehova.

3. Kovantu musinke ya tamba yikara eyi va singonona mwa-2 Timoteusa 3:2-5?

 ³ Mupositoli Paurusa kwa tjenge asi “pomazuva gopouhura ngapa kara yiruwo yoyidigu.” Konyima yipo ga tumbwire yikara 19 yoyidona yovantu wopomazuva gopouhura. Yikara oyo ya lifana neyi va tumbura moVaroma 1:29-31. Nye yikara eyi ga tumbwire Paurusa mombilive zendi kwaTimoteusa kwa ruganesa mo nonkango edi atu dili kugwana moMatjangwa goRugereka goSikriste. Pokutumbagura yikara yovantu ava va dira kuhara Karunga, age kwa tamekere nononkango edi asi “vantu ngava . . . ” Nye nonkango odo kapi adi likida asi vantu navenye ngava kara noyikara oyo yoyidona. Vakriste kwa kara noyikara yoyiwa.—Resa Marakiya 3:18.

4. Ngapi omu va kara vantu ava va linenepeka?

⁴ Apa Paurusa ga mene kutumbura asi vantu ngava lihara tupu vene nokudowokera yimaliwa, age kwa tente hena asi awo ngava lifumadeka tupu vene nokulinenepeka. Vantu ava va kara noyikara oyo kulimona asi awo mulyo unene morwa uwa womosipa nemona noyirugana ntani udivi. Vantu awo kwa hara va va fumadeke unene. Mulirongi gumwe kwa tente asi vantu wokulinenepeka kulifumadeka vene ntani kulimona asi awo mulyo. Vamwe kwa uyunga asi elinenepeko kuna kara sininke sosidona, morwa nampili valinenepeki, kapi ayi va hafesa apa ava mono wopeke kuna kulinenepeka.

5. Ngapi omu vakareli vaKarunga vamwe va linenepekere?

⁵ Jehova kwa nyenga ‘elinenepeko.’ (Yis. 6:16-19) Sikara oso kuninkisa vantu va dire kuhedera pepi naKarunga. (Epis. 10:4) Elinenepeko kuna kara sikara saSatana. (1 Tim. 3:6) Ehudi, vakareli vaJehova vamwe kwa ya tameka kulinenepeka. Hompa Usiya gwaJuda kwa limburukwire Jehova nomvhura dononzi. Nye Bibeli kwa tanta asi ‘apa ga ya kere munankondo, makura ta litumbu. Ano ayo tayi mu twaredesa kokugwa. Age nga swawisa Hompa Karunga gwendi pokuza montembeli a ka swakerere manganganga getutumikidiso posizambero seyi yedumba lyewa.’ Hompa Hisikiya nage kwa ya linenepekere nye konyima ga ya linunupike hena.—2 Hist. 26:16; 32:25, 26.

6. Yisinke ngano ya ninkisire Ndafita a linenepeke, nye morwasinke ga linunupikire?

⁶ Vantu vamwe kulinenepeka morwa vawa mosipa ndi va diva kudimba nomusika ndi morwa kwa kara nositumbukira sosinene. Ndafita ga kere noyininke nayinye oyo, nye age kwa linunupikire meparu lyendi nalinye. Pasihonena, apa ga dipagere Golyata, yipo va mu pere munwahompa Sauru asi a mu kware. Nye Ndafita kwa tente asi: “Nyame yilye nepata lyetu epata musinke nye ni ka kare tamweyi zahompa ame?” (1 Sam. 18:18) Yisinke ya vaterere Ndafita a linunupike? Nkenye yikara ndi nonkondo ntani yitumbukira eyi ga kere nayo, kwa horokere morwa Karunga ga mu vaterere. (Epis. 113:5-8) Ndafita ga yi divire asi nkenye eyi ga kere nayo kwa tundire kwaJehova.—Hetakanensa 1 Vakolinte 4:7.

7. Yisinke ngayi tu vatera tu linunupike?

⁷ Ngwendi Ndafita, naina vakareli vaJehova kukondja yipo va linunupike. Ayo kutukorangeda pokudiva asi, Jehova muntu gomunene po mouzuni mudima nage ga kara nosikara selinunupiko. (Epis. 18:35, NW) Ose kutura pasirugana epukururo eli asi: “Kareni nonkenda nombili nomalinunupiko nekuruko  nezaverero.” (Koros. 3:12) Ntani twa yi diva asi eharo “kapi ali likanganga, kapi ali litumbu.” (1 Kol. 13:4) Nsene wopeke va mona asi ose kulinunupika, kuvhura ngayi va koke va ya dive nawo Jehova. Ngwendi moomu mugara ayi mu tezwilisa yikara ya mukadendi, wopeke nawo kuvhura kuyadiva Jehova morwa elinunupiko lyovakareli vendi.—1 Pet. 3:1.

8. (a) Ngapi nkareso zokudira kuzuvha yovakurona vawo ava zi tara naina? (b) Yisinke Matjangwa aga korangeda vanona va rugane?

⁸ Paurusa kwa fatwilire omu vantu wopomazuva gopouhura ngava tekura vakwawo. Age kwa tjenge asi, vanona kapi ngava zuvha yovakurona vawo. Naina, nkareso ozo kuna kuzilikida kupitira monobuke nomonomuvi ntani momalikwamo gokotivi, morwa awo kuyitara asi kwato epuko kovanona mokudira kulimburukwa vakurona vawo. Nye nkareso ozo kuninkisa mapata ndi momukunda mu dire kukara uumwe. Vantu kwa diva usili ou kutunda kwanare. Pasihonena, posiruwo soVagereka nsene mugara ana toona vakondi vendi, ngava mu tjida mo momukunda. Moveta zoVaroma, nsene gumwe ana toona oguhwe, nga kara nonzo zedipago. MoMatjangwa nagenye goRuhebeli naga goRugereka kukorangeda mo vanona asi va fumadeke vakurona vawo.—Ex. 20:12; Efe. 6:1-3.

9. Yisinke ngayi vatera vanona va limburukwe vakurona vawo?

⁹ Vanona kuvhura kunyokera po nkareso zokudira kulimburukwa vakurona vawo, nsene va gazadara ko eyi vakurona vawo va va ruganena. Vanona va hepa kukwata egano asi Karunga, guhya gwanavenye kuna va harere va limburukwe vakurona vawo. Nsene va uyunga yininke yoyiwa kuhamena vakurona vawo ngayi tumangeda vakwawo va limburukwe nawo vakurona vawo. Yimo, nsene vakurona kapi va hara vana vawo, vanona owo ngayi va digopera kuvalimburukwa. Nye nsene vanona va dimburura asi vakurona vawo kwava hara, ngayi va tumangeda kuvalimburukwa nampili yi kare udigu. Austin kwa tanta asi: “Nampili ngomu na here kurugana eyi na here, vakondi vange ngava tulire nge po nompango nokufatwilira nge konda zeyi va di tulilire po ntani ngatu zogere nawo nkenye apa. Eyi kwa vaterere nge ni va limburukwe. Naya yi dimbwilire asi awo kwa kere nosinka kwange, eyi kwa ninkisire nge ni va hafese.”

10, 11. (a) Yikara musinke yoyidona ayi likida asi vantu kapi va kara neharo kovakwawo? (b) Ngapi omu Vakriste wousili va hara vakwawo?

¹⁰ Paurusa kwa tumbwire hena yikara yimwe eyi ya likida asi vantu kapi va kara neharo kovakwawo. Konyima apa ga tente asi “kapi ngava zuvha yovakurona vawo,” age ga ya tumbwire hena asi “kapi ngava paka mpandu.” Nonkango edi usili morwa vantu wokudira mpandu kapi ava mono mulyo goyininke eyi va va ruganena vakwawo. Age ga tumbwire hena asi kapi ngava pongoka. Awo ngava kara woyimbokauka kutanta asi kapi ngava hara kutulisa po mbili novakwawo. Awo ngava kara woyitjani ntani nombudi, kuuyunga nonkango donondona kuhamena vakwawo ntani Karunga. Ntani ngava kara varundili, wokuuyunga vakwawo moyimpempa, yipo va nyatekese madina govakwawo. *

 ¹¹ Vantu vaJehova va lisiga novantu wovanzi mouzuni ou, morwa awo kulikida eharo kovakwawo. Jesus kwa tente asi sipango sauvali moVeta zaMosesa kuna kara kuhara vakwetetu. (Mat. 22:38, 39) Age kwa tente hena asi kuhara vakwetu yiso sikara ngasi dimbwilisa Vakriste wousili. (Resa Johanesa 13:34, 35.) Eharo olyo kuninkisa Vakriste va hare hena nonkore dawo.—Mat. 5:43, 44.

12. Ngapi omu Jesus ga likida eharo kovantu?

¹² Jesus kwa likidire eharo lyenene kovantu. Age nga gendi tunda sitata zende sitata mokutantera ko vantu mbudi zongwa kuhamena Uhompa waKarunga. Nga verura vatwiku noyirema noyipuru-puru ntani nga pindura vafe. (Ruk. 7:22) Jesus kwa fililire vantu nampili ngomu va mu nyengere wovanzi. Eharo lyaJesus kwa likidire eharo eli ava likida oGuhwe. Nombangi daJehova kulikida eharo kovakwawo mouzuni mudima.

13. Ngapi omu eharo atu likida wopeke nali va vatera va hare kudiva Jehova?

¹³ Eharo eli atu likida, kuvhura kukoka wopeke va hare kudiva Guhyetu gemeguru. Pasihonena, mugara gomoTairanda kwa mu gumine komutjima apa ga mwene omu vanavazinyetu va li likidire eharo posigongi. Apa ga tengwire kembo yipo ga pulire nsene kuvhura a lironge Bibeli ruvali mosivike. Age nga zuvhisire vekoro lyendi nalinye makura konyima zomakwedi ntazimwe yipo ga geve siuyungwa sendi sokuhova sereso lyoBibeli kepongo. Mokulikonakona nsene asi ose kulikida eharo vakwetu twa hepa kulipura asi: ‘Ame kuvatera womombungakriste, vemepata lyetu ntani nava atu zuvhisire ndi? Ame kutara vakwetu ngwendi moomu ava tara Jehova ndi?’

14, 15. Yikara musinke yoyidona ava likida vantu, nye ngapi omu vamwe va tura po marunduruko?

¹⁴ Pomazuva aga gopouhura vantu kuna kulikida yikara yimwe yoyidona, yiyo nye twa hepera kulipora ko kwawo. Pasihonena, awo kwa nyenga yoyiwa nokuyirwanesa.  Vantu vangoso awo vankenye omu nava woyikotjongana. Vamwe valingi-lingi, awo kurugana yininke va hana kugazadara ko ntani kwato sinka kuhamena omu ayi kundama wopeke.

¹⁵ Wovanzi ava va kere noyikara ngwendi yikasama, ngesi va yi siga. Marunduroko ogo kwa ga pumbire moBibeli. (Resa Jesaya 11:6, 7.) Monovelise edi kwa tumbura mo asi yikasama ngwendi vanyime nomambungu ngayi kara mombili kumwe nononzwi noyitana. Koneka asi mbili ezi ngazi kara po morwa “sirongo ngasi zura ediwo lyaHOMPA.” (Jes. 11:9) Mokumona asi yikorama kapi ayi lirongo kuhamena Jehova, uporofete ou kwa tamba unene po kovantu.

16. Ngapi omu Bibeli za vatera vantu va rundurure yikara yawo?

¹⁶ Vamwe ava va kere nyanya ngwendi mambungu, ngesi kuna kara mombili novakwawo. Ose kuvhura kuresa yihorokwa yawo mosirongwa “Bibeli kurundurura eparu lyovantu,” esi asi kara ko-jw.org. Vantu ava va ya tameka kulironga Bibeli nokukarera Jehova kapi va fana ngwendi ava ava moneka ngwendi vakereliKarunga nye nonkondo damo ku di nyoka. Vantu vangoso kulininkisa asi awo kukarera Karunga, nye awo kuyilikida asi kapi ava mu karere. Nampili ngoso, vantu ava va kere nare nyanya va ‘gusa muntu gomupe, ogu va unga a kare sihwi saKarunga, ogu a lihorora moukaro ou wa hungama, awo wa pongoka.’ (Efe. 4:23, 24) Apa vantu ava lirongo kuhamena Karunga, awo kuyadimburura asi va hepa kukwama nompangera dendi. Eyi kuvatumangeda va ture po marunduruko monkareso zawo neyi va pura. Ayo udigu kutura po marunduruko gangoso, nye mpepo zaKarunga ngazi vatera owo vana hara kurugana mpango zendi.

17. Ngapi omu natu nyokera po nkareso zava ava dili kukarera Karunga?

¹⁷ Naina, elisigo lyava ava karere Karunga nava ava dili kumukarera kuna kulimonenena. Twa hepa kutakamesa asi twa ha honena nkareso zava ava dili kukarera Karunga. Tuna hara kukwama evyukiso lyaJehova mokulikara ure novantu ava va tumbura mwa-2 Timoteusa 3:2-5. Yimo, kapi tatu vhuru kuligusa ko nawa-nawa kovantu ava ava likida yikara yoyidona. Morwa nampo nawo atu rugana ndi atu dimbi sure ndi nawo twa tunga. Nye kuvhura tu nyokere po kuhonena yikara yawo. Mokututompoka oyo twa hepa kunkondopeka elikwatakano lyetu naJehova ntani nokutulisa po ukaume nava ava mu karere.

18. Ngapi eyi atu uyunga na yi vatera wopeke va hare kulironga kuhamena Jehova?

¹⁸ Twa hepa kukondja tu vatere wopeke va lironge Bibeli. Papara nompito mokugava umbangi, ntani pura Jehova a ku vatere o uyunge youhunga posiruwo souhunga. Twa hepa kulidivisa kwava wopeke asi ose Nombangi daJehova. Monkedi zangoso, nkareso zetu zongwa ngazi reta efumano kwaKarunga nye kapisi kwanyamwetu. Jehova kwa tu ronga “tu zumbe udinikarunga nomadowo gopauzuni ou, ose hena tu pangere marutu getu, tu hungame, ose tu kerere Karunga mouzuni ou.” (Tit. 2:11-14) Nsene tu likida nkareso zongwa, wopeke ngava tu nomena, ntani kuvhura ngava tokore asi: “Ose kuna hara tu kare mositambo soge, yeeyi ose kwa zuvha asi Karunga, neni ga kara.”—Sak. 8:23.